Luka 24

Itinwunn na Yesu Uwae Kuskab

(Matiyu 28:1-10; Markus 16:1-8; Yohana 20:1-10)

1Ucwe fam-yi, usir ti kucang uwae kutsáb na ba, ti kiskinn fifae anda aba nwunn ti isu yi ti aba jab ye su ru yi kuskab Yesu. 2Aba ka sang atang, u tu kutxom ti burkyi uwáe wu kaen ru ka nae iyen. 3Aba sang fife uwae uwáe wu, amaa, aba tu-ba rukom Itsekuru-ti Yesu atang be. 4Ti aba tsi u nung-ba iken ti aba u nde be, ande ifaen iki ru ba tsi fer ba. Atupwa-ba tsen poriri u jaen wurwur. 5Ikyenricwu ye anda ba, aba ru ka ku riben. Ande ba rang ba baa, “Imi ti nde ani ku sha unde ti tsi user uwae ande ti cwucwu? 6Awu ta-wu ike be. Awu nwunn pu wu. Ni tangsom ti ira ti awu ri te ni kiye ti awu ta ti Galili baa, 7a na u sa Umbae Unde na kang ande titibi. Aba u kwer wu risu kutuku ti cice. Uwae usir ti fa ti ita awu u nwunn uwae iticwu ti unyang.”

8Tiri anda ba tangsom ira-wu ayi 9u kafe ru yi kununn u ru ka ri meme ira yi te ande ti putsa Yesu rijwe asu kinjo ti ande-ba ti tsitsi meme. 10Anda ba si Mberimu Magadalen, ti Yowana, ti Mberimu iya Yakubu. Aba ti anda iki ti tsitsi tsag ira yine ti atom na Yesu. 11Amaa atom ba kab baa, ira ti anda bane na ri te ba na si ira ti ukaen. Aba ru-ba kubenti atang be. 12Amaa Bitrus fa sunwunn u ter inyae ru yi kuskab atang u ka pu ku u nung nyang atupwa amam. Isim yine awu kafe ru yi kununn u ku kab ira risu iken yine ti nde.

Yesu Tu Ande Ifaen Fengo ti Emawusi

(Markus 16:12-13)

13Usir wu ande ifaen uwae-ba nwunn ku ru yi imbae uten ti a ku kunn baa, Emawusi ti tsi Urushelima ka atang ka lamba itsongfaen. 14Aba ku tsag rikaen risu meme iken yi ti nde uwae kiye wu. 15Ti aba ku ru ku tsag rikaen risu iken yi, Yesu ti risu-wu ko ba fer ba u putsa ku ru. 16Aba sae wu amaa ayib fur ba aba nungye-ba wu cwucwo be. 17Yesu rang ba baa, “Ani ku tsag-ni akaen risu imi?” Aba kyaetsi, u sae ayib kum utob ti beb. 18Kinjo uwae-ba ti rinyi-wu si Kileyopa ri baa, “A! A! Afu amam uwae ande ti ba Urushelima ti nung-fu iken yi ti nde usir ifaen yine be a?” 19Awu rang baa, “Iken yi si imi ti nde?” Aba ri te wu baa, “Iken ti a nde te Yesu unde ti Nazareti. Awu si unde ti ku ya iskin ira Rimam. Uwe ande ti uwe Rimam, awu si unde ti site kuko uwae ira-wu ti uwae wande-wu meme. 20Akwen Rimam tiyang ti akwe ti ta risu-ti pwen wu rikwen iticwu u sa wu ru ka kwer risu kutuku. 21Ati ku tang baa, awu ti si unde wu ti ru ku ba ti wu ba nwangru ande ti Isirela! I si-yi nyang ayine amam be, usir ti yaka fa ti ita ti iken yi nde. 22Ariki uwae anda ti ta te ti ru ba ri ira ti fur ti ayib. Aba nwunn ti kiskinn fifae ru ka kuskab, 23ama a ru ka shanum rukom Yesu wu. Aba kafe ba u ba ri baa, aba na nung atom Rimam iki ti ri te ba baa, Yesu na nwunn pu wu ti unyang. 24Ariki uwae-ti ru ka kuskab wu u ka nung iken ti anda ba ri, ayi si kubenti ara, aba nung-ba wu be.” 25Yesu ri te ba baa, “Ani rob risu, ande-m! Ande ti ku ya iskin ira Rimam bae tag ira risu iken yine meme uwae Kutsingken-ba, ama utob-ni rob cwan, ani ru-ni kubenti atang fife be! 26Unde wu ti Rimam Tsab Tsi ngwa kang rikaen titawe awu u tu kuko-wu.” 27Tiri Yesu tsag te ba meme ira ti ta uwae Kutsingken Rimam risu-wu, bag ti ira ti Musa bae ru ka kwar ti meme ira na ande ti ku ya iskin ira Rimam.

28Ti aba ru ba fer imbae uten ti aba ku ru yi atang, Yesu nde pangma awu na u wur ya fife. 29Amaa aba ye wu tsi u ku yae wu baa, “Nae te ti ti ike, usir si yib pu wu, kufub si ku kyi pu wu.” Awu putsa ba sang ka som te ba. 30Ti awu te ba som ku ci wuci te atso, awu sa buredi u jwam itinyang ru ba risu-yi u kanta yi na ba. 31Ti ritsen ayib-ba mbubta, aba nungye wu. Ama awu yag byinn ayib-ba. Aba nung-ba uwe-wu cwucwo be. 32Aba ri baa, “Utob-ti ku kunn-yi tik tik kiye ti awu ku tsag akaen te ti u ku ri te ti ira uwae Kutsingken Rimam fengo akwen be a?”

33Aba fa sunwunn ti ritsen u kafe ba ti yi Urushelima u ru ka tu ande ti putsa Yesu rijwe asu kinjo funn ti uwog kinjo ti ande ti putsa Yesu ti tsitsi. 34Ariki ku ri baa, “Kubenti, Itsekuru-ti nwunn pu wu uwae kuskab! Awu tso risu-wu uwog Siman.” 35Uwog ne, ande ifaen bane, tsag te ba iken ti nde ba fengo, ti fengo ti aba nungye Itsekuru uwae kiye ti awu nyangta buredi na ba.

Yesu Tatso Risu-wu Uwog Ande-wu

(Matiyu 28:16-20; Markus 16:14-18; Yohana 20:19-23; Wande Atom 1:6-8)

36Ti ande ifaen bane ku tsag te ba ira yine, Yesu ti risu-wu mbug ruye kutampwa-ba u kunnji ba ira baa, “Kujimshwur ā ru ba risu-ni.” 37Ikyen ricwu ye ba, rijwen si ba ijwe, aba ku tang-ba baa, awu na si ricwu. 38Amaa awu ri te ba baa, “Ani kyang rimang u ku kyen ikyenricwu? Imi ti nde ti ani ku kab uwae? 39Ni sae afxen-m ti ajwo-m ti ni nungye baa, ayi na si ame. Ni sa kujwo tekunn m ti ni sae, ricwu site-wu amum ti akub pangma ti ani ku nung rimenn-m be.” 40Awu ri ira yine u tatso ba ajwo-wu ti afxen-wu. 41Ko ti awu tatso ba iken yine meme, aba ru-ba kubenti uwae-yi be. Aba tsen utob, ama ayib fur ba fa atang. Awu rang ba baa, “Ani site wuci ti ci ike a?” 42Aba nda wu iwag ti fufxab. 43Awu sa ra wu u sa kub ti kutxuwe-ba atang.

44Tiri awu ri te ba baa, “Iken ti ku nde ne si iken ti ame ri te ni kiye ti ame te ni ta tetso ti kucang, ti ame ri te ni baa, meme iken ti a bae risu-m uwae Icwe na Musa, ti uwae ira na ande ti ku ya iskin ira Rimam, ti uwae Kutsingken Akyang, ayi u si kang pu yi kubenti.” 45Isim ayine awu mbubta ba riyaen utob ti a na nungye imbyi ira ti a bae uwae Kutsingken Rimam. 46Awu ri te ba baa, “A bae uwae Kutsingken Rimam baa, ‘Unde wu ti Rimam Tsab Tsi u ngwa kang rikaen u cwu u nwunn uwae iticwu uwae usir ti fa ti ita. 47Uwae rinyi-wu, a u ri te meme ande ti utense baa, aba na kafe isim ta ikentitibi ti Rimam na ya ta na ba. A u bag ira yine nwunn ti Urushelima ru fe yi ise.’ 48Ani nung pu ni iken yine ti ayib-ni. 49Ayi u tsi-yi tsi be ame u tom na ni iken ti Itse-m yer unju risu-yi. Ama ni paji ti uwae uten ike, se usir ti ani a tu pu ni kuko Rimam si apupwen ba pu yi risu-ni titawe.”

Yesu Tso yi Apupwen

(Matiyu 16:19-20; Wande Atom 1:9-11)

50Isim ayine awu pu ba ruye uwae uten ru ka fifer ti Betani u pu ajwo tso u jwam itinyang si ba risu-ba. 51Ti awu ku jwam itinyang si ba risu-ba, awu nwunn u ya ba ta, Rimam kyangte wu ku tso yi apupwen. 52Aba fen wu u kafe ru yi Urushelima ti utob ti tsen. 53Ko kiye titini aba ku ru ba ko Kusog Rimam u ku teb Rimam.

Currently Selected:

Luka 24: kubNT

Highlight

Copy