ᒉᓂᓯᐢ 43

1ᒥᐢᑕᐦᐃ ᒫᑲ ᑭ ᓄᑌᑲᑖᓂᐊᐧᐣ ᐁᑯᑕ ᐊᐢᑭᕽ. 2ᑭ ᐊᔨᐦᑭᐣ ᒫᑲ ᐃᐢᐱ ᑳ ᑭᑕᒫᐧᒋᐠ ᐸᐦᑫᐧᓯᑲᓂᑳᓇ ᐃᒋᑊᑎᕽ ᑳ ᑭ ᐅᐦᒋ ᐯᓯᐋᐧᒋᐠ, ᐅᑖᐃᐧᐋᐧᐊᐧ ᐅᒥᓯ ᑭ ᐃᑎᑲᐧᐠ, ᐃᑐᐦᑌᐠ ᒥᓇ, ᐊᑖᐁᐧᐢᑕᒪᐃᐧᓇᐣ ᐊᐱᓯᐢ ᒥᒋᐃᐧᐣ. 3ᒍᑕ ᒫᑲ ᑭ ᑭᑐᑌᐤ ᐅᒥᓯ ᐁ ᐃᑖᐟ, ᐊᓇ ᓈᐯᐤ ᒥᑐᓂ ᓂ ᑭ ᐊᔮᑳᐧᒥᒥᑯᓈᐣ, ᐁ ᐃᑌᐧᐟ, ᓇᒪᐃᐧᔭ ᑭ ᑲ ᐋᐧᐸᒥᓈᐋᐧᐤ ᑭᐢᐱᐣ ᐁᑳ ᑭᒋᐋᐧᒥᐋᐧᐤ ᐯ ᐃᐧᒉᐋᐧᔦᑯ. 4ᑭᐢᐱᐣ ᓂᒋᐋᐧᒥᓈᐣ ᑭᑭ ᐃᓯᑎᓴᐦᐅᔮᑭ, ᑭ ᑲ ᓇᑕᐃᐧ ᐊᑖᐁᐧᐢᑕᒫᑎᓈᐣ ᒥᒋᐃᐧᐣ. 5ᒫᑲ ᑭᐢᐱᐣ ᐁᑳ ᐃᐧ ᐃᓯᑎᓴᐦᐊᐧᒋ, ᓇᒪᐃᐧᔭ ᓂ ᑲ ᑭ ᐃᑐᑖᓈᐣ, ᒋᑫᒫ ᐊᓇ ᓈᐯᐤ ᓂ ᑭ ᐃᑎᑯᓈᐣ, ᓇᒪᐃᐧᔭ ᑭ ᑲ ᐋᐧᐸᒥᓈᐋᐧᐤ ᑭᐢᐱᐣ ᐁᑳ ᐯ ᐃᐧᒉᐋᐧᔦᑯ ᑭᒋᐋᐧᒥᐋᐧᐤ. 6ᐃᐢᕒᐁᐃᓬ ᒫᑲ ᑭ ᐃᑌᐤ, ᑖᓀᐦᑭ ᐊᔨᐋᐧᐠ ᑳ ᐃᐧ ᑭᑎᒪᐦᐃᔦᐠ ᑳ ᐃᐧᐦᑕᒪᐋᐧᔦᐠ ᐊᓇ ᓈᐯᐤ ᑫᔮᐱᐨ ᐁ ᐅᒋᐋᐧᒥᔦᐠ? 7ᑭ ᐃᑎᐠ ᒫᑲ, ᐊᓇ ᓈᐯᐤ ᒥᑐᓂ ᓂ ᑭ ᑲᑫᐧᒋᒥᑯᓈᐣ, ᓂᔭᓈᐣ ᐅᐦᒋ, ᒥᓇ ᓂ ᐋᐧᑯᒫᑲᓂᓈᓇ, ᐅᒥᓯ ᐁ ᐃᑌᐧᐟ, ᐱᒫᑎᓯᐤ ᒋ ᑫᔮᐱᐨ ᑯᑖᐃᐧᐋᐧᐤ? ᑫᔮᐱᐨ ᒋ ᑯᒋᐋᐧᒥᓈᐋᐧᐤ? ᓂ ᑭ ᐃᐧᐦᑕᒪᐋᐧᓈᐣ ᒫᑲ ᒣᐧᐦᒋ ᐅᒪ ᑳ ᑭ ᐃᑌᐧᔮᕽ; ᑖᓂᓯ ᑫ ᑭ ᐃᓯ ᑭᐢᑫᔨᑕᒫᕽ ᑭᑕ ᐃᑌᐧᐟ, ᐯᓯᐋᐧᑫᐠ ᑭᒋᐋᐧᒥᐋᐧᐤ? 8ᒍᑕ ᒫᑲ ᐅᒥᓯ ᑭ ᐃᑌᐤ ᐃᐢᕒᐁᐃᓬᐊ ᐅᑖᐃᐧᔭ, ᓂᔭ ᑲᓇᐁᐧᔨᑕᒧᐃᐣ ᐅᐢᑭᓂᑭᐢ, ᓂ ᑲ ᐸᓯᑯᓈᐣ ᒫᑲ ᑭᑕ ᓯᐯᐧᑌᔮᕽ; ᑭᑕ ᐱᒫᑎᓯᔭᕽ, ᐁᑳ ᒫᑲ ᑭᑕ ᓂᐱᔭᕽ, ᓂᔭᓈᐣ ᒥᓇ ᑭᔭ ᒥᓇ ᑭᐟ ᐊᐋᐧᓯᒥᓯᓇᐊᐧᐠ. 9ᓂᔭ ᒫᑲ ᓂ ᑲ ᑲᓇᐁᐧᔨᒫᐤ, ᓂᒋᐦᒋᕽ ᐅᐦᒋ ᑭ ᑲ ᓇᑕᐁᐧᔨᒫᐤ, ᑭᐢᐱᐣ ᐁᑳ ᐯᑕᒫᑖᓂ, ᒥᓇ ᐸᑭᑎᓇᒫᑖᓂ, ᑭᔮᒼ ᓂᔭ ᑳᑭᑫ ᓂ ᑲ ᐊᑖᒣᔨᑖᑯᓯᐣ. 10ᒋᑫᒫ ᑭᐢᐱᐣ ᐁᑳ ᑭ ᐅᑕᒥ ᑭᓵᒋᔮᕽ, ᑫᐦᒋᓈ ᓵᓴᐩ ᓂᓵᐧᐤ ᓂ ᑲ ᑭ ᑕᑯᓯᓂᑖᐣ. 11ᐅᑖᐃᐧᐋᐧᐊᐧ ᐃᐢᕒᐁᐃᓬ ᒫᑲ ᐅᒥᓯ ᑭ ᐃᑎᑲᐧᐠ, ᑭᐢᐱᐣ ᐊᓄᐦᐨ ᐁᑯᓯ ᑫ ᐃᐦᑭᓄᑫᐧ, ᐅᒥᓯ ᑐᑕᒧᐠ, ᑕᐦᑯᓇᒧᐠ ᒫᐊᐧᐨ ᒣᔮᐧᓯᑭ ᑳ ᓂᐦᑖᐃᐧᑭᑭ ᐊᐢᑭᕽ ᑭᐟ ᐊᓯᐊᐧᒋᑲᓂᐋᐧᕽ, ᒥᓇ ᐃᑐᑕᑕᒫᕽ ᐊᓇ ᓈᐯᐤ ᒣᑭᐃᐧᐣ, ᐊᐱᓯᐢ ᒪᐢᑭᑭ, ᒥᓇ ᐊᐱᓯᐢ ᐊᒧᓯᓯᐹᐢᑲᐧᐟ, ᓯᐊᐧᔭᑫᐢᐠ, ᒥᓇ ᐃᐧᔨᑭᒫᑯᓯᐟ ᐱᑭᐤ, ᐸᑳᓇᐠ ᒥᓇ ᓇᐸᑭᐸᑳᓇᐠ. 12ᒥᓇ ᓂᓵᐧᐤ ᐃᔨᑯᕽ ᑕᐦᑯᓂᕽ ᓱᓂᔮᐤ, ᒥᓇ ᐊᓇ ᓱᓂᔮᐤ ᑳ ᑭ ᐯᓯᐋᐧᔦᐠ ᑭ ᒪᐢᑭᒧᑎᐋᐧᕽ ᑳᐃᐧ ᑭᐁᐧᑕᐃᕽ, ᒫᐢᑯᐨ ᑭ ᐋᓭᐧᔮᐸᒋᑳᓱ. 13ᐃᐧᒉᐃᐧᕽ ᒫᑲ ᑭᒋᐋᐧᒥᐋᐧᐤ, ᐸᓯᑯᐠ ᒫᑲ ᓇᑕᐋᐧᐸᒥᕽ ᒥᓇ ᐊᓇ ᓈᐯᐤ, 14ᑭᓭᒪᓂᑐ ᒫᑲ ᒫᒪᐁᐧᔭᐢ ᑳ ᑭᐦᒑᔨᐃᐧᐟ ᑭ ᑲ ᐃᐧ ᒥᔨᑯᐋᐧᐤ ᑭᑕ ᑭᑎᒫᑭᓈᑯᔦᐠ ᐊᓇ ᓈᐯᐤ, ᑭᑕ ᐯ ᓯᐯᐧᑎᓴᐋᐧᐟ ᑯᑕᑲ ᑭᒋᐋᐧᒥᐋᐧᐊᐧ, ᒥᓇ ᐯᐣᒋᒪᐣ, ᑭᐢᐱᐣ ᒪᐢᑲᒋᐃᑲᐃᐧᔮᓂ ᓂᐟ ᐊᐋᐧᓯᒥᓴᐠ, ᓂ ᒪᐢᑲᒋᐃᑲᐃᐧᐣ ᐊᓂ ᑖᐯᐧ.

15ᐊᓂᑭ ᓈᐯᐊᐧᐠ ᒫᑲ ᑭ ᑕᐦᑯᓇᒪᐧᐠ ᒣᑭᐃᐧᐣ, ᒥᓇ ᓂᓵᐧᐤ ᐃᔨᑯᕽ ᑭ ᑕᐦᑯᓀᐊᐧᐠ ᓱᓂᔮᐊᐧ ᒥᓇ ᐯᐣᒋᒪᓇ ᑭ ᐃᐧᒉᐃᐧᑲᐧᐠ; ᐁ ᑭ ᐸᓯᑯᒋᐠ ᒫᑲ ᐁ ᑭ ᐃᑐᐦᑌᒋᐠ ᐃᒋᑊᑎᕽ, ᐁᑯᓯ ᐁ ᑭ ᐅᑎᐢᑲᐃᐧᑳᐸᐃᐧᐢᑕᐋᐧᒋᐠ ᒍᓯᐸ. 16ᐃᐢᐱ ᒫᑲ ᒍᓯᑊ ᐃᐧᔮᐸᒫᐟ ᐯᐣᒋᒪᓇ ᐁ ᐃᐧᒉᐃᐧᑯᔨᐟ, ᐅᒥᓯ ᑭ ᐃᑌᐤ ᑳ ᑲᓇᐁᐧᔨᑕᒥᔨᐟ ᐅ ᐋᐧᐢᑳᐦᐃᑲᐣ, ᑭᐁᐧᑕᐃᐠ ᐅᑭ ᓈᐯᐊᐧᐠ, ᒥᓇ ᒥᓇᐅ ᒥᓇ ᑲᐧᔮᒋᐦᑖ; ᒋᑫᒫ ᐅᑭ ᓈᐯᐊᐧᐠ ᓂ ᑲ ᐃᐧᒋᒥᒋᓱᒥᑲᐧᐠ ᐋᐱᑖᑭᓯᑳᑭ. 17ᐊᓇ ᒫᑲ ᓈᐯᐤ ᑭ ᐃᐦᑐᑕᒼ ᑳ ᐃᑎᑯᐟ ᒍᓯᐸ, ᐁᑯᓯ ᐊᓇ ᓈᐯᐤ ᑭ ᐱᐦᑐᑲᐦᐁᐤ ᐊᓂᐦᐃ ᓈᐯᐊᐧ ᒍᓯᐸ ᐃᐧᑭᔨᕽ. 18ᐊᓂᑭ ᓈᐯᐊᐧᐠ ᒫᑲ ᑭ ᓭᑭᓯᐊᐧᐠ, ᒋᑫᒫ ᑭ ᐱᑐᑲᐋᐊᐧᐠ ᒍᓯᐸ ᐃᐧᑭᔨᕽ; ᒥᓇ ᑭ ᐃᑌᐧᐊᐧᐠ, ᒋᑫᒫ ᐁᑐᑫ ᓱᓂᔮᐤ ᑳ ᑭ ᑭᐁᐧᑕᐋᔭᕽ ᑭ ᒪᐢᑭᒧᑎᓈᕽ ᓂᐢᑕᒼ ᑯᐦᒋ ᐱᑐᑲᐦᐃᑲᐃᐧᔭᕽ, ᓈᐣᑕᐤ ᑭ ᐃᐧ ᑐᑖᑯᓇᐤ, ᑭ ᐃᐧ ᐅᑎᑎᓂᑯᓇᐤ, ᐁᑯᓯ ᑭᑕ ᐅᑎᓂᑯᔭᕽ ᑭᑕ ᐊᐊᐧᑳᓂᐃᐧᔭᕽ, ᑭᔮᓇᐤ ᒥᓇ ᑭ ᓱᓱᒥᐢᑕᑎᒧᒥᓇᐊᐧᐠ. 19ᑭᓯᐋᐧᐠ ᒫᑲ ᑭ ᐯ ᓈᑌᐊᐧᐠ ᐊᓂᐦᐃ ᑳ ᑲᓇᐁᐧᔨᑕᒥᔨᐟ ᒍᓯᐸ ᐃᐧᑭᔨᐤ, ᑭ ᑭᑐᑌᐊᐧᐠ ᒫᑲ ᐊᓂᑕ ᐋᐧᔭᐃᐧᑎᒥᐢᑳᐧᐦᐟ ᐋᐧᐢᑳᐦᐃᑲᓂᕽ, 20ᐅᒥᓯ ᐁ ᑭ ᐃᑖᒋᐠ, ᐅᑭᒫᐤ, ᓂ ᑭ ᐯ ᐃᑐᑖᐦᑖᐣ ᓂᐢᑕᒼ ᑖᐯᐧ ᑭᑕ ᐊᑖᐁᐧᔮᕽ ᒥᒋᐃᐧᐣ; 21ᑭ ᐊᔨᑭᐣ ᒫᑲ ᐃᐢᐱ ᑌᑯᓯᓈᕽ ᓯᑭᓂᑫᐃᐧᑲᒥᑯᕽ, ᓂ ᑭ ᐋᐱᑯᓀᓈᐣ ᓂ ᒪᐢᑭᒧᑎᓈᓇ, ᐳᑎ ᒫᑲ ᑲᐦᑭᔭᐤ ᐁ ᐃᐦᑕᓯᔮᕽ ᓂ ᓱᓂᔮᒥᓈᓇᐠ ᑭ ᐊᓯᐊᐧᓲᐊᐧᐠ ᓂ ᒪᐢᑭᒧᑎᓈᕽ, ᓂ ᓱᓂᔮᒥᓈᐣ ᑫᔮᐱᐨ ᐁ ᑭ ᐃᐢᐱᑎᓂᑯᑎᐟ; ᑳᐃᐧ ᒫᑲ ᒥᓇ ᓂ ᑭ ᐯᓯᐋᐧᓈᐣ. 22ᑯᑕᐠ ᒫᑲ ᓱᓂᔮᐤ ᓂ ᐯᓯᐋᐧᓈᐣ ᓂ ᓂᒋᐦᒋᓈᕽ ᑭᑕ ᐊᑖᐁᐧᔮᕽ ᒥᒋᐃᐧᐣ, ᓇᒪᐃᐧᔭ ᓂ ᑭᐢᑫᔨᑌᓈᐣ ᐊᐁᐧᓇ ᑳ ᑭ ᐊᐦᔮᐟ ᓂ ᓱᓂᔮᒥᓈᓇ ᓂ ᒪᐢᑭᒧᑎᓈᕽ. 23ᑭ ᐃᑌᐧᐤ ᒫᑲ, ᑭᔮᒣᔨᑕᒧᐃᐧᐣ ᑭ ᑲ ᐃᐧ ᐊᔮᓈᐋᐧᐤ, ᐁᑳᐃᐧᔭ ᓭᑭᓯᐠ, ᑭ ᑭᓭᒪᓂᑐᒥᐋᐧᐤ ᒥᓇ ᐅ ᑭᓭᒪᓂᑐᒪ ᑯᑖᐃᐧᐋᐧᐤ, ᑭ ᑭ ᒥᔨᑯᐋᐧᐤ ᐁᐧᔪᑎᓯᐃᐧᐣ ᑭ ᒪᐢᑭᒧᑎᐋᐧᕽ, ᓂᐟ ᐊᔮᐋᐧᐤ ᐃᐧᔭ ᑭ ᓱᓂᔮᒥᐋᐧᐤ. ᑭ ᐯ ᐊᐧᔭᐃᐧᑕᐦᐃᒣᐤ ᒫᑲ ᓯᒥᔭᓇ. 24ᐊᓇ ᓈᐯᐤ ᒫᑲ ᑭ ᐱᐦᑐᑲᐦᐁᐤ ᐊᓂᐦᐃ ᓈᐯᐊᐧ ᒍᓯᐸ ᐃᐧᑭᔨᕽ, ᐁ ᑭ ᒥᔮᐟ ᓂᐱᔨᐤ, ᑭ ᑭᓯᐯᑭᓇᒥᔨᐊᐧ ᒫᑲ ᐅᓯᑎᔨᐊᐧ; ᒥᓇ ᑭ ᐊᓴᒥᒣᐤ ᐅ ᓱᓱᒥᐢᑕᑎᒧᒥᔨᐊᐧ. 25ᑭ ᑲᐧᔮᒋᐦᑖᐊᐧᐠ ᒫᑲ ᒣᑭᐃᐧᓂᔨᐤ ᑳ ᐃᐧ ᒥᔮᒋᐠ ᒍᓯᐸ ᐃᐢᐱ ᑕᑯᓯᓂᔨᒋ ᐁ ᐋᐱᑖᑭᓯᑳᔨᐠ; ᒋᑫᒫ ᑭ ᐯᐦᑕᒪᐧᐠ ᑭᑕ ᒧᐋᐧᒋᐠ ᐸᐦᑫᐧᓯᑲᓇ ᐁᑯᑕ.

26ᐃᐢᐱ ᒫᑲ ᒍᓯᑊ ᑌᑯᓯᕽ, ᑭ ᐯ ᒥᔦᐊᐧᐠ ᒣᑭᐃᐧᓂᔨᐤ ᑳ ᑕᐦᑯᓇᑭᐠ ᐋᐧᐢᑳᐦᐃᑲᓂᕽ, ᐁᑯᓯ ᐁ ᑭ ᓇᓈᒥᐢᑫᐧᔨᐢᑕᐋᐧᒋᐠ ᒧᐦᒋᕽ ᐃᓯ. 27ᑭ ᑲᑫᐧᒋᒣᐤ ᒫᑲ ᐁᓯ ᐊᔮᔨᐟ, ᐅᒥᓯ ᐁ ᑭ ᐃᑖᐟ, ᒥᔪ ᐊᔮᐤ ᒋ ᑯᑖᐃᐧᐋᐧᐤ, ᑭᓭᔨᓂᐤ ᑳ ᐊᒋᒫᔦᐠ? ᑫᔮᐱᐨ ᒋ ᐱᒫᑎᓯᐤ? 28ᑭ ᐃᓯ ᓇᐢᑫᐧᐊᐧᓯᒣᐊᐧᐠ ᒫᑲ, ᑭᐟ ᐊᑐᐢᑫᔮᑲᐣ ᓄᑖᐃᐧᓈᐣ ᒥᔪᐊᔮᐤ, ᑫᔮᐱᐨ ᐱᒫᑎᓯᐤ, ᑭ ᓈᒥᐢᑫᐧᔨᐊᐧᐠ ᒫᑲ ᒥᓇ ᐁ ᑭ ᐊᑕᒥᐢᑲᐋᐧᒋᐠ. 29ᑭ ᐃᑖᐱᐤ ᒫᑲ ᐁᑯᓯ ᐁ ᑭ ᐋᐧᐸᒫᐟ ᐯᐣᒋᒪᓇ ᐅᒋᐋᐧᒪ, ᐅᑳᐃᐧᔭ ᐅᑯᓯᓯᔨᐊᐧ, ᐅᒥᓯ ᒫᑲ ᑭ ᐃᑌᐧᐤ, ᐁᐊᐧᑯ ᒋ ᐊᐊᐧ ᐅᓯᒥᒫᐤ ᑭᒋᐋᐧᒥᐋᐧᐤ ᑲ ᑭ ᐋᒋᒧᐢᑕᐃᐧᔦᐠ? ᑭ ᐃᑌᐧᐤ ᒫᑲ, ᑭᓭᒪᓂᑐ ᑭ ᑲ ᐃᐧ ᓴᐁᐧᒥᐠ ᓂᑯᓯ. 30ᒍᓯᑊ ᒫᑲ ᑭ ᑲᑫᐧᔮᐅ; ᒋᑫᒫ ᑭ ᑭᑎᒫᑭᓇᐁᐧᐤ ᐅᒋᐋᐧᒪ, ᑭ ᓇᑐᓇᐣ ᒫᑲ ᐃᑕ ᑫ ᑕᓯ ᒫᑐᐟ, ᑭ ᐱᐦᑐᑫᐤ ᒫᑲ ᐅ ᓂᐯᐃᐧᑲᒥᑯᕽ ᐁᑯᑕ ᐁ ᑭ ᒫᑐᐟ. 31ᑭ ᑳᓯᑫᐧᐤ ᒫᑲ ᐁ ᑭ ᐊᐧᔭᐃᐧᐟ, ᒥᓇ ᐁ ᑭ ᒪᐢᑲᐃᐧᑫᔨᐟ, ᐅᒥᓯ ᐁ ᑭ ᐃᑌᐧᐟ, ᐊᔨᕽ ᐸᐦᑫᐧᓯᑲᐣ. 32ᑭ ᐅᔭᐢᑕᒪᐁᐧᐊᐧᐠ ᒫᑲ ᐸᐦᑳᐣ ᐁ ᐯᔭᑯᐟ, ᒥᓇ ᐁᐊᐧᑯᓂ ᐸᐦᑳᐣ, ᒥᓇ ᐃᒋᑊᓯᐊᓇ ᐸᐦᑳᐣ ᑳ ᐃᐧᒋᒥᒋᓱᒥᑯᐟ; ᒋᑫᒫ ᐃᒋᑊᓯᐊᓇᐠ ᓇᒪᐃᐧᔭ ᐃᐧ ᐃᐧᒋᒥᒋᓱᒣᐊᐧᐠ ᐸᐦᑫᐧᓯᑲᓇ ᐦᐃᐸᕒᐅᐊᐧ, ᐊᔨᐢ ᑭ ᐸᑳᐧᑕᒪᐧᐠ ᐁᐊᐧᑫᐧᔨᐤ ᐃᒋᑊᓯᐊᓇᐠ. 33ᑭ ᐊᐱᐊᐧᐠ ᒫᑲ ᐁ ᐅᑎᐢᑲᐃᐧᐢᑲᐋᐧᒋᐠ ᑳ ᐃᓯ ᐊᐢᑳᐧᑐᒋᐠ ᐅᐢᑌᓯᒫᐤ ᐁ ᐃᓯ ᐅᐢᑌᓯᒫᐃᐧᐢᑲᕽ ᒥᓇ ᐅᓯᒥᒫᐤ ᐁ ᐃᓯ ᐅᓯᒥᒫᐃᐧᐟ; ᐊᓂᑭ ᓈᐯᐊᐧᐠ ᒫᑲ ᑭ ᒫᒪᐢᑳᑕᒪᐧᐠ. 34ᑭ ᒫᑎᓇᒪᐁᐧᐤ ᒫᑲ ᑫ ᒥᒋᔨᐟ, ᒫᑲ ᐯᐣᒋᒪᐣ ᐅᐟ ᐊᓴᒥᑯᐃᐧᐣ ᓂᔮᓇᓈᐧᐤ ᐊᐊᐧᓯᒣ ᑭ ᐃᐢᐱᒑᔨᐤ ᐃᔨᑯᕽ ᑯᑕᑲ. ᑭ ᒥᓂᐦᑫᐧᐊᐧᐠ ᒫᑲ, ᒥᓇ ᐁ ᑭ ᐃᐧᒋᒥᔭᐋᐧᑕᒧᒫᒋᐠ.

Currently Selected:

ᒉᓂᓯᐢ 43: KKMs

Highlight

Copy