Yohana 3

Yesu ti Nikodemu

1Unde ti uwe Mbayawuda iki ta uten atang ti a ku kunn rinyi-wu baa, Nikodemu. Awu si kinjo uwae kumbub Farisi. 2Utitang usir iki awu ru ba uwog Yesu u ri baa, “Unde ti uwe, ati nung pu ti baa, afu na si unde tiyang ti Rimam tom ru ba. Unde iki u nde tu-wu wande tiyang ti afu ku nde ne be, se unde ti Rimam a te wu som tetso tawe.” 3Yesu ri te wu baa, “Ame ku ri te fu kubenti, unde ta-wu ti awu u sang Kujwokwe Rimam be, se iken ti a mbae shem pu ba awu tawe.” 4Nikodemu rang wu baa, “A u nde rimang titawe a u mbae shem unde ti kwèn mam pu wu? Awu u kafe sang kyi ti uwae rishwu iya-wu itawe a mbae shem wu a?” 5Yesu ri te wu baa, “Ame ku ri te fu kubenti, unde iki u sang-wu Kujwokwe Rimam be se unde ti a mbae pu ba awu yi fengo na ambyi, ti ana Kusung. 6Unde ku mbae unde, Kusung ku mbae kusung. 7Ti ame ri te fu baa, a na mbae kang ni tishe, ayi ā si-yi iken ti ku fur ayib uwog-fu be. 8Ufunn ku kae ku ru yi uwog ti awu ku sha. Ande ku fxen ujwin ti awu ku kunn, amaa aba nung-ba uwog ti awu kae ku ru atang ba be, u nung-ba uwog ti awu kae ku ru yi atang be. Ayi si ahan uwog unde titini ti a mbae wu uwae Kusung Rimam.” 9Nikodemu rang wu baa, “Ayine u nde rimang tawe ayi u nde tu?” 10Yesu ri te wu baa, “Afu si undufu tiyang yi Isirela, ama afu nde rimang u nungye-fu ira yine be?

11“Ame ku ri te fu kubenti baa, ati ku ri ira risu iken ti ati nungye u ku ri te ni ira risu iken ti ati sae ti ayib-ti, amaa ani paembe-ni ira-ti ayi be. 12Ame ku ri te fu ira risu iken ti utense ike. Amaa asiti afu a ru-fu uwae kinjo atang be afu u nde rimang u ru uwae kinjo kiye ti ame a ri te fu ira risu iken ti apupwen?

13“Unde iki ta-wu ti tso ka pu wu apupwen be, se awu Umbae Unde amam. Awu ti nung iken ti apupwen, ikyaen ti, awu si apupwen ba. 14Pangma kiye ti Musa ti ande-wu ta uwae kutur, Musa sa akyab kiser u kwen ikentibi u sa kwer risu ukum ikyaen itinwangru ande. Ayi si ahan ama, a u ye ra Umbae Unde kwer risu kutuku 15ikyaen ti unde titini ti a ru uwae kinjo uwog-wu, awu ā tu unyang ti tsi kukunn.#3:15 unyang ti tsi kukunn. Itso unyang ti Yohana ku ri ike si unyang ti nyang siskeb itinungye unde. Unde a site itso unyang wune, utob titsen-wu ti utob ti nae riben-wu si-yi ti ti ri be. Amaa uwae ande ti Rimam, isim kiye Yesu, ariki bag ku kwen baa, unyang wune u mam-wu mam ama be, nee iken ti nde ande ku kunn wu baa, “unyang ti tsi kukunn.”

16“Rimam ye ure te ande ti utense ko timambe, ne iken ti nde awu nda ba Umbae-wu ti si nyáng kinjo-wu amam, ikyaen ti unde titini ti a ru uwae kinjo uwog-wu, awu ā twenji-wu be, amaa, awu ā tu unyang ti tsi kukunn. 17Iken ti nde Rimam tom Umbae-wu ba utense si-yi ti wu na pwen ande rikwén be. Ayi si ti wu na nwangru ba.

18“Unde titini ti a ru uwae kinjo uwog Umbae Rimam wu, rikwen u ye-yi awu be. Amaa unde ti a ru-wu uwae kinjo uwog-wu be, rikwen ye pu yi awu, ikyaen ti, awu ru-wu uwae kinjo uwog Umbae Rimam awu kinjo-wu amam be. 19Nung fengo ti a ku pwen rikwen yi ta ri: Uwog ti saen sang ba pu wu uwae utense, amaa ande pyir-ba awu u ku sha skeb-ba kufub ikyaen ti, aba si ande ti ku nde ikentitibi. 20Unde ti ku nde ikentitibi ku sha-wu uwog ti saen kyag be, ikyaen ti, awu ku sha-wu ti ikentitibi-wu na nae ise be. 21Amaa unde ti a ku nde iken ti kubenti awu ku ter-wu uwog ti saen kyag be, awu ku ru ba sang uwae-yi ikyaen ti ayi ā tso paenine baa, Rimam ti nda wu nde iken yi.”

Yesu ti Yohana

22Isim ayine, Yesu ti atugbug-wu nwunn ru yi uten ti Mbayawuda. Awu nde usir ifaen te ba atang u ku nde na ande batisma. 23Ti uwae kiye wu ama, Yohana ta uten ti Ayenon ti fifer ti Salim u ku nde na ande batisma atang, ikyaen ti, ambyi ta atang ko timambe. Ande ku ru ba uwog-wu atang, awu ku nde na ba. 24Kiye wune a ye Yohana sang-ba pursuna khika be.

25Uwae kiye wune ande ti putsa Yohana ku shaen ishaen ti urae Mbayawuda iki risu icwe na ijwe ti ti jwo ti Mbayawuda ku putsa. 26Aba ande na Yohana kafe ru ba uwog Yohana u ri te wu baa, “Unde ti uwe, unde wu ti tu fu unju unyim ti Yordan akwen, nee afu ri ira risu-wu, awu ta ike u ku nde na ande batisma, ama ande meme ku ter ku ru yi uwog-wu.” 27Yohana ri te ba baa, “Unde u tu-wu iken iki be, se ti Rimam a nda wu. 28Ani ti risu-ni fxen pu ni ira ti m ri baa, ame na si-m Unde wu ti a Tsab Tsi be, ame si nyang atom ti Rimam tom ru ba uwe. 29Uwog ukwab unda ishe, ayi si ubaen unda ishe ti ku mbe unda ishe wu. Urwan ubaen unda ishe tsi te wu atang u ku fxen wu amam. Awu ku tsen utob kiye ti awu a ku fxen afxenjwin ubaen unda ishe wu. Utob ti tsen yine si ana-m tine. Ijwe-m si fa pu yi. 30Awu ā ko tsutso, ame ā ko sisi.

31“Awu unde ti ru uwog Rimam apupwen si ba, awu skeb tag iken meme. Unde ti utense ike si iken na utense. Ira ti ri-wu ama si ana utense ike. Amaa, awu ti ru apupwen si ba skeb pu wu ande meme. 32Awu ku ri ira risu iken ti awu nung ti ayib, ti iken ti awu fxen ti atong, ama ande kyangte-ba ira-wu ayi be. 33Amaa unde titini ti paembe ira-wu ayi ku tso baa, Rimam na si Rimam ti kubenti. 34Awu ti Rimam tom wu tom ba, ira-wu ti awu ku ri, si ana Rimam, ikyaen ti, Rimam nda wu kuko na Kusung-wu ti ititsikunn-yi ta-yi be. 35Rimam site ure ti Umbae-wu ko timambe. Awu sa iken meme fae si wu kujwo. 36Unde titini ti a ru uwae kinjo uwog Umbae Rimam wu site unyang ti tsi kukunn. Unde titini ti a pyir ira Umbae Rimam, awu u tu-wu unyang ti tsi kukunn be. Rinae Rimam u tsikunn risu-wu ru fife yi uwe.”

Currently Selected:

Yohana 3: kubNT

Highlight

Copy