Yohana 6

Yesu Sa Wuci Na Ande Kumbub Itsong

(Matiyu 14:13-21; Markus 6:30-44; Luka 9:10-17)

1Isim yine Yesu yen ru yi ukunn uyinn ti Galili ti uwe akwen. (Uyinn wune, ariki ku kunn wu baa, uyinn ti Tiberiya.) 2Ande jwunn ba putsa wu ikyaen ti, aba nung pu ba iken ti ku fur ayib ti awu nde uwog ande ti acaeb ti ru ba uwog-wu. 3Yesu ti ande ti imbyi-wu tso kubab rikwen iki u ru ka som atang. 4Kiye wu, ayi tsitsi kiye kpang ti Mbayawuda u nde ukwab tiyang-ba ti si Ukwab Itiyafe. 5Ti Yesu pu ayib tso ritsen u nungye ande ti ru ku ba yi uwog-wu, awu rang Filip baa, “Aka ti ati u jab wuci ti u ko ande abane meme-ba?” 6Awu ri ira yine ikyaen ti wu u myae Filip myae amam, ikyaen ti, awu ti risu-wu nung pu wu iken ti awu u nde. 7Filip ri te wu baa, “Ko ati a wen skeb dinari ukob ifaen, unde titini uwae-ba u tu wuci kpang amam.” 8Unde kinjo uwae ande ti ku putsa Yesu, ti rinyi-wu si Andarawu, inja Siman Bitrus, ri te wu baa, 9“Umbae iki ta ike ti site abyi buredi itsong ti iwag ifaen, amaa ayi ko ti ande yang-ba ne u ci u kyaen njaa?” 10Irum shab uwog-wu timambe, ikyaen yine Yesu ri baa, “Ni ri te ande ba ti a som riben.” Ande ba som riben. Arom amam uwae-ba ka kumbub itsong. 11Ama Yesu sa wuci yi u nde na Rimam fxaefa u kan na ande ti som riben atang, u nde ti mbwe-yi ti iwag yi meme. Unde titini ci u kyaen.

12Kiye ti aba ci kyaen pu ba awu ri te ande-wu baa, “Ni byir amumunn ti tsitsi byir ikyaen ti ayi ā ndembeb-yi ti ukaen amen be.” 13Aba byir amumunn buredi yi ti ande bane ci ne, ayi munn atyika rijwe asu ifaen.

14Kiye ti ande nung iken yi ti ku fur ayib ti awu nde ne aba ri baa, “Kubenti, awune ti si Unde wu ti ku ya iskin ira Rimam ti kubenti ti a ri baa, awu na u sang ba utense#6:14 Iki be a ku tangsom ti unde ti Musa ri ira risu-wu uwae Itishem Icwe 18:15-19..” 15Yesu nungye pu wu ti aba ku sha ti a na u ba ye wu ti ribom ti a na u nae wu ukwe. Ikyaen yine awu nwunn u ya ba ta atang u tso yi kitaen rikwen.

Yesu Kyang Ikyin Risu Ambyi

(Matiyu 14:22-33; Markus 6:45-52)

16Usir pang kujwo ureb, ande na Yesu si yi unju uyinn 17u ru ka sang kuyae u kafe yen ku ruru yi uka ti Kaparnawum. Uwog byi kyi, ama Yesu ru ba tu-wu aba khika be. 18Kiye wune ufunn iki ti ribom ku kae u ku tur ambyi ru uwe u ku tur ambyi ru isim. 19Ti ande na Yesu jwo kuyae ru ka sang pangma lamba ita ko inje ahan, aba nung Yesu ku kyang ikyin risu ambyi u ru ku ba ku fer kuyae, ama ikyenricwu ye ba. 20Yesu kunn ira baa, “Ni kyen-ni ikyenricwu be, i si ame Yesu!” 21Aba tsen utob u ye wu sang uwae kuyae amam. Ti ritsen kuyae ru ka sang pu wu ukunn uyinn uwog ti aba ku sha.

22Ucwefam-yi ande ti nae ti ukunn uyinn akwen ku sha rifab Yesu, ikyaen ti, aba nung baa, kuyae kinjo amam ti ta atang, ama Yesu na sang-wu uwae kuyae wu ti ande ti imbyi-wu sang atang be. Nyáng aba amam uwae kuyae wu. 23Ama ayae iki ru uten ti Tiberiya ba fer uwog wu ti aba ci pu ba wuci pu atang kucang, isim-yi ti Yesu tso pu wu fxaefa risu-yi na Rimam. 24Kiye ti ande ba nungye baa, Yesu ti ande imbyi-wu meme na ta-ba atang be, aba sang kuyae yine u yen ku sha rifab Yesu ku ru yi Kaparnawum.

Yesu Si Wuci ti ku Nda Ande Unyang

25Kiye ti aba ru ka sang pu ba ukunn uyinn akwen, aba tu wu u rang wu baa, “Unde ti uwe, afu ru ba ike isinn?”

26Yesu cwe ba unju baa, “Ame ku ri te ni kubenti, iken ti nde nee ani ku sha rifab-m si ikyaen ti, ani ci u kyaen ti buredi yi kiye wu, si-yi ikyaen ti ani nung iken ti tatso kuko Rimam be. 27Ni nung! Ni nde-ni wande ikyaen wuci ti ku mamam be. Ni kwab ti ni tu itso wuci ti ku nda ande unyang ti tsi kukunn, ayi itso wuci wune Umbae Unde u nda ni. Ayi si si awu ti Rimam Itse cwe pu wu ira-wu#6:27 cwe pu wu ira-wu Unju Mbahelene a bae baa Rimam na kum na wu sitam-wu, ti tatso baa, kuko-wu si ana Rimam..”

28Ama aba rang wu baa, “Ati u nde rimang titawe ati u nde iken ti ku nyang uwae Rimam?”

29Yesu ri te ba baa, “Wande ti ku nyang uwae Rimam si ti ni ru uwae kinjo uwog unde ti awu tom ba.”

30Aba ama jwam wu baa, “Nde wande ti kuko ti ati u sae u ru uwae kinjo uwog-fu! Tatso ti iken ti afu u ndetu. 31Kiye ti abitse-ti som uwae kutur ti kute, Musa nda ba ‘mánna.’#6:31 Ira risu wuci yine ta uwae kutsingken Itiruye 16:31-35. Pangma ti a bae uwae Kutsingken Rimam baa, ‘Awu nda ba wuci ti si apupwen ba.’ ”

32Yesu ri te ba baa, “Ame ku ri te ni kubenti, unde ti nda ni wuci yi si-yi Musa be, i si Itse-m. Cwucwo, buredi ti kubenti ti ku si apupwen ba, Itse-m ti ku nda yi si ba na ni tine. 33Ikyaen ti, buredi ti Rimam ku nda ande si unde wu ti si apupwen ba u ku nda utense unyang.” 34Aba ri te wu baa, “Itsekuru-ti, nda ti itso wuci yine ko kiye titini.”

35Yesu ri te ba baa, “Ame ti si buredi ti ku nda unyang. Unde titini ti awu a ru ba uwog-m, awu u fxen-wu rimenn be. Unde titini ti awu a ru uwae kinjo uwog-m ama u fxen-wu unwaen cwucwo be. 36Amaa, pangma ti ame ri te ni kucang, ko ti ani nung me ti ayib, ani ru-ni uwae kinjo uwog-m kihka be. 37Ande meme ti Itse-m a sa ba na m kujwo, aba u ba yi uwog-m. Ama unde titini ti a ba uwog-m, ame u rwae-m awu rwae be. 38Ame si apupwen ba ikyaen ti m na u nde iken ti awu ti tom m tom ku sha, i si-yi ti m na u nde iken ti utob-m ku sha be. 39Iken ti Itse-m Rimam ku sha si ti m na u nungkyi ande ti awu nda m meme, ti ko kinjo na yag ta-wu ta be, ikyaen ti m na kunn nwunn ba uwae iticwu usir ti ricwunnkyi. 40Iken ti Itse-m ku sha si ti unde titini ti a sae Umbae-wu u ru uwae kinjo uwog-wu, unde wu na tu unyang ti tsi kukunn. Ame ama u kunn nwunn wu uwae iticwu uwae usir ti ricwunnkyi.”

41Kiye ti awu ri ira yine Mbayawuda nwunn ku pwen unju ikyaen ti, awu ri baa, awu ti si buredi ti si apupwen ba. 42Aba ku ri baa, “Awune si-wu Yesu umbae Yusufu be a. Itse-wu ti iya-wu ama si-ba ande ti ati nunung be a. Awu nde rimang ku ri baa, awu na si apupwen ba?”

43Yesu ri te ba baa, “Ni fxae kitsag ti tsag ti unju ti pwen-ni. 44Unde iki u ru ba fob-wu uwog-m be, se unde ti Itse-m ti tom me ru ba a shir wu ru ba pu wu. Unde titini ti ru ba uwog-m ama, ame u nda wu nwunn uwae iticwu usir ti ricwunnkyi. 45Ti kute ande ti ku ya iskin ira Rimam bae baa, ‘Rimam ti u kwen na ba meme.’ Ande meme ti fxen ira Itse-m u kwen ye ira-wu, awu u ru ba uwog-m. 46Unde iki nung ji-wu Itse khika be, nyang awu unde ti ru uwog Rimam ba amam ti nung pu wu Itse. 47Ame ku ri te ni kubenti, unde ti a ru uwae kinjo uwog-m, awu site pu wu unyang ti tsi kukunn. 48Ame ti si buredi ti ku nda ande unyang. 49Kiye ti abitse-ni ta uwae kutur, aba ku ci mánna#6:49 mánna Imbyi Mánna unjwu Mbaibrane baa, “Ayine si imi,” ti si wuci ti Rimam nda ande Isirela uwae kutur., amaa aba cwu pu ba. 50Ama wuci ti ku si apupwen ba, unde titini ti a ci wu, awu u cwu-wu cwu cwucwo be. 51Ame ti risu-m ti si wuci yi ti si apupwen ba, awu ti ku nda unde unyang. Unde titini ti a ci wuci yine, awu u som yiyer. Wuci ti ame u nda ande ti utense ti a na tu unyang si ibye rimenn-m.”

52Ira ti awu ri ne nda ande ndufu Mbayawuda shaen ishaen te atso. Aba ku rang atso baa, “Unde wune u nde rimang u sa ibye rimenn-wu na ti, ti na kub?”

53Yesu ri te ba baa, “Ame ku ri te ni kubenti, asiti ani a u kub-ni ibye rimenn na Umbae Unde be, u ngwa-ni anying-wu be, ani u site-ni ti unyang be. 54Ama unde titini ti a kub ibye rimenn-m u ngwa anying-m site pu wu unyang ti tsi kukunn, ama ame u kunn nwunn wu ti unyang usir ti ricwunnkyi. 55Ikyaen ti, ibye rimenn-m ti si wuci ti kubenti, anying-m ama ti si iken ti ngwa ti kubenti. 56Unde titini ti a kub ibye rimenn-m, u ngwa anying-m, awu baefa te m, ame ama baefa te wu. 57Itse-m ti tom me ru ba. Ame site unyang ikyaen ti, awu site unyang. Ayi si ahan ama uwog unde ti a kub ibye rimenn-m, awu u som ti unyang ikyaen-m. 58I si ijwe-m wune ti si wuci ti si apupwen ba. Awu si-wu pangma itso wuci ti abitse-ni ci kucang u cwucwu ne be. Unde titini ti awu a ci wuci ti kubenti ti ame ku nda ande, awu u tu unyang ti tsi kukunn.”

59Yesu ku ri ira yine kiye ti awu ta kusog Rimam na Mbayawuda uwae uten ti Kaparnawum.

Unyang ti Tsi Kukunn

60Ande-wu fxen ira yine u ri baa, “Iken ti kwen ayine bom pang-yi. Aye ti u kyangte ira yine?”

61Yesu nungye pu wu baa, ande ti putsa-wu na ku pwen unju risu ira yine riyaen utob-ba. Awu rang ba baa, “Ko ira-m yine nda ni ku sha ti ni u ter saen m ta-ni ahoo? 62A baa, ani na nung Umbae Unde kafe tso ti uwog ti awu ru atang ba, ani ú kab rimang? 63I si Kusung Rimam ti ku nda ande unyang ti tsi kukunn. Unde u tu-wu ayi ti ajwo-wu amam be. Ira ti ame ri te ni ne, si ira Kusung, u si ira unyang. 64Amaa ariki uwae-ni ru-ni uwae kinjo uwog-m be.” Yesu ri ira yine ikyaen ti, ti kucang-yi, awu nung pu wu ande ti u ru-ba uwae kinjo uwog-wu be, u nung pu wu unde ti u sa wu jabci ama. 65Awu ri ira iki baa, “Ayine ti si iken ti nde tawe ame ri te ni baa, unde iki na u ru ba fob-wu uwog-m amen be, se unde ti Itse-m Rimam a cwe na wu.”

66Ikyaen ira ti awu ri ne, ande ti ku putsa-wu yang-ba akwen kafe ti isim u putsa-ba awu cwucwo be. 67Ama Yesu ri te ande rijwe asu ifaen ti awu tsab ba tsi baa, “Ani ama re? Ani u ya m ta ama a.”

68Siman Bitrus ri te wu baa, “Itsekuru-m, Ati u ru ka tu-ti aye? Afu ti site ira ti ku nda ande unyang ti tsi kukunn. 69Ati ru uwae kinjo u nung pu ti baa, afu ti na si Unde ti Saen kyag ti Rimam Tsab Tsi.”

70Yesu ri te ba baa, “Unde ti tsab ni rijwe asu ifaen si-yi ame be a? Ama kinjo uwae-ni si-wu umbae Shetann.” 71Yesu ri ira yine risu Yawuda umbae Siman Iskariyoti, ikyaen ti ko ti awu Yawuda si kinjo uwae ande ti Yesu tsab ba, awu ku kwab ti awu na u ye Yesu jabci.

Currently Selected:

Yohana 6: kubNT

Highlight

Copy