Nasepte 25

Festus Mai-ah Thusitna

1Tua gam a tun zawh ni thum khit ciangin Caesarea panin Jerusalem ah Festus pai to a, 2 tua munah siampi makaite le Jew makaite ama mai-ah dingin Paul a mawhmatnate uh a gen uh hi. 3 Amaute in Festus kiangah amau a angvanna-in, a manlang theithei a Jerusalem ah Paul a puak nading a ngen uh hi. Ahang in, amaute in lamkal ah buksimin Paul thah nading a kigingkhol khin zo uh hi. 4 Festus in, "Caesarea ah Paul a kikhumsa hi a, kei mahmah zong tua lai-ah ka paipah ding hi. 5 Na makaite uh pawlkhat kei hong zuisak unla, tua mipa in hihkhialh nei ahileh tua lai-ah a mawhmatna uh gen uh hen," ci-in a dawng hi.

6 Amaute tawh ni giat hiam, ni sawm hiam a omkhawm khit ciangin Caesarea ah paisuka, a zing ciangin thukhenna zum ah kahin a mai-ah Paul a puak nadingun thu a pia hi. 7 Paul a kilak ciangin Jerusalem pana paisuk Jew-te a kimkotah ding uh a, kiteltaka a lah theih loh uh mawhmatna nasia mahmah tampi tawh a mawhsak uh hi.#Mk 15:3

8 Tua ciangin Paul in a kihutna thu gen a: "Jew-te thukham tungah ahi zongin, biakinnpi tungah ahi zongin Caesar tungah ahi zongin khialhna bangmah ka bawl kei hi," a ci hi.#Ms 28:17

9 Festus in Jew-te angvan-nopna khat nei a, Paul kiangah, "Hih mawh matna mah hong kisit dingin Jerusalem a paitoh ding na ut hiam?" ci-in a dong hi.#Ns 24:27

10 Paul in, "Kei hong kisit nading a kilawm mun Caesar thukhenna mai ah tu-in ka ding hi. Nang mahmah in zong siangtaka na theihsa bangin Jew-te tungah bangmah khialhna ka bawl kei hi. 11 Ahi ta zongin sihna thuak nading donga mawhna ka neih leh sih ding ka nial kei hi. Ahi hangin hih Jew-te hong mawhmatna a maan lopi ahileh amaute tungah kei a piak nading thuneihna kuamah in a nei kei hi. Caesar tunga ka thu ka tun hi," ci-in a dawng hi.#Ns 26:32; 28:19

12 Festus in ama vaihawmpihte tawh a kikup khit uh ciangin, "Na thu Caesar tungah na tun zo hi. Caesar tungah na pai ding hi!" ci-in a thukhenna a pulakkhia hi.

Festus in Kumpi Agrippa Kuppih

13 Ni tawm vei khit ciangin Kumpi Agrippa le Bernice in, Festus zahtakna pia dingin Caesarea a tung uh hi. 14 Tua lai-ah ni tampi a taam khit uh ciangin Festus in Paul thu, kumpipa a kikuppih hi. Amah in, "Hih lai-ah Felix in thong kiasa-a a nusiat mi khat a om hi. 15 Jerusalem ah ka pai ciangin siampi makaite le Jew-te upate ama langah pangin amah mawhpaih dingin hong ngen uh hi,#Ns 24:1

16 "Ken amau kiangah, ‘Mi khatpeuh a kimawhmat ciangin amah a mawhmatte mai-ah dinga, a mawhmatna uh pan a kihut nading hun hoih a ngah khit mateng, piakkhiat ding Rome-te ngeina hi lo hi,’ ci-in ka hilh hi. 17 Hih mun kei kiang hong tut uh ciangin a thu uh zia-olsak loin a zing ciangin thukhen zum ah ka kah pah a, tua mipa hong paipih nadingun thu ka pia hi. 18 Amah a mawhmatte thugen dinga a din uh ciangin ka upmawh bangin gitlohna lian khat beek tawh a mawhmat kei uh hi. 19 Tua sangsik in, amau biakna thu le Jesu kici mi sisa khat, Paul in nungta hi, a cih thu tawmkhat kitotpih uh ahi hi. 20 Tua thu ka kantel nading ka thei zo kei a, ‘Jerusalem ah paito in hih mawhmatna thu mah tua mun ah hong kisit leh na ut hiam?’ ci-in amah ka dong hi. 21 Paul in a thu Rome-te kumpipa thukhen dinga a tut ciangin Caeisar tunga ka puak theih mateng thong sunga khum dingin thu ka pia hi," a ci hi.

22 Tua ciangin Agrippa in Festus kiangah, "Hih mipa thugen kei mahmah in ka za nuam hi," a ci hi. Amah in, "Ama thugen zing ciangin na za ding hi," ci-in a dawng hi.#Ns 9:15

Agrippa Mai-ah Paul

23 A zing ciangin Agrippa le Bernice thupitakin hong pai uh a, kumpipa nasem zaliante le khuapi uliante tawh kikhopna inndei lianpi sungah a lut uh hi. Festus in thu pia a, Paul kilutpih hi. 24 Festus in: "Kumpi Agrippa le kote tawh a om khawmte khempeuh aw, hih mipa na mu uh hi! Jew mite khempeuh in, Jerusalem le hih lai Caesarea a kei tungah a thu hong tun uh a, amah hingkhawi lai ding hi peuhmah lo hi, ci-in kiko uh hi. 25 Sihna thuak nading zahin ama gamtatna bangmah ka mu kei hi. Ahi hangin amah in Rome kumpipa tungah a thu tun ahi manin amah Rome ah puak dingin ka khensat hi. 26 Ahi hangin a Thupi Kumpipa tungah ama thu ka gelh ding thu kician bangmah ka nei kei hi. Tua ahi manin na thudotnate panun gelh ding khatpeuh ka neih nadingin noteng khempeuh le a diakdiak in nang Kumpipa Agrippa mai-ah amah kong paisak hi. 27 Ahang in, a kimawh matna om lopi a, thongkia khatpeuh a bana sawn ding, thu kicingtak hi thei lo hi, ci-in ka ngaihsun hi," a ci hi.#Ns 23:9; 26:30

Currently Selected:

Nasepte 25: ZIV

Highlight

Copy