aMarkus 14

Áko̱k kasho̱o̱n nye ibo̱ro̱ng kufe̱r aYeso

(aMat 26.1-5; aLuk 22.1-2; aYoh 11.45-53)

1To̱, a tú won inom ifa ne a nye Riye̱ Rikan aPasova #14.1: aPasova: fa: Akanang Ike̱re̱ Ikak, kaye̱e̱r nafarap'e nakak. ne izen Kuya aBiredi Dar Ayisti, ágbang atsi ne áner kubo̱so̱p Itsi se be kutse̱r iren á tana yiir aYeso be ritseng nong á tu ku fe̱r. 2Amma yong á fe̱ ye, “Amma sang nizen riye̱ rikan na baꞌ, fan ánerawe bin dorok natoon yir be kuren.”

Abining akak na aBetani korok aYeso name rice

(aMat 26.6-13; aYoh 12.1-8)

3Nizen iya aYeso ta se na aBetani nasa aner akak a tú ku yis ye, aSiman a tá nye akparo̱ng. aYeso tá se be iya naya azong ne abining akak be̱ nufu be kudu name, a tá nye be awan atsip ike̱ng ikak a tá yis ye anad,#14.3: anad: fa: Akanang Ike̱re̱ Ikak, kaye̱e̱r nafarap'e nakak. na ta be ikon itek dide̱ng ne na be itso̱m dide̱ng. A nye kudu'me be ata a ta yis ye alabasta. Ayong a fo kudu ame nong a tá korok aYeso name ame rice.

4Áner akak aya a tá se azong tá di anong ne aye̱ ba beseng yong á fe̱ ye, “Kamok akye̱ a beseng name ana e̱? 5A fa re̱p ke a ti se̱ itso̱m i ta gor itso̱m kuwoso alebura kuko̱s iso̱k inyak iso̱k itaar, nong a ta no̱o̱k afe rizor, ke i nar.” Iyong á zhe̱e̱r abining ame dide̱ng.

6Amma aYeso fe̱ be ba ye, “Ku won yin kyo̱o̱n, kamok akye̱ yin tú daam yin e̱? A min nye ike̱ng itek dide̱ng. 7Áfe rizor se mak be yin ye̱r ye̱r, koakye izen ne yin shim yin, yin tú ku nye yin ba ritek, amma mi se be yin ye̱r ye̱r baꞌ. 8A nye ike̱ng ife wu tana kyem a nye. A ti korok name nuro̱m nakuruk nong tin tor izen kune̱r mi. 9Katsak ne mi ta ka tak yin, koake̱ ne a taas Rife̱ Ritek na kaye̱e̱r kazatse na'me, a ta yiir fe̱ itak abining na nong a tin yiring be wu.”

aYahuda shim a tá no̱o̱k aYeso

(aMat 26.14-16; aLuk 22.3-6)

10Ayong aYahuza Iskariyot, azining kaye̱e̱r kuso̱k be afa ame tseng nufe ágbang atsi nong a tá su ku no̱o̱k ba aYeso. 11Á tá fa fok anong yong á nye riye̱ rikan, yong á ti sak ye ba tu ku no̱o̱k itso̱m. Ayong aYahuda tse̱r iren a tana no̱o̱k aYeso ame.

Azhibi Agwo̱m Ágwo̱m

(aMat 26.17-25; aLuk 22.7-14, 21-23; aYoh 13.21-30)

12Katuk ime̱se̱ng, katuk kunye Riye̱ Rikan kuya aBiredi Dar Ayisti, i tá nye izen kunye asidaka be itsamang nong a tà yiring be izen aPasova, yong álimazhiri aYeso tú ku rip ye, “Ake̱ ne wan shim ta se ka nye yir karo̱ kuya abiredi afuan e̱?”

13Ayong aYeso'me tom álimazhiri wu afa, ne a fe̱ be ba ye, “Tseng yin kaye̱e̱r kuwo̱p, yin tà nyim yin be aner akak a tan cer ashi nafeneng, ku kuus yin. 14Kasa kaya ne aner'e tù ku no̱, no̱ yin azong nong ta fe̱ yin be atekasa'me ye, ‘Aner Kubo̱so̱p nye fe̱ ye, karo̱ wu tana kunye riye̱ rikan aPasova mak be álimazhiri wu se ake̱ e̱?’ 15A ta ka tonong yin agbang kutu kaza kaya a tan nye gye̱r. Azong ne yin ta nye yin kanye̱k naya'me.”

16Ayong álimazhiri ame dorok nong a tá no̱ kaye̱e̱r kuwo̱p'e, ne á se se̱ ike̱re̱'me cice̱r kyo̱ndi aYeso tá tsang a ku tak ba. Ayong á nye kanye̱k naya ame.

17Kawheshirim tá fa nye aYeso tseng be álimazhiri wu kuso̱k be afa azong. 18Nizen á ta se ba be iya naya'me ne aYeso fe̱ be ba ye, “Katsak ne mi ta ka tak yin, azining kaye̱e̱r yin tin sok a ta no̱o̱k, ákak kaye̱e̱r yin áfe i ta sen yas yin mak be mi.”

19Iyong álimazhiri ame nye riye̱ riwe ne á kpaan i ku risim azizirik ye, “Ka mi e̱?”

20Ne aYeso fe̱ be ba ye, “Azining kaye̱e̱r yin kuso̱k be fa na, aner aya yir ta sen ya yir kaye̱e̱r kures kuzining. 21Igon Anerawe tà ku, kyo̱ndi a tá zibir natoon wu. Amma awo̱ tsek be aner aya a tana sok Igon Anerawe nong a ta no̱o̱k. Aner na a fa ku tes baꞌ, ke i tu nar.”

Azhibi Agwo̱m Ágwo̱m kamok ázhe̱l'e

(aMat 26.26-30; aLuk 22.15-20; 1 aKor 11.23-26)

22Nizen iya á ta sen ya naya'me, aYeso sok abiredi ame nong a tin nye aduwa, ne a te̱se̱ng, a tá no̱o̱k álimazhiri wu, ne a fe̱ ye, “Inga yin, iyuna ne i nye kuro̱m mi.”

23Nama anong ne a sok ako̱p ashi anap'e nong a tin nye aduwa, ne a no̱o̱k álimazhiri wu'me ne á so̱ cice̱r ba. 24Ne a fe̱ be ba ye, “Iyu ne i nye naso̱k mi. Naso̱k kushining kushu kufas. A ta nyosong kamok ánerawe whe̱re̱. 25Mi ta ka tak yin katsak, mi ta ba so̱ ashi anap na baba baꞌ, ma katuk afe mi tana so̱ afas kaye̱e̱r rigwo̱m Adakunom.”

26Nama aYeso be alimazhiri wu tá fa bom abom, ne a wuruk nong á tá tseng natoon Kawhanang Nafar.

aYeso nye kuzarap ye aBitrus tú ku ton

(aMat 26.31-35; aLuk 22.31-34; aYoh 13.36-38)

27aYeso fe̱ be álimazhiri wu ye, “Cice̱r yin, yin ta teng yin nong tin won yin, kamok i se ni izibir ye,

“ ‘Mi tà fe̱r afek itsamang'e,

nong itsamang'e tà te shaam.’

28“Amma nama ke mi dorok, mi tà ka tsang yin na aGalili.”

29Ayong aBitrus fe̱ be wu ye, “Ko áro̱ teng cice̱r, mi tà teng baꞌ.”

30Amma aYeso fe̱ be wu ye, “Katsak ne mi ta ka tak, katuur natuk, nizham atso̱n ta ra te̱p kutak kufa, wan tin ton kutak kutaar.”

31Amma aBitrus yiir ife̱'me ne a toos'e ye, “Ko a tin fe̱r mak be wan, mi tà ka ton baꞌ.”

Ribir álimazhiri wu'me fe̱ anong gip.

aYeso nye aduwa na aGetsemani

(aMat 26.36-46; aLuk 22.39-46)

32Á tseng ba naro̱ kakak a tá yis ye, aGetsemani, yong aYeso fe̱ be álimazhiri wu ye, “Sonong yin aze. Mi shim ta se nye aduwa.” 33Ayong a sok aBitrus be aYakub ne aYohana mak be wu. A tá ra ku sor cie̱k ne aYeso san kudaam dide̱ng kaye̱e̱r riye̱ ne a nye riye̱ riwe. 34Ayong a fe̱ be álimazhiri wu'me ye, “Riye̱ riwe ri tase kaye̱e̱r riye̱ mi sak ma mi fok ye mi ta ku. Sor yin aze ne i sak yin riye̱.”

35A tá fa rak kusees cie̱k, ne a tigbok akuur a tá te akace nong a tá nye aduwa ye, ke i ta se gye̱r, ne a ku sok izen risam'me. 36Ne aYeso nye aduwa ye, “Abba, #14.36: Abba: Iyu se nirem áner Aramiya, i ta sor “Ada”. Ada, wan kyem i nye koakye ike̱ng. Sok ako̱p risam na. To̱, nye ike̱ng iya wan ta shim sang iya mi ta shim baꞌ.”

37Ayong a bun a tú ku bun nufe álimazhiri wu ataar ame, a sú ku se̱ ba nida. Iyong fe̱ be aBitrus ye, “aBitrus, wan se be ida wa? Aser, wan ta kyem i sor dar ida nizen cie̱k aꞌa?” 38Ayong aYeso fe̱ be ba ye “Sak yin riye̱, nye yin aduwa fan yin bu kpas yin kaye̱e̱r kubo̱mo̱ng. Katsak'e, riye̱ shim kunye'me amma kuro̱m gaar.”

39A bun a tú bun gbak nong a ta se nye aduwa'me kyo̱ndi a tá nye ni ime̱se̱ng'e. 40Nizen iya aYeso tá bun a be̱, a bun a tu ku se̱ ba nida gbak, kamok anyisi ba tsang a te zi be ida. Á ren ike̱ng iya ba tana fe̱ be wu baꞌ. 41Ayong aYeso tseng a tá bun a be̱ ife ataar, ne a fe̱ be ba ye, “Yin bun i rusek yin nida ne i sen i song yin a? I kyem anong izen n nye, di yin án no̱o̱k Igon Anerawe nubo̱k áfe rine̱n. 42Dorok! Yin nong ta tseng yir! Aner aya a tá sok a ta no̱o̱k'e na an be̱!”

A yiir aYeso

(aMat 26.47-56; aLuk 22.47-53; aYoh 18.3-12)

43Nizen iya aYeso ta sen fe̱ anong ne aYahuza, azining kaye̱e̱r álimazhiri wu kuso̱k be afa ame, be̱ mak be ánerawe whe̱re̱ be ike̱re̱ kuren ne íshe̱n be áwe̱n itsor. Áya agbang átsi ne áner kubo̱so̱p Itsi ne áko̱k kasho̱o̱n ne á tú ku tom ba.

44aYahuda aner a tá no̱o̱k aYeso ame tsang a ni sak be ba ye, “Aner aya ne yin di yin mi tu ku kunung ne a nye aner'e. Ku yiir yin nong ta tseng yin be wu.” 45Kum aYahuza tá fa be̱ nufe aYeso ne a fe̱ be wu ye, “Aner Kubo̱so̱p.” Ne a ku kunung. 46Ayong áner ame yiir aYeso nong á tú ku rosom. 47Amma azining kaye̱e̱r álimazhiri aYeso'me aya a ta se nyeseng bubarak azong, tun awe̱n itsor wu nong a tin tse̱r kuto asam agbang atsi akak ma a te̱n. 48aYeso fe̱ be ba ye, “Mi nye akpatang yin tá be̱ yin be ítsor ne íshe̱n nong tin yiir yin a? 49Koakye kunom mi se mak be yin, ne i bo̱so̱p ánerawe'me kaye̱e̱r kubang kutu kuya Adakunom iben, yin ti yiir yin baꞌ. I be kudaam baꞌ. Amma a nye anong, nong a tá shining ike̱ng iya rife̱ Adakunom tá fe̱ dim.”

50Ayong álimazhiri'me cice̱r teng nong á tú ku won.

51Acam akak, tú se kaye̱e̱r áya a tá sen kuus aYeso, a be kukpiin baꞌ, a be awan ike̱ng ku naka kis tsek. Á tá tsek á tú ku yiir, 52yong a teng ica'me nong a tá won ike̱ng ku naka kis wu ame.

aYeso nasho̱o̱n kusonong áko̱k kasho̱o̱n aner Isarela

(aMat 26.57-68; aLuk 22.54-55, 63-71; aYoh 18.13-14, 19-24)

53A tseng be aYeso nufe ako̱k kasho̱o̱n atsi ne ágbang átsi be ásho̱n ne áner kubo̱so̱p Itsi naka tusung cei. 54aBitrus tsang a ku kuus nama, ma kaye̱e̱r kasa ako̱k kasho̱o̱n atsi'me. A sonong be áfe kutor kasa atsi'me nong a tà fok kuro̱ng.

55Ágbang atsi ame ne áko̱k kasho̱o̱n, á shim ke á se̱ aYeso be rine̱n ike̱ng ikak nong a tú ku fe̱r, a ra ku se̱ be ike̱ng ikak baꞌ. 56Anerawe whe̱r ti bo̱s naborok na aYeso, amma rife̱ ba nyim baꞌ.

57Iyong ákak dorok á bo̱ naborok natoon wu ye, 58“Yir tú ku fok yir a tá fe̱ ye, ‘Mi ta yirik kutu kuya Adakunom iben na anerawe tá no̱k nong tu ku no̱k kukak, kuya ku ta nye rino̱k anerawe baꞌ, kaye̱e̱r inom itaar.’ ” 59Gip be anong'e, kanu ba se kazining baꞌ.

60Ayong agbang atsi ame dorok nong a ta nyeseng nasho̱o̱n ba, a ta tá fe̱ be aYeso ye, “Wan ta fe̱ ike̱ng ikak aꞌa? To̱, ike̱ng iya ba ta fe̱ natoon wan e̱?” 61Amma aYeso sor gbik, a ti sak baꞌ. Ayong ako̱k kasho̱o̱n agbang atsi ame bun a tú ku rip ye, “Iyong wan ne i nye aKiristi Igon Aner Ritek a?”

62aYeso fe̱ be wu ye, “Ei, yin tà di yin Igon Anerawe nusonong nukim kubo̱k riya Aner Kukyem. A ta saase kaye̱e̱r ane̱n natoon kaza.”

63Ayong ako̱k kasho̱o̱n agbang atsi ame sarak ares wu. Ne á fe̱ be ba ye, “Yir bun i tse̱r yir akye̱ nufu e̱?” 64“Yin fok yin kuzhe̱e̱sh a tá zhe̱e̱sh Adakunom! To̱, yong yin di yin ane̱ e̱?”

Ayong ánerawe ame fe̱ ye a ra ku fe̱r. 65Ákak wor á san ku ku tang ace̱ ne á ku rosom anyisi nong a tú ku baas ibo̱k, ne á fe̱ be wu ye, “To̱, ko̱ fe̱, angan ne a tá ka rus!” Áya á tá tor karo̱'me tú ku sok nong á tá su ku tsor.

aBitrus ton'e ye sang wu ren aYeso baꞌ

(aMat 26.69-75; aLuk 22.56-62; aYoh 18.15-18, 25-27)

66Nizen iya aBitrus ta se kaben kaye̱e̱r kubang kasa'me, kanamang kakak, ka tá nye itomong kaye̱e̱r kasa ako̱k kasho̱o̱n agbang atsi'me be̱ azong. 67Ka tá fa di aBitrus ta sen fok kuro̱ng, ne ka ni sak anyisi ni wu. Ka tá fe̱ ye, “Wan se mak be aYeso afu aNazaret gip.”

68Amma aBitrus ton'e ne a fe̱ ye, “Mi ren ike̱ng iya wan tin fe̱ natoon'e baꞌ, so̱. Mi se̱ rikpa rife̱ wan baꞌ, so̱.” Ne a wuruk nanu kubang kasa ame. Ne atso̱n wor a te̱p.

69Kanamang ame tá fa ku di azong ne ka bun ka fe̱ be áner a ta se nyeseng azong ye, “Aner na nye akak kaye̱e̱r ba.” 70Amma aBitrus ton'e gbak, a fa sor cie̱k ne afe a tá nyeseng bubarak fe̱ ye, “Katsak wan nye akak kaye̱e̱r ba, kamok wan nye afu aGalili.”

71Ne aBitrus san i naka fiming ne a ya kushu ye, “Mi ren aner aya yin tin fe̱ yin baꞌ.”

72Kum atso̱n tá fa te̱p ife afa ne aBitrus yiring be rife̱ aYeso tá tsang afe be wu ye, “Atso̱n ta tsang a te̱p baꞌ, ne wan ni ton kutak kutaar,” ne a fo nanak.

Currently Selected:

aMarkus 14: izrNT

Highlight

Copy