isihcikēwiniwāwa 4

1mēkwāc māka ē kitotācik ayisiyiniwa, ayamihēwiyiniwa mina kā simākanisiwikimākatahk kihci ayamihēwikamik mina sātosiwa ki otihtikwak, 2mistahi ē mikoskātēyitamiikoyit ē kiskinohamawācik ayisiyiniwa, mina ē tēpwātakik cisasa ohci apisisinowin nipowinihk ohci. 3ki otitinikwak māka, mina ki pakitinikwak kipahotowinihk isko kita wāpaniyik, cikēmā sāsay ē otākosiniyik. 4māka mihcēt aniki kā pēhtahkik itwēwin ki tāpwētamwak; ēkosi nāntaw niyānanwāw kihci mitātahtomitanaw ki ati itasiwak aniki ayisiyiniwak.

5ki ayikiniyiw māka wiyāpaniyik, oyasowēmiwāwa mina kā nikānēyitākosiyit mina masinahikēwiyiniwak ki māwaciitowak cērosalamihk; 6ānas mina māwaci kihci ayamihēwiyiniw ēkota ki ayāw, mina kāyapās, mina cān, mina āliksāntar, mina tahto kā o wākomākanit kihci ayamihēwiyiniw. 7ispi māka tāwayihk kā pakitinācik, ki kakwēcimēwak, kēko kaskihēwisiwin ohci, ahpo awēna o wiyowinihk, oma kā ki itotamēk? 8ēkwa pitar, ē moskinēskākot kā kanātisiyit ahcāhkwa, ki itēw, kiyawāw ayisiyiniwak oyasowēwiyinimiwāwa, mina kā nikānēyitākosiyēk, 9kispin ni wi kakwēcimikawinān anohc kā kisikāk miyo kēkway ē ki itotāht ēkā ē ki waskawitāt nāpēw, tānisi kā isi minwāciiht awa nāpēw; 10kiskēyitamok kahkiyaw kā itasiyēk, mina kahkiyaw isrēil ayisiyiniwak o wiyowinihk cisas Christ nāsaritihk kā ohcit, kā ki cistahāskwātāyēk, kisēmanito kā ki waniskānāt nipowinihk ohci, ēwako ohci awa nāpēw ota kā otiskawikāpawistākoyēk mitoni ē miyo ayāt. 11#nikamona 118:22ēwako ana asini kā ki ātawēyimāyēk kiyawāw owāskāikanikēwak, kā ki kistayiht kikētakahk. 12namawiya kotak awiyak pimācihiwēwin ayāw: cikēmā namawiya kotak wiyowin ihtakwan sipā kisikohk, kā mēkināniwahk ayisiyinināhk, ita kita ki ohci pimācihoyahk.

13ispi māka wiyāpahtamwācik o sokēyimowiniyiw pitara mina cāna, ēkosi ē ki kiskēyitahkik ēkotowi ayisiyiniwak ēkā kā ki kiskinohamācik mina ēkā kā okiskēyitamowinicik, ki māmaskātamwak, ēkosi ki mani kiskēyimēwak ē ki wicēwāyit cisasa. 14mina ē wāpamācik anihi nāpēwa kā ki minwāciimiht ē wicikāpawistākoyit, nama nānataw ki isi ānwēyitamwak. 15māka ispi kā itasowātācik ohpimē kita itohtēyit oyasowēwinihk ohci, wiyawā ki oyasowēwak, 16ē itwēcik, tānisi kē totawāyakok oki ayisiyiniwak? cikēmā tāpwē ē ātotākwaniyik mamātāwi isihcikēwin ē ki itocikātēk wiyawāw ohci, kahkiyaw wāpahtamwak cērosalamihk kā ayācik; namawiya māka kita ki ānwētamahk. 17māka ēkā awasimē kita sipwēpayik ayisiyinināhk, kiyām asomātānik, ēkā wikāc mina kita tasitamawācik awiya ayisiyiniwa oma wiyowin. 18ēkwa māka ki natomēwak, mina ki ayākwāmimēwak ēkā kita tasitamiyit ahpo kita kiskinohamākēyit o wiyowiniyiw cisasa. 19māka pitar mina cān ki naskwēwasimēwak omisi ē ki itācik, kispin mēywāsinokwē ē isi wāpahtahk kisēmanito nawac kiyawāw kita natotākawiyēk ispihc kisēmanito, kiyawāw oyasowātamok: 20cikēmā piko kita wihtamāhk anihi kā ki wāpahtamāhk mina kā ki pētamāhk. 21wiyawāw māka, ispi awasimē kā asomācik, ki pakitinēwak ēkā kēkway ē miskahkik kita isi oyasowātācik, cikēmā ayisiyiniwa ohci; wiya kakiyaw ayisiyiniwak ē kistakimācik kisēmanitowa anima ohci kā ki itocikātēyik. 22wiya ana nāpēw awasimē nēmitanaw ē itahtopiponwēt, oma kā ki isi mamātāwi minwāciiht.

23ispi māka kā pakitinihcik, ki pē natawāpamēwak wiyawāw o wicēwākaniwāwa, mina ki ācimowak kahkiyaw anima kihci ayamihēwiyiniwa mina kā nikānēyitākosiyit kā ki itikocik. 24#ēksatas 20:11; nihimāya 9:6; nikamona 146:6wiyawā māka, ispi piyēhtahkik, ki māmawi opinamawēwak kisēmanitowa ot itwēwiniwāw, omisi ē itwēcik, ā tēpēyihcikēyan, kiya kā ki osihtāyan kihci kisik mina aski mina kihcikami, mina kahkiyaw ēkota kā ayācik: 25#nikamona 2:1,2kā ki itwēyan kā kanātisit ahcāhk ohci, otoniyihk ohci notāwināna tēpit kit atoskēyākan,

tānēki cēntāilak kā ki kisiwāsicik, mina ayisiyiniwak pakwanata kēkway kā ki itēyitahkik?

26kihci okimāwak ota askihk ki wawēyikāpawiwak, mina oyasowēwak ki māwaciitowak, ē nakāskawācik kā tipēyihcikēyit mina o Christimiyiwa:

27 # lok 23:7-11; mātyo 27:1,2; mārk 15:1; lok 23:1; cān 18:28,29 cikēmā tāpwē oma otēnāhk, tāpiskoc ērat mina pantiyas pailat, asici cēntāilak mina isrēil ayisiyiniwak, ki māwaciisostawēwak kā kanātisiyit kit atoskēyākana cisasa, kā ki oyakimimat, 28kita itotahkik mina piko kēkway kicihci mina koyasowēwin ohci niyāk kā ki oyastēk kita ispayik. 29ēkwa māka, tēpēyihcikēyan, kanawāpahtam ot asomiwēwiniwāwa: ēkosi pakitēyitamawik kit atoskēyākanak kita ki wihtahkik kit ayamiwin misiwē sokēyimowinihk, 30ē ispici sowiniskēyiyan kita iyinikaiwēyan; mina kiskinawāci isihcikēwina mina mamātāwi isihcikēwina kita ki itocikātēki o wiyowinihk ki kanāci atoskēyākan cisas.

31ispi māka kā ayamihācik, ita anima kā māwaciitocik ki waskawipayiw; ēkosi kahkiyaw ki moskinēskākwak kā kanātisiyit ahcāhkwa, mina ki wihtamwak kisēmanito ot ayamiwin sokēyimowinihk. 32#isihcikēwiniwāwa 2:44,45ē māmawēyaticik māka aniki kā tāpwētahkik ki pēyakwan mitēh mina ki pēyako ahcāhk: ēkosi namawāc pēyak itwēw nāntaw kēkway kā ayāt wiya ē tipiyawēwisit; māka kahkiyaw kēkwāy māmawi ki āpacitāwak. 33kihci maskawisiwinihk māka apāstilak ki ātotamwak ot āpisisinowiniyiw kā tipēyihcikēyit cisasa: mina kihci nisokamākowin kahkiyaw ki otihtikwak. 34wiya namawiya mina awiyak nāntaw kēkway kwitamāw: cikēmā tahto ē ayācik askiya ahpo wāskāhikana ki atāwākēwak, ē isi ohtisicik anai kā atāwākēcik, 35ē astācik apāstila ositiyihk: ēkota ohci cacēp ē miyihcik piko awiyak ē isi kwitamāt.

36cosip māka, pārnapas kā isi aspiyikātikok apāstila (ēwakwānima ē itwēstamawātamihk, kā okosisimikot sikikēmowin,) lipait towa, sāiparas ē otaskānēsit, 37kistikān ē ayāt, ki atāwākēw, mina ki pēsiwēw soniyāwa, ēkosi ki pakitinēw apāstila ositiyihk.

Currently Selected:

isihcikēwiniwāwa 4: KKMR

Highlight

Copy