Markus 11

A Nda Yesu Rurob Uwae Uten ti Urushelima

(Matiyu 21:1-11; Luka 19:28-40; Yohana 12:12-19)

1Ti aba ka ku ye uten ti Urushelima, aba tawe uwe sang imbae uten ti Betifaji ti Betani ti ta ubaen Rikwen Zetunn. Yesu tom ande ifaen uwae na ande ti ku putsa wu ru uwe. 2Awu ri te ba baa, “Ni ru yi umbae uten ti ta uwe-ni akwen. Ani a sang ka pu ni uwae uten atang, ani u nung umbae ikyinnsu kyae tsi atang ti unde iki tso ji-wu awu khika be. Ni saen wu ti ni shir wu ba na m ike. 3Asiti unde iki a rang ni baa, ani nde rimang ku saen umbae ikyinnsu wu, ni ri te wu baa, ‘Itsekuru ku sha ti wu na u nde wande te wu. Awu a nde mam pu wu wande te wu, awu u sa kafe ba na ni ti ritsen.’ ”

4Tiri aba ande ti ku putsa Yesu ru ka tu umbae ikyinnsu ti unde ti ikyinnsu-wu sa kya fenkyi-wu. Aba saenra wu. 5Ti aba ku saen ku ra wu, ande ti tsi uwog wu rang ba baa, “Ani saen umbae ikyinnsu ne ku ru yi aka?” 6Ande na Yesu ri te ba ira yi ti Yesu ri te ba. Ama ande ba cwe na ba u ya ba ta. Aba ru.

7Aba tae umbae ikyinnsu wu ba na Yesu. Ti aba ka atang, aba pu atupwa-ba ta isim ikyinnsu wu. Yesu tso ka som tsa atang. 8Ande yang akwen ta atupwa-ba fengo. Ariki sang yi uwae risaen u ka mber atsing ituku ba ta fengo. 9Ande ti ta uwe-wu, ti aba ti putsa wu isim, ye ra afxenjwin tso baa, “Ti teb rinyi Rimam! Rimam ā sa tinyang na unde wune ti ku ba uwae rinyi Itsekuru! 10Kujwokwe itse-ti Dawuda u ba kyi cwucwo! Rimam ā nde tinyang atang roo! Ti teb rinyi na Rimam apupwen!” 11Yesu sang uwae uten ti Urushelima u ru ka sang fe yi uwae kusog Rimam tiyang na Mbayawuda ama sae ayib kyife iken ti ta atang meme. Ti awu sae fe iken meme, awu nwunn ruye u kafe ru yi Betani ti atugbug-wu rijwe asu ifaen, ikyaen ti, usir te pu wu.

Yesu Rimbeb Kutuku

(Matiyu 21:18-19)

12Ucwe fam-yi, ti aba nwunn Betani u ba sang fengo, rimenn ye Yesu. 13Awu nung kutuku kututung ti shab atsing tsi, ama awu ru ka umbyi-wu ti wu na nung baa, ko awu u tu awaen ijwe-wu bara. Amaa, awu tu-wu awaen iki atang be se atsing amam, ikyaen ti, kiye ti ayi u waen awaen nde-yi khika be. 14Ama awu rimbeb kutuku wu baa, “Tsi kunn yaka ne ru fe yi uwe, unde iki u ci-wu awaen rimenn-fu cwucwo be!” Atugbug-wu fxen ira yi ti awu ri ne.

Yesu Nda Kusog Rimam Rurob

(Matiyu 21:12-17; Luka 19:45-48; Yohana 2:13-22)

15Ti aba ka sang Urushelima, Yesu sang yi uwae kusog Rimam tiyang u rwae ruye ande ti ku jabci te iken, ti ande ti ku jab kijab meme uwae kusog Rimam. Awu ye tebur na ande ti ku fi aser fxae bur riben, u pu iken ti som na ande ti ku jabci te akwae fxae bur ama. 16Awu byang kyi ande baa, aba na su usu kijab nyaetsa-ba utabshi na kusog Rimam cwucwo be. 17Ama awu kwen na ba iken u rang ba baa, “Rimam ri paenine uwae Kutsingken-wu baa, aba na u kunn kusog-wu baa, Kusog ti meme utense na u jwam wu atang. Ama ana-ni, ani sa wu tsi pangma uwog ti ande ti riyib ku tam atang.” 18Ti ande ti uwe na akwen Rimam, ti ande ndufu ti ku kwen na ande icwe Rimam fxen ira Yesu, aba sha fengo ti a wen wu. Aba ku kyen ikyenricwu-wu, ikyaen ti, ande meme ku fxen iken ti kwen-wu, ama ayi ku fur ba ayib. 19Ti uwog byi kyi pu wu, Yesu ti ande ti ku putsa wu ruye uwae uka atang.

Iken ti Kwen Risu Kutuku Kututung

(Matiyu 21:20-22)

20Ti kiskinn fifae yi, ti aba ba yafe ku ru cwucwo aba nung kutuku kututung wu ti Yesu rimbeb ire myae mbeb pu-wu. Awu cwu tso ti imbyi-wu, ba furu risu. 21Ama Bitrus tangsom ti iken ti nde ire. Awu ri te Yesu baa, “Unde ti uwe! Sae ne! Kututung wu ti afu rimbeb wu ire myae mbeb pu-wu.” 22Yesu ri te ba baa, “Ni ru uwae kinjo uwog Rimam. 23Kubenti ti ame ku ri te ni, asiti unde a ri te rikwen wune baa, awu na mbub nwunn u ka jwunnsi uwae uyinn tiyang, ama asiti unde wu a kab-wu uwae be, awu a ru uwae kinjo baa, iken ti awu ri na u nde, Rimam u nde na wu. 24Ikyaen na ayine, ame ku ri te ni, kiye ti ani a ku jwam iken uwog Rimam, ni ru uwae kinjo baa, ani na tu pu ni iken yi, ani u tu kang yi. 25Cwucwo, ko kiye titini ti ani a ku jwam Rimam, asiti unde iki a raen ni ira iki, ni yata na wu, ikyaen ti Itse-ni ti ta apupwen u yata na ni ikentitibi-ni ama.”#11:25 Ariki uwae atsingken ti kucang site ira iki uwog ne baa, 26 Asiti ani a ku yata na-ni ande ikentitibi-ba be, Itse-ni ti ta apupwen ama u yata na-wu ani ikentitibi-ni be.

A Rang Yesu Ira Risu Kuko-Wu

(Matiyu 21:23-27; Luka 20:1-8)

27Cwucwo Yesu ti atugbug-wu kafe ru yi Urushelima. Ti awu ku kyang ikyin uwae Kusog Rimam, akwen tiyang ti ande ti ku kwen na ande ira Icwe, ti ande ndufu ti ku myae ira, meme ru ba uwog-wu. 28Aba rang wu baa, “Afu tu kuko aka ku nde wande yine? Aye ti nda fu kuko baa, afu na nde wande yi ti afu ku nde ne?”

29Yesu ri te ba baa, “Ame ama u rang ni ira iki. Ani a ri te pu ni ame, ame ama u ri te ni uwog ti ame tu kuko atang nee ame ku nde wande yine.” 30Awu rang ba baa, “Aye ti nda Yohana kuko ti wu na ku nde na ande batisma, Rimam ti nda wu ree, re ande ti nda wu? Ni ri te m!”

31Aba ande ndufu bane ku shaen ishaen te atso baa, “Asiti ati a ri baa, Rimam ti na nda Yohana kuko, Yesu u rang ti baa, ati nde rimang na ru-ti uwae kinjo uwog ira ti Yohana ri be bara. 32Amaa ati u ri baa, ande ti utense ike ti na nda Yohana kuko njwaa?” Aba kyen ikyenricwu ande, ikyaen ti, ande meme sa Yohana tsi baa, awu na si unde ti kubenti ti ku ya iskin ira Rimam. 33Uwog wune, aba ri te Yesu baa, aba na nung-ba be. Yesu ri te ba baa, “Ame ama u ri te-m ani uwog ti ame tu fengo atang ne ame ku nde wande yine be.”

Currently Selected:

Markus 11: kubNT

Highlight

Copy