Kucangtsi 19

Itibi Ande ti Sodom

1Atom ti apupwen ifaen bane ka sang uka ti Sodom kiye ti usir kujwo ureb. Kiye wu, Loti som rishen fer ufu ti ku sang uwae uten. Ti awu nungye atom bane, awu faa sunwunn u ka tu ba, ama u si ku riben uwe-ba. 2Loti ri baa, “Itsekuru-m, ani a cwe, ni ka jwo afxen-ni kununn-m, ti ni cwag atang utitang ne. Ucwe a fam pu wu, ni ru-ni ikyin-ni.” Ande ba ri baa, “Iyee, ati u nae tí rishen ike utitang ne.”

3Ama Loti jwam sha ba, aba cwe u ka sang kununn-wu. Awu fxab buredi, ama u nde na ba ukwab, ama aba ci u ngwa.

4Tí kiye ti Loti ti rikyen-wu sang-ba kicwag khika be, meme ande ti Sodom, anyisu itaen ti andufu meme ba sangkob kununn Loti. 5Aba kunn Loti, u rang wu baa, “Ande ba ti sang rikyen uwog-fu ureb ne ta aka? Pu ba ruye na ti, ti ti nae te ba.”

6Loti ruye u cwunnkyi ufu, ama u ka tu ande ba. 7Awu ri te ba baa, “Iyee, ameinja-m, ni nde-ni itso ikentitibi ne be! 8Nung! Ame site anyisu anda ifaen ti nung-ba urom khika be. Ame u pu ba na ni, ti ani ā nde iken ti nyang uwae-ni te ba. Ni nde-ni iken iki te ande bane be, ikyaen ti, aba si rikyen-m, ame u kyir kang ba.”

9Ande ba taen Loti ira baa, “Ko ru ru ike.” Aba ri tetso baa, “Unde wune si rikyen, ama ku sha ti wu u pwen ti rikwén!” Ama aba ri te Loti baa, “Ati u nde te fu beb skeb ana-ba fa.” Aba taenshi Loti, u kwab ti a u rug mbub ufu kusog wu. 10Ama rikyen ifaen ba ti ta uwae kusog wu, sa kujwo ruye u shir Loti kafe sang ti uwae, ama cwunnkyi ufu. 11Ama aba nda kufub sikyi ande ba ti tsi ufu kusog atang ne ayib, anyisu itaen ti andufu. Meme-ba ayib-ba mbubkyi, a raen raen raen, u raen num ufu kusog wu.

Rimam Nwangru Loti u Twenmbub Sodom

12Atom ti apupwen ifaen ba rang Loti baa, “Afu site ande iki ike a. Ko ayeb-fu, anyisu ti arom ko ti anda, ko unde iki uwae uten wune ti si ure-fu a. Pu ba ruye. 13Ikyaen ti, ati u twenji uten wune. Ira ti jwub risu itibi ande ti uten wu ko pu yi uwe Yaweh, ama awu tom ti ba ti ti na ba twen mbub wu.”

14Ama Loti ka ri te ayeb-wu, aba ti ye isam te anyisu-wu ti anda. Awu ri te ba baa, “Ni nwunn ti kufe ti ni ruye uwae uten ike bē, Yaweh sa tsi pu wu ti wu na u twen mbub uten wune.” Amaa, ayeb-wu sa yi ma ira ti uru.

15Ti ucwefam kiskinn, atom ifaen bane kunn tu Loti baa, “Nwunn ti kufe ti pu uwa-fu ti anyisu-fu ti anda ifaen ti ta te fu, ti ni ruye ti ritsen, be, ani u twenji uwae rikwén ti ku ba risu uten wune.” 16Amaa Loti tsi ku nde kukyib, ama ande bane ye wu ti kujwo, awu ti uwa-wu, ti anyisu-wu ti anda ifaen, u tae ba ruye uwae uten atang, ikyaen ti Yaweh nung risi-ba. 17Kiye ti atom ti apupwen ba tae ba ruye, kinjo uwae atom ba ri baa, “Ni ter nwang unyang-ni! Ni sae-ni ayib isim be, ti ni tsi-ni tsi uwog iki be. Ni ter ru yi rikwen, be, ani u twenji.”

18Ama Loti jwam ba baa, “Iyee, abitse-m, 19ame tu kutxuwe titinyang uwe-ni, ani tso m itinyang-ni, u ya m ta ti unyang. Amaa, rikwèn wu rwen skeb pu wu ame, ame u ter kaa sang-m atang be, ira titibi yi u tu m, ama ame u twenji. 20Nung umbae uten ti ta akwen ne. Afu a cwe, ame u ter ru yi atang, awu rwen-wu rwen be, ti ame u nwangru.”

21Atom wu cwe u ri baa, “Ame cwe pu m itijwam-fu, ame u twen mbub-m umbae uten wu ti afu ku ri ne be. 22Ter ru yi atang ti kufe! Ame u nde-m iken iki be, se ti afu a ka pu fu atang.” (Ayine si iken ti nde a ku kunn uten wu ba Zowar ti imbyi-yi baa, “Uwog ti ko-wu be.”) 23Loti ter ru ka sang Zowar kiye ti usir pur tso ti kiskinn. 24Ama Yaweh yaen uvum urwa si Sodom ti Gomora, u yaen akyaen urwa ti yag skween si apupwen ba. 25Awu twen mbub uten uten yine, ti meme iken ti ku nyang unyang ti ta uwae uten uten yi, fa ti irum, ti shab tso uwae-yi meme. 26Ama uwa Loti kafe ayib sae isim, u kafe kutxom rinwaen, u gbugtsi.

27Ti ucwefam kiskinn, Ibrahim nwunn u ru ka tsi ti uwog ti awu tsi atang ti Yaweh kucang. 28Awu sae ayib si uwe ti Sodom, ti Gomora, ti meme kubxab na Yordan, ama awu sae, u nung akyang ku tso uten atang cwurr pangma urwa ti ku twen kutur. 29Kiye ti Rimam twen mbub uten uten ti ta uwae kubxab wu, awu tangsom ti Ibrahim, ama u sa ruye Loti uwae ititwenji na uten uten yi uwog ti Loti som atang ne.

Iken ti Loti ti Anyisu-wu ti Anda Nde

30Isim ayine, ikyaen ikyenricwu, Loti ti anyisu-wu ti anda ifaen bane, nwunn Zowar u tso ka nae fifae rikwen. 31Usir iki, umbae-wu ti ndufu ri te ti tinying baa, “Itse-ti kyáen pu wu, ama unde ti urom iki ta-wu ti wu u mbe ti pangma ti ande ku nde ko aka uwae utense be. 32Ba ti ti nda itse-ti ambyi anam, ti awu a ngwa kyaen pu wu, ama ati u nae te wu, ti ti tu utso ruye uwog itse-ti, be utso-ti u twenji.” 33Utitang wu, aba nda itse-ba ngwa kyaen ambyi anam. Ama umbae-wu ti ndufu sang ka nae te wu. Loti nung-wu kiye ti awu sang ba nae te wu u nwunn be.

34Ucwe fam-yi, umbae ti ndufu ri te ti kitinying baa, “Utitang ire ame nae te pu m itse-m, ti nda kyi wu ambyi anam ureb yaka, ti fu sang ka nae te wu ama, ti ti tu utso ruye ijwe itse-ti.” 35Ikyaen yine aba nda itse-ba ngwa kyaen ambyi anam ureb usir wu, ama ti kitinying wu sang ka nae te itse-wu. Loti nung-wu kiye ti awu sang ba nae te wu ti kiye ti awu nwunn be. 36Ikyaen yine, meme anyisu Loti tu rishwu uwog itse-ba. 37Umbae wu ti ndufu mbae umbae ti urom, u fa rinyi wu baa, Mowab. Awu ti si itse na ande ti Mowab ba sang yaka ne. 38Ti kitinying ama mbae umbae ti urom u fa rinyi-wu baa, Ben-Ami. Awu ti si itse ande ti Amon ba kwer tine.

Currently Selected:

Kucangtsi 19: kubNT

Highlight

Copy