LUK 18
18
A gato tavalu huri na vavine madue ko a tangaloi vevegi
1Siu i Jisas mo veve na gato tavalu ngaha lawera, mo huhuire ve rain tataro gesegi ko rain mese wiriwiri. 2“Lolo togagi venue gatagale a tangaloi vevegi mo toga aiehi he matagu tea gi God ko he ladomava ginire tangaloi tea. 3A vavine madue gatagale mo toga lolo vanue hi. Gesegi mo vomai lobena tangaloi vevegi hi, mo navuhie vena vovohoigi na nona romasi mena nona tavului vuro. 4Vagasaosao a tangaloi vevegi hi he masinge tea, nge vagasigi mo domigi lolo domine vena, ‘A hogo, nahe matagu tea gi God sige na he ladomava ginire tangaloi tea, 5tau nain vovohoigi na romasi nona vavine madue hi, huri gesegi mo vomai mo serieu gina leona. Tare ve hatie, a vavine hi vin vanai ta mwere ko lo vagasigi vin ve wiriwirigieu.’ ”
6Ko a Huqe mo veve vena, “Nen lado na leoi tangaloi vevegi hi he vovohoi tea. 7?Nge wuraha huri God? ?Tare ve ira nona sinobu hi u leo wahera ram warea lolo rani ko lolo bongi, nem lado huri ve vin he vovohoigi na nora romasi tea? ?Sige nem lado huri ve vin ribi lawagi? 8Nam veve lawe gimiu vena i God vin vovohoigi na nora romasi, ko vin veie siseri. ?Nge ve ineu i Netui Tangaloi nain vomai taligu lo ure, nain haqe na tangaloi lavasigi ram lado hogogieu sige hatie?”
A gato tavalu huri na Varise ko a tangaloi vilevile takis
9I Jisas mo veve na gato tavalu vage lawera tangaloi hi rau ladohogo u siaga ve a doridorire rau vovohoi, ko ram leoleo hivoginire tangaloi wagineu. 10Mo veve vena, “A tangaloi gairue rom vano lolo valei tataro ve ron tataro. Tuegi nge a Varise ko tuegi nge a tangaloi vilevile takis. 11“A Varise hi mo labe ko mo tataro rorongo lolo domine, mo veve vena, ‘God, nam waregareaginigo, huri ineu nahe mwere ire tangaloi wagineu tea. Nahe vai huri tea vai gineu nora tangaloi wagineu. Nahe vai na gineu esi tea ko na he galegaleasi tea lo vavine. Ko vage nam waregareaginigo huri ineu na he mwere na tangaloi vilevile takis ngaha tea. 12Neu nam gologolo vagarue lo wik gatagale, ko nam bete lawego a hangavulugi den noku hako gineu doluegi.’ 13“Nge a tangaloi vilevile takis mo labe vagahao, he leo te hage eulu, nge mo vosa na mabune ko mo veve vena, ‘E, God, gon hagavieu, huri ineu a tangaloi galegaleasi!’ ” 14Siu i Jisas mo veve vena, “Nam veve lawe gimiu vena, a tangaloi hi mo mule taligu lo valena nge u vovohoi lo nagoi God, nge a tangaloi tuegi he vovohoi tea lo nagoi God. Huri ihine mo lado hageginie sibona God vin vei wuweuginie, ko ihine mo lado wuweuginie sibona God vin vei hageginie.”
I Jisas mo vai gareaginire maresu wuwerigi
15A tangaloi lavasigi ram lai na maresu wuwerigi lawe Jisas vena tango lure. Lune nona rorongtagi ram leo mwerehi, ram tara gorora. 16Nge i Jisas mo warera maresu wuwerigi hi vomai lobena, ko mo veve vena, “Nen siregi ira maresu ve ran vomai lobeku, ko nge mese vai gorora, huri a tangaloi a doridorire u mwere na maresu biti God mo voragi nora Ratahigi beno. 17A hogo, nam veve lawe gimiu vena, ihine he lai tea na mwasoana garaqa God mo ratahigi lolona mwere na maresu biti vin he ahu lai tea lolona.”
A mwerai homu mo tarani vena lai na mwasoana radu
18A tangaloi lawua nora a duvi Israel gatagale mo hui Jisas vena, “?Huhui garea, nain vei vahavagi huri ve nain lei na mwasoana radu?”
19I Jisas mo veve lawea vena, “?Huri havai gom wareau ve nau garea? Ihine tea he garea tea, nge i God hogosie. 20Gu ilo na Leo hora: ‘Gon mese vagasile lo vavine, gon mese ue tangaloi, gon mese balubelu, gon mese tawei vurogi, gon ladomavagi tamamu ko i ratahimu.’ ”
21Nge mo duvi lawea vena, “Nau tabe na Leo hora ingere ngaha doluegi lo mahogi nau maresu mo dadari siseri ngaha.”
22Lune Jisas mo rongoe, mo veve lawea vena, “Gom qilodo lo gineu gatagale mosigei. Gon sogagi vohogi na nomu lalaie teri, gon bete na mane lawera mahogi, ko goin haqe na lalaie lo eulu. Siu gon vomai gon hurieu.” 23Lune nge mo rongo na leo hi, mo tauvuigi mo hahagavi, huri nona lalaie u sao.
24I Jisas mo lehe mo veve vena, “Ei, u gona garagara hurire tagi hako gineu ve rain ehu lolo mwasoana garaqa God mo ratahigi lolona. 25U matamwasara huri ve a bulugi vin ehu turu na matai nitil dena tagi hako gineu vin ehu lolo mwasoana garaqa God mo ratahigi lolona.”
26Irahine rau rongo na leo ngaha ram veve vena, “?Nge siu ihine vin mwaso lai?”
27I Jisas mo duvi vena, “A hava gineu u gona meire tangaloi, nge he gona tea mei God.”
28Vunu Bita mo veve vena, “Leo, gamai gau siregi na tanomai ko gam hurigo.”
29I Jisas mo veve lawera vena, “A hogo, nam veve lawe gimiu vena, ihine tea vin siregi na valena sige i gahorana sige ire tuana sige i ratahine mei tamana sige ire netune huri ve God vin voragi Ratahigi goro na tangaloi doluegi, 30ngehi vin lei vagasaosao lolo taro ngaha ko a mwasoana radu lolo taro vin vomai.”
I Jisas mo veve vagatoligi huri na nona mateana ko nona maragaana
31I Jisas mo lai beraginire rorongtagi hangavulu domwagi gairue ko mo veve lawera vena, Leo, dam hage Jerusalem. Aiehi vin vagahorongi na gineu doluegi a tangaloi ligoligogi rau reve hurieu i Netui Tangaloi. 32Rain siregieu lawera haroharo ko ingere rain sovueu, rain veve asiesigieu, rain lodosieu, 33rain taligu ko rain vei vagamateau, nge lo rani gaitoligi nain maraga taligu sulo mwasoana.”
34Ira rorongtagi rahe ilo vurugegi na gineu ingere ngaha tea, a iloiloi leo mo hili denire, ko ra he ilo tea vurugegi huri na hava gineu hi i Jisas mo laqaginire.
I Jisas mo vagaleleohagi na matadodo
35I Jisas mo vomai kakarani lobei na vanue Jeriko, ko a tangaloi matadodo gatagale mo toga lo mwararai turegi mo navunevu. 36Lune mo rongo na tangaloi sao ram dige kakarani lobena, mo huire vena, “?A hava gineu ngaha?”
37Ram veve lawea vena, “I Jisas ta Nasaret mo dige.”
38Nge mo ulo siaga vena, “Jisas! Netui Devet! Gon hagavieu!”
39A sinobu lavasigi ram labe lo nagona ram gato goroe vena toga rorongo. Nge mo ulo siaga den tomue vena, “Netui Devet! Gon hagavieu!”
40Siu i Jisas mo labe, mo veve lawera huri ve ran lai na matadodo hi na vomai lobena. Lune mo vomai kakarani, i Jisas mo huie vena, 41“?Gom taranieu ve nain vei na hava gineu lawego?”
Mo duvi vena, “Huqe, nam tarani ve nain leo taligu.”
42Siu i Jisas mo veve lawea vena, “Gon leo taligu! Nomu ladohogo mo vagamwasoigo.”
43Ko siserigi nge mo leo taligu, mo huri Jisas, ko mo vevegareagi God. Lune a sinobu hi ram lehe, ingere doluegi ram waregareagi God.
Currently Selected:
LUK 18: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
