Mark 8

Jesu in Tullite Vak

1Tua hun laitakin mihonpi dang khat va kikhawm uh hi. Amaute in nek ding bangmah nei lo uh ahi ciangin Jesu in a nungzuite sama, 2 "Hih mite ka khuatuah hi. Kei kianga hong om zawh uh ni thum tak pha khin ta-a, a nek ding uh bangmah a nei kei uh hi. 3 Gil kialpi in innah ciahsak leng pawlkhatte gamlapi pana hong pai uh ahi manin lamkalah phuk-hong vei-in puk ding uh hi," a ci hi.#Mt 9:36; 15:32

4 A nungzuite in, "Ahi ta zongin gamsung hi bangah mihon hizah ta vak nading an koi pan kingah thei ding ahi hiam?" ci-in a dawng uh hi.

5 Jesu in, "Anlum bangzah na nei uh hiam?" ci-in a dot ciangin,

"Sagih," ci-in a dawng uh hi.

6 Amah in mihonpite leitual ah a tusak hi. Tua anlum sagihte la-a, lungdam a koh khit ciangin balkhama mipite a lui dingun a nungzuite pia-a, amaute in mipite a lui uh hi. 7 Amaute in ngasa neu tawmkha zong a nei uh hi; amah in tuate hangin zong lungdam a koh khit ciangin a hawmkhia dingin nungzuite a sawl hi. 8 Mipite in ne uh a, a kham pikpek uh hi. An khamval teng nungzuite in a neng a themin a top uh leh bawm sagih dimtak a pha hi. 9 Tua lai-ah pasal tulli bang a om hi. Jesu in amaute a ciahkhiatsak khit ciangin 10 a nungzuite tawh gunkuangah tuangin Dalmanutha kual lam a zuan hi.#Mt 14:19

11 Pharisee-te va pai-in Jesu kiangah thu a dong uh hi. Amah a zia-etna un, amaute in vantung panin lim khat a ngen uh hi. 12 Amah nakpi in khuisa-a, "Bang hangin hih khang mite in lim lamdang ngen uh ahi hiam? Thutak kong geninah, amaute tungah lim bangmah a kilak kei ding hi," a ci hi. 13 Tua ciangin Jesu in amaute nusia in gunkuangah tuang kika, a galkhat lamah a galkah hi.

Pharisee-te le Herod Silngo

14 Nungzuite in gunkuang sunga a neihsa uh anlum khat longal an puak ding a mangngilh uh hi. 15 Jesu in amaute kiangah, "Pilvang un, Pharisee-te le Herod silngo panin na kidawm un," ci-in a vauhilh hi.#Lk 12:1; 1Co 5:6-8

16 "An i neih loh hang hi," ci-in amaute khat le khat a kikum uh hi.

17 Jesu in amaute kikupna a theih ciangin, "Bang hangin note, na an neih loh uh kikum tazen na hi uh hiam? Tu dongin mu nai lo, theitel nailo lailai na hi uh hiam? Na lungtang uh kikhauhsak lai ahi hiam? 18 Mit nei napi in mu lo a, bil nei napi in za lo na hi uh hiam? Hih thu phawk lo lailai na hi uh hiam? 19 Mi tulnga adingin anlum nga ka balkhap lai-in athem aneng na topte uh bawm dim bangzah pha ahi hiam, na phawk lai uh hiam?" a ci hi.#Isa 6:9-10; Mk 6:30

"Sawm-le-nih," ci-in a dawng uh hi.

20 "Mi tulli ading anlum sagih ka balkhap lai-in athem aneng na topte uh, bawm dim bangzah pha ahi hiam?" ci-in a dot ciangin, amaute in,

"Sagih," ci-in a dawng uh hi.

21 Jesu in amaute kiangah, "Theitel nai lo na hi uh hiam?" a ci hi.#Mk 6:52

Bethsaida ah Mittaw khat Damsak

22 Amaute Bethsaida a tun uh ciangin mi pawlkhat in mittaw khat va paipih uh a, Jesu in a lawn nadingin a thum uh hi. 23 Amah in mittawpa a khutin kai-a, khuanawl ah a paikhiatpih hi. Jesu in tuapa mitte a cil phih-a a tungah a khutte a ngak khit ciangin, "Na khatpeuh na mu thei hiam?" ci-in a dong hi.

24 Amah khuadak a, "Mite ka mu hi; amaute singkung lampai bang uh hi," a ci hi.

25 Jesu in a khutte tuapa mitte ah a nga kik hi. Tua ciangin a mit kihongin khua mu thei-in na khempeuh siang sinsenin a mu hi. 26 Jesu in, "Khua sungah lut kei in," a#8.26 Khutgelh pawlkhatah pai kei inla khua sungah kuama kiangah gen kei in ci-in amah a ciahsak hi.#Mt 8:4

Peter in Christ a Pulakna

27 Jesu le a nungzuite, Caesarea le Philipi kima khuaneute a tun dong uh a pai uh hi. Lam a pai laitakun amaute kiangah, "Mite in kei kua hi, hong ci uh hiam?" ci-in a dong hi.#Lk 9:18

28 Amaute in, "Kimkhat in Baptize-pa John hi; adangte in Elijah hi; pawlkhatte leuleu in kamsangte lakah khat hi, hong ci uh hi," ci-in a dawng uh hi.#Mal 4:5; Mt 3:1

29 "No e leh, kei kua hi nong ci uh hiam?" ci-in a dong kik hi.

Peter in, "Nang tua Christ na hi hi," b#8.29 Ahikeh Messiah "Christ" (Greek) le "Messiah" (Hebrew) a nih in "Sathau-Kinilhpa" cihna ci-in a dawng hi.#Jn 6:69; 11:27

30 Jesu in ama thu kuamah a hilh loh nadingun amaute a vauhilh hi.#Mt 16:13

Jesu in a Sih ding Genkhol

31 Tua ciangin Mihing Tapa in tampi thuak pelmawh dinga, upate, siampi makaite le thukham siate in amah nolh ding uh a, pel loin amah kithatin ni thum khit ciangin a tho kik ding hi, cih thu amaute hilh a kipan hi. 32 Amah in hih thu teltakin gena, tua ciangin Peter in amah tang paikhiatpih in a tai hi.#Mt 16:21; Ns 2:23

33 Ahi hangin Jesu kihei-a, a nungzuite enin Peter tai a, "Satan aw, ka nungah kihem in! Pasian thute ngaihsun loin mihing thute na ngaihsun hi," a ci hi.

34 Tua ciangin a nungzuite le mihonpite ama kiangah sama, "Mi khatpeuh in ka nung hong zuih nop leh pel loin amah le mah kinialin, ama singlamteh kisuanin hong zui ding hi. 35 Ahang in, a nuntakna c#8.35 Greek kammal ah nuntakna ahikeh kha; tg. 36 ah zong a honkhia nuam peuh in taan dinga, ahi hangin kei hang le lungdamna-thu hangin ama nuntakna a taan peuhmah in a nuntakna a honkhia ding hi. 36 Mi khatin leitung buppi a neih hangin a hinna taan leh bang phatuam ding ahi hiam? 37 Ahi kei leh mi khatin ama hinna bang tawh khek thei ding ahi hiam? 38 Hih angkawm le mawhdim khang mite hunah keimah le ka thu a zumpihte, Mihing Tapa in a Pa minthanna-in ama vansawltak siang thote tawh hong pai ciangin amaute a zumpih ding hi," a ci hi.#Mt 10:38; Lk 12:9

Currently Selected:

Mark 8: ZIV

Highlight

Copy