Nikamowina 16
16
ē‑ayamihēstamihk ihtatēyimowin
onikamon David
1kanawēyimin kisē-manitow;
kiya piko ē‑mamisītotātān.
2ōmisi nititwān, “kiya nitipēyihcikēm;
kahkiyaw miyo-kīkway kā‑ayāyān
kiya kā‑ohcīstamawiyan.”
3kihcēyihtākosiwak aniki kā‑kwayaskātisicik kā‑tipēyihcikēt otayisiyinīma ōta askīhk!
nimāwaci-miywēyihtēn kita-wīcēwakik.
4aniki kotakak kā‑nātāmostawācik kotaka manitowa
māyi-tōtāsowak mihcētwāw.
namōya nika-wīcēwāwak macostēhamākētwāwi;
namōya nika-mawimostāmāwa omanitōmiwāwa.
5kimātinamākēstamawin kā‑tipēyihcikēyan,
kahkiyaw ē‑miyikowisiyān,
ōtē nīkānohk kiya ohci.
6tāpwē māmaskātēyihtākwanwa anihi kā‑miyiyan;
tāpwē miywāsinwa!
7nimamihcimāw kā‑tipēyihcikēt, ayisk nikiskinohtahik;
ēkwa kā‑tipiskāk nikiskinohamāk nitēhihk.
8tāpitawi nimōyēyimāw kā‑tipēyihcikēt kisiwāk ayāw,
ēkwa namōya kīkway nika-kostēn.
9ēkosi ninanāskomon mīna nimiywēyihtēn,
mīna namōya nitastāhikon kīkway,
10ayisk kikanawēyimin
ēkāya kita-sēkihikoyān nipiwin.
mīna kwayask ē‑atoskātān namwāc kika-pakitēyimin
ēkāya ka‑itohtēyān itē onipiwak kā‑ayācik.
11kiwāpahtihin mēskanaw pimātisiwinihk kā‑itamok;
kā‑mōsihitān nimiywēyihtēn,
mīna kākikē nimiyikon miywēyihtamowin.
Currently Selected:
Nikamowina 16: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
