JON 18

Ingere rau wiribibi Jisas

1Lo tagugi hi i Jisas u tataro u rovo, ingeie mo vano meire nona rorongtagi ram gao na walui wei Kidron. A talu aiehi, ko i Jisas meire nona rorongtagi ram vano lolona. 2I Judas, a tangaloi hi u rongo na leoi gai Jisas, u ilo na mahogi hi, huri lo tarogi u sao Jisas meire nona rorongtagi ram kalo bubugi aiehi. 3I Judas mo vano lolo talu mena buri soldia meire bolisman denire muei rugurugu meire Varise, ram hakovi na here bulebule mena laet ko a lakoi vuro. 4I Jisas u ilo na gineu doluegi hi ve rain vei lawea, ko mo dige vano mo veve lawera vena, “?Ihine hi nem hikesie?” 5‘Ngere ram duvi lawea vena, “I Jisas ta Nasaret.” I Jisas mo veve vena, “Ineu ngaha.” I Judas vage, a tangaloi u rongo na leoi gana, mo labe aiehi meire. 6Lune i Jisas mo veve lawera vena, “Ineu naha,” ram susudori ram soi sulo tano. 7Siu i Jisas mo huire taligu vena, “?Ihine hi nem hikesie?” Ingere ram veve vena, “I Jisas ta Nasaret.” 8I Jisas mo duvi lawera vena, “Nau veve beno lawe gimiu huri ve ineu ngaha. Tare ve nem hikesieu, nen sireginire lavasigi ngaha ran vano.” 9(Nge mo veve mwere ngaha huri ve a leo hi u vevea vin eno lune hogo: “A tangaloi gatagale he sala tea, Mama, denire hi gu betera laweau.”) 10I Saemon Bita u hakovi na bue; nge mo dangea, mo tai vano lo tangaloi tabanagi noi rugurugu lawua, ko mo tai sue na qerona lo matue. A tangaloi hi a henana i Malkas. 11I Jisas mo veve lawe Bita vena, “Gon tau na nomu bue taligu lolo tantanogi. ?Tau gom lado ve nain he inu na lahai gagarasiana tea i Tamaku u bete laweau?”

I Jisas mo labe lo nagoi Anas

12A buri soldia mena nona tomtomuegi ko ira bolisman nora duvi Israel ram wiri bibi Jisas, ram vauhie, 13ko ram laie vano gitomue lawe Anas, huri ingeie qeligei Kaiavas, ngehi a rugurugu lawua lo higao hi. 14I Kaiavas hi u veve haharagi lawera duvi Israel huri ve u garea ve a tangaloi gatagale vin mate huri na sinobu.

I Bita mo taha Jisas

15I Saemon Bita ko a rorongtagi tuegi rom huri Jisas. A rugurugu lawua u ilo vurugegi na rorongtagi tuegi hi, ko nge mo vano mei Jisas sulolo ara noi rugurugu lawua hi. 16I Bita mo toga varea lo matai ara. A rorongtagi tuegi hi a rugurugu lawua u ilo vurugeginie mo mwalue vano, mo laqa lawe na taqalugu lo matai ara ko mo lai Bita sulolo ara. 17A taqalugu lo matai ara mo veve lawe Bita vena, “?Wa iniko hatie rorongtagi gatagale noi tangaloi ngaha?” I Bita mo duvi lawea vena, “Hatie, ineu hatie.”

18A gamwadidi u lawua ko ingere tangaloi tabanagi meire bolisman ram hure na manonoi avi ko ram labe dalie ram madinu. I Bita mo vano ko mo labe meire mo madinu.

A rugurugu lawua mo hui Jisas

19A rugurugu lawua mo hui Jisas huri na nona rorongtagi ko huri na nona leo huhui. 20I Jisas mo duvi lawea vena: “Gesegi nam laqa lo ute lawua lawe na sinobu doluegi; gesegi nam huhui lolo valei soneana ko lolo Sara Gogona, ingere duvi Israel ram sone bubugi aiehi. Nahe veve haro vunigi na gineu tea. 21?Huri hava gineu gom huieu? Gon hui na sinobu ingere hi rau rongoau huri hava gineu nau veve lawera; ingere rau ilo na hava gineu hi nau veve.” 22Lune i Jisas mo veve mwere ngaha, gatagale denire bolisman mo rabasie mo veve vena, “Gu huire mwere na hava gineu huri gom laqa mwerehi lawe na rugurugu lawua!” 23I Jisas mo duvi lawea vena: “Tare ve nau veve na gineu esi, gon veve lawera doluegi tangaha hurie. ?Nge tare ve nau veve na gineu garea, huri hava gineu gom tiqarieu?”

24Siu i Anas mo hora i Jisas lawe Kaiavas i rugurugu lawua mena garo vauveu lo limana.

I Bita mo taha Jisas taligu

25I Saemon Bita mo labe mo madinu. Siu ingere lavasigi ram veve lawea vena, “?Wa iniko hatie nona rorongtagi gatagale?” Nge i Bita mo tahae mo veve vena, “Hatie, ineu hatie.” 26A tangaloi tabanagi gatagale noi rugurugu lawua, ingeie hi i havai tangaloi hi i Bita u tei sue na qerona, mo huie vena, “?Wa na he lehigo tea meie lolo talu?” 27I Bita mo tahae taligu. Ko siserigi a toa mo tarere.

I Jisas mo labe lo nagoi Baelat

28Ngere ram lai Jisas dena valei Kaiavas sulolo ara mo waregi vena Braetoriam, huri ve a valei Kavman, lolo robongi siaga. Ira lawua nora duvi Israel ra he ahu tea sulolo Braetoriam vai teu ram vagasolora ginie sibora, nge huri ve rain geni lei na hinagai Halegagaliu. 29Siu i Baelat mo mwalue suvarea lobera mo veve vena, “?Nem vaivei na tangaloi ngaha huri na hava gineu?” 30Ngere ram duvi vena, “Gain he laie tea tavanai lawego huri ve nge he galegaleasi tea.” 31I Baelat mo veve lawera vena, “Gimiu sibomiu nen laie ko nen veveginie na huri na nomiu tauleo.” Ira lawua nora duvi Israel ram duvi lawea vena, “Hate leo siregi huri ve gain vei vagamate ihine tea.” 32(U vei mwere ngaha huri ve a havagineu hi I Jisas u veve huri ve vin mate mwerehilogo vin eno lune.) 33I Baelat mo ahu taligu sulolo Braetoriam ko mo ware Jisas mo huie vena, “?Wa iniko i ratahigi nora duvi Israel?” 34I Jisas mo duvi vena, “?Wa a leo huihui ngaha mo vanai denigo sige a tangaloi wagineu rau veve lawego hurieu?” 35I Baelat mo duvi vena: “?Gom lado ve ineu a duvi Israel? ?Nge a nomu sinobu sibomu ko a nora muei rugurugu ngerehi rau betego vanai laweau? Gu vei na hava gineu?” 36I Jisas mo duvi vena, ?A noku tanoi ratahigi hatie talo ure ngaha, ve mwere a noku tanoi ratahigi talo ure ngaha, irahine hi ram hurieu ram qalo goroau nain he vano tea lo limara lawua goro nora duvi Israel. Hatie, a noku tanoi ratahigi mo eno lo ute wagineu.” 37Siu i Baelat mo ule vena, “?Wa iniko a ratahigi?” I Jisas mo duvi vena, “Iniko gom veve ve ineu a ratahigi. Ineu nau vora, ko nau vanai sulo ure huri na gineu gatagale ngaha, ngehi ve nain laqagi huri na hogo. Ihine tea talo hogo mo ronghurieu.”

Ram vevegi Jisas huri mate

38I Baelat mo huie vena, “?A hogo a havagineu?” Siu i Baelat mo mwalue taligu suvarea lobera duvi Israel ko mo veve lawera vena: “Na he haqe na gineu tea huri ve nain vevegi vagamatea. 39Nge mo huri na nomiu doridori, gesegi nam siregi na tangaloi vauveu gatagale lawe gimiu lo taroi Halegagaliu. ?Nem tarani huri ve nan siregi tabetabegi na ratahigi nora duvi Israel lawe gimiu?” 40Ingere ram ulo vena, “Ingeie hatie, nge i Barabas!” (I Barabas nge a tangaloi balubelu.)

Currently Selected:

JON 18: HNT

Highlight

Copy