Matiyu 9

Yesu Nwangru Unde ti Cwu Afxen ti Ajwo

(Markus 2:1-12; Luka 5:17-26)

1Yesu sang uwae kuyae u yen uyinn kafe ba ti uten-wu. 2Ande iki ye unde ti cwu afxen ti ajwo fwa ijwe ikentinae ba uwog-wu. Kiye ti Yesu nungye baa, aba ru uwae kinjo uwog-wu, awu ri te unde ti cwu afxen ti ajwo wu baa, “Ye utob, uyin-m! A yata na pu ba afu ikentitibi-fu.” 3Ariki uwae ande ndufu ti ku kwen na ande ira icwe tsi atang. Ti aba fxen ira yine, aba nwunn u ku pwen unju tetso risu Yesu baa, “A a! Unde wune ku ri ira pangma awu ti na si Rimam!” 4Yesu nungye ira utob-ba u rang ba baa, “Ani nde rimang ku kab ira titibi rishwu-ni? 5Ayi bir skeb ti a u ri baa, ‘A yata na pu ba afu ikentitibi-fu’ ree, re ti a u ri baa, ‘Nwunn ritsen ti kyang ikyin’? 6Amaa, ame u tatso ni iken ti ni nungye baa, Umbae Unde na site kuko uwae utense ti awu u yata na ande ikentitibi-ba.” Isim yine, awu ri te unde ti cwu afxen ti ajwo wu baa, “Nwunn ritsen, fur kucwo-fu, ti ru yi kununn!” 7Unde wu fa sunwunn ritsen u ru yi kununn-wu. 8Kiye ti ande ti funn atang sae iken yine, ikyenricwu ye ba. Aba nwunn u ku teb rinyi Rimam ikyaen ti, awu sa itso kuko yine na ande.

Yesu Kunn Matiyu

(Markus 2:13-17; Luka 5:27-32)

9Ti Yesu nwunn uwog atang u kyang ku ru, awu nung unde iki ti ku mbe aser akwe ti rinyi-wu baa, Matiyu. Unde wu som uwae kusog uwog ti awu ku nde wande-wu atang. Yesu ri te wu baa, “Putsa m.” Ti ritsen Matiyu sunwunn u putsa Yesu.

10Kiye iki Yesu ta kununn Matiyu wune u ku ci wuci ti ariki ti ku mbe aser akwe ti ariki ti ku putsa-ba icwe ande ndufu be. 11Ama kiye ti ande ti kumbub Farisi nung yi, aba rang atugbug Yesu baa, “Iken ti nde titawe unde ti uwe-ni ku ci wuci te ande ti ku mbe aser akwe ti utso ande bane ti ku putsa-ba icwe be si imi?” 12Amaa, Yesu fxen ye ira ti aba ku ri u sunn ira te ba baa, “Ande ti tsi ti ribom ijwe-ba ku sha-ba unde ti kucin be, se ande ti nae kicaeb. 13Ni ru ti ni ka sha imbyi ira yi ti a bae uwae Kutsingken Rimam baa, Rimam na sha-wu ti a yerwen na wu ibye be, awu na ku sha ti ande na site utob na risi. Ame ba-m utense ikyaen ti m kunn ande ti ku nde iken ti tinyang be. Ame ba ikyaen ande ti ku nde ikentitibi.”

Unju ti Cwe

(Markus 2:18-22; Luka 5:33-39)

14Isim yine ande ti putsa Yohana unde ti ku nde na ande batisma ru ba uwog Yesu u ba rang wu baa, “Nung! Ati ku cwe unju ko kiye titini. Ande ti kumbub Farisi ku cwe unju ama. Ande ti umbyi-fu nde rimang ku cwe-ba unju be?” 15Yesu rang ba baa, “Ande ti ta uwog ukwab unda ishe u byir utob kiye ti ubaen unda ishe a som te ba a? Amaa kiye ru ku ba ti a u ru ba ye ra ubaen unda ishe ru uwog-ba. Kiye wune aba u cwe unju u byir utob.

16“Unde u sa kutupwa tikyi kob fa-wu te kutupwa tishe be. Awu a nde ahan, kutupwa tishe wu u shiyaen ru ijwe ti tikyi u nda kiye wu ko fufa. 17Cwucwo unde u yaen ambyi awaen anam tishe si-wu uwae apwa tikyi#9:17 apwa tikyi. Ande ti uten atang site-ba ti kukwer be. A ku yaen ambyi awaen anam si uwae apwa mbawen. be. Awu a nde ayine, apwa yi u ndub yaen, ama ambyi anam yi u yaen mbub riben, apwa yi ti risu-yi u ndembeb. I nyang skeb ti unde ā yaen ambyi anam tishe si uwae apwa ti tishe, ikyaen ti meme-yi ā ye su atso nyinyang.”

Yesu Ndeya Unda iki u Kunn Shwur Umbae iki Uwae Itikicwu

(Markus 5:21-43; Luka 8:40-56)

18Kiye ti Yesu ku ri ira yine te ba, unde ndufu iki ka ru ba jwunn ikyig uwe-wu u ri baa, “Unda-m cwu tine ahan. Ru ba sa kujwo-fu nae tsa wu ti awu ā shwur.” 19Yesu sunwunn u putsa unde wu, ama atugbug-wu te wu putsa atso.

20Unda iki ti ku shinn anying ise ka asang rijwe asu ifaen ru ba isim Yesu u sa kujwo tekunn kutupwa-wu. 21Awu ku kab uwae baa, asiti awu a kwab u sa kujwo tekunn kutupwa Yesu, awu na u nwangru. 22Yesu kafe uwe u sae wu u ri baa, “Si-fu anying utob be, unda-m. Uwae kinjo-fu nwangru pu yi afu.” Ti ira unju ne, anying-wu ayi yer, ufunn sang wu ijwe.

23Ti Yesu ru ka sang kununn unde ndufu wu, awu sae baa, ande byir atang ku ten ricwu u ku jwub ira. 24Awu ri te ba baa, “Ni ruye yi ise meme-ni. Umbae wandab wune cwu-wu cwu be, awu nae kicwag.” Ande ba ti funn atang sang Yesu ti txir. 25Amaa, isim ti a jae ande ba ruye tag yi ise, Yesu sang yi kusog ti mbawandab wu nae atang u ru ka sa kujwo-wu u ye mbawandab wu fa sunwunn ritsen. 26Iten ira yine shag kyife uten atang meme.

Ande Ifaen ti Mbub Ayib

27Ti Yesu nwunn atang u ku ru, ande ti mbub ayib ifaen putsa wu isim. Aba jwub ira u ku ri baa, “Umbae Dawuda, sae ti te ayibrisi.” 28Kiye ti Yesu sang ka som mam pu wu uwae kusog, ande ti mbub ayib bane ru ba tu wu. Awu rang ba baa, “Ani ru kubenti baa, ame na u nde tu ti m u nwangru ni a.” Aba cwe baa, “Een, Itsekuru.” 29Ama Yesu sa kujwo tekunn ayib-ba u ri baa, “Ayi ā nde pangma ti ani ru uwae kinjo.” 30Ti ritsen ande ba sae tu uwog. Ama Yesu fwa ba kusen baa, aba na ri te-ba unde iki ira risu iken ti awu nde ne be. 31Amaa, aba nwunn u sa iten ira wande Yesu ri kyife uten atang meme.

Unde ti Kusung Titibi Tsi wu Unju

32Ti ande bane nwunn ku ru, ande iki pu unde ti tsi unju ru ku ba yi uwog Yesu. Unde wune ku ri tu-wu ira be, ikyaen ti, rijwen titibi byinn wu. 33Yesu rwae ruye rijwen titibi wu, ama unde wu sang ira ti ti ri. Ayib fur ande ti funn atang. A ku ri tetso baa, “Ati nung ji-ti iken iki pangma yine uwae uten Isirela khika be.” 34Amaa ande ndufu ti kumbub Farisi ti ta atang ri baa, “I si ukwe ajwen titibi ti nda wu kuko ti wu na jae ru rijwen titibi wune.”

Yesu Nung Risi Ande

35Yesu nwunn u sang uwae uten tiyang ti imbae uten u ku kwen na ande ira Rimam uwae asog Rimam-ba. Awu ku ri te ba ira ti tinyang risu Kujwokwe Rimam u ku nwangru ande ti site acaeb ti tsotso. 36Kiye ti awu pu ayib sae kumbub ande ti funn atang, risi nde wu ikyaen ti, aba ta uwae rikaen u si-ba te itindeya be. Aba pangma iwen ti site-yi te unde ti ku shi yi shi be. 37Awu ri te atugbug-wu baa, “Wuci ben ko tag uwae risaen, ande ti u bunn yi ko-ba be. 38Ni jwam Itsekuru ti awu ā tom ande ba kyi ti a na ba bunn wuci.”

Currently Selected:

Matiyu 9: kubNT

Highlight

Copy