Kucangtsi 18

Ande Ita Sang Rikyen Uwog Ibrahim

1Usir iki ti usir ta utaen, Ibrahim som ufu kufug-wu ti ta fer ituku tiyang na Mamre, ama Yaweh tso risu-wu uwog-wu cwucwo. 2Ibrahim pu ayib tso, u sae ande ita tsi uwe-wu. Ti awu sae ande bane, awu fa sunwunn ti ritsen u ter ru ka jwunn ikyig riben uwe-ba. 3Awu ri baa, “Itsekuru-m, asiti ame a tu kutxuwe titinyang uwe-fu, nyatsa-fu upyi-fu be. 4A txi ra ambyi ba na ni ti ni jwo afxen atang, u pu ra unyang imbyi kutuku ike titawe. 5Tine ti ani ru tsa pu ni uwog-m ike, ame u nde ra wuci na ni ti ni ci, u tu kpakang titawe ti ni ru.” Ande ba cwe u ri baa, “Nde iken ti afu ri.”

6Ibrahim nwunn ti ritsen u sang ka tu Saratu uwae ufug, u ri te wu baa, “Myae umung kitu ita ti nde wuci ti kufe.” 7Awu ama nwunn u sang uwae rukug asinn-wu, u ka ye imbae indag ti rikem na upyi-wu iki ti wu na nde ti kufe. 8Ama awu sa yoguti, ti akang abyaen indag, ti ibye ti a to tag pu ba, ba na ande ba. Ti aba ku ci wuci ne, awu tsi fifer ti imbyi kutuku atang.

Ira Risu Itimbae Ishaku

9Ande ba rang wu baa, “Uwa-fu Saratu ta aka?” Awu ri baa, “Awu ta uwae ufug akwen.”

10Ama Yaweh ri baa, “Kubenti, pangma kiye wune uwae usang ti ku ba, ame u kafe ba kyi uwog-fu. Saratu, uwa-fu u mbae umbae ti urom.” Kiye wu, Saratu ta uwae kufug ti ta isim unde wu, ku fxen ira ti aba ku ri. 11Kiye wune, Ibrahim ti Saratu kyáen tag pu ba, aba site asang yang-yi akwen. Saratu ama nyatsa pu wu kiye ti awu u mbae umbae. 12Ti Saratu fxen ira-ba yine, awu skaen ikyaen ama u ri te ijwe-wu baa, “Ti ame kyáen tag pu m, unde ti kununn-m ama kyáen tag pu wu ne, imi ti u nyang kyi cwucwo?” 13Ama Yaweh rang Ibrahim baa, “Imi ti nde Saratu skaen ikyaen u ri baa, ‘Ame u mbae kyi umbae ti ame kyáen tag pu m ne a.’ 14Iken iki ta atang ti kpag skeb Yaweh skeb a. Ame u kafe ba kiye wune, kusang ti ku ba. Saratu, uwa-fu, u mbae umbae ti urom.” 15Ikyenricwu ye Saratu, ama awu yer rifen baa, “Ame skaen-m ikyaen be.” Ama Yaweh ri baa, “Iyee, afu skaen ikyaen.”

16Ti ande ba nwunn ku ru, aba ka tsi uwog ti aba u sae Sodom. Ibrahim ama putsa ba ti wu pu ba ru ka tsita. 17Yaweh ri baa, “Ame u tam Ibrahim iken ti ame sa tsi ti m u nde njwaa? 18Ame nung pu m baa, rishi Ibrahim na u ba jwúnn timambe, ama ambukwen ande utense meme u ba tu itinyang uwog-ba. 19Iyee, ame tsab pu m awu ti wu na tae anyisu-wu, ti rishi-wu ti ku ba isim-wu yi fengo-m, u nde iken ti pang atang, ti iken ti kubenti, ikyaen ti, ame Yaweh u kumunn unju ti yer-m te Ibrahim.”

20Yaweh ri baa, “Ira ti jwub risu itibi Sodom, ti Gomora ko pu yi, ikentitibi-ba ayi beb timambe. 21Ame u si kaa nung, ko ikentitibi uten wu si pangma ti ame fxen. Asiti ande ba a beb pangma ti ame fxen, ame u nung.”

22Ama ande ba kafe ku ru yi uwog ti Sodom, Ibrahim ama tsi ti uwe Yaweh atang. 23Ama Ibrahim ko fer wu, u rang baa, “Itsekuru, afu u fen mbeb ande ti kubenti ren fa ti ande titibi a. 24Asiti ande mae ifaen mbe rijwe a ta uwae uten atang, afu u twenji uten wu a. Afu u yata na-fu aba ikyaen ande mae ifaen mbe rijwe ti som usom ti kubenti bane be a. 25Itso itibi yine ā tsi rurwen te fu, ti afu u wenji ande ti som usom ti kubenti fa ti aba ti itibi, ti afu u nde te ande ti som usom ti kubenti pangma ti afu u nde te ande titibi. Ira titibi yine ā tsi rurwen te fu! Afu unde ti ku pwen utense rikwén, afu u nde-fu kubenti be a.”

26Ama Yaweh ri baa, “Asiti ame a tu ande mae ifaen mbe rijwe ti som usom ti kubenti uwae uten ti Sodom, ame u yata na meme uten wu ikyaen-ba.” 27Ibrahim ri baa, “Itsekuru, yata na m, ti fu nda kyi m riyae ti m u ri kyi ira te fu, ikyaen ti, ame si-m iken iki be, ame si unde amam. 28Asiti afu a tu ande mae ifaen mbe itsong atang re, afu u twenji uten wu a.” Awu ri baa, “Iyee, ame a tu ande mae ifaen mbe itsong atang, ame u twenji-m uten wu be.”

29Cwucwo, Ibrahim rang baa, “Asiti aba a si nyáng ande mae ifaen re?” Awu ri baa, “Ikyaen ande mae ifaen ti som usom ti kubenti, ame u twenji-m uten wu be.”

30Ibrahim jwam baa, “Itsekuru ā ndembeb-wu utob be, ame u ri kyi ira. Asiti afu a tu ande rijweta amam re.” Awu ri baa, “Ame u twenji-m uten wu be, asiti ame a tu ande rijweta atang.”

31Ibrahim ri baa, “Itsekuru, ame ko-m ti m tsi uwe-fu, u ri ira be. Ama afu a tu ande rikom amam re?” Awu ri baa, “Ikyaen ande rikom ti som usom ti kubenti, ame u twen mbub-m uten wu be.”

32Ibrahim ri baa, “Itsekuru ā ndembeb-wu utob be. Ame u ri ira ti ricwunnkyi. Afu a tu nyáng ande rijwe atang amam re?” Awu ri baa, “Ikyaen ande rijwe ti som usom ti kubenti, ame u twen mbub-m uten wu be.” 33Kiye ti Yaweh tsag tag akaen te Ibrahim, awu ye ikyin ru-wu. Ibrahim ama kafe ru yi kununn.

Currently Selected:

Kucangtsi 18: kubNT

Highlight

Copy