Matiyu 10

Yesu Tsab Atom-wu

(Markus 3:13-19; Luka 6:12-16)

1Yesu kunn byir ande-wu rijwe asu ifaen ti awu ku kwen na ba iken u nda ba kuko ti a na jae ru rijwen titibi ijwe ande, ti a na nwangru ande uwae acaeb ti tsotso. 2Rinyi ande rijwe asu ifaen ba ta ri: Utikucang si Siman, ti a ku kunn wu baa Bitrus, ti inja-wu Andarawu; Yakubu ti inja-wu Yohana, aba si anyisu Zebedi; 3Filip ti Bartolomu; Toma ti Matiyu, unde ti ku mbe aser akwe; Yakubu umbae Alifas, ti Tadeyus; 4Siman ti a ri baa, awu na si unde ti site kitsinn ikyaen uten-wu, ti Yawuda Iskariyoti, unde ti sa Yesu jabci.

Yesu Tom Atom-wu Ruye

(Markus 6:7-13; Luka 9:1-6)

5Yesu tom atom-wu rijwe asu ifaen bane ru u fwa ba kusen baa, “Ni ka-ni uwae uka na ande ti nung-ba Rimam be, ko uwae uka na Samariya iki be. 6Ni ru yi uwog rishi Isirela, aba iwen ti yag fufa. 7Ni ru ka ri te ba baa, Kujwokwe Rimam na kyang ku yaen pu yi. 8Ni nwangru ande ti acaeb. Ni kunn shwur ande ti cwucwu. Ni nwangru ande ti kicaeb ikum. Ni rwae ruye rijwen titibi risu ande. Ani tu ana-ni ti rinyangwae, ni nda ande ti tsitsi ti rinyangwae ama. 9Ni ye su-ni azurfa ko zinariya, ko kiser iki uwae jifu be. 10Ni ye su-ni rikyig be. Ni ye su-ni atupwa ifaen be. Ni ye su-ni apwafxen ifaen be. Ni ye su-ni ukum be. Unde ti ku nde wande u tu kang iken ti awu ku sha.

11“Kiye ti ani a ru ba sang uten iki ko imbae uten iki, ni sang ti ni sha unde ti u cwe u pu ni sang uwae kununn-wu, ti ni som atang se iken ti ani a nwunn pu ni uwae uten atang. 12Kununn ti ani a sang atang, ni ri na ba unju tinyang. 13Asiti ande ti kununn wu a kyangte ni ti ajwo ifaen, kikunnji na kujimshwur-ni ā te ba som te atso. Ama asiti aba a kyangte-ba ani be, kikunnji-ni ā kafe ba ti uwog-ni. 14Cwucwo asiti ande ti kuru iki ko uka iki a kyangte-ba ani be, ni ya uwog wu ta ti ni fwer ibung afxen-ni si ba ti atang. 15Kubenti ti ame ku ri te ni, usir rikwen, Rimam u nung risi ande ti uten Sodom ti Gomora skeb pu wu ande ti uten wune.

Rikaen ti Ngwa ti ku Ba Uwe

(Markus 13:9-13; Luka 21:12-17)

16“Nung, ame tom ni ku ru pangma iwentam ti a ku rwae yi sang yi kutampwa mbuku. Ni nung ijwe-ni nyinyang pangma ikentibi, ti ni nde wande-ni te kujimshwur pangma akwae. 17Ni som ti ujwin, ikyaen ti, ariki u pu ni ru yi kusog rikwen. Aba u byinn ni kimbab uwae asog Rimam-ba. 18Abikwe ti afaen-ba u pwen ni rikwén ikyaen-m. Ayine si ikyaen ti ni sa ira-m ti tinyang ri te ande ti ise. 19Kiye ti a pu ni ru ka uwog rikwen, ni kab-ni uwae risu ira ti ani u ri ko fengo ti ani u ri yi be, ikyaen ti, Rimam u sha na ni ira ti ani u ri uwae kiye wu. 20Ira ti ani u ri meme u si-yi ana-ni be, ayi u ruye uwog Kusung na Itse-ni tso unju-ni.

21“Ande u ye ameinja-ba na ande ti a na pu ru ka wen. Abitse u nde ahan te anyisu-ba ama. Anyisu u ta rika te abitse-ba ti abiya-ba u pu ba yerwen. 22Ande meme u sa ni kuka ikyaen-m. Amaa, unde ti a tsi ti kubenti ru ba sang usir ti ricwunnkyi, awu u nwangru. 23Asiti ande a ku nde ni rikaen uwae uten iki, ni ter ru atang ti ni ru yi uten iki. Ame ku ri te ni, ani u ka tag-ni uwae uten Isirela titawe Umbae Unde u ba be.

24“Umbae ti ku kwen iken skeb-wu unde ti ku kwen na wu be. Upyi ma skeb-wu itsekuru-wu be. 25Ayi pang pu yi ti umbae makanta ā kwab ti awu ti unde ti ku kwen-wu, ā pang atso, upyi ama ā kwab ti awu ti itsekuru-wu ā pang atso. Asiti ande a ku kunn unde ti kununn baa, Beyel Zebul,#10:25 Beyel Zabul si rinyi Shetann. rinyi ti a u kunn ni, ani ande ti kununn-m u beb siskeb.

Rimam Skeb Ande

(Luka 12:2-7)

26“Ni kyen-ni ikyenricwu ande be. Iken ti titam, a u shaen umbyi-yi tso ba nae ise. Ira ti ku cwucwe meme, ande u fxen yi. 27Ira ti ame ku ri te ni uwae kufub tine, ucwe a fam pu yi, ni ri yi ayib jwunn ande wurr. Meme ira ti ani fxen uwae kitam tine, ni tso usen rukub u sa yi ya iskin atang. 28Ni kyen-ni ikyenricwu ande be. Aba ku wen nyang ijwe rimenn amam, aba wen fob-ba kusung be. Amaa ni kyen ikyenricwu Rimam ti site kuko ti u twenji rimenn ijwe ti kusung meme uwae urwa ti ku ten u ku jim-wu jim be. 29A ku jab isen ifaen kobo, amaa, ko kinjo uwae-yi u jwunnsi-wu riben be, se iken ti Itse-ni Rimam a cwe tawe. 30Ani ti risu-ni, Rimam pwen tag pu wu ikyinn risu-ni. 31Ani skeb-ni isen ti rurob uwe Rimam be a. Ani u nde rimang kyen ikyenricwu?

Ande ti Cwe Ira Yesu ti Ande ti Pyir Ira-wu

(Luka 12:8-9)

32“Unde titini ti a ri tso kubenti te ande baa, ame na si Itsekuru-wu, ame u kunn rinyi-wu ama uwe Itse-m ti ta apupwen. 33Amaa, unde ti a shaen ira-m ayib jwunn ande baa, awu na nung-wu ame be, ame u pyir ira-wu uwe Itse-m ti apupwen ama.

Si-yi Kujimshwur be, Si Rika

(Luka 12:51-53; 14:26-27)

34“Ani ku tang baa, ame na ba ti m na u sa kujimshwur sang utense a. Iyee, ame ba-m ti m sa kujimshwur sang utense be, ame ba te kisum wen. 35Ame ru ba ti m ba nda anyisu arom ta rika te abitse-ba. Anyisu anda ma u ta rika te abiya-ba. Anda u ta rika te Abija abaen-ba. Abija ma u ta rika te awa byib-ba.

36“Ande ti rika unde u ru kununn unde ti kununn wu. 37Unde titini ti a ye ure te itse-wu ko iya-wu skeb me, unde wune ko-wu ti wu ru ba uwog-m be. Unde titini ti a ye ure te uyin-wu ko unda-wu skeb me, unde wune ko-wu ti wu ru ba uwog-m be. 38Unde titini ti a su-wu kutuku ti cice-wu u putsa-wu ame be, unde wune ko-wu ti wu ru ba uwog-m be. 39Unde titini ti a ku sha ti wu u txen unyang-wu txen, awu u shanum te wu, ama unde ti a sae ru unyang-wu ikyaen ira-m, awu u tu unyang ti tsi kukunn.

Kujwojang Ande ti Kyangte Atom Yesu

(Markus 9:41)

40“Unde titini ti a kyangte ni, awu kyangte pu wu ame. Unde ti a kyangte m, awu kyangte pu wu Rimam ti tom m ba utense. 41Unde titini ti a kyangte atom Rimam ikyaen ti awu na si atom Rimam, unde wune te unde ti atom wu u tu kujwojang ti pang atso uwog Rimam. Cwucwo unde ti a kyangte unde ti kubenti sang uwae kununn-wu ikyaen ti unde wu na si unde ti kubenti, meme ifaen-ba u tu kujwojang ti pang atso uwog Rimam. 42Cwucwo unde titini ti a ndeya umbae kinjo uwae anyisu ti putsa m ne, ko ti awu a txi ambyi isa na wu, asiti awu a nde yi ikyaen ti umbae wu na si unde ti ana-m, ame ku ri te ni kubenti, unde wune u shanum-wu te kujwojang-wu be.”

Currently Selected:

Matiyu 10: kubNT

Highlight

Copy