ᓭᐣᐟ ᓬᐅᐠ 23

1ᐁᑯᓯ ᑲᐦᑭᔭᐤ ᑳ ᒫᒪᐁᐧᔭᑎᒋᐠ ᑭ ᐸᓯᑯᐊᐧᐠ, ᐁ ᑭ ᐃᑐᐦᑕᐋᒋᐠ ᑭᑕ ᐅᑎᐢᑲᐃᐧᐢᑲᐊᐧᔨᐟ ᐸᐃᓬᐊᑕ. 2ᑭ ᒫᒋ ᒪᒥᓯᒣᐊᐧᐠ ᒫᑲ, ᐁ ᐃᑌᐧᒋᐠ, ᓂ ᑭ ᒥᐢᑲᐋᐧᓈᐣ ᐊᐊᐧ ᐊᔨᓯᔨᓂᐤ ᐁ ᒫᔨᓰᑭᐢᑲᐋᐧᐟ ᐊᔨᓯᔨᓂᐊᐧ, ᒥᓇ ᐁ ᑭᑕᐊᒫᑫᐟ ᑎᐸᐦᐊᒫᑫᐃᐧ ᓱᓂᔮᐊᐧ ᑭᑕ ᒥᔨᒥᐦᐟ ᓯᓴᕒᐊ, ᐁ ᐃᑌᐧᐟ ᐃᐧᔭ ᐁ ᙭ᐃᐃᐧᐟ, ᐁ ᑭᐦᒋ ᐅᑭᒫᐃᐧᐟ. 3ᐸᐃᓬᐊᐟ ᒫᑲ ᑭ ᑲᑫᐧᒋᒣᐤ ᐁ ᐃᑌᐧᐟ, ᑭᔭ ᒋ ᐅ ᑭᐦᒋ ᐅᑭᒫᒥᐋᐧᐊᐧ ᒍᐊᐧᐠ? ᐁᑯᓯ ᑭ ᓇᐢᑫᐧᐊᐧᓯᒥᐠ ᐁ ᑭ ᐃᑎᑯᐟ, ᑭᐟ ᐃᑖᐧᐣ. 4ᐁᑯᓯ ᐸᐃᓬᐊᐟ ᑭ ᐃᑌᐤ ᑭᐦᒋ ᐊᔭᒥᐦᐁᐃᐧᔨᓂᐊᐧ ᒥᓇ ᐊᔨᓯᔨᓂᐊᐧ, ᓇᒪᐃᐧᔭ ᑫᑲᐧᐩ ᓂ ᒥᐢᑫᐣ ᐊᐊᐧ ᐊᔨᓯᔨᓂᐤ ᑭᑕ ᐅᐦᒋ ᓇᔦᑕᐁᐧᔨᒥᐦᐟ. 5ᒫᑲ ᐊᐊᐧᓯᒣ ᑭ ᑭᐦᑭᒥᐠ ᐁ ᐃᑌᐧᔨᐟ, ᐅᐯᐧᐁᐤ ᐊᔨᓯᔨᓂᐊᐧ, ᐁ ᑭᐢᑭᓄᐦᐊᒫᑫᐟ ᒥᓯᐁᐧ ᐃᑌ ᒍᑎᔭᐃᕽ, ᑳᓬᐊᓬᐃᕽ ᐅᐦᒋ ᐱᔨᐢ ᐅᑕ ᐃᐢᑯ. 6ᐃᐢᐱ ᒫᑲ ᐅᒪ ᐸᐃᓬᐊᐟ ᐱᔦᐦᑕᕽ, ᑭ ᑲᑫᐧᒋᑫᒧ ᑭᐢᐱᐣ ᐅᐦᐃ ᓈᐯᐊᐧ ᑳᓬᐊᓬᐃᕽ ᐁᐧᒋᔨᑫᐧ. 7ᐁᑯᓯ ᓭᒫᐠ ᐃᐢᐱ ᑫᐢᑫᔨᑕᕽ ᐁᕒᐊᐟ ᐅ ᑎᐯᔨᐦᒋᑫᐃᐧᓂᔨᕽ ᐁ ᐅᐦᒋᔨᐟ, ᑭ ᐃᓯᑎᓴᐦᐊᒪᐁᐧᐤ ᐁᕒᐊᑕ, ᒣᑳᐧᐨ ᐊᔨᐢ ᒉᕒᐅᓴᓬᐊᒥᕽ ᐊᔮᔨᐊᐧ ᐁᐊᐧᑲᐧᓂ ᐁ ᑲᑭᓯᑳᑭ.

8ᐃᐢᐱ ᒫᑲ ᐁᕒᐊᐟ ᐃᐧᔮᐸᒫᐟ ᒋᓴᓴ, ᓈᐢᐱᐨ ᑭ ᒥᔦᐧᔨᑕᒼ: ᒋᑫᒫ ᑲᔮᐢ ᐅᐦᒋ ᑭ ᓄᑌ ᐋᐧᐸᒣᐤ, ᐃᐧᔭ ᐁ ᑭ ᐯᐦᑕᕽ ᐁ ᐋᒋᒥᒥᐦᐟ; ᐁᑯᓯ ᑭ ᐸᑯᓭᔨᒧ ᑭᑕ ᐋᐧᐸᐦᑕᕽ ᓈᐣᑕᐤ ᒪᒫᑖᐃᐧ ᐃᓯᐦᒋᑫᐃᐧᐣ ᑭᑕ ᑐᑕᒥᔨᐟ. 9ᒥᒉᑕᐧᔭᐠ ᒫᑲ ᑭ ᐃᓯ ᑲᑫᐧᒋᒣᐤ; ᒫᑲ ᓇᒪ ᓈᐣᑕᐤ ᑭ ᐃᓯ ᓇᐢᑫᐧᐊᐧᓯᒥᐠ. 10ᐁᑯᓯ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ, ᒥᓇ ᒪᓯᓇᐦᐃᑫᐃᐧᔨᓂᐊᐧᐠ ᑭ ᓂᐸᐃᐧᐊᐧᐠ ᐁ ᐊᑲᒣᔨᒧᒋᐠ ᐁ ᒪᒥᓯᒫᒋᐠ. 11ᐁᕒᐊᐟ ᒫᑲ ᐊᓯᒋ ᐅ ᓯᒫᑲᓂᓯᒪ ᑭ ᐱᐃᐧᑐᑕᐁᐧᐊᐧᐠ, ᒥᓇ ᑭ ᒣᑕᐋᐧᑳᑌᐊᐧᐠ, ᐁ ᑭ ᐳᐢᑕᓵᑲᐋᒋᐠ ᑭᑭᐢᑭᑲᐣ ᐁ ᑭᑳᓯᓇᐢᑌᔨᐠ, ᑳᐃᐧ ᒫᑲ ᒥᓇ ᐁ ᑭ ᐃᓯᑎᓴᐦᐊᒪᐋᐧᒋᐠ ᐸᐃᓬᐊᑕ.

12ᐁᕒᐊᐟ ᒫᑲ ᒥᓇ ᐸᐃᓬᐊᐟ ᑭ ᒥᔪ ᐅᑐᑌᒥᑐᐊᐧᐠ ᐁᐊᐧᑳᐧᓂ ᐁ ᑭᓯᑳᐠ: ᒋᑫᒫ ᑲᔭᑌ ᐁ ᑭ ᑭᓯᐢᑖᑐᒋᐠ.

13ᐸᐃᓬᐊᐟ ᒫᑲ ᑭ ᒫᒪᐃᐧ ᓇᑐᒣᐤ ᑭᐦᒋ ᐊᔭᒥᐦᐁᐃᐧᔨᓂᐊᐧ, ᐅᑭᒪᐊᐧ ᒥᓇ ᐊᔨᓯᔨᓂᐊᐧ, 14ᐁᑯᓯ ᑭ ᐃᑌᐤ, ᑭ ᑭ ᐯᑕᒪᐃᐧᓈᐋᐧᐤ ᐊᐊᐧ ᓈᐯᐤ ᑖᐱᐢᑯᐨ ᐊᐃᐧᔭᐠ ᑳ ᐊᐧᔦᓯᐋᐟ ᐊᔨᓯᔨᓂᐊᐧ; ᐁᑯᓯ ᒫᑎᑲ, ᓂᔭ, ᐋᑕ ᐁ ᑭ ᑲᑫᐧᒋᒪᐠ ᒥᓯᐁᐧ ᐃᓯ ᐁ ᐋᐧᐸᒫᔦᐠ, ᓇᒪᐃᐧᔭ ᑫᑲᐧᐩ ᓂ ᑭ ᒥᐢᑫᐣ ᐁ ᓇᔦᑕᐊᐧᓂᔨᐠ, ᐊᓂᐦᐃ ᑳ ᐃᓯ ᐊᑖᒥᒫᔦᐠ; 15ᓇᒪ, ᓇᒪᐋᐧᐨ ᐃᐧᐢᑕ ᐁᕒᐊᐟ; ᒋᑫᒫ ᑭ ᑭ ᐯ ᑭᐁᐧᑎᓴᐊᒪᑯᓇᐤ; ᐁᑯᓯ ᒫᑎᑲ, ᓇᒪᐃᐧᔭ ᑫᑲᐧᐩ ᐅᐦᒋ ᑐᑕᒼ ᐁ ᐃᐢᐱᑌᔨᑖᑲᐧᓂᔨᐠ ᑭᑕ ᓂᐸᐃᐦᐟ. 16ᐁᑯᓯ ᒫᑲ ᓂ ᑲ ᐸᓴᐢᑌᐋᐧᐤ, ᒥᓇ ᓂ ᑲ ᐸᑭᑎᓈᐤ. 18ᑲᐦᑭᔭᐤ ᒫᑲ ᑭ ᑌᐯᐧᐊᐧᐠ ᐁ ᐃᑌᐧᒋᐠ, ᓯᐯᐧᑕᐃᕽ ᐊᐊᐧ ᐊᔨᓯᔨᓂᐤ, ᐁᑯᓯ ᐸᑭᑎᓇᒪᐃᐧᓈᐣ ᐹᕒᐋᐸᐢ: 19ᐁᐊᐧᑯ ᐁ ᒫᔭᑲᒥᑭᓯᐟ, ᐅᑌᓈᕽ, ᒥᓇ ᐁ ᑭ ᓂᐸᑕᑫᐟ, ᑭ ᐱᒋᐁᐧᐱᓈᐤ ᑭᐸᐦᐅᑐᐃᐧᑲᒥᑯᕽ. 20ᐸᐃᓬᐊᐟ ᒥᓇ ᑭ ᑭᑐᑌᐤ, ᐁ ᓄᑌ ᐸᑭᑎᓈᐟ ᒋᓴᓴ, 21ᒫᑲ ᑭ ᑌᐯᐧᐊᐧᐠ, ᐁ ᐃᑌᐧᒋᐠ, ᒋᐢᑕᐦᐋᐢᑳᐧᐢ, ᒋᐢᑕᐦᐋᐢᑳᐧᐢ. 22ᐁᑯᓯ ᑭ ᐃᑌᐤ, ᐁᑲᐧ ᓂᐢᑖᐧᐤ, ᑖᓀᑭ, ᑫᑲᐧᐩ ᐁ ᒪᒑᔨᐊᐧᓂᔨᐠ ᐊᐊᐧ ᓈᐯᐤ ᑳ ᑐᑕᕽ? ᓇᒪᐃᐧᔭ ᓂ ᑭ ᒥᐢᑫᐣ ᑫᑲᐧᐩ ᑫ ᐅᐦᒋ ᓂᐸᐃᐦᐟ; ᐁᐊᐧᑯᐦᒋ ᒫᑲ ᓂ ᑲ ᐸᓴᐢᑌᐋᐧᐤ ᐁᑯᓯ ᓂ ᑲ ᐸᑭᑎᓇᐤ. 23ᓭᒫᐠ ᒫᑲ ᑭ ᑭᓯᐁᐧᐊᐧᐠ, ᐁ ᓇᑐᑕᑭᐠ ᑭᑕ ᒋᐢᑕᐦᐋᐢᑳᐧᑎᒥᐦᐟ. ᐁ ᐃᓯ ᑌᐯᐧᒋᐠ ᒫᑲ ᑭ ᓵᑯᒋᐃᐁᐧᒪᑲᓂᔨᐤ. 24ᐁᑯᓯ ᐸᐃᓬᐊᐟ ᑭ ᐃᑕᓱᐁᐧᐤ ᑭᑕ ᑐᒋᑳᑌᔨᐠ ᐊᓂᒪ ᑳ ᐃᓯ ᓇᑐᑕᒥᔨᐟ. 25ᑭ ᐸᑭᑎᓀᐤ ᒫᑲ ᐊᓂᐦᐃ ᑳ ᑭ ᐱᒋᐁᐧᐱᓂᒥᐟ ᑭᐸᐦᐅᑐᐃᐧᑲᒥᑯᕽ ᒪᐢᑲᑌᐧᐃᐧᐣ ᒥᓇ ᓂᐸᑖᑫᐃᐧᐣ ᐅᐦᒋ, ᐊᓂᐦᐃ ᑳ ᑭ ᓇᑕᐁᐧᔨᒫᒋᐠ; ᒫᑲ ᐃᐧᔭ ᒋᓴᓴ ᐁ ᐃᑌᔨᑕᒥᔨᐟ ᑭ ᐃᓯ ᐸᑭᑎᓇᒪᐁᐧᐤ.

26ᐁᑯᓯ ᐃᐢᐱ ᓭᐯᐧᑕᐋᒋᐠ, ᑭ ᐅᑎᐦᑎᓀᐊᐧᐠ ᐯᔭᐠ ᓴᐃᒪᓇ ᓴᐃᕒᐃᓂᐃᕽ ᐅᐦᒋ, ᐊᐧᔭᐃᐧᑎᒫᔨᕽ ᐁ ᐯ ᐅᑐᑌᔨᐟ, ᐁᑯᓯ ᐁ ᑭ ᐱᒥᐃᐧᑕᒧᐋᒋᐠ ᐱᒥᑖᐢᑯᐃᑲᐣ, ᑭᑕ ᐱᒥᐃᐧᑕᒪᐊᐧᔨᐟ ᒋᓴᓴ.

27ᑭᐦᒋ ᒥᐦᒉᐟ ᐊᔨᓯᔨᓂᐊᐧ ᒫᑲ ᑭ ᐱᒥᑎᓴᐦᐅᐠ, ᐊᓯᒋ ᐃᐢᑫᐧᐊᐧ ᐁ ᑲᑳᐧᑕᑲᑌᐧᒧᔨᐟ ᐁ ᒪᐃᐧᑳᑎᑯᐟ. 28ᒫᑲ ᒋᓴᐢ ᐁ ᐋᐸᒥᐢᑕᐋᐧᐟ ᑭ ᐃᑌᐤ, ᑭᔭᐋᐧᐤ ᑳ ᐅᑕᓂᓯᒥᑯᔦᐠ ᒉᕒᐅᓴᓬᐊᒼ, ᐁᑳᐃᐧᔭ ᒪᐃᐧᑲᓯᐠ, ᒫᑲ ᒫᑐᐠ ᑭᔭᐋᐧᐤ ᐅᐦᒋ, ᒥᓇ ᑭᐟ ᐊᐋᐧᓯᒥᓯᐋᐧᐊᐧᐠ. 29ᒋᑫᒫ ᒫᑎᑲ, ᐊᓂᐦᐃ ᑭᓯᑳᐊᐧ ᐹᐸᔨᐊᐧ, ᐃᑕ ᑫ ᐃᑌᐧᒋᐠ, ᓴᐁᐧᔨᑖᑯᓯᐊᐧᐠ ᐊᓂᑭ ᐁᑳ ᑳ ᐅᐟ ᐊᐋᐧᓯᒥᓯᒋᐠ, ᒥᓇ ᐊᓂᑭ ᐁᑳ ᑳ ᓄᔮᐊᐧᓱᒋᐠ. 30#ᐦᐋᓯᔭ 10:8; ᑭᐢᑫᔨᐦᑖᑯᐦᑫᐃᐧᐣ 6:16ᐁᑯᐢᐱ ᑭᑕ ᒫᒋ ᐃᑕᒪᐧᐠ ᐊᐧᒋᐊ, ᐸᑕᑯᐢᑲᐃᐧᓈᐣ; ᒥᓇ ᐃᐢᐸᑎᓈᐊᐧ, ᐊᑲᐧᓇᐅᓈᐣ. 31ᒋᑫᒫ ᑭᐢᐱᐣ ᐅᐦᐃ ᑐᑕᑲᐧᐃᐧ ᒣᑳᐧᐨ ᐁ ᐊᐢᑳᑎᑯᐃᐧᐟ ᒥᐢᑎᐠ, ᑖᓂᓯ ᑫ ᐃᑐᑕᐦᑭᐠ ᐹᐢᑌᐋᐧᑎᑯᕽ?

32ᑭ ᓂᓯᔨᐊᐧ ᒫᑲ ᑯᑕᑲ ᐅᒪᒋᐃᑎᐢᑲ ᐁ ᑭ ᑭᑭ ᐊᐧᔭᐃᐧᑕᐃᒥᐦᐟ ᑭᑕ ᓂᐸᐃᒥᐦᐟ. 33ᐁᑯᓯ ᐃᐢᐱ ᑳ ᐯ ᐅᑎᑕᑭᐠ ᐊᓂᒪ ᐃᑕ ᐅᐢᑎᑲᐧᓇᑲᐣ ᑳ ᐃᓯᔨᐦᑳᑌᐠ, ᐁᑯᑕ ᑭ ᒋᐢᑕᐦᐋᐢᑳᐧᑌᐊᐧᐠ, ᐁᑯᓯ ᐊᓂᐦᐃ ᐅᒪᒋᐃᑎᐢᑲ, ᐯᔭᐠ ᐅ ᑭᐦᒋᓂᐢᑭᔨᕽ ᐃᑌᑫ, ᐁᑯᓯ ᑯᑕᐠ ᓇᒪᑎᓂᕽ ᐃᑌᑫ.

34 # ᓂᑲᒧᓇ 22:18 ᐁᑯᓯ ᒋᓴᐢ ᑭ ᐃᑌᐧᐤ, ᓄᑕ, ᐳᓀᔨᑕᒪᐃᐧᐠ; ᐃᐧᔭ ᐁᑳ ᐁ ᑭᐢᑫᔨᑕᑭᐟ ᐊᓂᒪ ᑳ ᐃᑐᑕᐦᑭᐠ. ᑭ ᓇᓈᓂᐢᒋᑖᐧᑐᐊᐧᐠ ᒫᑲ ᐅ ᑭᑭᐢᑳᒋᑲᓂᔨᐊᐧ ᐁ ᐊᐢᑖᐧᑐᒋᐠ. 35#ᓂᑲᒧᓇ 22:7ᐊᔨᓯᔨᓂᐊᐧᐠ ᒫᑲ ᑭ ᓂᐸᐃᐧᐊᐧᐠ ᐁ ᑭᑖᐸᑫᒋᐠ. ᐁᑯᓯ ᐅᔭᓱᐁᐧᐃᐧᔨᓂᐊᐧᐠ ᒥᓇ ᐁ ᐸᐱᐃᐧᒫᒋᐠ, ᐁ ᐃᑌᐧᒋᐠ, ᑯᑕᑲ ᑭ ᐱᒫᒋᐦᐁᐤ; ᑭᔮᒼ ᐁᑲᐧ ᑭᑕ ᐱᒪᒋᐃᓱ, ᑭᐢᐱᐣ ᐁᐊᐧᑯ ᙭, ᐅ ᓇᐊᐧᓱᓈᑲᓇ ᑭᓭᒪᓂᑐ. 36#ᓂᑲᒧᓇ 69:21ᓯᒫᑲᓂᓴᐠ ᐃᐧᐢᑕᐋᐧᐤ ᑭ ᒣᑕᐋᐧᑳᑌᐊᐧᐠ ᐁ ᐯ ᓈᑖᒋᐠ, ᐁ ᐃᑎᓇᒪᐋᐧᒋᐠ ᓯᐃᐧᑳᐳᔨᐤ, 37ᐁ ᐃᑌᐧᒋᐠ, ᑭᐢᐱᐣ ᐃᔭᐃᐧᐊᐧᓀ ᐅ ᑭᐦᒋ ᐅᑭᒫᒥᐋᐧᐊᐧ ᒍᐊᐧᐠ, ᐱᒫᒋᐦᐃᓱ. 38ᐃᐢᐱᒥᓯᕽ ᒫᑲ ᑭ ᒪᓯᓇᐃᑳᑌᔨᐤ, ᐁᐊᐧᑯ ᐊᐊᐧ ᐅ ᑭᐦᒋ ᐅᑭᒫᒥᐋᐧᐊᐧ ᒍᐊᐧᐠ.

39ᐯᔭᐠ ᒫᑲ ᐊᓇ ᐅᒪᒋᐃᑎᐢᐠ ᑳ ᑭ ᒋᐢᑕᐦᐋᐢᑳᐧᑎᐦᐟ, ᑭ ᐸᐱᐃᐧᒣᐤ, ᐁ ᐃᑌᐧᐟ, ᓇᒪ ᒋ ᑭᔭ ᙭? ᐱᒫᒋᐦᐃᓱ ᐊᓯᒋ ᓂᔭᓈᐣ. 40ᒫᑲ ᑯᑕᐠ ᑭ ᓇᐢᑫᐧᐊᐧᓯᒣᐤ, ᒥᓇ ᐁ ᑭᑐᑕᐠ ᐃᑌᐤ, ᓇᒪᐃᐧᔭ ᒋ ᑭ ᑯᐢᑖᐤ ᑭᓭᒪᓂᑐ, ᐃᐧᔭ ᐁᑯᓯ ᒣᐧᐦᒋ ᑭᐢᑕ ᐁ ᐃᓯ ᐅᔭᓱᐋᐧᑎᑲᐃᐧᔭᐣ? 41ᑭᔮᓇᐤ ᒫᑲ ᐃᐧᔭ ᑲᐧᔭᐢᐠ; ᒋᑫᒫ ᑭᐟ ᐃᓯ ᒥᔨᑲᐃᐧᓈᓇᐤ ᐁ ᐃᓯ ᑲᐢᑭᑕᒫᑯᔭᕽ ᑭᐟ ᐃᑐᑕᒧᐃᐧᓂᓇᐊᐧ; ᒫᑲ ᐊᐊᐧ ᓈᐯᐤ ᓇᒪ ᓈᓂᑕᐤ ᑭ ᐃᓯ ᓇᔦᑕᐃᐧ ᑐᑕᒼ. 42ᐁᑯᓯ ᑭ ᐃᑌᐧᐤ, ᒋᓴᐢ, ᑭᐢᑭᓯᑐᑕᐃᐧᐣ ᐃᐢᐱ ᐯ ᐃᑐᑌᔭᓂ ᑭᐟ ᐅᑌᓇᐃᐧᐃᐧᓂᕽ. 43ᑭ ᐃᑌᐤ ᒫᑲ, ᑖᐯᐧ ᑭᐟ ᐃᑎᐣ, ᐊᓄᐦᐨ ᑳ ᑭᓯᑳᐠ ᑭ ᑲ ᐃᐧᒉᐃᐧᐣ ᐹᕒᐊᑕᐃᓯᕽ.

44 # ᐁᐠᓴᑕᐢ 26:31-33 ᐁᑲᐧ ᒫᑲ ᓈᓂᑕᐤ ᓂᑯᑕᐧᓯᐠ ᑎᐸᐃᑲᐣ ᐁ ᐃᐢᐸᔨᐠ, ᑭ ᐊᐧᓂᑎᐱᐢᑳᐤ ᒥᓯᐁᐧ ᐊᐢᑭᕽ ᐱᔨᐢ ᑫᑲᐟ ᒥᑖᑕᐟ ᑎᐸᐃᑲᐣ ᐁ ᐃᐢᐸᔨᐠ, 45ᐁ ᐊᐧᓂᑎᐱᐢᑭ ᐊᔮᐟ ᑭᓯᑲᐃᐧ ᐱᓯᒼ; ᒥᓇ ᐊᑯᐁᑲᐃᑲᐣ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑭ ᒥᓴᑳᒣ ᔮᔨᑭᐸᔨᐤ. 46#ᓂᑲᒧᓇ 31:5ᐁᑯᓯ ᐃᐢᐱ ᒋᓴᐢ ᑳ ᑭᐦᒋ ᑌᐯᐧᐟ, ᑭ ᐃᑌᐧᐤ, ᓄᐦᑕ, ᑭ ᒋᒋᕽ ᑭ ᐸᑭᑎᓇᒫᑎᐣ ᓂᐟ ᐊᐦᒑᕽ: ᐃᐢᐱ ᒫᑲ ᐅᒪ ᑳ ᐃᑌᐧᐟ, ᑭ ᓯᐯᐧᒑᑫᐧᐤ. 47ᐃᐢᐱ ᒫᑲ ᓯᒫᑲᓂᓯᐃᐧᑭᒪᐤ ᑳ ᐋᐧᐸᐦᑕᕽ ᐊᓂᒪ ᑳ ᑭ ᑐᒋᑳᑌᔨᐠ, ᑭ ᑭᐢᑕᑭᒣᐤ ᑭᓭᒪᓂᑐᐊᐧ, ᐁ ᐃᑌᐧᐟ, ᑖᐯᐧ ᐊᐊᐧ ᑭ ᑲᐧᔭᐢᑳᐧᑎᓯᐃᐧ ᐊᔨᓯᔨᓂᐃᐧᐤ. 48ᑲᐦᑭᔭᐤ ᒫᑲ ᐊᓂᑭ ᐊᔨᓯᔨᓂᐊᐧᐠ ᑳ ᑭ ᐯ ᒫᐊᐧᒋᐃᑐᒋᐠ ᑭᑕ ᑲᓇᐋᐧᐸᐦᑕᑭᐠ, ᐃᐢᐱ ᐃᐧᔭᐸᐦᑕᑭᐠ ᐊᓂᐦᐃ ᑳ ᑭ ᐃᑐᒋᑳᑌᔨᑭ, ᑭ ᐸᑲᒫᐢᑭᑲᓀᐅᓱᐊᐧᐠ ᐁ ᐊᑎ ᑭᐁᐧᒋᐠ. 49#ᓬᐅᐠ 8:2,3ᑲᐦᑭᔭᐤ ᒫᑲ ᐊᓂᐦᐃ ᑳ ᑭ ᓇᑲᔮᔦᔨᒥᑯᐟ, ᒥᓇ ᐊᓂᐦᐃ ᐃᐢᑫᐧᐊᐧ ᑳᓬᐊᓬᐃᕽ ᑳ ᑭ ᐅᐦᒋ ᐱᒥᑎᓴᐦᐅᑯᐟ, ᐊᐧᔭᐤ ᑭ ᓂᐸᐃᐧᐊᐧᐠ ᐁ ᐅᐦᒋ ᑲᓇᐊᐧᐸᐦᑕᑭᐠ.

50ᒫᑎᑲ ᒫᑲ, ᐯᔭᐠ ᓈᐯᐤ ᒍᓯᑊ ᐁ ᐃᓯᔨᐦᑳᓱᐟ, ᐅᔭᓱᐁᐧᐃᐧᔨᓂᐤ, ᐁ ᒥᔮᐧᑎᓯᐟ ᒥᓇ ᐁ ᑲᐧᔭᐢᑳᐧᑎᓯᐟ ᐊᔨᓯᔨᓂᐤ, 51ᓇᒪᐃᐧᔭ ᐅᐦᒋ ᐃᐧᒋᐃᐁᐧᐤ ᐅᔭᓱᐁᐧᐃᐧᓂᔨᕽ ᒥᓇ ᐅᐟ ᐃᑐᑕᒧᐃᐧᓂᔨᕽ, ᐊᕒᐃᒫᑎᐊ ᐁ ᐅᐦᒋᐟ, ᐅᑌᓇᐃᐧᐋᐧᐤ ᒍᐊᐧᐠ, ᐃᐧᐢᑕ ᒫᑲ ᐁ ᐊᓴᐋᐧᐸᐦᑕᕽ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ: 52ᐁᐊᐧᑲᐧᐊᐧ ᐊᔨᓯᔨᓂᐤ ᑭ ᓇᑌᐤ ᐸᐃᓬᐊᑕ ᒥᓇ ᐁ ᑭ ᓇᑐᑕᒪᐋᐧᐟ ᐃᐧᔭᐃᐧᔨᐤ ᒋᓴᓴ. 53ᐁᑯᓯ ᑭ ᓂᑎᓇᒼ, ᐁ ᑭ ᐁᐧᐁᐧᑭᓇᕽ ᐋᐧᐱᐢᑫᑭᓄᕽ, ᐁ ᑭ ᓇᑕᐃᐧ ᓇᐊᐢᑖᐟ ᒫᑲ ᓇᐦᐃᓂᑐᐃᐧᑲᒥᑯᕽ ᐁ ᑭ ᐃᐧᐱᑲᐃᑳᓱᐟ ᐊᓯᓂ, ᐃᑕ ᐁᑳ ᐃᐧᑳᐨ ᑲᔭᑌ ᐊᔨᓯᔨᓂᐤ ᐁ ᑭ ᐊᔨᐦᐟ. 54ᐁᑯᓯ ᒫᑲ ᐁᐊᐧᑳᐧᓂᒪ ᑭ ᐊᐧᐁᐧᔨᐃᐧ ᑭᓯᑳᐤ, ᑭ ᐊᑎ ᐯᓱᓈᑲᐧᐣ ᒫᑲ ᑭᑕ ᐊᔭᒥᐦᐁᑭᓯᑳᐠ. 55ᐊᓂᐦᐃ ᒫᑲ ᐃᐢᑫᐧᐊᐧ ᑳ ᑭ ᐯ ᐃᐧᒉᑯᐟ ᑲᓬᐊᓬᐃᕽ ᐅᐦᒋ, ᑭ ᐱᒥᑎᓴᐁᐧᐊᐧᐠ, ᒥᓇ ᑭ ᐋᐧᐸᐦᑕᒪᐧᐠ ᓇᐦᐃᓂᑐᐃᐧᑲᒥᐠ, ᒥᓇ ᑖᓂᓯ ᐃᐧᔭᐃᐧᔨᐤ ᐁ ᑭ ᐃᑕᐢᑖᐃᐧᐦᐟ. 56#ᐁᐠᓴᑕᐢ 20:10; ᑎᔪᑕᕒᐊᓇᒥ 5:14ᑭ ᑭᐁᐧᐊᐧᐠ ᒫᑲ, ᐁᑯᓯ ᐁ ᓇᑕᐃᐧ ᑲᐧᔭᒋᑖᒋᐠ ᐃᐧᑭᒪᑯᐅᐃᐧᓇ ᒥᓇ ᑕᒪᐢᑯᐃᐧᓇ. ᐁ ᐊᔭᒥᐦᐁᑭᓯᑳᔨᐠ, ᒫᑲ ᑭ ᐊᔦᐧᐱᐊᐧᐠ ᑳ ᐃᑕᐢᑌᐠ ᐅᔭᓱᐁᐧᐃᐧᐣ.

Currently Selected:

ᓭᐣᐟ ᓬᐅᐠ 23: KKMs

Highlight

Copy