Markus 13

Rikaen ti ku Ba Uwe

(Matiyu 24:1-14; Luka 21:5-19)

1Kiye ti Yesu nwunn ku ruye uwae Kusog Rimam, kinjo uwae ande ti awu ku kwen na ba iken ri te wu baa, “Unde ti uwe, sae asog yine ti a mbye yi meme ti atxom nyang timambe.” 2Yesu ri te wu baa, “Afu nung asog ti tiyang ti tinyang yine, uwe ike kutxom iki u nae tsa-wu risu kutxom iki be. Meme u kyaen si patag.”

3Kiye iki Yesu som tsa Rikwen Zetunn u kafe uwe tag Kusog Rimam. Bitrus ti Yakubu ti Yohana ti Andarawu ru ba uwog-wu. Ande iki ta-ba atang be, se aba itsong amam. 4Aba ri baa, “Ri te ti kiye ti a u byinn mbub kusog Rimam ti afu ri ne. Cwucwo, iken ti u tatso ti, ti ati u nung kiye ti iken yine u nde u si imi?”

5Yesu ri te ba baa, “Ni nung afxen-ni riben nyinyang, be unde iki u ba kyaefa ni. 6Uwe ike ande ko timambe u ba uwae rinyi-m. Aba u kyaefa ande yang akwen baa, ‘Ame si awu ti Rimam tsab tsi,’ ikyaen yine, aba u nda ande yang ba u jwe byinn, u ya fengo Rimam ta. 7Kiye ti ani a ku fxen a ku ta rika fer te ni, ama ku ta rika uten iki ti fengo ti rwen, ni yer-ni anying utob be. Meme iken yine u nde kang, ricwunnkyi utense ba-wu khika be. 8Ikyaen ti, uten ti uten u ta rika te atso. Akwe ti akwe u ta rika te atso. Riben u kyi ijwe kyi fe uwog meme. Rimenn u pu utense. Iken ayine si pangma umbae ti pwe titawe.

9“Ani ti risu-ni, ni nung afxen-ni riben nyinyang ti iken ti u tu ni. Ikyaen ti, ande iki u ye ni ru yi kusog rikwen. Ande u byinn ni kutxu uwae asog ti a ku fen Rimam atang. Ariki u ye ni ba uwe gomna ti akwe ikyaen-m, ani u ri na ba ira-m ti tinyang. 10Meme utso ande ti utense u fxen kang ira-m ti tinyang titawe ame u kafe ba. 11Kiye wu ti a ye ni ka kusog rikwen ikyaen ti a na pwen ni rikwen, ni yer-ni anying utob risu ira ti ani u ri te ba be. Kiye wu, Rimam u tso ni ira yi ti ani u ri. Ikyaen ti, Ayi u si-yi ani ti u ri ira yi be, Kusung ti Saen Kyag ti u ri. 12Kiye wu, unde u nde fengo ti a u wen inja-wu. Abitse ama u kafe isim ta anyisu-ba, anyisu ama u kafe isim ta abitse-ba. Aba u nde fengo ti a wen abitse-ba. 13Ande yang akwen u sa ni kuka ikyaen-m. Unde ti a bom utob ba kwar usir ti ricwunnkyi, awu u nwangru wu.

Iken ti ku Txi Iyib ti Tsi Kusog Rimam

(Matiyu 24:15-28; Luka 21:20-24)

14“Kiye ti ani a nung iken iki ti ku txi iyib, a ye yi tsi uwog iki ti fa fa atang be. (Afu ti ku pwen iwaen iken ti bae, nung ira yine nyinyang!) Kiye ti ani a ku nung ayine, ani ande ti ta uten ti Yawudiya, ni ter inyae tso yi rikwen. 15Unde ti a ta usen rukub, awu ā si ba-wu riben be, ko ti awu na kaa pu iken iki uwae kusog-wu be. 16Unde ti ku nde wande uwae risaen ufang, awu ā nde-wu kukyib baa, awu na u kafe ru yi uwae kununn ti wu na kaa pu atupwa-wu be. 17Ayaa! Anda ti kyaen rishwu ti aba ti ye su umbae ajwo u nde rimang kiye wu! 18Ni jwam Rimam ikyaen ti iken yi ā nde-yi ishaen upaen be.#13:18 Uwae uten ti Isirela ushaen upaen si kiye ti ikyin ti kyang caeb siskeb. 19Ikyaen ti, rikaen ti uwae kiye wu ti ame ku ri ne u skeb tag pu yi rikaen meme pab, ti ti Rimam kyae utense ba kwar ti yaka ne. Ama ande u ngwa-ba rikaen itso yine uwe ike cwucwo be. 20Rimam ko si pu wu usir rikaen yi, be unde iki ta-wu uwae utense ti wu u nwangru be ko ti kinjo. Amaa, ikyaen ira ande-wu ti awu tsab ba tsab ti ta kutampwa ande ti utense, ne awu kosi usir rikaen yi. 21Asiti unde a ri te fu baa, ‘Nung Unde wu ti Rimam Tsab Tsi ta ri!’ Ko awu a ri baa, ‘Nung Unde wu ti Rimam Tsab Tsi ta uwe akwen né!’ Ru-fu uwae kinjo ti ira-wu ayi be, 22ikyaen ti, aba Kristi tikong ti ande ti ku ya iski ira Rimam tikong u nwunn u nde iken ti ku fur ayib, ikyaen ti a u kyaefa ande, kwer ti ande ti Rimam tsitsab, asiti a u nde tu. 23Ame ku ri te ni baa, ni som usom-ni ti ujwin! Ame ku ri te ni ti ti iken yi nde-yi khika be.

Itiba na Yesu ti Apu-Ifaen

(Matiyu 24:29-31; Luka 21:25-28)

24“Isim ti kiye rikaen ne a mam pu yi, usir u kafe itibyir, uwog u byi kyi. Ushaen ama u tsen-wu cwucwo be. 25Atitaen ti ta apupwen ama u jwunnsi ba yi riben. Iken ti site kuko ti apupwen ama meme u kyi ijwe. 26Isim ayine tiri, ani u nung Umbae Unde ru ku ba uwae abyi ti apupwen ti kuko ti te riyinn. 27Ama, awu u tom atom-wu ti apupwen ti a ru yi kujwo usir ti kiskinn ti ti ureb, uwe ti kujwo rici, uwe ti kujwo ife, apupwen ti riben, ti a ka kunn byir ande-wu ti awu tsab ba tsab.

Iken ti Kwen Risu Kutuku Kututung

(Matiyu 24:32-35; Luka 21:29-33)

28“Ni kwen iken uwog kututung. Kiye ti ayi a mbubta ku shab atsing-yi, ani nungye pu ni ti ushaen ufam na kyang ku yaen ku pu wu. 29Ayi si ahan ama, kiye ti ani a nung iken yi ti ame ri ne a ku nde, kiye wu fer ku mam pu wu, u títa unju ufu tine. 30Kubenti ti ame ku ri te ni, iken yine u tu ariki uwae-ni itawe aba u cwu. 31Apupwen ti riben u mamam, amaa ira unju-m u tsi kukunn ru fe yi uwe.

Unde Nung-wu Usir ti Yesu u Ba be

(Matiyu 24:36-44)

32“Unde ta-wu ti nung usir wu, ko kiye wu, ti iken yine u nde be. Ko atom Rimam ti apupwen, aba nung-ba be. Umbae Rimam ti risu-wu nung-wu be, se Ite-wu kinjo-wu amam ti nung. 33Ni nung nyinyang! Ni som usom-ni ti ujwin, ikyaen ti, ani nung-ni kiye ti iken yine u nde be. 34Iken yine meme u nde pangma unde iki ti ku ru fengo rikyen. Awu sa iken ti ta uwae kununn-wu meme u nda apyi-wu kujwo. Unde titini uwae-ba tu wande ti awu u nde. Awu ri te unde ti ku som kyi ufu kusog baa, awu na som usom-wu ama ti ujwin. 35To, ani ama, ni som usom-ni ti itsab, ikyaen ti, ani nung-ni kiye wu ti unde ti kununn u ba be. Iki be, awu u ba ureb. Iki be ukatitang, iki be awu u ba ti mbakunn ku ta ira. Iki be awu u ba ti kiskinn. 36Ni som usom-ni ti kujwén, be unde ti kununn wu u ba purug ni, ani ku cwag kicwag. 37Ira ti ame ku ri te ni ne, ame ku ri te unde titini. Ko aye meme ā som usom ti ujwin!”

Currently Selected:

Markus 13: kubNT

Highlight

Copy