Matiyu 8

Yesu Nwangru Unde ti Kicaeb Ikum

(Markus 1:40-45; Luka 5:12-16)

1Kiye ti Yesu sī rikwen ba ande tum atso putsa wu. 2Ama unde ti kicaeb ikum iki ru ba ku riben uwe-wu u jwam wu baa, “Itsekuru-m, asiti afu a cwe ira, afu u nde tu ti fu u nwangru m.” 3Yesu sa kujwo tekunn wu u ri te wu baa, “Ame cwe pu m, tu itinwangru.” Ti ritsen unde wu nwangru uwae kicaeb ikum-wu ayi. 4Yesu fwa wu kusen baa, “Nung! Ri te-fu unde iki ira yine be. Ru ka tatso risu-fu uwog kukwen Rimam,#8:4 Tatso risu-fu uwog kukwen Rimam Wande na kukwen si ti awu ku myae ijwe ande ti kicaeb ikum. Se kicaeb yi a ya ba ta pu-yi itawe awu u ri baa, a pang pu ba ti a u sang kusog Rimam. ti nda Rimam iken ti ten ti Musa ri tsi. Ayine u tatso ande meme baa, kicaeb-fu na ya ta pu yi.”

Yesu Nwangru Upyi Unde ti Uwe Akyirten

(Luka 7:1-10)

5Kiye ti Yesu ka sang uwae uka ti Kaparnawum, unde ti uwe akyirten ru ba tu wu u jwam wu baa, 6“Itsekuru, upyi-m nae kicaeb uwae kununn, awu wam afxen ti ajwo u ta uwae rikaen ko tag.” 7Yesu cwe na wu baa, “Ame u ru ka u nwangru wu.” 8Ama unde ti uwe akyirten wu ri te Yesu baa, “Itsekuru-m, ame ko-me ti m u kyangte fu uwae kununn-m be. Afu a ri ira amam, upyi-m u nwangru. 9Ame nung ayine ikyaen ti, ame ti risu-m, ame ta imbyi unde ti uwe-m. Ame ama site akyirten yang-ba ti ame skeb ba ti kuko. Ame a ri te awune baa, ‘Ru,’ awu u ru, ame a ri te uriki baa, ‘Ba,’ awu u ba.” 10Ira yine fur Yesu ayib. Ama awu ri te ande ti ku putsa wu baa, “Ame ku ri te ni kubenti, uwae ande ti Isirela ame tu ji-m unde ti site kubenti pangma unde ti rikyen wune be. 11Kubenti, ande ko timambe u ru kujwo usir ti kiskinn ti ti ureb u ba ci ukwab na Kujwokwe Rimam. Aba u ba som te Ibrahim, ti Ishaku ti Yakubu. 12Amaa, ande ti si ti a ú sang Kujwokwe Rimam, a u pu ba jwunn sang uwae kufub uwog ti aba u jwub ira u kub kujwo anyi.” 13Isim yine Yesu ri te unde ti uwe akyirten wu baa, “Ru-fu yi kununn, iken ti afu ru kubenti atang, a u nde yi na fu.” Ti ira unju-wu ne upyi unde ti uwe akyirten wu tu itinwangru uwae kicaeb-wu.

Yesu Nwangru Ande Yang-yi akwen

(Markus 1:29-34; Luka 4:38-41)

14Kiye ti Yesu ru ka sang kununn Bitrus, awu sae iya uwa Siman nae kicaeb. 15Awu sa kujwo tekunn unda wu, ama kicaeb yi ya wu ta. Awu fa sunwunn ritsen u sha na ba wuci.

16Ureb usir wu, a pu ande ti rijwen titibi ta risu-ba ba uwog Yesu. Awu fwan ajwen titibi yine kubyag u jae ruye yi, ama u nwangru ande ti acaeb ti tsotso. 17Awu nde wande yine ikyaen ti ayi ā kumunn ira iki ti a ri pu ba ti kucang yi unju na Ishaya unde ti ku ya iskin ira Rimam baa,

“Awu ti risu-wu paembe acaeb-ti.

Awu su acaeb ti ta rimenn-ti ru.”

Ande ti ku Sha ti A u Putsa Yesu

(Luka 9:57-62)

18Ti Yesu nung baa, ande na jwunn pakob wu, awu ri te ande-wu baa, aba na yen ru yi ukunn uyinn uwe akwen. 19Ama unde iki uwae ande ndufu ti ku kwen na ande icwe ba uwog Yesu u ri te wu baa, “Unde ti uwe, ame u putsa fu ru yi uwog ti afu ku ru yi atang meme.” 20Yesu ri te wu baa, “Aswáe site uwáe ti ayi ku nae atang, inung ti ku pinn apupwen ama site afug-yi, amaa, Umbae Unde#8:20 Umbae Unde Yesu kunn ijwe-wu ahan ikyaen ti a tangsom ti ira ti a bae uwae kutsingken na Daniyel risu unde ti u ba nwangru Mbayawuda. Sae Daniyel 7:13; 8:17. site-wu ti uwog ti awu u nae atang be.”

21Unde iki cwucwo uwae ande ti ku sha ti a u putsa wu ri baa, “Itsekuru, afu a cwe ira ame u ru ka nji ite-m titawe.” 22Ama Yesu ri te wu baa, “Putsa m, ti ya ande ti cwucwu ta ti a nji atso.”

Yesu Nda Ufunn Kyatsi

(Markus 4:35-41; Luka 8:22-25)

23Isim yine Yesu sang uwae kuyae, ama ande ti awu ku kwen na ba iken putsa wu. 24Ti a nunung, ufunn ti ribom nwunn uwae uyinn atang ku nda kuyae ku txi pu ambyi txi pu ambyi u ku sha ti awu u fxaebur, ama Yesu nae kicwag. 25Ande-wu nwunn u ka shwu wu u ri te wu baa, “Nwangru ti, Itsekuru! Ati ku cwu-ti.” 26Yesu ri te ba baa, “Ande-m, ani nde rimang ku kyen ikyenricwu? Ani site-ni uwae kinjo ko tikiyib be a!” Isim yine awu nwunn u taen ufunn ira u fwan uyinn kubyag, ama uwog ka skirr. 27Ayib fur ande ti ta uwae kuyae atang meme. A ku rang baa, “Awune si utso unde ti rimang, ti ufunn ku nae risu riben te wu?”

Yesu Nwangru Ande Ifaen ti Site Rijwen Titibi

(Markus 5:1-20; Luka 8:26-39)

28Kiye ti Yesu ka ukunn uyinn akwen, uten ande ti Gadara, ande iki ifaen ba tu wu. Aba si ande ti munn te rijwen titibi u ruye uwog ti a ku nji ande atang. Aba ku sae ayib kum urwa urwa amam u byag uwae si-yi ti ti ri be. Unde iki ko-wu ti wu u ru fengo atang be. 29Ti ande ti munn te rijwen titibi bane nungye Yesu, aba taen ira ti ribom-ba baa, “Afu Umbae Rimam, afu nde rimang u ba uwog-ti ike? Afu ba ti fu nde ti rikaen ti ti kiye pang-wu khika be a.”

30Uwog wune ande ba iki pu ingog-ba ku ci iken fifer ti uwog atang. 31Rijwen titibi ti ta uwae ande ti rijwen titibi bane jwam Yesu baa, “Asiti afu a jae ruye ti, nda ti ti ti u ru ka sang uwae ingog ti ta akwen ne.” 32Yesu cwe na ba baa, aba na ru. Ama ajwen titibi yi ruye uwae ijwe ande ba u ru ka sang uwae ingog. Ama ti ritsen ingog yi meme pab ter ru ka jwunn si uyinn ti ta atang u si ka ngwa cwu uwae ambyi. 33Ande ti ku shi ingog yi nwunn u ter ru ka sang uwae uten ti fer atang u ka ri ira yi te ande ti ta uwae uten atang. A ri te ba iken ti aba nung, fa ti iken ti tu ande ti kijaen abane. 34Kiye ti ande ba fxen ira yine, meme-ba ter inyae ru ka tu Yesu. Ti aba nung wu, a jwam wu baa, awu na nwunn uwae uten-ba.

Currently Selected:

Matiyu 8: kubNT

Highlight

Copy