MAK 9

1Ko nge mo veve lawera vena: “A hogo, nam veve lawe gimiu ve lavasigi denire ram labe tahingaha rain he mate tea vin dadari ingere rain lehi na ute hi i God mo ratahigi lolona vin vanai mena huireana.”

A tarabesi Jisas mo varavara

2Lo tagui rani gaiono i Jisas mo lai Bita, Jemis ko i Jon meie, ko mo tomueginire ram hage gahera lo ului vusi u eno namawe. Lune ram leo bibie, a tarabesine mo dori, 3ko a luqana mo mavute ko mo varavara garagara denie hi ve ihine tea lo ure vin solo mwasaraginie; ihine tea lo vin he solo lai tea vena mavute mwerehi. 4Siu ingere gaitolu ram lehi Elaeja ko i Mosis, rom laqalaqa mei Jisas. 5I Bita mo veve lawe Jisas vena, “Huhui, u garea ve da toga hano. Ve da vai na vale siusiu gaitolu, gatagale hurigo, gatagale huri Mosis ko gatagale huri Elaeja.” 6Huri i Bita he ilo tea ve vin veve na hava gineu tea, a vevenagi ingere ram matagu garagara. 7Ko a dodo mo vonai mo luluwegi gorora, ko a dilogi mo vonai dena dodo hi, mo veve vena, “Nge ngaha i Netuku, a Mweratabe. Nen ronghurie.” 8Ko siserigi ram leo dalibulu, ra he lehi ihine tea vage nge i Jisas hogosie meire.

9Lune ram hivo dena vusi, i Jisas mo gato gorora mo veve vena: “Nen mese veve lawe hine tea huri na hava gineu neu leo, vin dadari lune ineu i Netui Tangaloi nain maraga taligu den mateana.” 10Huri ram rongo na nona leo, nge ram tauvuigi ram veve veveginire vena, “A maraga taligu dena mateana, a iloilogi mwerehilogo?” 11Ko ram hui Jisas ram veve vena, “?Huri hava gineu ira huhui talo Leo Hora noi Mosis ram veve vena a leo u labe ve i Elaeja mo vanai gitomue?” 12Nge mo duvi lawera, mo veve vena, “A hogo, Elaeja u vanai gitomue ve vin vei vagatai na gineu doluegi.? Nge huri hava gineu a Reve reve Gogona ram veve vena i Netui Tangaloi vin rongo gagarasi garagara ko rain tuli vohoginie? 13Nge ineu nam veve lawe gimiu ve i Elaeja u vanai beno, koa sinobu rau vei na hava gineu lawea mo huri na nora tarani, mwere hi a Reve reve Gogona rau reve hurie.”

I Jisas mo vagamwasoi na mwalakelo a vui esi u toga lune

14Lune i Bita, i Jemis ko i Jon ram himei dena vusi ram bubugi meire rorongtagi lavasigi, ram lehi na sinobu lawua ram sone dalire. A huhui lavasigi talo Leo Hora noi Mosis ram vui garogi meire rorongtagi. 15Nge siserigi lune a sinobu ram lehi Jisas, ingere ram awogi garagara, ko ram toa hurie ve ran lai vurugeginie. 16I Jisas mo hui na nona rorongtagi, mo veve vena, “?Igimiu nem vui garogi meire huri na hava gineu?” 17A tangaloi gatagale denire sinobu mo duvi lawea, mo veve vena, “Huhui, nau lei netuku vanai huri ve goin lehe, a vui esi lune, he laqa lai tea. 18Vataha tarogi a vui hi mo vaie, mo tulie hivo lo tano, ko a davine mo hale, ko nge mo gasi ngerengere, ko mo toratoraga. Nau hui na nomu rorongtagi ve ran vuro luae, nge rahe vai lei tea. 19I Jisas mo duvi lawera mo veve vena, “Igimiu ra tangaloi ladosavi! Hatie nomiu ladohogo lumiu! ?Nain toga mei gimiu vin dadari tagaha? ?Nain gagarasi mei gimiu vin dadari tagaha? Nen lai na mwalakelo vonai laweau.” 20Siu ram laie vano lawe Jisas, ko siserigi a vui esi mo lehi Jisas, mo vai na mwalakelo mo matemategi vule, ko mo soi sulo tano, mo talele lategi ko a davine ram hale. 21I Jisas mo hui tamana, mo veve vena, “?A gineu ngaha u veie a mahavagi u qaravu mwere hilogo?” Nge mo duvi mo veve vena, “Lo mahogi hi mo maresu teu. 22Vaga saosao a vui esi mo vai leo vena wehe, mo tulie talolo avi ko talolo wai. Tare ve gu vei lei, gon hagavi gamaru ko gon bului gamaru.” 23I Jisas mo veve lawea vena, “?Tare iniko sibomu gu veilei! Hine tea hi mo ladohogo a gineu doluegi rain vei mwerehi mo tarani.” 24Siserigi tamana mo ulo mo veve vena, “Nam ladohogo, nge a noku ladohogo he tatarise tea. Gon bului na noku ladohogo.”

25Lune i Jisas mo lehi na sinobu ram sone mo siseri dalire ingeie mo hora na vui esi vena, ?Iniko a vui esi hi gom vai na tangaloi rahe gato lai tea ko rahe rongo lai tea. Nam navu siaga denigo ve gon mwalue dena mwalakelo ngaha ko goin he ahu tea vohogi lolo lolona taligu?!” 26A vui esi hi mo ulo gagadiri ko mo vaie mo matemategi vule u esi garagara ko mo mwalue denie. A mwalakelo hi mo mwere ve u mate beno; giniehi, a sinobu doluegi ram veve vena, “Ingeie u mate!” 27Nge i Jisas mo hako lo limei mwalakelo, mo hau ragasie hage, ko nge mo labe.

28Lune i Jisas mo ahu lolo vale, a nona rorongtagi ram bei huihui rorongo ginie, ram veve vena, “?Huri hava gineu gamai gahe vai lei tea ve gan vuro lue na vui esi?” 29I Jisas mo veve vena, “A tataro hogosie mo vuro lai na vui esi, nge hatie gineu wagineu vage.”

I Jisas mo veve taligu huri na nona mateana ko nona maragaana

30Ngere ram siregi na vanue hi ko ram vano tuturedu a Kalili. I Jisas he tarani tea ve ihine tea vin ilo ve ingeie logo, 31huri nge mo huhui na nona rorongtagi, mo veve vena, “Rain lei i Netui Tangaloi talo limara tangaloi, ve rain vei vagamatea, ko lo tagui rani gaitolu nge vin maraga taligu.” 32Ngere rahe ilo tea vurugegi huri na nona leo, nge ingere ram matagu ve ran huie.

?Ihine hi u lawua garagara?

33Lune ingere ram vonai a Kabeniam. Ko lo tagugi rau soro lolo vale i Jisas mo hui na nona rorongtagi mo veve vena, “?A hava gineu hi igimiu neu vui garogi lune lo turegi?” 34Nge ingere rahe duvi laie tea, a vevenagi lo turegi ingere rau vui garo meire sibora lo turegi huri ve ihine tea hi gatagale denire u lawua garagara. 35I Jisas mo toga hivo, mo warera hangavulu domwagi gairue vonai lobena, ko mo veve lawera vena, “Tare ve ihine mo tarani vena muegi, vin teue sibona lo vagasigi, ko vin voragi na tangaloi tabanagi lawera doluegi. 36Siu ingeie mo lai na maresu, ko mo taue lo livugara, ko mo ragovie, mo veve lawera vena, 37“Tare ve ihine tea mo lai vurugegi na maresu gatagale mwere ngaha lo henaku, nge mo lai vurugegieu; ko tare ve ihine mo lai vurugegieu, nge he lai vurugegieu tea hogosie, nge ingeie hi vage u horau vonai.”

Ihine tea he tavului vuro tea goro gide, ingeie mei gide

38I Jon mo veve lawe Jisas vena, “Huhui, gau lehi na tangaloi mo vuro lai na vui esi lo henamu, ko gam gato goroe, a vevenagi ingeie hatie talo noda burigi.” 39Nge i Jisas mo veve vena, “Nen mese gato goroe, a vevenagi ihine tea mo vai na gineu managi lo henaku, vin he veve asiesigi lai eu tea. 40Huri ihine tea he tavului vuro tea goro gide, ingeie a noda. 41Huri tare ve ihine tea mo bete na wai inuinu lawe gimiu a vevenagi igimiu ira noi Kraes, a hogo, ingeie vin lei na nona gaitawe.

A kaliana talo galegaleasi

42“Tare ve gatagale denire maresu ingere, ngaha mo ladohogogieu, ko ihine tea mo vaie mo soi lo galegaleasi, u garea ve a tangaloi hi rain ligo dara na mwagorona mena vatu lawua ko ram dudunie lolo tahi. 43Tare ve a limemu mo vai tatureginigo lo nomu ladohogo, gon tai vohoginie! U garea meigo huri ve goin ehu lolo mwasoana mena lime mautu denie hi huri ve goin ehu lolo mateana radu mena lime gairue, lolo avi vin he mate lai tea. 44Aiehi, ‘A nuvara rain he rovo lai tea, ko a vire vin he mate lai tea.’ 45Tare ve a karumu mo vai tatureginigo, gon tai vohoginie! U garea meigo huri ve goin ehu lolo mwasoana mena karumu gatagale denie hi huri ve rain tuligo lolo mateana radu mena karu gairue. 46Aiehi ‘a nuvara rain he rovo lai tea, ko a vire vin he mate lai tea.’ 47Tare ve a matamu mo vai tatureginigo, gon lai vohoginie! U garea meigo huri ve goin ehu lolo mwasoana garaqa God mo ratahigi lolona mena matamu gatagale denie hi huri ve rain tuligo lolo mateana radu mena matamu gairue, 48aie hi ‘a nuvara rain he rovo lai tea, ko avire vin he mate lai tea.’

49“Huri vataha na tangaloi vin vei mwasaraginire gina avi mwere na rugurugu mo vai mwasaraginie gina mavai. 50A mavai u garea. ?Nge tare ve a mavai mo vaga salagi na gogonagi, vin vei gogonaginie taligu mwere hilogo? Nen koko goro na mavai lolo lolomiu, ko nen vui toga tamwata.”

Currently Selected:

MAK 9: HNT

Highlight

Copy