Yohana 2

Yesu Nde Wande ti ku Fur Ayib Uwae Uten ti Kana

1Uwae usir ti fa ti ita a pu unda ishe uwae uten ti Kana ti ta uwae uten ti Galili. Iya Yesu ta uwog ukwab atang ama. 2A yae Yesu ti atugbug-wu ru ba atang ama. 3Kiye ti iken ti ngwa mam fe, Mberimu iya Yesu ru ba ri te wu baa, “Iken ti ngwa#2:3 Yi unju Girik, a bae baa, “Oyinos” ti si ambyi anam ti fifab. mam tag pu yi.” 4Yesu ri te wu baa, “Ikyaen imi ti afu shir m ku sang yi atang, Iya? Kiye wande-m nde-yi khika be.” 5Iya-wu ri te itaen ti ku nde wande atang baa, “Iken ti awu a ri te ni meme ni nde yi!” 6Atsaen ambyi itsongnjo tsi uwae kununn atang. Mbayawuda ku nde wande te yi ikyaen icwe-ba na ijwe ti ti jwo. Ko kinjo uwae-yi ku si atutong ambyi rikom ko rijwe ita. 7Yesu ri te itaen ti ku nde wande atang baa, “Ni ka txi ambyi si munn atutong yine meme.” Aba txi ambyi munn tso ba sang ti atong atsaen yi. 8Tiri awu ri baa, “Ni txi tso uriki ru ka na unde ti uwe ukwab.” Aba txi ru ka na wu. 9Aba itaen ti ku nde wande nung pu ba uwog ti a txi ambyi yine atang, amaa unde ti uwe ukwab nung-wu be. Ti awu mbwa fe, awu kunn ubaen unda ishe ru ba 10u ri te wu baa, “A ku sa ambyi anam ti tinyang ru ba uwe ti ande ā ngwa. Afu nde rimang u sa ti nyinyang tam-fu tam u ka sa ku ba tine!”

11Iken ti Yesu nde uwae uten ti Kana ti Galili wune, si iken ti ku fur ayib ti kucang ti Yesu nde ti wu tso kuko-wu atang. Ikyaen iken yine ti awu nde, ande ti ku putsa wu ru uwae kinjo uwog-wu.

12Isim iken yine Yesu ti iya-wu ti ameinja-wu ti ande ti ku putsa-wu ru yi uten ti Kaparnawum u som atang ka usir kpang.

Yesu Kyaenyang Kusog Rimam

(Matiyu 21:12-13; Markus 11:15-17; Luka 19:45-46)

13Kiye wu Mbayawuda ku kyae ijwe-ba ikyaen ukwab tiyang-ba ti a kunn wu baa, Ukwab Itiyafe.#2:13 Ukwab Itiyafe. Unju Mbahelene a ku kunn ukwab wune baa Paska. Unju Mbayawuda, Pesak, ti imbyi-yi baa, Itiyafe. Yesu nwunn u tso yi Urushelima ama. 14Kiye ti awu ru ka sang Kusog Rimam tiyang, awu tu ande ti ku jabci ti indag ti iwen ti akwae, fa ti ande ti ku fen aser ti som kyi usu-ba. 15Awu shab kimbab uji u ndur wu ndur u byinn jae tag ba meme fa ti indag ti iwen yine ruye uwae kusog Rimam atang. Awu fxae bur tag tebur ande ba ti ku fen aser u pu aser-ba yi yaen mbub. 16Awu ri te ande ba ti ku jabci ti akwae baa, “Ni pu iken yine ru yiye ike. Ani nde rimang ku sa kusog Itse-m kafe ritug?” 17Ti ande ti putsa wu nung iken yine, aba tangsom ti ira ti a bae uwae Kutsingken Rimam baa, “Ure ti ame site risu kusog Rimam si urwa ti ku ten uwae utob-m.”

18Ama ande ndufu Mbayawuda ti ta atang byib wu baa, “Afu tu kuko aka nee afu ku nde iken yine? Ayi a si uwog Rimam, tatso ti iken iki ti u tso baa, afu na site kuko ti fu nde itso iken yine.” 19Yesu ri te ba baa, “Asiti ani a mbub kusog wune si riben, uwae usir ita ame u mbye cwunn wu ti atang.” 20Ande ndufu Mbayawuda aba ri baa, “Kusog Rimam awune, a mbye wu uwae asang ti asang mae ifaen asu itsongnjo ama afu ri baa, afu na u mbye cwunn wu uwae usir ita ané?”

21Amaa, kusog Rimam wu ti Yesu ri ne, awu ku sunn ira risu ijwe-wu. 22Ama ande ti putsa wu nungye-ba imbyi ira-wu ayi be, se isim ti a kunn nwunn wu uwae kuskab, titawe aba tangsom baa, awu ri ira yine. Aba ru uwae kinjo ti ira yi ti a bae uwae Kutsingken Rimam fa ti ira ti Yesu tsag te ba meme.

23Kiye ti Yesu ta Urushelima kiye na ukwab tiyang, awu nde iken ti ku fur ayib uwe ande atang. Ande yang-ba akwen nung iken yi u ru kubenti uwog-wu. 24Ama awu cwe-wu ti wu ri te ba iken ti ta utob-wu be ikyaen ti awu nung pu wu ande meme. 25I si-yi ti unde iki ti u ri te Yesu iken ti ta uwae utob unde be, ikyaen ti, Yesu nung pu wu iken ti ta uwae utob unde. Awu ti risu-wu nung tag pu wu itso iken ti ta uwae utob unde.

Currently Selected:

Yohana 2: kubNT

Highlight

Copy