MAK 5

I Jisas u vuro lue na vui esi dena tangaloi ta Kerasa

1Ko ram dadari lo tavului Wai ta Kalili lo loloi venue ta Kerasa. 2Ko siserigi i Jisas mo rovo dena aka, ingeie mo sakagi na a tangaloi gatagale mo bei mwelue dena malanga vatu ram tulegi na tarabesi tangaloi rau mate aiehi. 3A tangaloi hi a vui esi lune ko mo toga lolo malanga vatu. Rahe vau laie te taligu gena seni; 4vagasaosao rau veu bibi na karune ko a limana, nge gesegi mo roto na seni ngerehi lo karune ko lo limana. A tangaloi hatie nora huireana ve u tatarise ve rain tugoroe. 5Bongi ko rani mo dige lategi lolo malanga vatu ko lo vusi, mo ulo lategi ko mo teveie sibona gena vatu. 6Mo tino vagahao mo lehi Jisas; mo toa siaga, mo vano mo sisiqeu hivo lo nagona, 7mo ulo gena dilogi u lawua mo veve vena, “Jisas, i Netui God u Hahale garagara! ?Gom tarani na hava gineu meieu? Neu nam hariginigo lo henai God, gon mese vai garasieu! 8(Mo veve mwerehi huri Jisas mo veve lawea vena, “Vui esi, mwalue dena tangaloi hi!”) 9Ko i Jisas mo huie mo vena, “?A henamu hine?” Mo duvi goroe vena, “A henaku ‘A burigi’ a vevenagi gamai gau sao!” 10Ko mo hui siaga den Jisas huri ve na mese hora vohoginire dena ute tahi. 11A buri boe sao aie ram huhue lo vusi. 12A vui esi hi ram hui siaga den Jisas vena, “Gon hora gamai lawe na boe, huri ve gan ahu lolo lolora.” 13Ko mo horara. Ko a vui esi hi ram mwalue dena tangaloi hi, ram ahu lolo boe. Ko a buri boe doluegi, u tatarise teri vagarue, ram toa ram hivo lo bahai wai, ram qale talolo wai, ram dono. 14A tangaloi hi rau leo goro na boe ram toa vano, ram veve lategi lo qatui venue lawua ko lo togagi venue dalie. Ko a sinobu rau vano ve ran lehi na hava gineu hi u vei. 15Ram vonai lobei Jisas ram lehi na tangaloi hi a vui esi u toga lune mo toga tau u luqeluqe garea ko a qatune u garea taligu, ko ingere ram matagu liu. 16A tangaloi lavasigi ingere rau lehe ram valu huri lawe na sinobu a hava gineu u vei lawe na tangaloi hi a vui esi rau toga lune, ko ingere ram laqagi huri na boe ngerehi. 17Siu ingere ram tauvuigi ram navu dein Jisas huri ve na vano dena vanuara. 18Lune i Jisas mo kalo sulolo aka, a tangaloi hi a vui esi rau toga lune mo hui Jisas vena, “?Gon siregi ve ineu nain vano meigo?! 19Jisas he sireginie tea, lawea nge mo veve lawea vena, “Gon mule lo valemu ko lobei re havamu, gon veve lawera huri na gineu lawua a Huqe u veie lawego, ko ve u hagavigo!” 20Ko a tangaloi hi mo tudori mo vano mo veve lategi lo qatui venue hangavulu huri na gineu lawua i Jisas u veie lawea; ko a tangaloi doluegi ram awogi.

I Jisas mo vagamwasoi na maresu vavine i netui Jaerus mena vavine mo sikeli na luqana

21Lune i Jisas u vano taligu lo tavului wai ta Kalili, a sinobu sao ram sone goroe lo mwararai wai. 22I Jaerus, nge a tangaloi lawua gatagale goro na valei soneana, mo vonai mo lehi Jisas, mo soi hivo lolo karune, 23ko mo navu garagara denie vena, “I netuku a maresu vavine mo sege u liu. Gon vonai gon tau na limemu lune huri na mwaso taligu!” 24Siu i Jisas mo vano meie. Ko a sinobu sao ram hurie ram susuni dalideli ginie. 25A vavine gatagale a dai qaravu u veie a higao hangavulu domwagi gairue. 26A vavine hi mo rongo gagarasi u liu, mo vano lobei na dokta u sao. A nona homu mo rovo, nge a gana segeana he rovo tea, nge mo asi esi vage. 27A vavine hi u rongo na roro huri Jisas beno, siu mo vonai meire sinobu lo tagui Jisas. 28Nge ingeie mo lado vena, “Tare ve nai sikeli na luqana hogosie nai mwaso. 29Mo sikeli na luqei Jisas, ko a dai qaravu hi mo mautu vagatagale, ko mo rongo lolo betune huri ve a gana segeana u rovo. 30Ko siserigi i Jisas mo rongo huri ve a nona managi u vano denie, mo tudori goro na sinobu mo veve vena, “?Ihine u sikeli na luqeku?” 31Ko a nona rorongtagi ram duvi goroe vena, “Gom lehi na sinobu lawua ngaha ram vui susuni dalibulu gorogo. ?Huri hava gineu gom hui ve ihine mo sikeligo?” 32Nge i Jisas mo leo dalibulu huri ve ihine hi u veie. 33A vavine hi u ilo beno ve a hava gineu u vei lawea, mo matagu ko mo rurururu; mo vonai mo sisiqeu hivo goroe mo veve hogo doluegi lawea. 34I Jisas mo veve lawea vena, “Netuku, a nom ladohogo mo vaigo gom mwaso, siu gon vano lo tamwata, a gam segeana u rovo.” 35Lune i Jisas mo laqa mwerehi, a tangaloi lavasigi ram vonai dena valei Jaerus ram veve lawea vena, “I netumu u mate beno. ?Huri hava gineu gom vai taturegi na Huhui taligu?” 36Nge i Jisas mo rongo na leora, mo veve lawe Jaerus vena, “Gon mese matagu, nge gon ladohogo hogosie.” 37Siu nge he siregi ihine tea vena vano meie, nge hogosie Bita, Jemis mei tuana Jon. 38Ram vano dadari lo valei tangaloi lawua hi i Jaerus; i Jisas mo lehi na sinobu ram vui rorogi, ram ngara ko ram tangi u liu. 39I Jisas mo ahu vano lolo vale, mo huire vena, “?Huri hava gineu nem vui rorogi ko nem ngara? A maresu he mate tea, nge mo maturu. 40Nge ram sovue. I Jisas mo hora na tangaloi doluegi suvarea, ko mo lai na tamai maresu hi mei retahine mena nona rorongtagi gaitolu, ram ahu vano lo mahogi a maresu vavine hi mo eno aie. 41Mo hako lo limana, mo veve lawea vena, Talita kum, vena, “Maresu vavine! Neu nam veve lawego, gon maraga!” 42Ko siserigi a maresu hi mo maraga, mo tauvuigi mo dige lategi, huri a higaona hangavulu domwagi gairue. Ko a sinobu ram lehe ingere doluegi ram awogi u liu. 43Nge i Jisas mo gato gorora garagara ve ran mese veve lawe hine tea. Siu mo veve lawera vena, “Nen bete gineu lawea na gani.”

Currently Selected:

MAK 5: HNT

Highlight

Copy