Ephesa-te 2
2
Christ Sungah Nungtasak
1Note na hi uh leh na mawhnate uh le na khialhnate uh sungah na si khin uh a, 2 hih leitung thu, tu laitaka thumang lote sunga na a sem kha tua huihgam ukpa na zuih lai-un, tuate sungah na nungta uh hi. 3 Hun khat lai-in eite khempeuh zong amaute lakah i nungta a, i mawhdim pianngei a#2.3 Ahikeh eite ci-le-sa ukluatna tangtun in pumpi lunggulhnate le ngaihsutnate zui-in i om hi. Midangte bangin pianngei in, thangpaihna nuai-a omte i hi hi. 4 Ahi hangin lainatna a hau Pasian in a lian mahmah eite hong itna hangin 5 khialhna sungah si-a i om laitak nangawnin Christ tawh eite hong nungtasak khawm - hehpihna hangin hotkhiat na hi uh hi. 6 Pasian in Christ tawh eite hong thosak khawma, vanlam gamah Christ Jesu sungah amah tawh hong tukhawmsak hi. 7 Christ Jesu sunga a migitna hanga eite tunga hong kigenkhia tehpih bei ama hehpihna kicinna, hong tung ding khanghunte ah eite tunga hong kilatsak nading ahi hi. 8 Ahang in, hehpihna hangin upna tungtawnin hotkhiat na hi uh hi. No le no a na ngah uh hi loin Pasian letsong ahi hi - 9 kuamah a kisialh theih loh nadingin sepna hang ahi kei hi. 10 Ahang in, eite sep dinga Pasian geelkholh, nasep hoih sem dinga Christ Jesu sunga kipiangsak Pasian khutsiam i hi hi.#Ro 3:24; Col 2:13-15; Tit 2:14
Christ Sungah Khat
11 Tua ahi manin nidang lai-in pianngei in Gentile-te na hi uh a, amau le amau "vunat" (mihing khut tawh pumpi tunga ki-at) a kicite in note "vunat loh" hong cih uh phawk unla, 12 tua hunlai-in note Christ tawh kikhenin Israel mi hina pan kipuaseh in, kam ciamna thukhunte-a tan nei lo gamdang mi hi-in, lametna a om lo le Pasian lo-a leitunga om na hilam uh phawk gige un. 13 Ahi hangin khatvei lai-a gamlapi-a om note, tu-in Christ sisan tungtawnin Christ Jesu sungah hong kinaisak ta hi.#Isa 14:1; Col 1:20
14 Ahang in, nihte khat hong suaksak a, kikal dalna ahi kilemlohna kulhte a phelkhia pa a mahmah eite lemna hi-in, 15 amah in ama ci-le-sa ah tua thukham le thukham’ thupiakte le ngeinate a beisak hi. Mi nihte panin mi thak khat a mahmah sunga piansak ding a ngimna hi-a, tua hangin kilemna bawlin 16 hih pumpi khat sungah amaute gel singlamteh tungtawnin Pasian ah kilemkiksaka tua tawh amaute kilang neihna a lamang hi. 17 Amah hong pai-in no a gamlapi-a omsate tungah kilemna thu, a nai-a omsate tungah zong kilemna thu mah hong gen zo hi. 18 Ahang in, ama tungtawnin eite in Kha khat tawh Pasian mai-ah luttheihna i nei tuak hi.#Jn 14:27; 1Co 12:13
19 Tua thu hangin note mikhual le gamdang mi hi nawn loin, Pasian mite tawh tualsung mi na hikhawm uh a Pasian innkuan sung mite na hi uh hi, 20 innkiu suangpi Christ Jesu mahmah tawh sawltakpite le kamsangte bulkip tunga hong kilam na hi uh hi. 21 Ama sungah tua inn buppi kizomkhawm a, Topa sungah a siangtho biakinnpi a suak dingin a khang hi. 22 Tua hi-a note zong Pasian ama Kha-in a tenna a suak dingin a kilamkhawm toto na hi uh hi.#1Co 3:16; 1Pe 2:4-8
Currently Selected:
Ephesa-te 2: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission
