Markus 2

Isaye kam tiyinju nunaa isangaduwu

(Mat 9.1-8; Luk 5.17-26)

1Ngawo kawu ganayen Isa bǝrni Kafarnaambero walladanniya, jamadǝ ti fadonno fangera. 2Am ngǝwu isane captane, har cinnaman na baworo walyeno. Tayiro mana Alaye cǝddi duwon, 3am dewu kam tiyi nunaa laa ngojane isane nanjuro kewudo. 4Amma jama captana nangaro rakcane Isaa karǝnjaiwawodǝ, daji sorodǝro jawane kǝla sorodǝye na Isa dǝganadǝn kajane kamdǝa kǝla bǝnaramnjuyen sayeyera. 5Isa kambǝrsenjadǝa kirunniya, kam tiyinju nunaadǝro: «Tadani, biwunǝm gawurdǝna,» yeno.

6Daji malǝmba Attauraye laa nadǝn napkada karwunjan: 7«Awiro kam attǝ ngai wulji? Alaa gaskajǝna, diye! Ala gǝnia, wunduma kambo biwu gawurjiyi bawo, mare?» cani. 8Sadǝman Isa awo karwunjaye asuje tayiro: «Awiro karwundon awo ania wulluwidǝ? 9Ndaso gǝle kam tiyinju nunaa adǝro budu wo: “Biwunǝm gawurdǝna” wulduma ra “Cine bǝnarammǝm ngone lene!” wulduma? 10Nonowo, Tada Kambedǝ#2.10 Tada Kambedǝ - Isa kǝla Tada Kambedǝyen manajiya, kǝlanjuman manaji. nanjun kǝnduwo biwu ambe dunialan gawurduye mbeji!» yeno. Daji kam tiyinju nunaadǝro: 11«Niro wulnjǝgǝkki, cine bǝnarammǝm ngone fannǝmbo lene!» yeno. 12Sadǝman kamdǝ fuwu am sammayen cije bǝnaramnju ngoje leyeno. Tayi samma jauro ajapcane Alaa congorǝne: «Awo adǝ gai ngaltema ruiyende!» yera.

Isaye Lewia bowodu

(Mat 9.9-13; Luk 5.27-32)

13Koro Isa walde ci bǝrǝmbero kadio. Am kada kadami nanjuro isane tayia alamgeno. 14Kodu cǝdi duwon, Lewi tada Alfawusse kidaramnju akki mowoyen napkadaa kiro. Isaye tiro: «Wua sǝgai!» yenniya, cije tia giya.

15Isa fado Lewiyen masǝnaro napcǝna duwon, akki mowomaso-a biwuma gadeso-a kada ye ti-a fuwurawanju-a rokko masǝna dioro napkera, tayi gai kada tia jaana nangaro. 16Malǝmba Attauraye kǝwu Farisawaye laa Isa biwumaso-a akki mowomaso-a rokko masǝna cadiro kerunniya, fuwurawanjuro: «Awiro Isa akki mowomaso-a biwuma gadeso-a rokko masǝna cadidǝ?» yera. 17Isa adǝa fangenniya, tayiro: «Kam dondi gǝnia, kam ngadǝ lowotor majiwawo. Jiremasoa gǝni, biwumasoa bowoduro#2.17 biwumasoa bowodu - Tuwa cadoro. kadikko,» yeno.

Kambiwu kǝla asemben

(Mat 9.14-17; Luk 5.33-39)

18Fuwurawa Nawi Yahayaye-a Farisawaye-a asem#2.18 asem - Asem adǝ faral gǝni, nafila. cadai duwon, am laa na Isayero isane tiro: «Awiro fuwurawa Yahayaye-a Farisawaye-a asem cadai, amma fuwurawanǝm cadaiwawodǝ?» cane keworo. 19Isaye tayiro: «Mai larusaye dawunjan duwon, ngaladiya asem cadai wa? A’a, mai larusaye dawunjan duwon, asem cadaiwawo. 20Amma sa ise mai larusayedǝa dawunjan cattuluwiya, sa adǝn duwon asem cadai.

21«Wunduma guntu batta bǝɍinne ingiro cakke captǝnni ngoje kajǝmu dinaro cukkududiwawo. Ngai cǝdia, batta bǝɍindǝ dinadǝyen capte kardudǝ cayemaro kuraro walji. 22Koro wunduma diben bǝɍin ngoje satki dinaro fijiyiwawo. Ngai cǝdia, dibendǝ satkidǝa falji.#2.22 dibendǝ satkidǝa falji - Diben bǝɍin mojogolje kuraro walji nangaro, satki dinadǝa falji. Diben ye bawo, satki ye bawo. A’a, amso diben bǝɍindǝa satki bǝɍinno fijagai,» yeno.

Isa kǝma yim tustuye

(Mat 12.1-8; Luk 6.1-5)

23Yim tustuyea laa Isa-a fuwurawanju-a kulo algamaye rejane kojai duwon, fuwurawadǝ kǝla algamaye fifirdu badiyera. 24Farisawa laaye tiro: «Akko rui, awiro fuwurawanǝm awo yim tustuyea kǝndoro haramdǝa cadidǝ?» yera. 25Isaye tayiro: «Sa Nawi Dauda-a amnju-a kǝna fanjanadǝn, awo cǝdǝnadǝa ngaltema kitawulan kǝranuwwi wa? 26Jaman Abiyatar ɍiman kurayedǝn curo Fado Alayero ngaye burodi sadaaye ngoje jǝgǝre amnju yero ce gewo. Ɍimannaro gǝnia, am gadero burodi sadaaye ngǝrodǝ haram!»#1Sam 21.1-6 27Daji Isaye tayiro: «Ala kamdǝa yim tustuye nangaro alakcǝnni, yim tustuyedǝa kam nangaro alakkeno. 28Adǝ nangaro Tada Kambedǝ kǝma yim tustuye, diye!» yeno.

Currently Selected:

Markus 2: kby

Highlight

Copy