Matiyu 15

Iken ti Kwen Ande Ndufu ti Kute

(Markus 7:1-13)

1Kiye iki ande ti kumbub Farisi ti ande ti ku kwen na ande icwe ru Urushelima ba uwog Yesu u rang wu baa, 2“Ande ti imbyi-fu kyang rimang ku putsa-ba icwe abitse-ti be? Aba ku jwo-ba ajwo yi fengo ti ande ndufu kwen na ti, titawe m ci wuci be.” 3Yesu rang ba ama baa, “Ani ama kyang rimang ku sae ru Icwe Rimam, ku putsa icwe ti ani mam te ajwo-ni? 4Rimam ri baa, unde na u nda itse-wu ti iya-wu rurob. Unde ti a ri ira titibi risu itse-wu ko iya-wu, a na wen wu wen. 5Amaa, ani ku ri baa, ‘Asiti unde a ri te ite-wu ko iya-wu baa, “Ite, iken ti afu ku sha uwog-m, ame nda pu m Rimam,” 6ayi na si-yi kang ti awu na nungkyi itse-wu cwucwo be.’ Uwae yine, ani sae ru pu ni Icwe Rimam ikyaen iken ti kwen ti abitse-ni mam tsi. 7Ani ande ti kufur! Ani si pangma ti Ishaya unde ti ya iskin ira Rimam ri risu-ni kute baa,

8‘Ande bane ku nda m rurob

te unju ukaen,

utob-ba rurwen te m.

9A ku fen m ti ukaen amen.

A sa icwe ti ande mam ti ajwo-ba

ru ba fikyi icwe ti ana-m.’ ”

Iken ti ku Ndembeb Unde Uwe Rimam

(Markus 7:14-23)

10Yesu kunn byir ande ti funn atang ba uwog-wu u sunn ira te ba baa, “Ni naa atong ti ni fxen! 11Ayi si-yi iken ti unde ku ci si rishwu ti ku ndembeb-wu uwe Rimam be. Ayi si iken ti ku tso uwae unde ba ti ku ndembeb wu uwe Rimam.”

12Isim ira yine ande ti awu ku kwen na ba ru ba tu wu u rang wu baa, “Afu nung ti ande ti kumbub Farisi ndembeb utob kiye ti afu ri ira yine a?” 13Yesu ri te ba baa, “Meme ituku ti si-yi ana Itse-m ti apupwen ti yen be, a u mbub pu yi tso ti ipab. 14Ni ya ba ta. Aba si ande ti mbub ayib ti pu ariki ti mbub ayib ku kyang. Ani nung pu ni baa, asiti unde ti mbub ayib ti unde ti mbub ayib a tae atso, meme-ba u pu atso ka si uwae kukwae.”

15Bitrus jwam Yesu baa, “Ri te ti imbyi ira yi ti afu sunn ne.” 16Yesu ri te ba baa, “Ani ama, ani kab ye-ni ira yi ti ame ri ne khika be a. 17Meme iken ti ku si unju si uwae, awu putsa kushwur si u ka ruye yi ise. 18Amaa, iken ti ku tso unju unde ku ruye riyaen utob-wu. I si itso iken yine ti ku ndembeb unde uwe Rimam. 19Ikyaen ti, ira ti kab ti ku tso uwae utob unde si ira ti kab titibi, ande ti wen, iyag ti nae, amae ti nae, riyib ti yib, ucwé tikong, rinyi unde ti ti rimbeb. 20Iken yine ti si iken ti ku ndembeb unde uwe Rimam. Amaa ti unde u ci wuci u jwo-wu ajwo yi fengo ti ana Farisi be, ayine u ndembeb-yi unde uwe Rimam be.”

Yesu Nwangru Umbae Unda ti Rikyen

(Markus 7:24-30)

21Yesu nwunn atang u ru yi uten Tiire ti Sidon. 22Unda iki ti ta uten atang ru ba uwog Yesu. Awu si unda Kanana. Awu ru ba jwam Yesu baa, “Itsekuru-m, Umbae Dawuda, sae me te ayibrisi! Rijwen titibi ye unda-m u ku nde wu ira timambe.” 23Yesu ri-wu ira iki te unda wu be. Ande ti imbyi-wu ru ba tu wu u jwam wu baa, “Tē unda wune ru ike, awu ku taen ira putsa ti ti umbyi.” 24Yesu ri te ba baa, “A tom me ba nyáng uwog aba iwen ti yagtita, ande ti Isirela.”

25Ama unda wu ru ba ku riben uwe-wu u jwam wu baa, “Itsekuru-m, ndeya m.” 26Yesu sunn wu ira baa, “I nyang-yi ti a u sa wuci anyisu tinying u sa jwunnsi na mbapxu be.” 27Unda wu cwe baa, “Kubenti Itsekuru-m, amaa, mbapxu ku ndeye ti yi ci amumunn wuci ti ku jwunnsi afxen tebur itsekuru-ba.” 28Yesu ri te wu baa, “Uwae kinjo-fu ko. Iken ti afu ku sha, a u nde na fu.” Ti ira unju, umbae unda wu nwangru uwae ira rijwen titibi-wu.

Yesu Nwangru Ande Ko Timambe

29Yesu nwunn atang u putsa unju uyinn ti Galili ku ru. Uwog iki, awu tso yi kibab rikwen ka som atang. 30Ande yang-ba akwen ru ba uwog-wu te ande ti kicaeb. Ande ti pxib afxen, ande ti mbub ayib, ande ti faekyi afxen ti ajwo, ande ti tsi unju, ande ti acaeb ti tsotso, a pu ba ba som afxen Yesu. Awu nwangru ba. 31Ayib fur ande ti funn atang risu kiye ti aba sae ande ti tsi unju ku ri ira, ande ti pxib afxen ku kyang ikyin, ande ti faekyi afxen te ajwo nwangru, ande ti mbub ayib ku sae uwog. Aba teb Rimam na Isirela.

Yesu Sha Wuci na Ande Skeb Kumbub Inje

(Markus 8:1-10)

32Yesu kunn byir ande ti imbyi-wu u ri te ba baa, “Ame ku nung risi ande bane, ikyaen ti, a ta te me ka pu ba usir ita tine a ci-ba wuci iki be. Ame ku sha-m ti m tē ba ru ti rimenn rishwu be, be rikob u ye ba fengo.” 33Ande ti imbyi-wu rang wu baa, “Ati u tu wuci aka uwae kutur khika ike ti ati u pu na ande ba?” 34Yesu rang ba baa, “Ani ta te abyi buredi imwa?” A ri te wu baa, “Abyi buredi itsongfaen ti iwag kpang.” 35Yesu ri te ande ba ti a na som riben. 36Isim ti ande ba som mam pu ba riben, awu sa abyi buredi itsongfaen te iwag yine u nde fxaefa na Rimam, u nyangta yi u pu na ande-wu. Aba ama kan na ande ba ti som atang. 37Meme ande ba ci u num. Ande Yesu byir amumunn-yi munn ijwe atyika itsongfaen. 38Ujwunn ande ti ci wuci yine si kumbub inje, a pwen anda ti anyisu fa-ba atang be.

39Isim yine Yesu tē ande ba, u sang uwae kuyae ru yi uwae uten ti Magadan.

Currently Selected:

Matiyu 15: kubNT

Highlight

Copy