MATIU 21

I Jisas mo ahu lolo Jerusalem gina qoragiana

1Lune ingere ram vano kakarani a Jerusalem, ram vonai Betvas sulo Vusi Oliv. Aiehi i Jisas mo hora na nona rorongtagi gairue gitomue, 2mo veve lawera vena: “Neri vano lo togagi venue vantahi. Ko siserigi neri haqe na as mei netune meie. Neri torosire, neri leire vonai laweau. 3Ko tare ve ihine vin veve na gineu lawe gimiru, neri veve lawea vena, ‘A Huqe mo taranire,’ ko huri nge vin sireginire vagatagale.” 4Mo vai mwere ngaha huri ve vin vagahorongi na leo gina wuwai tangaloi ligoligogi vena:

5“Gon veve lawera ta Saeon vena:

‘Nen leo, a nomiu ratahigi

mo vonai lobemiu,

nge u lado wuweu, nge mo toga lo dongki,

nge mo toga lo as biti, a natugi.”

6Siu ira rorongtagi rom vano tomue, rom vai mwerehi Jisas u horara: 7rom lai na as mei netune vonai, ram vugeri na luqara lo ului gain herera, ko i Jisas mo toga namawe. 8A sinobu u sao ram vugeri na luqara lo turegi ko lavasigi ram tai na rangai gei ko ram siure lo turegi. 9A sinobu ram tomuegi Jisas ko ram tu tagu, ingere doluegi ram ulo vena: “Waregareagi Netui Devet! Vevegarea ginie hi mo vonai lo henai Huqe! Waregarea lo eulu!” 10Lune i Jisas mo ahu lolo vanue Jerusalem, mo gilugi na domi sinobu doluegi, ram veve vena, “?Nge ngaha? 11A sinobu ram duvi vena, “Ngaha i Jisas, a tangaloi veve rarai ta Nasaret a Kalili.”

I Jisas mo vagamwasaragi na Sara Gogona

12I Jisas mo ahu lolo Sara Gogona, ko mo vuro lue ngerehi doluegi ram voli ko ram sosogagi lolo Sara Gogona, ko mo talulugi dori na tanoi homu noi rahine ram lealeahi homu ko a tanoi togatoga noi rahine ram sogagi na rangamea, 13ko mo veve vena, “U reve beno lo Reve reve Gogona ve God u veve vena, ‘A valeku vin waregi ve a valei tataro.’ Nge gimiu nem vaie mo voragi malangai belu!” 14Ira matadodo meire lukuluku ram vonai lobei Jisas lo Sara Gogona, ko nge mo vagamwasoire. 15Ira muei rugurugu ko ira huhui talo Leo hora noi Mosis ram lologagasi lune ingere ram lehi na gineu garigiana nge u veire ko ira maresu ram ulo lolo Sara Gogona vena, “Waregareagi Netui Devet!” 16Ko ram veve lawe Jisas vena, “?Wa iniko gom rongo na hava gineu hi ram veve?” I Jisas mo duvi lawera vena, “Io. ?Wa igimiu ne he valu na Reve reve Gogona tea hi mo veve vena, ‘Gu lei na leo vevegarea dena singora maresu lalawua meire memeaga’?” 17I Jisas mo sireginire mo mwalue dena qatui venue ko mo vano Betani, ko mo maturu aiehi.

I Jisas mo warai na vui duledule

18Lo rani tuegi, ram vonai taligu sulo qatui venue, i Jisas mo mwaruruhi. 19Nge mo lehi na vui duledule lo mwararai turegi. Nge mo vano lobegi, mo lehi na raugi hogosie. Siu nge mo veve lawe na gai hi vena, “Iniko goin he wai tea taligu vin tuei!” He ribi tea, a vui duledule hi mo koru. 20Ira rorongtagi ram leo, ram garigi hurie, ram hui vena, “?A vui duledule hi mo koru siserigi mwerehilogo?” 21I Jisas mo duvi lawera vena: “A hogo, nam veve lawe gimiu vena, tare ve gimiu nem ladohogo, ne he ladosavi tea, igimiu nein vei lei na gineu mwerehi nau vei lawe na vui duledule hi; hatie hogosie ngaha, nge gimiu nein veve lai lawe na vusi ngaha vena, ‘Maraga, gon tuligo sibomu lolo tahi,’ ko vin vei mwerehi. 22Tare ve gimiu nem ladohogo, nein lei na hava gineu tea hi nem navu huri lo tataro.”

Ram hui Jisas huri nona managi

23Siu i Jisas mo vonai taligu lolo Sara Gogona; lune nge mo huhui, ira muei rugurugu meire tamaragai ram vonai lobena, ram huie vena, “?Gom vai na gineu mwere ngaha gina managi mo vonai logo? ?Ihine u bete na managi ngaha lawego?” 24I Jisas mo duvi lawera vena, “Ineu vage nain hui gimiu gina leo gatagale, ko tare ve gimiu nein duvi goroau, ineu vage nain veve lawe gimiu ve nam vai na gineu ingere ngaha gina managi mo vonai logo. 25?I Jon u lei na managi logo vena garuhigogona: den God sige dena tangaloi? Ingere ram tauvuigi ram vuigarogi sibora vena, “Tare ve dam duvi goroe vena, ‘Den God’, nge vin veve lawe gide vena, “?Huri hava gineu gimiu ne he ladohogo tea ginie?’ 26Nge tare ve dam veve vena, ‘Dena tangaloi’, dam matagugi na sinobu, a vevenagi ingere doluegi ram lado siaga ve i Jon ineie a tangaloi veve rarai.” 27Giniehi, ram duvi goro Jisas vena, “Gahe ilo tea.” Ko i Jisas mo veve lawera vena, “Ko ineu vage nain he veve tea lawe gimiu ve nam vai na gineu ngere ngaha gina managi mo vonai logo.

A gato tavalu huri na mwalakelo gairue, netui tangaloi gatagale

28“?Tau, gimiu nem lado mwerehilogo? A tangaloi gatagale netune gairue. Nge mo vano lobena togagi, mo veve lawea vena, ‘Netuku, gon vano, gon kea lolo talui vaen gaqarigi.’ 29Nge mo duvi vena, ‘Nam rao’, nge lo tagugi nge mo lado dori ko mo vano. 30Siu i tamara mo vano lobei tuana, mo veve mwerehi vage lawea. Ne mo duvi vena, ‘Io, mama’, nge he vano tea. 31?Nge hilogo denire gairue hi u vei na taraniana noi tamana?” Ngere ram duvi vena, “A togagi.” I Jisas mo veve lawera vena, “A hogo, nam veve lawe gimiu vena, ira vilevile homu ko ira vavine tuvetuvegi rain ehu lolo mwasoana garaqa God mo ratahigi lolona tomue den gimiu. 32Huri i Jon Garuhigogona i vonai lobemiu, mo haharagi na matahala vovohoi lawe gimiu, nge gimiu ne he ladohogo te ginie. Nge ira vilevile homu meire vavine tuvetuvegi ram ladohogoginie. Gimiu nem leo ngaha, nge lo tagugi nehe lado dori tea ve nen ladohogoginie.”

A gato tavalu huri ira leogoro talui vaen

33I Jisas mo veve vena: “Nen rongo na gato tavalu wagineu. A huqei tano gatagale mo rivu na talui vaen, mo hakovi na ara goroe, mo geli na walu huri ve vin seri na mwasi vaen lolona ko mo hakovi na tuleo. Siu mo siregi na talui vaen lawera leogoro ko mo vano lo vanue wagineu. 34Lo taroi taro matue, ne mo horara nona tangaloi tabanagi lawera leogoro ve rain lei na nona duvigi denire. 35Ira leogoro ram wiri bibire tangaloi tabanagi, ram talie gatagale, ram ue vagamatea gatagale, ko ram bugurie gatagale. 36A huqegi mo horara tangaloi tabanagi taligu, rau sao liure tomue, ko ira leogoro ram vai lawera mwerehi vage. 37Siu mo hora vagasigi lawera leogoro i netune, mo veve vena, ‘Ngere rain ladomavagi netuku.’ 38Lune ira leogoro ram lehi netune, ram veve veveginire vena, ‘I gineu ngaha vin hako hougi na talu. Da, da ue vagamatea, siu dain lei na talune gi talude.’ 39Siu ram wiri bibie, ram tuli vohoginie den talui vaen ko ram ue vagamatea.” 40I Jisas mo hui vena, “?Lune a huqei telu vin vonai nge vin vei na hava gineu lawera leogoro hi?” 41Ngere ram duvi vena, “Nge vin ue asiesiginire tangaloi esi ngerehi, ko vin siregi na talu lawera leogoro wagineu, rain bete nona duvi mwasi vaen lawea lo taro matue.” 42I Jisas mo veve lawera vena, “Gimiu nehe valu tea lo Reve reve Gogona vena:

‘A vatu hi ira hakohako vale

rau tuli vohoginie mo voragi

na vatu togaibibi.

A Huqe u veie ngaha,

a gineu garigiana lo matada!’ ”

43I Jisas mo tarihougi vena: “Nam veve lawe gimiu vena, i God vin he voragi nomiu Ratahigi tea ingeie vin betea lawe na sinobu wagineu ingere rain lei na mwasigi vovohoi denie. 44Ihine tea vin soi talo vatu hi vin mevurivuri, nge a vatu hi vin soi talu ihine tea vin momogaginie mwere na qie.”

45Ira muei rugurugu meire Varise ram rongo na gato tavalu noi Jisas, ram ilo ve nge u veve hurire, 46siu ram vai leo ve ran wiri bibie. Nge ram matagugi na sinobu, huri ingere ram lado ve i Jisas nge a tangaloi ligoligogi.

Currently Selected:

MATIU 21: HNT

Highlight

Copy