Matiyu 19

Ribaen Ti Wen

(Markus 10:1-12)

1Kiye ti Yesu ri tag ira yine, awu nwunn uten Galili u kafe ru ti yi uten ti Yawudiya, ukunn akwen unyim ti Yordan. 2Ande kuko tum atso putsa wu, awu ama ku nwangru ba uwae acaeb-ba.

3Ande ti kumbub Farisi ru ba myae wu kumyae u ri baa, “Uwog-fu, i nyang ti unde ā fxae iben-wu te uwa-wu, asiti awu a ku sha a?” 4Yesu rang ama baa, “Ani fxen-ni ira ti a bae uwae Kutsingken Rimam be a. Ti kucang ti Rimam kyae ande, awu kyae urom ti unda 5u ri baa, ‘Unde u ya ite-wu ti iya-wu ta u ti uwa-wu u baen atso, meme ifaen-ba kafe anying kinjo.’ 6Aba si-ba ande ifaen cwucwo be, aba si unde kinjo. Ikyaen na yine, iken ti Rimam a yir pu-wu, unde iki ā saen-wu ayi be!” 7Ande ba rang kyi Yesu baa, “Ayi a si ahan, imi ti nde ti Musa sa icwe tsi baa, asiti unde a te uwa-wu u kata ribaen, awu na nda unda wu kutsingken na iben ti wen ti awu na tē wu ru?” 8Yesu ri te ba baa, “Musa nda ni icwe ti ni na kata ribaen ikyaen utob ti kwen-ni. Ayi si-yi ahan ti kucang cang ti Rimam mam utense be. 9Ame ku ri te ni baa, unde a wen ribaen-wu te uwa-wu, ti a si-yi ikyaen ti unda wu nae isa be, asiti unde wu a ru ka mbe unda tishe, awu nae pu wu amae te unda wu.”

10Atugbug Yesu ri te wu baa, “Asiti ayi a si ahan kutampwa urom te unda, ayi nyangskeb ti ribaen ā ta-yi be.” 11Amaa Yesu ri te ba baa, “Ira ti ame ri ne, i si-yi meme ande ti u kyangte yi be, se ande ti Rimam sa yi na pu wu aba. 12Ikyaen ti, ira munnae munnae ti nde ne arom u mbe-ba anda be. Ariki cwu umbyi ru ti uwae rishwu iya-ba. Ariki ikyaen ti, ande ndembeb ba. Ariki ama ku mbe-ba anda be ikyaen wande na Kujwokwe Rimam ti apupwen. Unde ti a u nde tu, awu ā fxen iken ti kwen yine.”

Yesu Nde Anyisu Tinying Itinyang

(Markus 10:13-16; Luka 18:15-17)

13Ande pu anyisu-ba ba uwog Yesu ti wu na pu ajwo cwu tsa ba risu ti wu na jwam itinyang Rimam ba risu-ba, amaa ande ti imbyi Yesu fwan ande ba kibyag. 14Yesu ri baa, “Ni ya anyisu ta ti a ru ba uwog-m. Ni rwae-ni aba rwae be, ikyaen ti, Kujwokwe Rimam ti apupwen si ikyaen utso ande pangma anyisu bane.” 15Yesu pu ajwo cwu tsa anyisu ba risu tawe u nwunn atang.

Unde ti Rifunn ti Kujwokwe Rimam

(Markus 10:17-31; Luka 18:18-30)

16Kiye iki unde iki ru ba uwog Yesu u rang wu baa, “Unde ti uwe, imi ti tinyang ti ame u nde titawe ame u tu unyang ti tsikukunn?” 17Yesu rang wu ama baa, “Afu kyang rimang ku rang me ira risu iken ti tinyang? Unde ti tinyang si nyang unde kinjo amam. Afu a ku sha ti fu u tu unyang ti tsikukunn, ye su icwe Rimam.” 18Unde wu rang Yesu baa, “Icwe titini?” Yesu ri te wu baa, “Wen-fu unde be, nae-fu amae be, yib-fu riyib be, yer-fu rifen be, 19nda itse-fu ti iya-fu kuko, ye ure te unde ice-fu pangma ti afu ku ye te risu-fu.” 20Unde wu ri te Yesu baa, “Ame ye su tag pu m meme icwe yine, imi ti tsitsi kyi cwucwo?” 21Yesu ri te wu baa, “Asiti afu a ku sha ti fu na si-fu ti riraen be, ru ka pu rifunn-fu jabci ti pu aser-yi kan na ande ti rikaen. Afu u tu rifunn apupwen akwen. Isim ayine, ba putsa m.” 22Kiye ti unde ti rifunn wu fxen ira yine, awu nwunn uwog atang ti utob ti byir, ikyaen ti, awu site rifunn ko timambe.

23Yesu ri te atugbug-wu baa, “Kubenti ti ame ku ri te ni, ayi bom pu yi ti unde ti rifunn u sang Kujwokwe Rimam ti apupwen. 24Ame ku ri te ni kyi cwucwo, ayi caeb skeb pu yi ti unde ti rifunn u sang Kujwokwe Rimam ti ti a u sa kakum nwunn sang umbyi uyi.”

25Kiye ti atugbug Yesu fxen ira yine, ayib fur ba risu, a nwunn u ku rang atso baa, “Ayi a si ahan ama aye ti u nwangru kyi cwucwo?” 26Yesu pu ayib cwu tsa ba piin u ri baa, “Ayine si iken ti cicaeb uwe ande, amaa iken iki ta-yi ti si iken ti cicaeb uwog na Rimam be.”

27Ti Bitrus fxen ira yine, awu rang baa, “Tine ati ya iken-ti meme ta pu ti u ba putsa fu. Kujwojang imi ti ati u tu?” 28Yesu ri te ba baa, “Kubenti ti ame ku ri te ni, kiye ti a u kafe utense tishe, Umbae Unde u som tsa iken ti som na Ukwe-wu, ani ande-m rijwe asu ifaen ne u som tsa iken ti som na akwe ama. Ani u pwen rikwen risu rishi anyisu Isirela rijwe asu ifaen. 29Unde ti a ter ya kununn-wu ta, ko inja-wu ko kaya-wu ko ite-wu ko iya-wu ko anyisu-wu ko risaen ufang-wu ikyaen rinyi-m, awu u tu iken yi ti awu ya ta ne atsepu mae itsong. Cwucwo awu u tu unyang ti tsi kukunn. 30Amaa, ande yang akwen ti si ti kucang u ba kafe ande ti isim, ande ti isim ama u ba kafe ande ti uwe.”

Currently Selected:

Matiyu 19: kubNT

Highlight

Copy