John 17

Jesus ayamihēstamawēw okiskinohamawākana

1Jesus ē‑kīsi-pīkiskwēt kī‑tastasāpiw ispimihk isi ēkwa ōmisi kā‑itwēt, “nohtā, otihcipayiw ēkwa. wāpahtihik ayisiyiniwak okistēyihtākosiwin kikosis, ēkosi wīsta kikosis kita-wāpahtihiwēw kikistēyihtākosiwin. 2ayisk kikī-miyin sōhkisiwin kita-tipēyimakik kahkiyaw ayisiyiniwak, ēkosi aniki kā‑tipēyihtamōhiyan kita-pimātisicik kākikē. 3ēkwa ē‑kiskēyimiskik kiya piko tāpwē kisē-manitow ēkwa Jesus Christ kā‑kī-pē-isitisahwat, ayisiyiniwak ēkota otinikēwak kākikē-pimātisiwin. 4nikī-wāpahtihiwān kikistēyihtākosiwin ōta askīhk. nikī-kīsihtān anima atoskēwin kā‑kī-mamisītotawiyan kita-tōtamān. 5nohtā! miyin kistēyihtākosiwin ōma ēkwa kā‑ayāyan tāpiskōc pēyakwan isi kā‑kī-ayāyān kā‑kī-wīcēwitān mwayēs askiy osīhcikātēk.

6“nikī-kiskēyihtamōhāwak kiya ohci aniki kā‑kī-tipēyihtamōhiyan ōta askīhk. kikī-tipēyimāwak māka kikī-miyin. kī‑nanahihtamwak kititwēwin. 7ēkwa kiskēyihtamwak kahkiyaw kīkway kā‑kī-miyiyan kiya ē‑ohcīstamawiyan. 8nikī-ācimostawāwak anima kākī-miyiyan kititwēwin, ēkwa kī‑otinamwak; kiskēyihtamwak kiya tāpwē ē‑kī-pē-isitisahoyan ēkwa ēwako tāpowakēyihtamwak.

9“nitayamihēstamawāwak. namōya nitayamihēstamawāwak aniki kotak ayisiyiniwak ōta askīhk ohci māka aniki piko kā‑kī-tipēyihtamōhiyan ayisk ē‑wīcēskik. 10aniki kā‑ayāwakik kitipēyimāwak, ēkwa aniki kā‑ayāwacik nitipēyimāwak ēkosi nikistēyihtākohikwak. 11ēkwa ōma ē‑wī-nātitān; namōya ayiwāk nitayān askīhk, māka wiyawāw ayāwak ōta askīhk. kā‑kihcihtwāwisiyan ohtāwīmāw! kiwīhowinihk ohci kitēyimik kā‑kī-isi-kitēyimiyan, ēkosi kita-pēyako-māmawi-ayāwak tāpiskōc kā‑isi-pēyakoyahk. 12ē‑mēkwā-wīcēwakik nikī-kitēyimāwak kiwīhowinihk, ēwako wīhowin kā‑kī-miyiyan. nikī-kitēyimāwak ēkwa namwāc pēyak nitohci-wanihāw, ana piko kā‑itēyimikowisit ta‑wanihot, ēkota ohci kita-kiskēyihtākwahk kihci-masinahikan ē‑tāpwēwiniyik. 13ēkwa ōma ē‑nitawi-nātitān, ēkwa ēwakoni ōhi nititwān ōta askīhk nimiywēyihtamowin kita-ayācik otēhiwāhk tāpwē piko. 14nikī-wīhtamawāwak anima kā‑kī-itwēyan, ēwako ohci ayisiyiniwak kā‑pakwātācik ayisk namōya tipēyihtākosiwak askīhk, tāpiskōc niya ēkāya kā‑tipēyihtākosiyān ōta askīhk. 15namōya ē‑kakwēcimitān kita-otinacik ōta askīhk ohci, māka kita-kanawēyimacik ēkāya ka‑macipayihikocik anihi macāyisa kā‑itimiht. 16tāpiskōc ē‑omānitēwicik ōta askīhk ēkosi nīsta. 17kistakihtamāso tāpwēwinihk ohci; kititwēwin ēwako tāpwēwin. 18kā‑isi-pē-isitisahoyan ōta askīhk, pēyakwan ēkosi nisipwēhtisahwāwak askīhk isi. 19wiyawāw ohci ēkwa nipakitinison kita-atoskātān, ēkosi wīstawāw tāpwē piko kita-pakitinisocik kita-atoskāskik.

20“namōya piko ōki kā‑ayamihēstamawakik, māka wīstawāw nitayamihēstamawāwak aniki kā‑tāpwēhtawicik ayisk ohci otitwēwiniwāw. 21nitayamihān kahkiyaw kita-pēyako-waskawītotahkik. nohtā! pitanē kita‑wī-māmawi-wīcēwikonānak tāpiskōc kiya kā‑wīcēwiyan ēkwa niya kā‑isi-wīcētān. kita-wī-pēyako-māmawi-wīcēwitowak, ēkota ohci ayisiyiniwak kita-tāpwēhtahkik ōta ē‑kī-pē-isitisahoyan. 22nimiyāwak anima kistēyihtākosiwin kā‑kī-miyiyan, ēkota ohci kita-pēyakocik tāpiskōc kiyānaw kā‑pēyakoyahk. 23niwīcēwāwak mīna kiwīcēwin, ēkosi kwayask kita-māmawi-wīcēhtocik. ēkwa ayisiyiniwak ōta askīhk kita-kiskēyihtamwak ē‑kī-pē-isitisahoyan, ēkwa ē‑sākihacik tāpiskōc kā‑isi-sākihiyan.

24“nohtā, kikī-miyin, ēkwa ninitawēyimāwak itē ayāyāni wīstawāw kita-ayācik ēkotē. ēkosi kita-wāpahtahkik nikistēyihtākosiwin kā‑kī-miyiyan ayisk kikī-sākihin mwayēs askiy ē-osīhcikātēk. 25nohtā kā‑kwayaskwātisiyan, ayisiyiniwak ōta askīhk namwāc kitohci-kiskēyimikwak, māka niya ki‑kiskēyimitin ēkwa ōki kiskēyihtamwak ē‑kī-pē-isitisahoyan. 26nikiskēyihtamōhāwak kiwīhowin, ēkwa namōya ēwako nika-pōnihtān, ēkota ohci kā‑isi-sākihiyan kita-wīcēkocik ēkwa nīsta kita-wīcēwakik.”

Currently Selected:

John 17: PCSBR

Highlight

Copy