Kucangtsi 8
8
Ambyi Yer Tsen, u Wom Tag
1Rimam tangsom ti Nuhu ti asinn ti ibye kutur ti ta te wu uwae kuyae, u tom ufunn ti kpakang sang utense, ama ambyi womsi. 2Isatsub ti kyeb tsoye ko aka yer tsen, ufu ambyi ti apupwen ama cwunnkyi. Upwen tsa-wu cwucwo be. 3Ambyi wom ku si sku, sku. Isim usir ukob kinjo ti mae ifaen mbe rijwe (150), ambyi womsi tag pu yi. 4Ama usir ti rijwe asu itsongfaen ana ishaen ti itsongfaen, kuyae si ba tsitsa risu rikwen na Ararat. 5Ambyi wu wom si skuu, ka kwer ti ishaen ti rijwe. Usir ti tawe ana ishaen ti rijwe, risu rikwen mbagta ku nae ise.
6Isim usir mae ifaen, Nuhu mbubta riye kuyae wu, 7u tom rirang kinjo ruye. Awu kafe ba-wu be, u ku pinn ku kyang, se ti ambyi wom tag riben. 8Ama Nuhu tom kyi kukwae iki ruye, ti wu na ka nung ko ambyi na wom pu yi riben. 9Kukwae wu tu-wu uwog ti awu u pu afxen tsi atang be, ikyaen ti, ambyi ku pang riben ti atang. Awu kafe ru ka tu Nuhu uwae kuyae. Nuhu ye ra wu kafe sang ti uwae kuyae. 10Awu som usir itsongfaen, u tom kukwae wu ru kyi cwucwo. 11Ureb usir wu, kukwae wu kafe ba ti kutsing kutuku olifi tirisub unju-wu. Tiri Nuhu nungye baa, ambyi na wom pu yi utense. 12Awu som ka kyi usir itsongfaen cwucwo, u tom kyi kukwae wu ruye, ama kiye wune, awu kafe ba-wu cwucwo be.
13Usir ti tawe na ishaen ti kinjo na asang ti ukob itsongnjo ti kinjo (601) na Nuhu, ambyi wom tag pu yi utense. Nuhu mbub ra ufu kuyae wu ama u sae ambyi wom tag pu yi riben. 14Usir ti rikom-asu itsongfaen na ishaen ti ifaen, riben wom tag pu wu meme. 15Rimam ri te Nuhu baa, 16“Ni ruye-ni uwae kuyae tiri, afu ti uwa-fu ti anyisu-fu ti awa-ba. 17Pu ruye meme iken ti site unyang, ti ta te fu, inung ti ibye ti itso iken ti ku kyang riben meme, ti ayi ā ru ka mbae jwunn, u jwunn kyi utense.” 18Nuhu ruye uwae kuyae, awu ti uwa-wu, ti anyisu-wu ti awa-ba. 19Meme iken ti site unyang, ti itso iken ti ku kyang riben, ti inung, ruye uwae kuyae ti itso-yi.
20Uwog wune, Nuhu mbye kuta ikentitwen na Yaweh, u ye ibye iki ti sisaen fa ti inung iki ti sisaen, u pu twen ikentitwen atang na Yaweh. 21Ti Yaweh fxen kuyang ikentitwen yine, awu ri yi utob-wu baa, “Ame u fwag-m riben kufwag ikyaen ande cwucwo be, ko ti ira ti kab ande munn te ira titibi ti kiye ti aba si anyisu tinying. Ame u twenji-m utense fa ti meme iken ti site unyang, pangma ti ame nde ne cwucwo be.
22Tsi tine,
ru ka sang ricwunnkyi utense,
kiye na ritom ti kiye itibunn,
kiye upaen ti kiye kuwum,
ishaen usen ti ishaen ufam,
usir ti utitang, u be-yi be be.”
Currently Selected:
Kucangtsi 8: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
