Luka 4

Shetann Myae Yesu Uwae Kutur

(Matiyu 4:1-11; Markus 1:12-13)

1Isim ti Kusung Rimam si ba munn risu Yesu kiye ti a nde wu batisma, awu nwunn unju unyim ti Yordan, ama Kusung Rimam pu wu ku kyang uwae kutur khika 2ka usir mae ifaen. Uwae kiye wu, ukwe kukyaefa myae wu kumyae. Ama meme usir yi ti awu nde atang, awu ci-wu iken iki be. Isim ti usir yi mam pu yi, rimenn wen wu timambe.

3Ama ukwe kukyaefa wu ba ri te wu baa, “A ri baa, afu na si Umbae Rimam, ri te kutxom wune ti wu kafe wuci.” 4Yesu ri te wu baa, “A bae uwae Kutsingken Rimam baa, ‘I si-yi uwae wuci amam ti unde u ser be.’ ”

5Ukwe kukyaefa wu pu wu tso yi kitaen rikwen tiri. Uwae kiye kpang ahan, awu tatso wu meme uten ti ta utense ti akwe-ba. 6Awu ri te Yesu baa, “Meme iken ti kuko yine ti rifunn yine, ame u nda fu. A sa iken yine na me kujwo. Unde ti nyang uwae-m, ame u pu na wu. 7Ikyaen yine, asiti afu a fen me ame u nda fu meme iken ti afu ku nung ne.” 8Yesu ri te wu baa, “A bae uwae Kutsingken Rimam baa, ‘Fen-fu unde iki be, se Itsekuru-fu Rimam amam.’ ”

9Ama Shetann ye pu kyi wu ru yi Urushelima. Aba tso ka tsitsa usen rukub kusog Rimam. Shetann ri te wu baa, “Afu a si Umbae Rimam ti kubenti, te saen ajwo-fu ta ti mbyae si riben. 10Ikyaen ti, a bae uwae Kutsingken Rimam baa, ‘Rimam u ri te atom-wu baa, aba na nungkyi fu. 11Aba u kyangte fu ti ajwo-ba, ikyaen ti fu na pu afxen-fu na byinn mber-fu yi atxom be.’ ” 12Yesu ri te wu baa, “A bae ama baa, ‘Myae-fu Itsekuru-fu Rimam myae be.’ ”

13Isim ti Shetann myae mam pu wu Yesu kumyae, awu nwunn u ya wu ta tsi ku ji usir iki.

Yesu Ye Wande-Wu ti Kucang Uwae Uten Galili

(Matiyu 4:12-17; 13:53-58; Markus 1:14-15; 6:1-6)

14Uwae kuko na Kusung Rimam Yesu kafe ba ti Galili, ama ira risu-wu shag kyi fe uwae uten meme ti ta fer atang. 15Awu kwen na ande iken uwae asog Rimam-ba ti ta atang.

16Ama awu ru ba yi Nazareti, uwog ti awu ser ben atang, u sang ka kusog Rimam pangma ti awu ku nde kob Usir ikyinn titini. Awu nwunn ritsen ti wu u nung putsa kutsingken ayib ujwunn ande. 17A nda wu kutsingken na Ishaya unde ti ku ya iskin ira Rimam. Awu mbub kutsingken wu u nung uwog iki ti a bae baa,

18“Kusung na Itsekuru ta risu-m

ikyaen ti, awu tsab ra m

ti m na sa ira-wu ti tinyang

na ri te ande ti rikaen.

Awu tom me ba

ikyaen ti m na ri te ande

ti a ye ba yir uwae rikaen upyi baa,

a na saen ba na ta,

ti m na ri te ande ti mbub ayib baa,

aba na u tu itinung uwog,

ti m na nwangru ande ti ta

kujwo ande ti ku ndeshi ba.

19Cwucwo, ti m na ri te ba baa,

kiye ba pu yi ti Rimam na

u tso ba itinyang-wu.”

20Isim ti awu nung putsa mam kutsingken wu awu burkyi kutsingken wu u nda unde ti ku nungkyi kusog Rimam wu. Isim yine awu som riben ti wu ya iski ira Rimam.#4:20 Uwog Mbayawuda, unde ti ku ya iski ira Rimam ku susom, awu ku tsi-wu ritsen be. Meme ande ti ta kusog Rimam atang pu ayib cwutsa wu piin. 21Awu bag ira ti ri te ba baa, “Yaka ne, ira ti a bae uwog ti ame nde karatu ne, ti ani fxen ti atong-ni, ayi kumunn pu yi.”

22Meme-ba cwe ira yi ti awu ri ne. Ira ti ruye unju-wu fur ba ayib. Aba ku rang atso baa, “Awune si-wu umbae Yusufu be a?”

23Yesu ri te ba baa, “Ame nung pu m ti ani u ba ri te m baa, ‘Afu unde ti acin, nwangru risu-fu! Iken yi ti ati fxen ti afu na nde uwae uten Kaparnawum né, nde yi ama uwae uten-fu ike.’ ” 24Awu ri te ba baa, “Kubenti ti ame ku ri te ni, ande ku nung-ba rurob na unde ti ku ya iskin ira Rimam uwae uten-wu be. 25Kubenti, awa icwu munnae uwae uten na Isirela kiye na Eliya, kiye ti upwen tsa-wu be ka asang ita ti ishaen itsongnjo. Ama rimenn tiyang shag kyi uwog meme. 26Rimam tom Eliya ru-wu uwog unda iki uwae anda ti Isirela be. Amaa, awu tom wu ru yi iyen, uwog uwa icwu iki ti ta uten Zarafati uwae uten Sidon. 27Uwae kiye na Elisha unde ti ku ya iskin ira Rimam, ande ti acaeb ikum munnae uwae uten Isirela. Amaa ko unde iki uwae-ba tu-wu itinwangru be. Nyáng Naaman urae Siriya amam.”

28Kiye ti ande ba fxen ira yine unju Yesu, rinae ye ba meme uwae kusog Rimam atang. 29A fa sunwunn u tur wu ruye uwae uten atang u pu wu tso yi imbae rikwen ti ta uwae uten atang ikyaen ti a na ka tur wu jwunnsi yi imyim ti ta atang. 30Amaa, awu nwunn ru kutampwa-ba atang, u ru-wu iken-wu.

Unde ti Site Kusung Titibi

(Markus 1:21-28)

31Awu nwunn si ba yi Kaparnawum, imbae uten iki ti ta uten ti Galili u ku kwen na ba iken Usir ikyinn. 32Ayib fur ba risu iken ti ti kwen-wu, ikyaen ti, ira ti ruye unju-wu site kuko. 33Uwae kusog Rimam atang unde iki ti rijwen titibi byinn wu ta atang. Awu taen ira, u ri baa, 34“Kayi! Iken ti ren fu te ti si imi, Yesu unde ti Nazareti? Afu ru ba ike ti fu u ba twenji-fu ati a? Ame nung pu m afu. Afu si unde ti saen kyag ti ru uwog Rimam ba.”

35Yesu fwan rijwen titibi wu ira baa, “Bwe tag! Ruye uwae unde wune!” Isim yine rijwen titibi byinn unde wu si riben u ya wu ta u ruye ijwe-wu ti kujimshwur.

36Ande meme ti funn atang nung ira yi fur ba ayib. Aba ku rang atso ira risu Yesu baa, “Ira unju unde wune si rimang? Awu ku fwa rijwen titibi kusen, aba ama ku nae risu riben uwog-wu u ku ruye uwae ande!” 37Isim yine iten ira Yesu shag kyi fe uwae uten ti Galili patag.

Yesu Nwangru Ande Yang-ba akwen

(Matiyu 8:14-17; Markus 1:29-34)

38Awu nwunn u ya kusog Rimam atang ta u ru yi kununn Siman. Kununn Siman atang, iya uwa Siman nae kicaeb. Ijwe tibyag byag wu timambe. A tsag te Yesu ira kicaeb yi. 39Awu ru ka uwog unda wu u ka fwan kicaeb yi kibyag, ayi yag ta. Ti ritsen unda wu fa sunwunn u nde na ba wuci.

40Ti usir jwo ureb, ti usir si ku yib ande ti uten atang meme ru ka pu ande-ba ti site acaeb ti tsotso ru ba uwog Yesu. Awu pu ajwo-wu cwu tsa ba risu ti kinjo ti kinjo u nwangru ba uwae acaeb yi. 41Ajwen titibi ama ruye uwae ande yang-ba. Kiye ti aba a ru ku ye a ku taen ira baa, “Afu si Umbae na Rimam!” Awu fwan ba kibyag u cwe u nda-wu aba riyae ti a na ri ira be, ikyaen ti, a nung pu ba baa, awu na si Unde ti Rimam Tsab Tsi.

Yesu Nde Wande Uwae Uten Yawudiya

(Markus 1:35-39)

42Ti ucwefam yae, awu nwunn u ya ba ta u ru yi uwog ti ku skirr, uwog ti ande ku ka-ba atang be. Ama ande nwunn u sha rifab-wu u ru ka tu wu atang. Aba cwe-ba ira ti wu na ya ba ta be. 43Amaa, awu ri te ba baa, “Ame u ru kaa ri kang Ira tinyang na Kujwokwe Rimam te ande iki uten iki ama. Rimam tom me ba ikyaen wande yine.” 44Ama awu nwunn ku ri ira Rimam te ande uwae asog Rimam ti ta uten Yawudiya meme.

Currently Selected:

Luka 4: kubNT

Highlight

Copy