isihcikēwiniwāwa 2

1 # lipitikas 23:15-21; tiyotaranami 16:9-11 ispi māka anima pēntikast kisikāw wēticipayik, kahkiyaw pēyakwanohk ki māmawi ayāwak. 2sisikoc māka kisikohk ki ohci pēhtākwan tāpiskoc ē mistahi pimwēwēstihk, ēkosi misiwē ki tēpitākwan wāskāhikanihk ita ē apicik. 3ēkosi ki nokohisostākwak mitēyaniya ē papēskici ayaki, tāpiskoc iskotēw; ēkosi kahkiyaw ki otihtikwak. 4kahkiyaw māka ki moskinēskākwak kā kanātisiyit ahcāhkwa, mina ki māci pikiskwēwak kotaka pikiskwēwina, ahcāhkwa ē isi miyikocik itwēwin.

5ēkota māka ki ayāwa cērosalamihk, cowak, ayamihāwātisiwi ayisiyiniwak, kahkiyaw ē itaskānēsicik ayisiyiniwak sipā kisikohk ohci. 6ispi māka oma ē pēcikātēk, ē osamēyaticik ayisiyiniwak ki pē māmawi itohtēwak, ēkosi ki wawānēyitamwak, cikēmā kahkiyaw awiyak pētawēw ē pikiskwēyit wiya ot isi pikiskwēwinihk. 7ēkosi kahkiyaw ki māmaskātamwak mina tānisi wiya oma ki itēyitamwak, ē itwēcik, cist, nama ci kahkiyaw oki kā pikiskwēcik kālaliwiyiniwak? 8tānisi māka ēsi pētawāyakok, kahkiyaw ayisiyiniw kit isi pikiskwēwinināhk, ita kā ki nihtāwikiyahk? 9pāltiyanak mina mitak mina ēlamaitak, mina kā ot askicik mēsopotēmiya, cotiya mina kāpatāsiya, pāntas mina ēsiya. 10pariciya mina pampiliya, icipt mina paki lipiya ciki sāirini kā ayāk, okapēsiwak rom ohci, cowak ātiht mina kwēskinākanak. 11karitak mina arēpiyānak, mitoni ki pētawānawak kiyānaw kit isi pikiskwēwinināhk, ē tasitakik kisēmanito o kihci isihcikēwina. 12kahkiyaw māka ki māmaskātamwak, mina ē ki wawānēyitahkik, omisi ē ayititocik, kēkway wiya oma kā ayikihk? 13kotakak māka wiyā ē pāpinotakik ki itwēwak, oski somināpo sākaskinēskākwak.

14māka pitar, ē nipawit asici aniki mitātat pēyakosāp, soki ki pikiskwēw, mina ki kitotēw ēwakwani, ē itwēt, kiyawāw cotiya ayisiyinitik, mina kahkiyaw kiyawāw kā ot itāwiniyēk cērosalamihk, kiskēyitamok oma mina natohtamok nit itwēwina. 15cikēmā namawiya oki kiskwēpēwak kā itēyitamēk; wiya picēyak nisto tipaikan anohc kā kisikāk; 16māka ēwako oma kā ki itwēk okiskiwēhikēw coil;

17 # coil 2:28-32 kita ayikin māka iskwāyāc ati kakisikāki itwēw kisēmanito, ni ka sikinamawāwak nit ahcāhkwa kahkiyaw kā o wiyāsit: ēkosi kikosisiwāwak mina kitānisiwāwak kita kiskiwēhikēwak, mina koskinikimiwāwak kita wāpahtamwak isinamowina, mina ki kisēyinimiwawak kita pawamiwak pawāmiwina:

18ēhē mina nit atoskēyākanak mina nit atoskēyākaniskwēmak ēwako kakisikāki ni ka sikinamawawak nit ahcāhkwa ēkosi kita kiskiwēhikēwak.

19ēkosi ni ka wāpahtaiwān kā māmaskātēyitākwaki kisikohk ispimihk, mina kiskinawāci isihcikēwina askihk nicāyihk. mihko, mina iskotēw. mina ē pikisēyāpatēk:

20kisikāwi pisim kita wanitipiskiāw, mina tipiskāwi pisim kita mihkosit, mwayēs o kisikām kā tipēyihcikēt otihcipayiyik, anima kihci mina iyātotākwahk kisikāw:

21kita ayikin māka, piko awiyak kē mawimostamokwē o wiyowiniyiw kā tipēyihcikēyit kita pimācihāw.

22kiyawāw isrēil ayisiyinitik, natohtamok ohi ayamiwina: cisas nāsaritihk kā ohcit, ayisiyiniw kā ki miyo wāpatiikoyēk kisēmanito ē kihci isihcikēt mina mamātāwi wāpahtahiwēt ēwakwani ohci mēkwāc ita ē ayāyēk, kiyawāw ahpo ēwako ē kiskēyitamēk: 23#mātyo 27:35; mārk 15:24; lok 23:33; cān 19:18ēwakwāna, oyascikēwinihk mina o nikāni kiskēyitamowinihk kisēmanito, kiyawāw ocihciwāhk ohci ēkā oyasowēwin kā pimitisahahkik ayisiyiniwak, ki ki cistahāskwātāwāw mina ki ki nipahāwāw 24#mātyo 28:5,6; mārk 16:6; lok 24:5ēwakwani kisēmanito ki waniskānēw, ē ki āpikonahk kā ākwahk nipowin: cikēmā namawiya kita ki ihkin kita ki miciminikot. 25#nikamona 16:8-11wiya tēpit itwēw ēwakwani ē itāt,

ni kanawāpamāw kākikē kā tipēyihcikēt ē otiskawiskawit; cikēmā ni kihciniskihk ayāw ēkā kita waskawinikawiyān:

26ēwako ohci nitēh ki mamahtākosimakan, mina ni tēyani ki miyawātamomakan; ēkosi mina ni wiyās kita aywēpimakan aspēyimowinihk:

27cikēmā namawiya ki ka nakatāw nit acāhk hētisihk, namawiya mina ki ka pakitināw ki kanātisim kita wāpahtahk pikiskatatiwin.

28ki ki kiskēyitamoin pimātisiwini isitwāwina; ki ka tēpi mamahtākoin ki miyo kitāpakēwin ohci.

29niciwāmitik, namawiya kita manā wihtamātakok ana kayās otāwimāw tēpit, ē ki nipit mina ē ki nainiht, ēkosi o nainikowikamik ē ayāwāyahk piyis anohc kā kisikāk. 30#nikamona 132:11; 2 sāmyoil 7:12,13wiya māka ē kiskiwēhikēwiyiniwit, mina ē kiskēyitahk kisēmanitowa ē ki kihci itikot, wiyawihk ē ohciyit kita apiyit o kihci okimāwapiwinihk; 31wiya niyāk ē wāpahtahk ēwakwēyiw ki tasitamwēw ot āpisisinowiniyiw anihi Christ, ēitwēt, namawiya ohci nakatāw hētisihk, namawiya mina o wiyās ohci wāpahtamomakaniyiw pikiskatatiwin. 32awa cisas kisēmanitowa ki waniskānik, ēwako kahkiyaw niyanān kā ātotamāhk. 33ēkosi māka o kihciniskiyihk kisēmanitowa ē ki ispakēnikot, mina ē ki miyikot wēyotāwihk anima asotamākowin kā kanātisit acāhk, ki sikinamākēw oma kā wāpahtamēk mina kā pēhtamēk. 34#nikamona 110:1cikēmā tēpit namawiya kihci kisikohk ki isi opiskāw: māka wiya itwēw,

kā tipēyihcikēt itēw notipēyicikēma, api ni kihciniskihk,

35piyis kita isiakik ki notinākanak kita ot aspisitēsimoniyan.

36kiyām māka kahkiyaw isrēil wikihk kēcinā kita kiskēyitamwak, kisēmanito ē ki isiāt ēwakwani māmawi kā tipēyihcikēt mina Christ, awa cisas kā ki cistahāskwātāyēk.

37ispi māka oma piyēhtahkik, ki cistaokwak otēiwāhk, ēkosi ki itēwak pitara mina kotaka apastila, wēciwāmiyāhk, tānisi oma kē totamāhk? 38pitar māka ki itēw, kwēskipimātisik mina pāptaisiwik kahkiyaw ē itasiyēk o wiyowinihk cisas Christ kita ponēyitamākawiyēk ki maciitiwiniwāwa; ēkosi ki ka miyikawināwāw anima mēkiwin kā kanātisit ahcāhk. 39cikēmā kiyawāw kit asotamākawināwāw, mina kit awāsimisiwāwak, mina kahkiyaw wāyaw kā ayācik, tahto oti kā tipēyihcikēt ki kisēmanitominaw kē natomāt. 40mihcēt māka kotaka ayamiwina ohci ki wahwitamawēw, mina ki sasikimēw, ē itwēt, pimācihisok ota ohci ēkā kā nisitawākātisicik ayisiyiniwak.

41ēkwa māka anihi kā otinamiyit ot ayamiwin ki pāptaisiwiāwak: ēkosi ki takoāwak ēwakwānima ē kisikāk nāntaw nistwāw kihci mitātatomitanāw ahcāhkwak. 42tahkinē māka ki tāpitawi ayāwak apāstila o kiskinohamākēwiniyihk mina o wicētowiniyihk, ē papakwēniht pakwēsikan mina ayamihāwinihk. 43sēkisiwin māka ki pakamiskāk kahkiyaw ahcāhk: mihcēt māka mamātaw mina kiskinawāci wāpahtahiwēwina ki itotamwak apāstilak. 44#isihcikēwiniwāwa 4:32-35kahkiyaw māka aniki kā tāpwētahkik ki māmawi ayāwak, mina kahkiyaw kēkway tāpiskoc ki āpacitāwak; 45ēkosi ki atāwākēwak o tipiyawēwisiwiniwāwa mina ot ayāwiniwāwa, kahkiyaw ē mātinamawācik, piko ē isi kwitamāt piko ana ayisiyiniw. 46ēkosi tahto kisikāw, tahkinē ki tāpitawi māmawi ayāwak kihci ayamihēwikamikohk, mina ē nayawinācik pakwēsikana wikiwāhk, ki otinamwak o miciwiniwāw mamahtākosiwinihk mina nayēstawi mitēhihk, 47ē mamicimācik kisēmanitowa, mina ē miywēyimikocik kahkiyaw ayisiyiniwa. ēkosi kā tipēyihcikēt ki takotowēw tahto kisikāw anihi kā ati pimāciihcik.

Currently Selected:

isihcikēwiniwāwa 2: KKMR

Highlight

Copy