Nikamowina 73
73
wiyasiwēw kisē-manitow
onikamon Asaph
1tāpwē miyo-tōtawēw kisē-manitow Israelīwiyiniwa,
anihi kā‑kanācitēhēyit.
2māka niya kēkāc nikī-piswahikān;
kēkāc nikī-wanihtān nitāpowakēyihtamowin,
3ayisk ē‑kī-ohtēyimakik aniki kā‑kihcēyimocik,
kā‑wāpamakik ē‑miyopayicik āta ē‑macātisicik.
4namōya wīhkāc wīsakāhpinēwak;
wiya ē‑maskawisīcik mīna ē‑miywāyācik.
5namōya kakwātakihtāwak tāpiskōc kotakak iyiniwak;
namōya nayēhtāwīwak nānitaw isi tāpiskōc kotakak.
6ēkosi okistēyimisowiniwāw nōkwaniyiw tāpiskōc tāpiskākan
mīna otākwātisiwiniwāw tāpiskōc kinwāpēkasākaya.
7otēhiwāhk ohcipayiyiw maci-kīkway,
ēkwa otamēyihtamwak maci-kīkway omitonēyihcikaniwāhk.
8nīhtāwāhpihēwak kotaka ayisiyiniwa mīna maci-āyimōcikēwak;
kihcēyimisowak mīna kakwē-miskwēyihtamwak tānisi ka‑kitimahācik kotaka.
9maci-āyimōmēwak kisē-manitowa kihci-kīsikohk kā‑ayāyit,
ēkwa osām ē‑kistēyimisocik, wiyasiwātēwak iyiniwa ōta askīhk,
10ēkosi pimitisahwēwak mīna tāpwē piko tāpwēhtawēwak,
ahpō wīstawāw kisē-manitow otayisiyinīma.
11ōmisi itwēwak, “kisē-manitow misawāc namwāc ka‑kiskēyihtam;
namōya kita-kiskēyihtam kā‑māwaci-ispāhkēyihtākosit.”
12ēkosi itātisiwak kā‑macātisicik.
mistahi ayāwak mīna āhci piko ati-wēyōtisiwak.
13namōya nānitaw nititāpacihikon ē‑kī-pē-miyo-pimātisiyān
mīna namwāc ē‑kī-māyi-tōtamān.
14hāw, kisē-manitow, kikitimahin kapē-kīsik;
tahtwāw ē‑kīkisēpāyāk kikwātakihin.
15kīspin ēkosi nikī-itwān,
namōya niya pēyak nika-kī-itakimison kitiyinīmak.
16nikī-kakwē-nisitohtēn ēwako ōma,
māka osām āyiman niya ohci
17isko ispī ē‑itohtēyān kikihci-ayamihēwikamikohk.
ēkota kā‑kiskēyihtamān
tānisi kita-ispayihikocik omacātisak.
18kika-ahāwak itē ē‑sōskwāyik,
ēkosi kita-pahkisihkik misiwanācihowinihk.
19sēmāk misiwanācihāwak;
kakwāyakihāwak.
20tāpiskōc kā‑pawātamihk itēyihtākosiwak
ē‑kīkisēpāyāk wanikiskisināniwan;
kā‑tipēyihcikēyan, ispīhk ē‑koskopayiyan
namōya nōkosiwak.
21ispīhk kā‑kī-kisīwēyihtamān
mīna kā‑kī-wīsakitēhēyān,
22tāpiskōc pisiskiw nikī-kakēpātisin,
ēkāya ē‑kī-nisitohtātān.
23āhci piko tāpitawi kisiwāk kiwīcētin;
ēkwa nikihciniskihk kimiciminin.
24kikiskinohtahin kikiskinohamākēwinihk ohci,
mīna iskwēyānihk kika-tawinamawin ka‑kistēyimiyan.
25kīkway kotak ē‑ayāyān kihci-kīsikohk, kiya piko?
kīkway kotak ka‑kī-nitawēyihtamān ōta askīhk, ayisk ē‑wīcēwiyan?
26nika-kī-nā-nēsowisin nimāmitonēyihcikanihk mīna niyawihk,
māka wiya kisē-manitow nisōhkisiwin;
wiya piko nika-mamisīn.
27aniki kā‑kī-wanisihkik kēhcinā kita-pōni-pimātisiwak;
aniki ēkāya kā‑pimitisahoskik kika-misiwanācihāwak.
28māka niya wiya ohci mistahi miywāsin
cīki kita-wīcēwak kisē-manitow;
kita-kanawēyimit kā‑tipēyihcikēt kisē-manitow,
ēkosi kita-ātotamān kahkiyaw omiyo-tōtamowina.
Currently Selected:
Nikamowina 73: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
