Эвел 3

Гуннагь арайиз гъюб

1РАББИ Заанури гъапӀу гьяйванатаригъ варитӀан аьмалдаруб битӀ вуйи. Диди дишагьлийихьан гьерхру:

– Му багъдин сабкьан йимиш мипӀанай кӀури Заанури дугъридан гъапнийинхъа?

2Хъа дишагьлийи битӀраз гъапи:

– Заанури гъапунчуз: йимишар итӀуз шулучвхьан, 3амма багъдин кьялаъ айи гьаргъян учву дарчӀиди гъузбан бадали, митӀанай ва дурарик кучуз мукучанай.

4Хъа битӀру дишагьлийиз:

– Ваъ, йикӀидарчва, – кӀуру. 5– Думу йимишар гъитӀу йигъан ичв улар арццди ва учвузра ужʼвална харживал аьгъю хьибдичвуз. Заанурси хьидичва. Мидкан Заануризра аьгъя.

6Дишагьлийиз гьарин йимишар, итӀуз ужудар, уччвудар ва аькьюл туврудар вуди, рякъюру. Дугъу гьаргъян йимиш гъюдубтӀуру, ипӀуру, жилиризра тувру ва дугъура ипӀуру. 7Дурарин улар арццру, ва дурариз чиб гъяцӀалди айиб рябкъюру. Хъа жилирина хпири инжирин кӀажарикан чпиз юкьвнаан идитӀрудар апӀуру.

8Хъябяхъган жилиризна хпириз багъдиъ РАББИ Заанур лицурайиб ебхьуру, ва дурар гьарарихъ гьитӀикӀуру. 9РАББИ Заанури адмийиз дих апӀуру:

– Наан ава?

10Дугъу гъапи:

– Багъдиъ Уву лицурайиб гъеебхьунзуз. ГучӀ гъабхьунзуз, фицики гъяцӀалди айза, ва гъитӀикӀунза.

11– Шли гъапунвуз яв гъяцӀливаликан? – гьерхру РАББИ Заанури. – Узу увуз гъадагъа гъапӀу гьаргъян йимишар гъитӀнийва?

12Адмийи гъапи:

– Уву узуз туву дишагьлийи дурар тувунзуз, хъа узура гъитӀунза.

13РАББИ Заанури дишагьлийихьан гьерхру:

– Уву мици гьаз гъапӀунва?

Дишагьлийира жаваб туву:

– БитӀру алдатмиш гъапӀунзу ва гъитӀунза.

14Хъа РАББИ Заанури битӀраз гьамци кӀуру:

– Яв гъапӀубдиз дилигну, балайикк ккабхъдива: мал-къарайин ва гьяйванатарин арайиан идипну хьибдива – уву яв фунʼинди гъябгъюри йибкӀайизкьан бишируг ипӀури хьивдива. 15Увуна дишагьли душмнар апӀидизачву, ва ичв насларра чиб-чпиз душмнар хьиди: дугъан насли яв кӀул уьбгъидияв, ва уву думу наслин швякьраз галам йивидива.

16РАББИ Заанури хпириз кӀуру:

– Уву гъагъдиъ гъахьиган, яв аьзиятар Узу артухъ апӀидизаяв, аьзабариъди бицӀидар апӀидива. Яв жилирихьна яман тямягь хьибдияв, хъа дугъу увʼин аьхювал апӀиди.

17Хъа адмийиз РАББИ Заанури кӀуру:

– Хпирихъ хъебехъну, Узу увуз гъадагъа гъапӀу йимиш гъипӀунва! Уву багьна духьну жил балайикк ккабхъну. Вари яв уьмриъ жилин бегьер аьзиятниинди гъазанмиш апӀури хьидива. 18Зазарна чӀуру укӀар диди увуз тувди, хутӀлин укӀ ипӀури хьидива. 19Уву жиликан ктаур вува, ва думу жилиз кьяляхъ хътакидива. Думу вахт улубкьайиз, амкӀуъди уьл ипӀури хьидива. Уву жилин биширугтӀан дарва, ва хъана биширугдиз илтӀикӀидива.

20Адамди#3:20 «Адам» жугьуд чӀалниинди «адми» кӀуру гаф ву. чан хпириз Гьава#3:20 «Гьава» жугьуд чӀалниинди «уьмур» кӀуру гаф ву. кӀуру, фицики дугъкан вари инсаниятдин баб шулу.

21РАББИ Заанури Адамдизна дугъан хпириз гъидкьин палтар апӀуру ва дурариин алахьуру.

22Хъа РАББИ Заанури кӀуру:

– Магьа адми Ухьусир гъахьну – ужубна харжиб аьгъюр. Гьамус уьмрин гьаргъян, аьжал хътрур дархьуз, дугъу йимиш гъюдудубтӀри гьа!

23РАББИ Заанури думу, учв ктау ругдихьна жил тартиб апӀуз, Эдем багъдиан адауру. 24Адми утӀурккну, уьмрин гьарихьна вуйи рякъ уьбхюз, Эдем багъдин ригъ гьудубчӀвру терефнаъ кьудратлу малайикар-херувимар дерккру ва илтӀибкӀурайи цӀин тур дубсру.

Currently Selected:

Эвел 3: ТабГК

Highlight

Copy