Luka 5

Yesu Kunn Atom-Wu ti Kucang

(Matiyu 4:18-22; Markus 1:16-20)

1Kiye iki ti Yesu ta unju uyinn ti Genesare ku ri ira Rimam te ande, aba ku tur atso fer wu ti a na fxen ira Rimam. 2Awu nung ayae ifaen ti a ku ye iwag te yi ta unju uyinn atang. Ama ande ba ti ku ye iwag yi nwunn tso pu ba yi akaense u ku jwo akye-ba unju ambyi. 3Kinjo uwae ayae yi si ana Siman Bitrus. Yesu sang uwae kuyae wune u ri te Siman baa, awu na jwora wu na ko sang yi uwae uyinn kpang. Yesu som si uwae kuyae u kwen na ande ira Rimam.

4Kiye ti awu ri ira ri ri ri u ri mam pu wu awu ri te Siman ti arwan wande-wu baa, “Ni ko ru ka sang uwog ti jijang ti ni pu akye-ni sī, ti ni ye iwag.”

5Siman ri te wu baa, “Itsekuru-m, ati kwab pu ucwefam u tu-ti iken iki be. Amaa, ikyaen ira-fu ame u pu akye-m si.” 6Isim ti a pu akye-ba si, aba ye iwag yang-yi. Ama ikyaen kuko iwag yi, akye-ba bag ti ti yáen. 7Ikyaen yine a sam arwan-ba ti ta kuyae ti ifaen ajwo baa, aba na ru ba ndeya ba. Ande ba ru ba u te ba yaen iwag munn yi ayae ifaen yi, ama ayae yi meme ifaen-yi ku nde pangma ayi na u fxaebur. 8Kiye ti Siman Bitrus nung iken yine, awu nwunn ru ba ku riben uwe Yesu, u ku ri baa, “Itsekuru-m, nwunn-fu uwe-m ike tiri, be ame si unde ti ku nde ikentitibi.”

9Awu ri ira yine ikyaen ti, ayib fur wu ti arwan-wu ti ta uwae ayae atang ikyaen ira ti Yesu ri ne nee aba ye iwag ko timambe. 10Yakubu ti Yohana, anyisu Zebedi ti Siman, ayib fur ba ama. Yesu ri te Siman baa, “Kyen-fu ikyenricwu be. Pangma ti afu ku ye iwag tine, tsikunn ike ru yi uwe, afu u si unde ti ku ye ande!”

11Isim ti aba jwo ayae-ba ba pu ba yi ukunn ambyi, aba ya isu-ba ta ukunn atang u nwunn putsa Yesu.

Yesu Nwangru Unde ti Kicaeb Ikum

(Matiyu 8:1-4; Markus 1:40-45)

12Kiye iki ti Yesu ta uwae uten iki, unde ti kicaeb ikum ru ba tu wu. Kiye ti unde wu nungye Yesu, awu si ku riben uwe Yesu u ku jwam wu baa, “Itsekuru-m, kicaeb-m ayine nda m kafe iken ti ku txi iyib uwog ande. Afu u nde tu ti fu nwangru m, asiti afu a cwe ira.”

13Yesu ndab ta kujwo-wu u sa tekunn wu u ri baa, “Ame cwe pu m, a nwangru pu ba fu uwae kicaeb.” Ti ira unju-wu, kicaeb ikum yi ya unde wu ta. 14Yesu fwa unde wu kusen baa, awu na tsag te-wu unde iki ira risu iken yine be, ama awu ri te wu baa, “Ru ti ka tso risu-fu uwe kukwen Rimam, ti ru ka nda iken na Rimam ikyaen kicaeb yi ti ya fu ta ne pangma ti Musa ri. Ayine u tso ande kubenti na kicaeb yi ti yag ta.”

15Amaa, iten Yesu shag kyi uwog meme skeb ti kucang. Ande ti kumbub-ba nwunn u ru ba ti a na fxen wu. Ande ti acaeb ti tsotso ru ba ama ti Yesu na nwangru ba. 16Amaa ana-wu awu ku nwunn u ku ru-wu yi uwog ti ande ta-ba atang be u ku jwam Rimam.

Yesu Nwangru Unde ti Cwu Afxen ti Ajwo

(Matiyu 9:1-8; Markus 2:1-12)

17Usir iki Yesu ku kwen na ande iken, ariki uwae kumbub Farisi som atang ama, fa ti ariki ti si ande ti ku kwen na ande ira Icwe Rimam. Ariki uwae-ba ru uwae uten ti Galili, ariki ru uten ti Yawudiya, ariki ama ru Urushelima ba. Uwae kiye wune Kusung Rimam ku nde wande ti kuko uwae ijwe Yesu, ku nda wu nwangru ande ti acaeb. 18A baa, a na nunung, ande iki su unde ti cwu afxen ti ajwo ku ba risu iken ti nae. Ande ba kwab ti a na ye wu sang ka nae uwe Yesu. 19Amaa ikyaen na ande ti munn pang-ba, a tu fob-ba riyae be. Ikyaen yine aba su wu tso yi usen rukub u ka tsig ta usen rukub#5:19 usen rukub Usen rukub Mbayawuda si-yi ma ana Kuteb be. Aba ku gbimkyi rukub-ba jab pataa, itso ti unde u ndetu ti a tso kaa kyang atang. u sa unde wu fa ti iken ti nae-wu meme si ba riben uwe Yesu kutampwa ande ti funn atang. 20Kiye ti Yesu nungye uwae kinjo na ande bane, awu ri te unde wu ti kicaeb baa, “Umbae-m, a yata pu ba afu ikentitibi-fu.”

21Ande ba ti ku kwen na ande ira icwe ti ande ti kumbub Farisi nwunn ira ti rang uwae utob-ba. Aba ku rang baa, “Unde wune si aye ti ku ri unju titibi? Ira-wu ti awu ri ne, awu ku ri mbeb Rimam. Unde iki nde tu-wu ti wu yata na ande ikentitibi-ba be, se Rimam amam.”

22Ti Yesu nungye ira ti aba ku kab uwae utob-ba, awu rang ba baa, “Ani kyang rimang u ku rang itso ira yine uwae utob-ni? 23Iken ti tom skeb si titini, ti a ri te unde ti pxib afxen baa, a na yata na pu ba wu ikentitibi-wu ree, re ti a ri te wu baa, awu na nwunn ritsen ti wu na kyang ikyin? 24Ame u tatso ni baa, Umbae Unde na site kuko uwae utense wune ti awu yata na ande ikentitibi-ba.” Uwog wune Yesu ri te unde wu ti cwu afxen ti ajwo baa, “Ame ku ri te fu, nwunn ti fur iken ti nae-fu ti ru yi kununn.”

25Ti ritsen, unde wu fa sunwunn uwe-ba atang u fur iken ti nae-wu u ru yi kununn ku teb rinyi Rimam. 26Aba som, ayib fur ba risu meme. Aba ama nwunn ku teb rinyi Rimam ti ikyenricwu. Aba ku ri baa, “Yaka ne ati nung pu ti itso iken tishe.”

Yesu Kunn Lawi

(Matiyu 9:9-13; Markus 2:13-17)

27Isim yine Yesu ya ba ta u ruye yi ise u ka tu unde iki ti som ufu kusog ti a ku mbe aser ukwe atang. Awu si unde ti ku mbe aser ukwe. Rinyi-wu si Lawi. Yesu ri te wu baa, “Putsa m.” 28Awu teya meme iken yi ta u nwunn u putsa Yesu.

29Isim usir iki Lawi nde ukwab na Yesu. Awu yae ande ti ku mbe aser ukwe yang-ba ba kununn-wu atang ama, fa ti ande iki. Aba som tebur, ku ci ku ngwa. 30Ama ande ti kumbub Farisi, ti ande-ba ti ku kwen na ande icwe nung ira yi. Aba ndembeb utob u ru ka tu ande na Yesu u ku rang ba baa, “Ani nde rimang ku ci ku ngwa te ande ti ku mbe aser ukwe ti ande ti ku putsa-ba icwe be?”

31Yesu fxen ira-ba u ri baa, “I si ande ti nae kicaeb ti ku sha unde ti kucin, i si-yi ande ti tsi ti ribom-ba be. 32Ame ru ba-m ikyaen na ande ti ku nde iken ti tinyang be; ame ba ikyaen na ande ti ku nde ikentitibi, ti m na kunn ba ti a na ya ikentitibi-ba ta.”

A Rang Yesu Ira Risu Unju ti Cwe

(Matiyu 9:14-17; Markus 2:18-22)

33Ande iki rang Yesu baa, “Imi ti nde nee ande na Yohana ti ande ti ku putsa ira Farisi ku cwe unju u ku jwam Rimam ko kiye titini amaa ande ti ana-fu ku ci-ba ci amam u ku ngwa-ba ngwa amam u ku cwe-ba unju be?” 34Yesu ri te ba baa, “Kiye ti ubaen unda ishe a te arwan-wu ta tetso a u nde tu ti a nda ba cwe unju u som rimenn a? 35Usir ku ba ti aba u cwe unju isim ti a ye pura ubaen unda ishe ru pu ba uwog-ba.”

36Yesu sunn kyi ira iki te ba cwucwo baa, “Unde iki u shiyaen-wu kutupwa tishe u sa bur fa kutupwa tikyi be. Asiti unde a nde ahan, kutupwa tishe wu u shiyaen ti tikyi. Cwucwo, awu ti tishe ti itikyi u ru-yi atso be. 37Aye ti u sa ambyi awaen anam si uwae apwa ti tikyi? Unde ti a nde yine, apwa yi u ndub yaen. Ambyi anam ti apwa meme u yaen mbub riben. 38Unde u funn kang ambyi anam ti tishe si uwae apwa ti tishe. 39Cwucwo, isim ti unde a ngwa mam pu wu ambyi anam ti ire, awu ku sha-wu ambyi anam ti tishe cwucwo be. Awu u ri baa, ‘Itikyi yi nyang skeb pu yi.’ ”

Currently Selected:

Luka 5: kubNT

Highlight

Copy