Matiyu 22

Ira ti Sunn Risu Ukwab Unda Ishe

(Luka 14:15-24)

1Yesu sunn kyi ira iki te ba cwucwo baa, 2“Kujwokwe Rimam ti apupwen pangma Ukwe ti mbe unda na umbae-wu. 3Awu tom apyi-wu ti a na ka kunn ande ti awu yae ti a na ci ukwab unda ishe ayi, ama ande ba shaen-ba. 4Awu tom kyi apyi iki ti a na ka ri te ande ba baa, ‘Wuci ukwab unda ishe-m ben mam pu yi. Ame wen pu m mbawen-m te indag-m ti rikem. Ame nde tag pu m iken meme. Ni ru ba ci ukwab-m.’ 5Ama aba naa atong fxen-ba ira-wu ayi be, u ye ikyin-ba ru. Uriki ru yi risaen-wu, uriki ru yi ritug, 6ande ti tsitsi ama ye apyi unde wune byinn u wen ba. 7Rinae ye ukwe wu, ama awu tom akyirten-wu ka twenji ande ba ti wen apyi-wu, u twen mbub tag uten-ba. 8Isim yine ukwe kunn byir apyi-wu u ri te ba baa, ‘Ame nde mam pu m wuci ukwab-m, amaa ande ti ame yae ba pang-ba atang be. 9Tine, ni ru yi fengo kum ti ni ka yae ande ti ani tu atang ba ci ukwab yi.’ 10Apyi bane nwunn u ru yi fengo yi, u ka kunn ande ti tinyang ti titibi ti a tu atang meme, ama uwog ukwab wu munnkyi te ande ti a yiyae.

11“Kiye ti ande funn tag pu ba, ukwe nwunn sang yi uwae kusog atang ti wu na nung ande ba. Awu sang ka ye u ka nung unde iki ti sī-wu kutupwa ukwab be. 12Ukwe rang wu baa, ‘Urwan-m, afu kyang rimang ba sang ike u sī-fu kutupwa ukwab be?’ Unde wu bwetag skirr. 13Tiri ukwe ri te apyi-wu baa, ‘Ni yir wu afxen ti ajwo ti ni sa wu jwunnsi uwog ti byitang, uwog ti a u jwub ira u kub nger!’ ” 14“Ayi a si ira Kujwokwe Rimam, a kunn ande ko timambe, amaa ande ti a tsitsab kpang.”

Ira Risu Aser Ukwe

(Markus 12:13-17; Luka 20:20-26)

15Uwog wune, ande ti ta kumbub Farisi ru ka myae fengo ti aba na u txae Yesu ira unju. 16Isim ayine, aba tom ande ti imbyi-ba iki te ariki uwae ande ti isim Herodus ru ka uwog Yesu. Aba ka rang wu baa, “Unde ti uwe, ati nung pu ti baa, afu na si unde ti kubenti ama ku kwen na ande ira Rimam ti kubenti. Afu ku kab-fu rikaen ira ti ande ku kab be, ikyaen ti, afu ku fxen-fu atong risu iken ti unde ku tang baa, awu na si be. 17Ri te ti. I nyang ti ati u ta aser ukwe na Kaisar, Ukwe Roma a.” 18Yesu nung mam pu wu ira titibi ti aba ku myae rishwu-ba u ri te ba baa, “Ani ande ti kufur! Ani kyang rimang ku sha ti ni myae me myae? 19Ni sa riyaen aser ti ani ku pae aser ukwe atang ba ti m nung.” A ka sa riyaen aser ba na wu. 20Yesu rang ba baa, “Uwe unde ti ta ijwe aser yine si ana aye? Rinyi unde ti a bae atang ne si ana aye?” 21A ri te wu baa, “Ana Ukwe Roma.” Yesu ri te ba baa, “Ayi a si ahan, ni pae iken ti si ana Ukwe Roma na Ukwe Roma, ti ni pae iken ti si ana Rimam na Rimam.” 22Kiye ti aba fxen ira yine, ayib fur ba. Aba ter ya Yesu ta u nwunn uwog wu atang.

Ira Risu Ande ti Cwucwu

(Markus 12:18-27; Luka 20:27-40)

23Ti usir wu, ande ti ta kumbub Saduke ba uwog Yesu. Aba si ande ti ku ri baa, unde na a cwu pu wu, awu na u shwur-wu cwucwo be. Aba ba rang Yesu ira 24baa, “Unde ti uwe, Musa kwen na ti baa, asiti unde a cwu u mbae-wu anyisu be, inja-wu ā mbe kang uwa icwu wu ikyaen ti wu na mbae anyisu na inja-wu ti cwucwu. 25Anyisu unde iki ta atang ka itsongfaen. Umbae ti ndufu mbe unda u cwu u mbae-wu anyisu te wu be, u ya uwa-wu ta na inja-wu. 26Ti ifaen mbe unda wu u cwu u mbae-wu anyisu te wu be, ka ti ti ita, ama meme itsongfaen-ba mbe tag unda kinjo u mbae-ba anyisu te wu be. 27Ricwunnkyi-yi, unda wu ti risu-wu sa cwu. 28Tine unda wu u ba si uwa aye uwae ande itsongfaen bane kiye ti a ba nwunn uwae iticwu? Ikyaen ti, meme-ba mbe wu.”

29Yesu ri te ba baa, “Ira-ni ayine u ru-yi risu be, ikyaen ti, ani nung-ni Kutsingken Rimam be. Ani nung-ni kuko na Rimam be ama. 30Usir ti a u kunn nwunn ande ti cwucwu, aba u pangma atom Rimam ti apupwen. Arom te anda u baen-ba atso cwucwo be. 31Ira na ande ti nwunn uwae iticwu ama, ani fxen-ni ira ti Rimam ri te ni be a. 32‘Ame si Rimam Ibrahim, Rimam Ishaku, Rimam Yakubu.’ Awu si-wu Rimam ande ti cwucwu be, awu si Rimam ande ti tsi user.” 33Ande ti funn atang fxen ira-wu yine, ama iken ti kwen-wu fur ba ayib.

Icwe ti Ko Siskeb Uwae Icwe Rimam

(Markus 12:28-34; Luka 10:25-28)

34Kiye ti ande ti kumbub Farisi fxen baa, ande ndufu ti kumbub Saduke na shanum te ira ti a u ri te Yesu, aba kunn byir atso ti uwog kinjo. 35Uriki uwae-ba si unde ti nung ira icwe si-yi ti ti ri be. Awu kwab ti wu u myae Yesu kumyae ti ira ti ti rang. 36Awu rang Yesu baa, “Unde ti uwe, icwe ti ko siskeb uwae Icwe Rimam si titini?” 37Yesu ri te wu baa, “Ye ure te Itsekuru-fu Rimam ti utob-fu meme, ti unyang-fu meme, ti ira ti kab-fu meme. 38Awune si icwe ti ko siskeb u si ti tawe. 39Ti ifaen-yi si pangma ti kucang, ye ure te unde ice-fu pangma ti afu ye ure te risu-fu! 40Icwe Rimam ti tsitsi ti iken ti kwen na ande ti ku ya iskin ira Rimam meme som tsa risu icwe ifaen yine.”

Unde ti Rimam Tsab Tsi

(Markus 12:35-37; Luka 20:41-44)

41Kiye iki ti ande ti kumbub Farisi ba byir ti uwog kinjo, Yesu rang ba baa, 42“Ani ku kab rimang risu Unde wu ti Rimam Tsab Tsi? Awu si umbae aye?” A ri te wu baa, “Awu u si umbae Dawuda.” 43Yesu rang kyi ba cwucwo baa, “Ayi a si ahan, Kusung Rimam nde rimang nda Dawuda ti wu na kunn unde wu baa, Itsekuru-wu? Ikyaen ti, Dawuda ri baa,

44‘Rimam ri te Itsekuru-m baa,

Som kujwo rici-m ike,

se iken ti ame a wenji tag pu m ande ti rika-fu!’

45Ti Dawuda ku ri baa, Unde wu ti Rimam Tsab Tsi na si Itsekuru-wu ne ahan, awu kyang rimang u si kyi-wu umbae Dawuda?” 46Unde ta-wu atang ti nda tu Yesu imbyi ira ti rang-wu be. Tsi usir wune ru yi uwe, unde iki ta-wu ti si te ribom utob ti wu u rang Yesu ira cwucwo be.

Currently Selected:

Matiyu 22: kubNT

Highlight

Copy