Luka 7

Yesu Nwangru Upyi Ukwe Akyirten

(Matiyu 8:5-13)

1Isim ti Yesu ri mam pu wu ira te ande, awu nwunn ru yi uten ti Kaparnawum. 2Uwae uten atang ukwe akyirten iki ta atang. Awu site upyi iki ti nyang uwae-wu si-yi ti ti ri be. Upyi wu nae kicaeb u ta unju iticwu. 3Kiye ti unde wu fxen baa, Yesu na sang ba pu wu uwae uten atang, awu tom andufu iki na Mbayawuda ru ka uwog Yesu ti a ru ka jwam wu ti wu na ru ba nwangru upyi-wu ti ta unju iticwu. 4Ande ba ru ba uwog Yesu u ba jwam wu ti uwae-ba kinjo baa, “Kubenti, unde wune pang pu wu ti fu ndeya wu. 5Awu site ure te ti, awu mbye na ati kusog Rimam-ti.”

6Yesu nwunn u putsa ba ru. Kiye ti aba ru ba ku fer kununn atang, ukwe akyirten wu tom ande-wu ru ka tu Yesu u ri te wu baa, “Itsekuru, nde-fu ijwe-fu rikaen be, ikyaen ti, ame ko-m ti m u kyangte fu uwae kununn-m be. 7Ame ko-m ti m u ru ba kutxuwe-fu be. Asiti afu a ri ira ti uwog ti afu tsi atang ne amam, upyi-m u nwangru pu wu. 8Ame ti m ta ne ama, ame ta isim unde ti uwe iki u ta risu akyirten iki ama. Asiti ame a ri te akyirten iki uwae-ba baa, ‘Ru,’ awu ku nwunn ru. Ame a ri te akyirten iki baa, ‘Ru ba,’ awu ku nwunn ru ba. Ame a ri te apyi-m baa, ‘Nde iken yine,’ awu ku nde yi.” 9Kiye ti Yesu fxen ira yine, ira yi fe wu ayib, awu kafe uwe u ri te ande ti putsa wu baa, “Ame ku ri te ni, uwae anyisu Isirela meme, ame tu ji-m unde iki ti site kubenti pangma unde wune khika be.” 10Isim ti ande ba ti a tom ba ru ba uwog Yesu kafe ka sang kununn, aba tu upyi ukwe akyirten wu, awu nwangru pu wu uwae kicaeb-wu ayi.

Yesu Kunn Nwunn Umbae Uwa-icwu

11Isim yine, Yesu nwunn ru yi uten iki ti a ku kunn rinyi-wu baa, Nayin. Ande ti ku putsa wu, fa ti kumbub ande iki yang-ba ta atang. 12Ti aba ru ba fer ufu ti ku sang uwae uten atang, a su rukom umbae iki ba ku ru ku ye. Rukom wu si umbae uwa icwu iki ti mbae nyang umbae wune kinjo-wu amam. Kumbub ande ken tag te unda wune putsa atso. 13Kiye ti Yesu nung unda wu, risi nde wu. Awu ri te wu baa, awu na jwub-wu ira be. 14Tiri awu ru ka tekunn kupam ti a sa rukom wu nae si atang. Ande ba ti su rukom wu kyaetsi. Yesu ri te rukom wu baa, “Umbae ti utaen! Ame ku ri te fu, fa sunwunn!” 15Unde wu ti cwucwu ne faa sunwunn u som ritsen u ku ri ira. Yesu ye pu wu na iya-wu ti atang.

16Ikyen ricwu ye ande ti ta atang meme. Aba nwunn ku teb rinyi Rimam u ku ri baa, “Unde tiyang ti ku ya iskin ira Rimam ru ba pu wu uwog-ti! Rimam ru ba pu wu uwog-ti.” 17Iten Yesu shag kyi uwae uten Yawudiya ti meme uten ti ta fer atang.

Ande ti Yohana Tom Ru Ba Uwog Yesu

(Matiyu 11:2-19)

18Ande ti putsa Yohana ri te Yohana ira risu iken yine meme. Yohana kunn pu ifaen uwae-ba 19u tom ba ru ka uwog Itsekuru ti a na ru ka rang wu baa, ko awu si unde wu ti Rimam tsab tsi ti na u ba ree, re a u som ji-ba unde tishe bara?

20Kiye yi ti aba ru ka uwog Yesu, a ri te wu baa, “Yohana unde ti ku nde batisma tom ti ru ba uwog-fu baa, afu ti si unde wu ti awu na u ru ba ree, re ati u som ji unde tishe bara?”

21Uwae kiye wu ti aba tu wu, awu nwangru ande yang-ba uwae acaeb-ba ti tsotso. Awu jae ru rijwen titibi ti ta uwae ande ti site yi u mbubta ayib ande yang-ba akwen ti mbub ayib. 22Ikyaen yine, Yesu ri te atom Yohana ba baa, “Ni kafe ru ti ni ri te Yohana iken ti ani nung u fxen. Ande ti mbub ayib tu itisae, ande ti cwu afxen tu itikyang, ande ti acaeb ikum tu itinwangru, ande ti tsi atong ku fxen ira tine, ande ti cwucwu tu pu ba unyang, ande ti rikaen, a tsag te ba ira ti tinyang na Rimam. 23Itinyang ā si ana unde ti ku shaen-wu ira-m be!”

24Isim-yi ti atom Yohana nwunn ru, Yesu nwunn ku ri ira risu Yohana te ande ti funn atang. Awu ku ri te ba baa, “Kiye ti ani ru ka sha rifab Yohana uwae kutur, itso unde titini ti ani ku kab baa, ani na u nung? Unde ti ira-wu kafe kafe pangma irum ti ufunn ku kae uwae kutur a. 25Ama imi ti ani ru ti ni kaa sae? Unde ti kyae ijwe-wu ti atupwa ti aser a. Kubenti, utso ande ti ku kyae ijwe-ba te atupwa ti aser u ku kam uwae rifunn, aba ta uwae ushi kununn akwe. 26Imi ti ani ru ka sha uwae kutur atang? Unde ti ku ya iskin ira Rimam a? Enheen! Ame ku ri te ni, awu skeb pu wu unde ti ku ya iskin ira Rimam. 27Yohana ti si atom wu ti Rimam ri ira risu-wu uwae Kutsingken-wu baa, ‘Ame u tom wu ru uwe ti wu kaa kyae nyang fengo na fu.’ ”

28Ama, Yesu ri kyi baa, “Ame ku ri te ni, uwae meme ande ti a mbae ba sang ba utense, uriki ta-wu ti skeb Yohana be, amaa unde ti si-wu iken iki uwae Kujwokwe Rimam be ko skeb pu wu awu Yohana ti rurob.”

29Ande ti ku mbe aser akwe ti ande ti tsitsi meme fxen ira-wu. Ande bane si ande ti cwe ti Yohana na nde na ba batisma. Yi fengo yine aba cwe baa, Rimam na nde pu wu wande ti pang atang. 30Amaa, ande ti kumbub Farisi ti ande ti ku kwen na ande icwe sae ru itinyang ti Rimam sa ru ba ikyaen-ba, u cwe-ba ti Yohana na nde ba batisima be.

31Yesu ri baa, “Ande ti kiyiku pangma imi? Ame u sa ba myae te imi? 32Aba pangma anyisu tinying ti som uwae ritug u ku ri te atso baa, ‘Ati kunn ikob ikyaen ti ni na se ise, ani se-ni be! Ati yang akyang ricwu ti ten, ani jwub-ni ira be!’ 33Yohana unde ti ku nde ande batisma ka ru ba u ci-wu kiraen be u ngwa-wu ujwab ti itu be, ama ani ri baa, awu na si unde ti site kusung titibi. 34Ama Umbae Unde ka ru ba u ku ngwa u ku ci, ama ani ri baa, ‘Sae unde ti rimenn umbyi ti ku ngwa ku fxen-wu atong be, u ku ye ure te ande ti ku mbe aser ukwe ti ande titibi.’ 35Ame ku ri te ni, meme ande ti kyang te ben-ayib na Rimam tatso baa, ben-ayib yi na si kubenti.”

Unda ti ku Nde Ikentitibi Sa Kindob Shin Yesu

36Unde iki ta atang ti ta kumbub Farisi. Awu yae Yesu ti wu na ru ka ci wuci te wu kununn-wu. Yesu ru ka som atang ku ci wuci. 37Unda iki ta uwae uten atang ti si unda ti ku nde ikentitibi. Ti awu fxen baa, Yesu na ku ci wuci kununn Farisi wu, awu sa kushi kindob ti ku nung kuyang timambe ru ka atang. 38Awu ba tsi isim, fer ti afxen Yesu u ku jwub, aten-wu jwae tag afxen Yesu. Awu fen aten yi te ikyinn risu-wu u ye afxen yi bur utob u sa kindob yi shin Yesu afxen. 39Kiye ti unde ti kumbub Farisi wu sae iken yine, awu ri uwae utob-wu baa, “A baa, unde wune na si unde na Rimam ti kubenti, awu ú nungye pu wu unda wu ti ku ye wu ajwo rimenn ahan. Awu u nungye pu wu itso ikentitibi ti unda wu ku nde!” 40Yesu ri te wu baa, “Siman, ame site ira ti ame u ri te fu.” Siman cwe baa, “Imi, ite?” 41Yesu ri te wu baa, “Ande iki ifaen ci ripab uwog unde ti rifunn. Unde ti rifunn wu ku putsa unde kinjo ripab iken ukob itsong, unde ti ifaen ama a ku putsa wu ripab iken itsong. 42Meme ifaen-ba pae fob-ba ripab yi cwucwo be. Unde ti rifunn wu kyi num u yata na ba. Uwae-ba ande ifaen bane, aye ti u ye ure ti unde ti rifunn wu siskeb?” 43Siman ri baa, “Ame ku tang baa, unde ti a yata na wu siskeb.” Yesu ri baa, “Afu ri pang atang.” 44Tiri awu kafe uwe tag unda wu u ri te Siman baa, “Afu nung unda wune a? Ame ru ba kununn-fu, afu jwo na-fu ame afxen be. Unda wune jwo afxen-m ti aten ayib-wu u fen wam yi te ikyinn risu-wu. 45Afu tso-fu ame ure u ye m bur utob be, amaa, unda wune, ti ti ame ba, awu tso m ure u ya afxen-m ti fung ta-wu be. 46Afu sha na-fu ame kindob ti ku nung kuyang be. Awu shin afxen-m ti kindob. 47Ame ku ri te fu, iken yine meme ti awu nde te m tatso baa, Rimam na yata na pu awu ikentitibi-wu timambe. Amaa unde titini ti a yata na wu ikentitibi-wu kpang, awu ku tso ure-wu kpang.” 48Tiri Yesu ri te unda wu baa, “A yata na pu ba afu ikentitibi-fu.”

49Ariki ti som fer ba risu tebur atang nwunn ku rang atso baa, “Unde wune si aye ama ti ku yata na ande ikentitibi-ba?”

50Ama Yesu ri te unda wu baa, “Ikyaen ti afu ru kubenti afu nwangru pu fu. Ka-fu nyinyang.”

Currently Selected:

Luka 7: kubNT

Highlight

Copy