Markus 5

Yesu Nwangru Unde ti Site Kusung Titibi

(Matiyu 8:28-34; Luka 8:26-39)

1Yesu ti ande ti putsa wu yen uyinn tiyang ru yi ukunn akwen, uwae uten na ande ti Gerase. 2Ti aba tsoye uwae kuyae, unde iki ru ba tu wu. Unde wu ruye uwog ti a ku nji ande atang. Ufunn titibi ta risu-wu. 3Uwog ti nae-wu si awae rikwen uwog ti a ku nji ande atang. Unde ta-wu ti wu u yir tu wu be. Ko a yir wu ti uji kiser, ayi u shi tag. 4Atsepu yang-yi ti aba ku yir ajwo-wu ti aser. A kwer wu uti kufxen. Awu ku shi yer tag aser yi u ku ye ituku yi byinn mbember. Unde iki ta-wu ti site kpakang ti u ye wu kwer riben be. 5Utitang ti usir, awu ku kyang kob uwog askab ande u ku tsutso ku sisi kitaen rikwen u ku taen ira u ku ten yer ijwe-wu ti atxom.

6Ti unde wune sae Yesu ku ba ti fengo ti rwen, awu ter inyae ru yi uwog-wu u kú riben uwe-wu 7u taen ira ti ribom-wu baa, “Imi ti ren fu te m, afu Yesu Umbae Rimam ti site kuko ti skeb titag? Ame ku jwam fu yi rinyi Rimam, nde-fu ame rikaen be!” 8(Awu ri ira yine ikyaen ti, Yesu ri te rijwen titibi baa, “Afu rijwen titibi! Ruye risu unde wune!”)

9Yesu rang unde wu baa, “Rinyi-fu baa imi?” Awu ri baa, “Rinyi-m baa, ‘Atijwunn’ ikyaen ti, ati jwunn ken pu ti.” 10Unde wu tsi kunn, ku jwam Yesu u ku mbyae ajwo na wu baa, “Rwae ru-fu rijwen titibi ne uten ike be!”

11Uwog wu ande iki ku shi ingog ubaen rikwen atang. 12Rijwen titibi jwam Yesu baa, “Fu a cwe ira, nda ti ti ti sang uwae ingog akwen.” 13Yesu cwe na ba. Ama rijwen titibi ruye risu unde wu u ter ka sang ijwe ingog akwen. Ingog yi ter yaen shag u tum si ibaen rikwen atang u ru ka jwunnsi uwae uyinn tiyang u ngwa cwu. Ingog yi ka kumbub ifaen.

14Ande ba ti ku shi ingog yi ter inyae ru ka tu ande ti ta uten tiyang ti aba ti ta ufang meme, ku tsag ira yi te ba. Ande ba ru ba ti a nung iken ti nde. 15Aba ru ba tu Yesu u nung unde wu unde wu ti site asung titibi ti kucang. Awu sī-wu kutupwa ijwe-wu tiri. Cwucwo aba nung wu, awu kafe pangma ti kucang. Aba kyen ikyenricwu. 16Ande ti a nung ira yi ti ayib, ri te ande ti ru ba, iken ti nde uwog na unde wu ti site itub asung titibi, ti iken ti nde uwog ingog.

17Ama tiri ande ti uten atang jwam Yesu ti wu na ruye uten-ba. 18Ti awu ku si uwae kuyae, unde wu ti rijwen titibi ta risu-wu ru ba tu wu u jwam wu baa, “Afu a cwe ira, ame u putsa fu ru.” 19Amaa Yesu cwe-wu be. Awu ri te unde wu baa, “Kafe ru yi uwae kununn, uwog ameinja-fu. Ka ri te ba itso iken ti Itsekuru nde na fu. Awu sae pu wu afu ti ayibrisi u nde na pu wu afu wande tiyang.”

20Ikyaen na yine unde wu ru ka kyang kyi fe uten ti Dekapoli u ku ri te ande ira risu wande tiyang ti Yesu nde na wu. Meme ande ti fxen ira-wu ayi, ira yi fur ba ayib.

Unda Yayirus ti Unda Iki ti Site Kicaeb

(Matiyu 9:18-26; Luka 8:40-56)

21Yesu kafe sang kyi ti uwae kuyae u yen ru yi ukunn akwen cwucwo. Ande yang akwen byir kob wu. Ama ti awu ta unju uyinn atang, 22unde ti uwe iki na kusog Rimam na ande ti ta uten atang, rinyi-wu baa Yayirus, ru ba atang. Ti awu nung uwe Yesu, awu ba jwunn ikyig uwe-wu 23u jwam wu ti ribom-wu baa, “Unda-m ta unju iticwu. Ame ku jwam fu, ba sa kujwo naetsa wu ti nwangru wu, ti awu ā site unyang-wu.” 24Yesu te wu ru tetso. Ande yang akwen putsa wu u ku fer wu timambe.

25Unda iki ta atang ku ngwa rikaen ti ise ti ta. Awu shinn anying ka asang rijwe asu ifaen. 26Awu ngwa rikaen timambe kujwo ande ti acin. Awu pu aser-wu wen tag uwog acin u tu-wu itindeya iki be. Kicaeb yi byag pu ku fufa. 27Ti awu fxen ira ti ande ku ri risu Yesu, awu ba isim Yesu yi ujwunn na ande, ama u sa kujwo tekunn kutupwa-wu. 28Awu kab baa, “Asiti ame a sa kujwo tekunn kutupwa-wu amam, ame u nwangru.” 29Ti ritsen, anying yi ti ku shinn wu yer. Awu nungye baa, awu na nwangru pu wu uwae rikaen-wu ayi. 30Ti ritsen, Yesu nung ti kpakang na ruye ijwe-wu. Awu kyatsi u kafe uwe sae isim u rang ba baa, “Aye ti sa kujwo tekunn atupwa-m?” 31Atugbug-wu ri te wu baa, “Afu nung ande byir ku fer fu timambe. Afu nde rimang ku rang ira baa, ‘Aye ti sa kujwo tekunn m?’ ” 32Amaa Yesu sae ayib pakob ba ti wu u nung unde ti na nde iken yine. 33Ama ti unda wu nung pu wu ti Yesu nwangru wu, awu kyen ikyenricwu. Ijwe-wu ku fufwer. Awu ba ku riben uwe Yesu u ku mbyae ajwo u ku ri te wu kubenti iken ti tu wu meme. 34Yesu ri te wu baa, “Unda-m, ayi si uwae kinjo-fu ti nwangru fu. Ka-fu nyinyang! Afu nwangru pu fu uwae kicaeb-fu.”

35Ti awu ta uwae ira ti ri, ande iki ruye kununn Yayirus ba. Aba ru ba ri te wu baa, Rimam na sa pu wu unyang na unda-wu. Awu na nde-wu Yesu rikaen cwucwo be. 36Amaa Yesu tsi-wu utob risu ira ti aba ku ri be. Awu ri te Yayirus baa, “Yer-fu anying utob be. Ru uwae kinjo amam.” 37Awu cwe-wu ti unde iki na putsa wu ru ka kununn Yayirus be, nyáng Bitrus ti Yakubu ti Yohana inja Yakubu amam. 38Ti aba ka sang kununn Yayirus, Yesu nung kununn wu munnkyi ti ira ti jwub. Ande ku jwub ira ricwu u ku mbub ukunn ko timambe. 39Ti awu sang yi uwae kununn atang, awu fwan ba ira baa, “Ani nde rimang ku jwub ira ricwu? Mbawandab-wu cwu-wu cwu be. Awu cwag kicwag.”

40Aba sae ru wu ti ikyaen ti skaen. Amaa, Yesu rwae pu ba meme ruye yi ise. Awu pu itse mbawandab wu, ti iya-wu, fa te ande ti imbyi-wu ita u sang yi uwae kusog uwog ti mbawandab wu nae atang. 41Ti aba sang pu ba atang, awu ye umbae wu kujwo u ri te wu ti unju uten-ba baa, “Talita, kumi.” (Imbyi-yi baa, “Mbawandab, nwunn ritsen!”)

42Ti ritsen, mbawandab wu nwunn ritsen u kyang ikyin. (Asang-wu si rijwe asu ifaen.) Ande nung ira yine fur ba ayib risu. 43Yesu fwa ba kusen baa, aba na sa ira yine na ri te-ba unde iki be. Cwucwo, awu ri te ba ti a na sha na mbawandab wu wuci.

Currently Selected:

Markus 5: kubNT

Highlight

Copy