Матта 1
1
Месигь Исайин ата-бабйир
1Магьа Ибрагьимдин наслиан вуйи, Давудрин тухмиан вуйи Месигь Исайин ата-бабйир:
2Ибрагьимдиз Исакь кӀуру бай гъахьну, Исакьдиз Якьуб, Якьубдиз Ягьудана дугъан чвйир гъахьну;
3Ягьудайиз Тамар кӀуру хпирикан Перецна Зерагь гъахьну, Перецдиз Гьецрон, Гьецрондиз Арам гъахьну; 4Арамдиз Амминадаб, Амминадабдиз Нецрон, Нецрондиз Салман гъахьну; 5Салмандиз Рагьабдикан Воаз, Воаздиз Рутдикан Обед, Обеддиз Ессе гъахьну; 6Ессейиз Ягьудия уьлкейин паччагь гъахьи Давуд гъахьну. Давудриз сифте Урияйихь хьади гъаши хпирикан Сулейман гъахьну; 7Сулеймандиз Ригьаб, Ригьабдиз Абия, Абияйиз Аса гъахьну; 8Асайиз Юсафат, Юсафатдиз Юрам, Юрамдиз Уззия гъахьну; 9Уззияйиз Ятам, Ятамдиз Агьаз, Агьаздиз Гьизкия гъахьну; 10Гьизкияйиз Манассей, Манассейиз Амон, Амондиз Яшия гъахьну; 11Яшияйиз (жугьдар Вавилондиз адау девриъ) Ехония гъахьну; 12Ехонияйиз (Вавилондиз адаъхъан) Шалтиэл, Шалтиэлиз Зеруббабел гъахьну; 13Зеруббабелиз Абиуд, Абиуддиз Элияким, Элиякимдиз Азор гъахьну; 14Азориз Садок, Садокдиз Агьим, Агьимдиз Элиуд гъахьну; 15Элиуддиз Элизар, Элизариз Маттан, Маттандиз Якьуб гъахьну; 16Якьубдиз, Месигь Иса гъапӀу Марʼямдин жилир Юсуф гъахьну. 17Гьаму саягъниинди, Ибрагьимдилан гъадабгъну Давудриина гъяйиз йицӀиюкьуб насил, Давудрилан гъадабгъну Вавилондиз адаайиз йицӀиюкьуб насил ва Вавилондиз адаъхъан Исайиина гъяйизра йицӀиюкьуб насил шула.
Месигь бабкан хьуб
18Месигь Иса гьамци бабкан гъахьну: Дугъан дада Марʼям Юсуфдиз хъирснайи. Марʼямдик швуваз гъягъяйиз Гирами Рюгьналан бицӀир кади шулу. 19Хъасин дугъан жилир гъахьи Юсуфдиз, учв гьялал кас вуди хьпаз лигну, Марʼямдикан чӀуру аваза ипуз даккунди, чан дирчу лишнар жиниди кьяляхъ апӀуз ккун шулу. 20Дугъу гьамциб хиял гъапӀиган, нивкӀукди дугъахьна Агъайин малайик дуфну, гьамци гъапну: «Давудгъярин бай Юсуф! Марʼям хпирди гъадагъуз гучӀ мапӀан, фицики Дугъак кайи БицӀир Гирами Рюгьналан ву. 21Марʼямди Бай апӀиди ва Дугъʼин Иса кӀуру ччвур иливидива, фицики Дугъу Чан халкь гунгьарихьан уьрхиди». 22Хъа вари гьаму ляхнар Агъайи Пайгъамбрин мелзналан гъапи исихъайи гафар кӀулиз удучӀвуз тамам духьнайидар ву: 23«Магьа, шурак БицӀир киршди, Бай апӀиди ва Дугъʼин Эммануил, яна „Ухьухъди Аллагь хъа“, кӀуру ччвур иливиди».
24НивкӀʼан хъиргиган, Юсуфди Агъайин малайикди гъаписи апӀуру, дугъу Марʼям хпирди гъадагъуру.
25Амма Марʼямди чан сарпи Бай апӀайизкьан, Юсуф дугъахь гьучӀври гъахьундар; хъа Бай гъашиган, Дугъʼин Иса кӀуру ччвур иливуру.
Currently Selected:
Матта 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
