Kucangtsi 7
7
Rimam Twenji Utense te Ambyi
1Yaweh ri te Nuhu baa, “Sang uwae kuyae, afu ti ishikununn-fu, ikyaen imi, ame nung, afu amam ti si unde ti kubenti uwae ande ti ta utense tine. 2Pu ibye ti sisaen ifaen-ifaen atsepu itsongfaen, tishir ti tiyae. Ye ayi ti ajib ifaen-ifaen, ti urom te ti unda. 3Ye inung ifaen-ifaen, ka atsepu itsongfaen ama, itishir ti itiyae, ikyaen ti ayi ā ba mbae jwunn uwae utense. 4Isim usir itsongfaen ti ku ba uwe ne, ame u sa upwen tsa usir mae ifaen ti utitang mae ifaen, u twenji meme iken ti site unyang ti ame kyae.” 5Ama, Nuhu nde meme iken ti Yaweh ri.
6Nuhu site asang ukob itsongnjo kiye ti ambyi munnkyi utense. 7Nuhu ti uwa-wu, ti anyisu-wu ti awa-ba, sang uwae kuyae, ti a u ter nwang ambyi ti u ba munnkyi utense wune. 8Itso ibye, itisaen, ti iti ajib, ti inung, ti meme iken ti ku kun riben, ti meme iken ti Rimam kyae, ti ku kyang riben meme, 9tí ifaen tí ifaen, itishir ti itiyae, ba tu Nuhu. Awu pu yi sang uwae kuyae pangma ti Rimam ri te wu. 10Ti usir itsongfaen nde pu yi, upwen tsa tsa tsa, ambyi munnkyi utense.
11Uwae asang ti fa ti ukob itsongnjo (600) na Nuhu, usir ti rijwe asu itsongfaen na ishaen ti ifaen, usir wune si usir ti isatsub kyeb tsoye ko aka, ufu ambyi ti apupwen patag mbubta. 12Upwen kum kum kum, usir mae ifaen ti utitang mae ifaen. 13Tí usir wu, Nuhu ti anyisu-wu, Shem ti Ham ti Jafeti ti uwa-wu fa ti awa anyisu-wu, sang uwae kuyae. 14Ibye kutur ti itso-yi, asinn ti itso-yi, iken ti ku kun riben ti itso-yi, inung ti apupwen ti itso-yi, aba pu yi sang tag te ijwe-ba uwae kuyae atang. 15Patag itso iken ti site unyang ba ti ifaen-ifaen, ama Nuhu pu yi sang uwae kuyae. 16Ayi ti sang si itishir ti itiyae ti itsotso ti site unyang, pangma ti Rimam ri te Nuhu. Ama Yaweh cwunnkyi ufu kuyae wu.
17Ambyi munnkyi utense ka usir mae ifaen. Ayi munn ku tso, munn ku tso ama u su ra kuyae wu tso fife yi apupwen. 18Ambyi munn, u kyebkyi utense, kuyae ku kyang yinn yinn risu ambyi. 19Ambyi yi munnkyi kwer ti meme rikwen ti tso siskeb uwae utense. 20Rurong na ambyi ti munn nyatsa utaen rikwen yi si kutun-kujwo rijwe asu itsong. 21Meme iken ti site unyang ti ta uwae utense cwu tag, inung, asinn, ibye kutur, ti akako iken ti site unyang meme, fa ti ande, cwu tag. 22Patag iken ti ku kyang riben, ti ku nyang unyang ruwen, cwu tag. 23Rimam fen tag meme iken ti site unyang ti ku kyang riben uwae utense, ibye ti ande, fa ti inung ti apupwen meme. Nuhu amam ti tsi ti unyang, ti aba ti ta te wu uwae kuyae. 24Ambyi munnkyi utense ka usir ukob kinjo ti mae ifaen mbe rijwe (150).
Currently Selected:
Kucangtsi 7: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
