Matiyu 7

Kusen ti Fwa Risu Rikwen ti Pwen

(Luka 6:37-38; 6:41-42)

1“Ni pwen-ni atso rikwen be, be a u pwen ni rikwen. 2Ikyaen ti, a u pwen ni rikwen ti fengo ti ani pwen ariki, u myae na ni te kitu kumyae ti ani myae na ariki. 3Afu nde rimang nungye kirim ti ta uwae riyib inja-fu u nungye-fu kucwub kutuku ti ta riyib-fu be? 4Ko afu u kyang rimang ri te inja-fu baa, afu na u sa ruye kirim ti ta riyib-wu, kucwub kutuku ama ta riyib-fu? 5Afu unde ti kufur! Sa ru iken ti rikem ti ta uwae riyib-fu ne titawe afu u sae tu iken tikiyib ti ta uwae riyib inja-fu.

6“Pu iken ti saen kyag na-fu mbapxu be. Pu iken ti site aser ama jwunnsi-fu ingog be, be ayi u ceb ndembeb yi te afxen ama u kafe u kub fu anyi.

Iken ti Kwen Risu Rimam ti Jwam

(Luka 11:9-13)

7“Jwam! A u nda ni iken. Sha! Ani u tu. Kwer kujwo ufu kusog! A u mbubta na ni. 8Ikyaen ti, unde titini ti a jwam, a u si na wu. Unde titini ti a sha, awu u tu, unde ti a kwer kujwo ufu kusog ama, a u mbubta na wu. 9Aye uwae-ni ti umbae-wu a jwam wu buredi, awu u sa kutxom na wu? 10Ko umbae wu a jwam wu iwag, awu u nda wu ikentibi? 11Asiti ani ande ti ku nde ikentitibi a ku pu iken ti tinyang na anyisu-ni, Itse-ni ti ta apupwen ama re? Asiti ande a jwam iken uwog-wu, awu u nde na-wu aba be a.

12“Nde na ariki iken ti afu ku sha ti a na nde na fu. Ayine ti si imbyi Icwe Musa ti iken ti kwen na ande ti ku ya iskin ira Rimam.

Fengo Rimam ti Fengo Utense

(Luka 13:24)

13“Ni putsa ufu ti fifer sang, ikyaen ti, ufu ti ku sang yi uwog ititwenji yaen timambe, fengo-wu ama caeb-wu caeb be. Cwucwo, ande ti ku putsa fengo wune ko timambe. 14Amaa, ufu ti ku sang yi uwog unyang ti tsikukunn fer timambe, fengo ti ku tso yi atang ama site rikaen timambe, ande ti ku putsa atang ama ko-ba ko be.

Iken ti Kwen Risu Kutuku ti Awaen-wu

(Luka 6:43-44)

15“Ni nung nyinyang ti ande ti ku ya iskin ti rifen. Aba ku ru ba uwog-ni pangma iwentam rimenn ijwe ise ike, amaa uwae utob-ba, aba si ibye anyi. 16Ani u nungye utso ande bane uwae ajwo wande-ba ti aba ku nde. Kutukog u waen awaen anam a. A u kwaen lemo ruye yi kutuku indag a. 17Kutuku ti tinyang ku waen awaen ti tinyang, amaa kutuku titibi ku waen awaen titibi ama. 18Kutuku ti tinyang ku waen-wu awaen titibi be, kutuku titibi ama ku waen-wu awaen ti tinyang be. 19Kutuku ti a waen-wu awaen ti tinyang be, a u yer wu si riben u sa jwunn sang uwae urwa. 20Yi fengo wune, ani u nungye ande ti ku ya iskin ti rifen te ajwo wande-ba.

Ande Rimam ti Kubenti

(Luka 13:25-27)

21“Ayi si-yi meme ande ti ku kunn me baa, ‘Itsekuru, Itsekuru,’ ti u sang Kujwe Ukwe Rimam ti apupwen be. Ande ti u sang si nyang ande ti ku nde wande Itse-m ti ta apupwen, aba amam. 22Uwae usir rikwen, ande u funn u jwam m baa, ‘Itsekuru, Itsekuru! Ati ya-ti iskin uwae rinyi-fu, ama jae ruye-ti rijwen titibi rimenn ande uwae rinyi-fu be a. Ati nde wande ti ku fur ayib ko timambe uwae rinyi-fu!’ 23Tiri ame u ri te ba baa, ‘Ame nung-m ani usir iki be. Ni ko ru ru uwe-m ike, ani si ande ti ku nde wande titibi.’

Unde ti Ben ayib ti Unde ti Kuskwab

(Luka 6:47-49)

24“Ikyaen ayine, unde titini ti a fxen ira-m ayine u nde wande te yi, awu pangma unde ti ben ayib u ta umbyi kusog-wu ti kutxom. 25Ama upwen tsa, uyinn munn ba yaen shag ise, ufunn kae ba tso tsa risu kusog wu. Ama awu mbub si-wu be, ikyaen ti, a ta umbyi-wu ti kutxom.

26“Unde ti a fxen ira-m u nde-wu wande te yi be, awu u si pangma unde ti kuskwab ti mbye kusog-wu tsitsa isa ibung. 27Upwen tsa, uyinn munn ba yaen shag ise, ufunn kae ba tso tsa kusog wu, ama kusog wu kyaen si tag sisaen, ko uwog iki tsitsi-wu be.”

Iken Tikwen Yesu Fur Ande Ayib

28Kiye ti Yesu ri mam ira yi, ayib fur ande ti putsa wu risu iken ti awu kwen na ba, 29ikyaen ti, awu si-wu pangma ande ndufu-ba ti ku kwen na ba icwe Rimam be. Ana-wu, awu ku kwen na ba pangma unde ti sa icwe yi tsi.

Currently Selected:

Matiyu 7: kubNT

Highlight

Copy