Лука 11

Ӏисайи ученикарис дуьгӀе акьас ягӀар акьуная

1Сагелай Ӏисайи са мукьуйиъ дуьгӀе аркьай хьуная. ДуьгӀе акьуна ккиркӀугуна, Гин са ученикди пуная:

– ХӀаф, часра ягӀар акье дуьгӀебур акьас, ЯхӀъяйи учин ученикарис ягӀар акьуф суман.

2Ӏисайи пуная гебурис:

– ДуьгӀе акье миштти:

«Дад, Ве ттур гирами хьурай;

Ве Паччагьвел адирай.

3ТӀалаб аркьая чин Вакес гьер ягъас гуни.

4Гъил гъушен че гунагьарилас, чинна гъил гъуршанду кӀилди час Ӏайвелар аркьаттарилас.

ХӀа темехӀера хьас амарта час».

ТӀалаб аркьаттис ирцӀанде

5Ӏисайи пуная ученикарис:

– Белекин, чвагӀас гьинаичира ушуна сурӀуьшари дусттуралди пасе: «Е дустт, фаша зас бурджуни хьибу гуни. 6Захъди агьал рекъуьас дустт ачадиная, гис ес фера адава зе». 7Ти раккахъас пеб мункине: «Бизар маркьа зун, раккара хъикӀуна зун зе шиниккварихъай ахуникк ккея. Зафас вей адава гъайшина вас гуни ес». 8Зун чвас агъая, гъайшина дусттвел бадала дайичира, тис алчархьасе гъайшина ес кӀилди геректтар, ге тилас есттегьен алттадархьухаб. 9Зун чвас агъая: ТӀалаб аркьай акье – чвас есе, руцай акье чвас джикӀесе, хъирхӀай акье – чвас дахъасе. 10Гьер тӀалаб аркьаттис – ирцӀанде, руцаттис – джиркӀенде, хъирхӀаттис – дархъа. 11Нае дада чвагӀас, кӀиркӀа балугъ тин пичин, балугъин еринди есе илан? 12Е кӀиркӀа гъурагъал тин пичин, гьина гис гъурагъалдин еринди есе Ӏекьраб? 13Чун фидегьен Ӏаттар ичира, чвафас чве шиниккварис иджвел акьас верехаб, Заварин Дадафас хъара ппара акьас хьасе, Лифас ес хьасе Аллагьдин РуьхӀ те Учикес тӀалаб аркьаттарис.

Гьинан кьуватилди э Ӏисайи шейтӀанар адикаф?

14Сагелай, Ӏисайи адикуная инсан Ӏебаб аркьа шейтӀан. ШейтӀан аттушугуна, инсан гъургъуная. Гисаъ завал хьуна халкь муьхӀтал хьуная. 15Са Ӏудари гебуригӀас пуная:

– Ги шейтӀанар адикаф Велзевул агъа шейтӀанарин хӀаттин кумакилди э.

16Сасрабури, Ӏисайиас азмурар аттивай, заварин Ӏеламат агваракь агъай хьуная. 17Ӏисайи, гебурин фикирар ягӀай, пуная гебурис:

– Нае паччагьвел ичира, чиппин арайиъ душманвел аяф, ккеттархьасе, чиппин арайиъ дуьхьуьвел адава хизанара далгъванасе. 18Нагагь Иблис уч учихъай дадуьхьуьнахаб, фиштти э гин паччагьвел илгванф? Ппай чун Зас агъая, Велзевулдин кумак фай э пуна Зун шейтӀанар адикаф. 19Эгер Зун шейтӀанар Велзевулдин#11:19 Велзевул – Иблисин ттур э. кумакилди ичин адикаф, чве ученикари гьинан кумакилди э гебур адикаяф? Гьете ученикар хьурай чве диванчибур. 20Зун Аллагьдин кьуватилди э шейтӀанар адикаф, гагьа гьегилди аргвая Аллагьдин Паччагьвел чваалди адинаяф. 21Кьуват кея инсан, гъилив яракьра фай учин хулал алгъузуна аячин, гин шейъерис фера акьасттава. 22Амма фушчира гилас гуджлу адичин, фаттивуна гин эхӀттибар але яракьра, тӀараш акьасе гин хал. 23Захъди даваф, те Зас Ӏайвел аркьаф э. Захъай завал даркьаф, те фадархъаф э.

Инсандиас айчӀу шейтӀан хаб адегуна

24– Чиркин руьхӀ инсандиас айчӀугуна, руьхӀ адаркай аве хьед адава къумариъ, учис сакин мукьуйихъас руцай. Мукь даджикӀигуна, ги агъа: «Зун хаб весе те зун ай уйи хулади». 25Адегуна, гис аргва джикуна мертт акьуна хал. 26Хаб ушуна, ге шейтӀанди гъа учихъай ери шейтӀан сара, хъара училасра Ӏаттар, шейтӀанар учӀуна инсандиъ эркьва. Гегуна хаб инсандин гьава удигьай аттиласра Ӏае ве.

ХӀекьданди бахттлу

27Ӏисайи гебур агъагуна, халкьдигӀас са дишагьли гьавайикес пуная:

– Бахттлу э те баб, Вун хуна хӀа акьуф.

28Ппай Ӏисайи пуная:

– Бахттлубур э тебур, Аллагьдин гаф унихьуна, гисаъ агъагъилди аркьаттар.

Пайгъамбар Юнусан Ӏеламат

29Вей вей ппара халкь завал вей хьуная, Ӏисайи пуная гебурис:

– Ӏаттар э гьалдин инсанар. Ме инсанари тӀалаб аркьая заварин Ӏеламат, амма са Ӏеламатра агвасттава мебурис, са пайгъамбар Юнусан Ӏеламат дала. 30Ниневи дерейин халкьдис Юнус фиштти Ӏеламат суман хьучин, гьегиштти гьалдин инсанарис Инсандин КӀиркӀра Ӏеламат суман хьасе. 31Кьибла багухъас паччагь дишагьли гъайшасе кьияматин ягъа гьалдин инсанарихъай, ме гьалдин инсанарин диван акьас, ле паччагь дишагьли адеф идехӀела Сулейманан Ӏекьуллу гафарил юркӀв алихьас дуьнйайин те кӀилиъ ая хӀуькуматтиас. Агьал мисаъ чвахъай аяф, Сулейманаласра ХӀаф э. 32Кьияматин ягъа Ниневи дерейин халкь гъайшасе гьалдин инсанарин диван акьас, те халкьди чиппин гунагьар чиппин гардандиъ гъушухӀела, Юнуса Аллагьдин гаф чиппис пегуна. Агьал мисаъ чвахъай аяф, Юнусаласра ХӀаф э.

Инсандин лампа

33Сайира кикӀуна лампа алихьайдава даргва мукьуйил, я кичикӀайдава бахӀтикк. Лампа хъихьа кьасахъ, ачавереттарис Ӏекв агвас. 34Улар – инсандин лампа хӀисаб э. Улар сагъди агуна, кӀилди инсандис Ӏекв ичина аве, улар иттагуна, инсан мучӀаъ аве. 35Хъуттурфен гьа, ваъ ая Ӏекв мучӀе дахьас! 36Нагагь ваъ Ӏекв аяхаб, фера мучӀеф адавай, вун Ӏекун нур ичай ахьасе, лампайи вас учин Ӏекун нур ичаф суман.

Ӏисайи тахсирар кикӀуная фарисеярикна Ӏелимарик

37Ӏиса гъургъуна ккиркӀугуна, са фарисея хъаттфайшуная Ге учихъди абкьанттар акьас. Ӏиса ачушуна хулади, экьуная суфрайихъ. 38Фарисей муьхӀтал хьуная, Ӏисайи сагелай гуни ӀуьтӀанастти гъилар даӀуьччухӀела. 39Ӏисайи пуная гис:

– Магьа чун, фарисеяри, вартталас мертт аркьайчира чве вакъна курушка, чве гӀанаъ ппара гашна, Ӏайвел ая. 40Эй фагьумсузар! Сайи ду яратмиш акьунаф варттал багвра, гӀана багвра. 41Чве аяф Ӏеджизарис пай аркьай акье, гьетегуна чве кӀилди мертт хьасе. 42Язукъ э чве, фарисеяр! Чун ирцӀанде чве багъдиъ узуна уриариласра кехӀей хъара джуьре ӀуькӀериласра кехӀей закатин йицӀудпе пай, амма Аллагьдин дузвелдихъасна кканевелдихъас, чве кӀвалас ушуная! Удигьай гьеле э кканди аяф, джуьре курарихъасра кӀвалас девей. 43Язукъ э чве, фарисеяр! Чвас кканве экьвас дуьгӀебур хура хулариъ хӀуьлматин мукьарил. Чвас кканве гимил чун тегӀрифилди кьабул аркьагуна. 44Язукъ э чве, чун ттаргъунар хъудава некьвар суман э: инсанар ве гисарилас, некьвар ккеяф дагӀай.

45Са Ӏелима пуная Ӏисайис:

– МегӀелим, ле гафарилди Вун часра гиран аркьая!

46Ӏисайи пуная:

– Язукъ э чвера, Ӏелимар! Чун гъас деве къакъ алчихьа инсанарил, амма чун тӀуб тӀубук кирхӀайдава гебурис кумак акьас. 47Язукъ э чве, чун, чве дадари кӀе пайгъамбарарис пирар алихьахӀела. 48Чун шихьидвел аркьая, хӀекь э пуна, чве дадари акьуна курар: чве дадари луькӀей хьуная пайгъамбарар, амма чун те пайгъамбарарис пирар алихьая. 49ДехӀела хьуная Аллагьди пунаф: «Зун гьикасе гебурилди пайгъамбарарна вакилар, амма сур пайгъамбарарна вакилар кӀесе гебури, сасрабурис Ӏайвелар акьасе». 50ДехӀела чун, гьалдин инсанари, джуваб йина ккандея ме дуьнйа яратмиш акьугуналас мич кӀина пайгъамбарарихъас, 51ХӀебилилас Закарияйилди. (Закария йирхӀуна кӀиная Аллагьдин хулаъ садакьа аркьа мукьуйина Гирами мукьуйин арайиъ.) Зун чвас агъая, чун джалла курарихъас джуваб есе. 52Язукъ э чве, Ӏелимар, чун чваалди гъушуна Аллагьдин гафттин гуьлегвар, е чун ачушундава, е те ачевес ккандеттар ачатундава.

53Ӏиса ушугуна, фарисеярна Ӏелимар ахьуная фи тахсирар кикӀагьан агъай Ӏисайик, Ӏисайикес хъел адина. Гебури гьер джуьре суалар алихьай хьуная Ӏисайис, 54алгъузуна фи аттархьайчугас Гин сивиас.

Currently Selected:

Лука 11: AGU

Highlight

Copy