Matiyu 13

Yesu Sunn Ira Risu Unde ti ku Yag Itso

(Markus 4:1-9; Luka 8:4-8)

1Ti uwae usir wu, Yesu ruye kununn u ru ka som unju uyinn. 2Ande yang-ba ru ba byir pakob-wu. Ikyaen yine, awu ru ka sang uwae kuyae u som atang, ande ba ama tsi ti ukunn uyinn.

3Awu ri te ba ira yang-yi yi fengo ira ti sunn baa, “Unde ti ritom iki nwunn ru ka u yag itso. 4Ti awu ku yag itso yine, itso iki jwunnsi fengo, ama inung ba tob pu yi ci. 5Itso iki si riben kusáng uwog ti ayi tu-yi isa yang-yi be. Ayi ruye ise ti kife ikyaen ti ayi si-yi te riben ti tinyang be. 6Ama kiye ti usir byag ba, ayi wam cwu, ama atsing-yi waen tika, ikyaen ti, ipab-yi si fob-yi riben be.

7“Itso iki tā ka sī uwog icwong, ama icwong ser tso u ba cwin wen yi. 8Itso iki ama tā ka sī riben ti tinyang, ama ayi waen awaen, uriki mae ande itsong. Uriki mae ande ita. Uriki rijwe ita.

9“Unde ti a site atong ti ku fxen ira, awu ā fxen.”

Iken ti Nde Yesu ku Tsag Ira ti Riben

(Markus 4:10-12; Luka 8:9-10)

10Ama atugbug na Yesu ba rang wu baa, “Ikyaen imi ti afu ku ri kob ira te ba ti ira ti sunn?” 11Awu ri te ba baa, “Ana-ni, a nda pu ba ani ti ni na nungye ira ti kitam na Kujwokwe Rimam ti apupwen. Amaa, uwog-ba, a nda-ba aba rinda wune be.

12“Uwog na unde ti site iken, a u sī na wu ko ra fufa, awu u site iken kuko. Unde ti si-wu te yi be, iken ti kpang ti awu site, a u mbe ra yi ru ru. 13Iken ti nde nee ame ri ira te ba yi uwae ira ti ti sunn si ikyaen ti, aba ku sae, amaa, a ku nung-ba be, aba ku naa atong, amaa, a ku fxen-ba be, ku nungye-ba be. 14Yi uwog-ba ama, a kumunn pu ba ira na Ishaya unde ti ku ya iskin ira Rimam ti ri baa,

‘Itifxen, ani u fxen

amaa ani u kab tu-ni be.

15Ikyaen ti, utob ande bane

cwunnkyi pu yi,

aba tsi kyi atong-ba,

aba burkyi ayib-ba.

Aba cwe-ba ti a u sae uwog be.

A cwe-ba ti a u fxen ira be.

Aba cwe-ba ti a u si

ande ti ku kab tu ira be.

Aba ku sha-ba

ti a u kafe ba uwog Rimam

ti wu to ser ba be.’

16“Amaa, itinyang si ana ayib-ni ikyaen ti ayi ku sae, ti atong-ni ama, ikyaen ti ayi ku fxen ira. 17Kubenti, ame ku ri te ni, ande ti ku ya iskin ira Rimam ti ande ti kubenti yang-ba ku sha ti a na u nung iken ti ani na ku nung, aba nung-ba be, aba ku sha ti a na fxen iken ti ani ku fxen, aba tu-ba riyae be.

Imbyi Ira Risu Unde ti ku Yag Itso

(Markus 4:13-20; Luka 8:11-15)

18“Ni naa atong ti m ri te ni ira risu unde ti ku yag itso. 19Kiye ti unde a fxen ira risu Kujwokwe Rimam, asiti awu a kab tu-wu ira yi be, awu Unde Titibi ku sang ba ku fxaen mbe ra iken ti a tso tsi utob-wu u sa ru. Ayine si pangma itso iken yi ti tā ka si ukur fengo. 20Iken ti tā ka si riben kusáng si pangma unde ti fxen ira Rimam u kyangte yi ti kufe ti utob titsen, 21amaa, awu si-wu te ipab be u som ra pang ahan, ama kiye ti rikaen nwunn, ko asiti ande a nde wu rikaen ikyaen ira Rimam ti awu putsa ne, ti ritsen, awu ter ya ira Rimam ta. 22Itso iken ti tā ka si uwae icwong si unde ti mbe ira Rimam ti utob-wu, ama ira ti kab risu iken na ise ti rifunn fangkyi wu, ama awu tso-wu ajwo wande ti tinyang be. 23Iken ti tā ka si riben ti tinyang ama, si unde ti fxen ira Rimam u ye su yi tsi utob-wu. Ayi waen awaen. Iki ikaen mae itsong, iki ikaen mae ita, iki ama si rijwe ita.”

Itso Alikama ti Itso Arisab

24Awu sunn kyi ira iki cwucwo te ba baa, Kujwokwe Rimam ti apupwen na pangma unde iki ti ru yi uwae rukong u ru ka yag itso ti tinyang atang. 25Ama usir iki kiye ti ande meme ku cwag kicwag utitang, unde ti rika-wu ru ba pu arisab tso fa ti itso ti tinyang yine u ru-wu iken-wu tiri. 26Kiye ti ayi ruye u ku ba kyaen rishwu tiri, arisab ta atang ama. 27Apyi unde wu ba ri te wu baa, “Unde ti uwe, afu yag-fu itso ti tinyang yi uwae rukong-fu be a. Ama arisab ru kyi-yi aka ba ta uwae atang?” 28Awu ri baa, “Ayi si kang unde ti rika-m iki ti yag iken yine.” Ama apyi-wu ri baa, “Afu ku sha ti ti na sub yi byir a.” 29Awu ri baa, “Iyee. Iki be kiye ti ani a ku sub yi, ani u sub pu iti tinyang fa ti atang ama. 30Ikyaen yine, ni ya yi ta ti yi ā ser tetso se kiye ti a u bunn yi bunn. À ba kiye itibunn, ame u ri te ande ti ku bunn yi ti aba ā byir yi, ti aba ā yir yi ukaen ukaen u twen mbub yi. Ama iti tinyang, a u pu ru ka si kurug-m.”

Isinn Musita

(Markus 4:30-32; Luka 13:18-19)

31Yesu sunn te kyi ba ira iki baa, “Kujwokwe Rimam si pangma isinn musita ti unde sa wu tso riben. 32Itso wune yib siskeb uwae itso iken meme, amaa, kiye ti awu a ser tso fe, awu ku kafe kufub ti ko siskeb patag uwae iken ti ku shab riben. Awu u kafe kutuku ti inung ku ba kyae afug-yi ijwe ajwo-wu.”

Kujwokwe Rimam pangma Yisiti

(Luka 13:20-21)

33Yesu sunn te kyi ba ira iki cwucwo baa, “Kujwokwe Rimam ti apupwen pangma yisiti ti unda sa pang ahan tsinn fa umung kitu kumyae ita, ama ayi ndub tso ba munn ti ijwe kitu.”

Iken ti Nde Yesu ku Sunn Kob Ira

(Markus 4:33-34)

34Yesu ri meme ira yine te ande ti funn uwog-wu yi ira ti sunn. A si-yi ira ti sunn be, awu ku ri-wu ira iki te ba be. 35Awu nde yine ikyaen ti wu u kumunn ira ti unde ti ku ya iskin ira Rimam ri ti kute baa,

“Ame u ri ira te ande ti ira ti sunn.

Ame u ri tso ira ti a tam yi tam

ti kiye ti a bag utense.”

Imbyi Ira Yesu Risu Itso Alikama ti Itso Arisab

36Ama awu ya ande ba ta, u sang yi uwae kusog. Atugbug-wu ba tu wu u ri baa, “Ri te ti umbyi ira ayine risu arisab uwae risaen alikama.” 37Awu ri te ba baa, “Unde ti ku ta itso ti tinyang yine si Umbae Unde. 38Uwae rukong wu ama si utense ike. Itso ti tinyang ama si ande ti ta uwae Kujwokwe Rimam. Itso arisab ama si ande ti si ana unde titibi wu. 39Unde ti rika wu ti tso iken yi ama si Shetann. Kiye itibunn ama si ricwunnkyi na utense wune. Ande ti ku bubunn ama si atom Rimam ti apupwen. 40Pangma ti a byir arisab ru ka twen mbub urwa, ayi u si ahan ama kiye ti ricwunnkyi. 41Umbae Rimam u tom atom-wu ti apupwen kyang kyi fe uwae Kujwokwe-wu, ama aba u byir tag ande ti ku nda ni nde ikentitibi ti ande ti ku nde wande titibi meme. 42Awu u pu ba ru ka jwunnsi uwae urwa uwog ti a u jwub ira u kub nger. 43Ama ande ti som usom ti saen kyag u jijaen wur wur pangma usir yi Kujwokwe ana Itse-ba. Unde ti a site atong ti ku fxen ira, awu ā fxen.

Rifunn ti Tam Riben

44“Kujwokwe Rimam ti apupwen pangma rifunn ti tam riben ti unde iki tu fe wu u tam kyi wu ti atang. Ikyaen utob titsen, awu ru ka pu iken ti awu ta te yi meme jabci u ba jab ra riben wune.

Kutxom ti Site Aser Timambe

45“Kujwokwe Rimam pangma unde ti ku kafe ajwo ku kyang ku sha atxom aser. 46Kiye ti awu tu kutxom kinjo ti tinyang ti u shir aser yang-yi ba na wu, awu ru yi uwae kununn u ka pu isu-wu meme jabci u ba jaebra awune.

Kujwokwe Rimam Pangma Kukye

47“Cwucwo Kujwokwe Rimam si pangma kukye ti a pu si uwae uyinn u ye iwag ti tsotso. 48Kiye ti awu a munn pu wu, a ru ba shir wu tso yi ukunn uyinn u som riben u tsab ti tinyang si uwae atyika u pu ititibi tika. 49Ti mbwe-yi ama kiye ti utense u cwunnkyi, atom Rimam ti apupwen u ba tsab ande ti ku nde iken ti tinyang ruye uwae ande ti ku nde ikentitibi. 50Aba u pu aba ti ku nde ikentitibi jwunnsi uwae urwa uwog ti ande u jwub ira u kub nger.”

Iken ti Kwen Tishe ti Iken ti Kwen Tikyi

51Yesu rang ba baa, “Ani nungye pu ni umbyi ira yine a?” Aba ri baa, aba na nungye pu ba. 52Ama awu ri te ba baa, “Ikyaen ayine, unde ti ku kwen na ande icwe Rimam, asiti a kwen na pu ba awu ira Kujwokwe Rimam fa atang, awu si pangma unde ti kununn ti ku sa ruye uwae rifunn-wu iken tishe ti itikyi meme.”

A Rang baa Yesu Si Aye?

(Markus 6:1-6; 6:14-16; Luka 4:16-30; 9:7-9)

53Kiye ti Yesu mam tag pu wu ira ti sunn yine, awu ya atang ta 54u kafe ba uten ti ana-wu. Ti awu ku kwen iken kusog Rimam atang, ira-wu ayi fur ba ayib. Aba ri baa, “Unde wune tu-wu itsab ti iken ti ku fur ayib ayine aka? Awu nde rimang tawe awu ku nde wande ti ku fur ayib yine? 55Awu si-wu umbae kafinta wu be a. Si-yi umbae ti rinyi iya-wu baa Mberimu be a? Aba Yakubu ti Yusufu ti Siman ti Yawuda si-ba ameinja-wu be a? 56Meme ambakaya-wu ama ta te-ba ati ike be a. Awu ama ru ka tu-wu iken yine aka?” 57Ama aba ndembeb utob te wu. Amaa Yesu ri te ba baa, “Unde ti ku ya iskin ira Rimam ku tu kuko uwog ande ko aka meme, se uwae uten-wu ti uwae kununn-wu ti awu u shanum kuko atang.”

58Ama awu nde-wu wande ti ku fur ayib yang-yi atang be, ikyaen ti, aba ru-ba uwae kinjo be.

Currently Selected:

Matiyu 13: kubNT

Highlight

Copy