Nikamowina 115
115
kā‑tipēyihcikēt mamihcimihk
1kiya, kā‑tipēyihcikēyan, kiya piko,
ēkwa namōya niyanān, māka kiya piko kita-kistēyimitāhk
ayisk kisākihiwēwin ēkāya wīhkāc kā‑kīsipipayik ēkwa kimamisīwātisiwin.
2tānēhki ayisiyiniwak ē‑itahtōskānēsicik kā‑kakwēcimikoyāhkok,
“tāniwā kimanitōmiwāw?”
3nikisē-manitōminān kihci-kīsikohk ayāw;
piko isi ē‑wī-tōtahk tōtam.
4omanitōhkāniwāwa wāpiski-sōniyāwa ohci asici osāwi-sōniyāwa ohci,
ēwakonik ōki ē‑mosci-osīhihcik.
5ē‑otōniyit māka namwāc pīkiskwēyiwa;
ē‑oskīsikoyit māka namwāc wāpiyiwa.
6ē‑ohtawakāyit māka namwāc pēhtamiyiwa;
mīna ē‑oskiwaniyit māka namwāc pasoyiwa.
7ē‑ocihciyit māka namwāc mōsihtāyiwa,
mīna ē‑ositiyit māka namwāc pimohtēyiwa;
namwāc kī‑pēhtākosiyiwa okohtākaniyihk.
8aniki kā‑kī-osīhācik mīna aniki kā‑mamisīcik
naspitawēwak anihi manitōhkāna kā‑kī-osīhācik.
9mamisītotāhk kā‑tipēyihcikēt, kiyawāw ayisiyinītik Israel ohci.
kiwīcihikowāw mīna kikanawēyimikowāw.
10mamisītotāhk kā‑tipēyihcikēt, kiyawāw kisē-manitow otayamihēwiyiniwa.
kiwīcihikowāw mīna kikanawēyimikowāw.
11mamisītotāhk kā‑tipēyihcikēt, kahkiyaw kiyawāw kā‑mawimostawāyēk.
kiwīcihikowāw mīna kikanawēyimikowāw.
12kā‑tipēyihcikēt kikiskisitotākonaw ēkwa kika-sawēyimikonaw;
kita-sawēyimēw ayisiyiniwa Israel ohci
ēkwa kahkiyaw kisē-manitow otayamihēwiyiniwa.
13kita-sawēyimēw tahto anihi kā‑mawimostākot,
anihi kā‑kihcēyihtākosiyit mīna pīwiyiniwa.
14kā‑tipēyihcikēt kika-wī-miyikowāw mihcētōsēwin,
kiyawāw mīna ay‑āniskē kitawāsimisiwāwa.
15kika-wī-sawēyimikowāw kā‑tipēyihcikēt,
kā‑kī-osīhtāt kihci-kīsik mīna askiy!
16wiya tipēyihtam kā‑tipēyihcikēt kihci-kīsik,
māka kī‑miyēw ayisiyiniwa ōma askiy.
17namwāc onipiwak kāmwātanohk kā‑ayācik mamihcimēwak kā‑tipēyihcikēyit.
18māka kiyānaw kā‑pimātisiyahk
kika-mamihcimānaw anohc mīna kākikē.
mamihcimihk kā‑tipēyihcikēt!
Currently Selected:
Nikamowina 115: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
