MAK 3

A tangaloi a limana u koru

1I Jisas mo vano taligu lolo valei soneana, ko a tangaloi gatagale aiehi a limana u koru. 2A sinobu lavasigi ingere aiehi ram tarani ve ran tawei Jisas. Huri ve mo vai gineu giniehi, ram matabibie, huri ve rain leo ve vin vagamwasoi na tangaloi hi lo Rani Mangaana. 3I Jisas mo veve lawe na tangaloi hi a limana u koru vena, “Gon hamai tangaha ko gon labe lo nagora tangaloi doluegi.” 4Siu i Jisas mo hui na sinobu vena, “?A noda Leo Hora u siregi lawe gide ve dain vei wuraha lo Rani mangaana? Ve dain vei gineu raugarea sige dain vei gineu esi bulubului sige dai vei asiesigi? ?Ve dai vei vagamwasoi na tangaloi sige dai vei vagamatea?” Nge ingere ram toga rorongo. 5I Jisas mo leo dali bulu ginire gina lolo meromero, nge mo hagavire vage, huri ingere ram qatu siaga ko rau vagasile. Siu mo veve lawe na tangaloi hi vena, “Gon vugeri tovoragi na limemu.” Nge mo vugeri tovoraginie ko a limana mo garea taligu. 6Ko ira Varise ram mwalue ram sonebubugi meire burigi noi Herot lavasigi, ram domi hikehike huri ve rai wehi Jisas mwerehilogo.

A buri sinobu lo mwararai wei

7I Jisas meire nona rorongtagi ram vano beragi sulo wailawua Kalili, a buri sinobu lawua ram hurie. Rau vanai den Kalili, 8den Judia, den Jerusalem, den Idumea, dena tavului wei Jodan, ko ingere kakarani lobei togagi venue Taea ko Saedon. A buri sinobu lawua hi rau vonai lobei Jisas huri rau rongo na roroi gineu teri hi nge u veire. 9Huri a sinobu u sao lawagi, i Jisas mo veve lawe na nona rorongtagi huri ve ran vai rarai na aka gatagale hurie, vaiteu ram susunie. 10Huri ingeie u vagamwasoi na tangaloi sao, ko ira segesege doluegi ram vui susuni huri ve ran sikeli Jisas. 11Tare ve a tangaloi ngerehi a vui esi mo eno lure ram lehi Jisas ram sisiqeu lo nagona, ram ulo ko ram veve vena, “Iniko i Netui God!” 12I Jisas mo gato siaga goro na vui esi, mo veve vena, “Ne mese veve sere na henaku.”

Jisas mo leowahera gaihora hangavulu domwagi gairue

13Siu i Jisas mo hage lo vusi, mo ware na tangaloi ngerehi mo taranire ko ingere ram vanai lobena. 14Siu mo leowahe denire hangavulu domwagi gairue, mo suri na henara ve a gaihora, huri ve rain toga meie, ko vin horara ve rain mwelue vano rain toretore 15rain hako managi huri ve rain vuro vohogi na vui esi. 16I Jisas mo leowahe ira hangavulu domwagi gairue a henana i Saemon nge hi i Jisas u suri na henana ve i Bita, 17i Jemis tona tuana Jon, tamara Sebedi, Jisas u suri na henara ve i Boanakas, vena ira netui Mantawa, 18i Andru, Vilib, Batolomiu, Matiu, Tomas, Jemis tamara Alvius, Taedias, Asemon i Garohuri. 19Ko i Judas Iskariot ngehi u rongo na leo gai Jisas.

I Jisas ko a vui esi

20Siu i Jisas mo mule. Ko a buri sinobu lawua ram sone taligu vonai, giniehi hatie mahogi mei Jisas ko nona rorongtagi ve rain gagani. 21Lune ira havana ram rongo na roro hurie, ram vano huri ve ran laie, a vevenagi a sinobu ram veve ve, Ingeie mo lenga.? 22A huhui lavasigi talo Leo Hora noi Mosis ram vonai den Jerusalem ram veve vena, “Bielsibul mo toga lune!” ?Ngehi a huqegi nora vuiesi u bete na huireana lawea ve vin vuro vohogi na vuiesi dena sinobu.” 23Siu i Jisas mo ware bubugi na sinobu vanai lobena, mo laqa lawera lo gato tavalu mo veve vena: “?I Satan vin vuro Satan mwerehilogo? 24Tare ve a vanue mo vilewahe lo burigi u sao ram vui qalogi, a vanue hi vin he labe lai tea. 25Tare ve a vale mo vilewahe duvigi goro duvigi, vin he labe lai tea. 26Ko tare ve i Satan mo qalo meie sibona ko mo vilewahe, vin he labe lai tea, nge vin rovo.

27“Ihine tea vin he ahu e tea lolo valei tangaloi u huire vena lai na nona vivilakogi, nge hogosie ve vin veuhi na tangaloi huire hi tomue; siu, mo bei mwekitegi na valena.

28“Ineu nam veve hogo lawe gimiu, a galegaleasi doluegi ingere hi a sinobu ram vaie ko a gineu doluegi hi a sinobu nam veve vovohoi God vin lado vohogi na bugugi. 29Nge tare ve ihine mo veve asiesigi na Vui Gogona, vin he ladovohogi lai na bugugi tea a vevenagi u vei na galegaleasi hi a bugugi vin eno vagituei, huri nge mo vai na galegaleasi vi eno radu.” 30I Jisas u veve mwerehi huri a tangaloi lavasigi ram veve vena, “A vui esi mo toga lune.”

Retahi Jisas mei retuana

31Retahi Jisas mei retuana ram vomai lobena, ram labe varea ram hora na leo ram hui haroe. 32A sinobu ram toga dalie, ram veve lawea vena, “I ratahimu mei retuemu ingere varea ram taranigo.” 33I Jisas mo duvi vena, “?Retahiku hine? ?Retueku irahine?” 34Ingeie mo leo vano lure hi ram toga dalie, mo veve vena, ?Leo! I ratahiku ko iretueku ingere ngaha!? 35Ihine hi mo vai na taraniana noi God, ingeie hi i tueku, haqeku, ko i retahiku.”

Currently Selected:

MAK 3: HNT

Highlight

Copy