aLuka 16

Kumaas natoon afe itomong akak

1aYeso tak álimazhiri wu ye, “Arum akak tuse aya ánerawe tú ku tak ye aner aya a tin sak riye̱ nike̱re̱ wu nye̱e̱n'e kpe̱de̱ng. 2Ayong arum'e yis aner a tin sak riye̱ nike̱re̱'me nong a tú ku rip ye, ‘Akye̱ kuri rife̱ ne mi foos natoon wan e̱? Ni tonong itomong wan tá nye. Wan tà ba ni nye itomong baba baꞌ.’

3“Aner a tin sak riye̱ nike̱re̱ ame to̱ riye̱ wu ye, ‘To̱, mi tà ma nye ane̱ makong e̱? Atekasa mi min ro ni itomong. Sang mi ba be agap tin kap baꞌ. Mi fok isum kutsang nye izong nufe ánerawe. 4Mi ren ike̱ng iya mi tana nye nong ase̱ ke mi dun itomong'i aze, ánerawe tin shan ibo̱k ifa ninasa ba.’

5“Ayong a yis koangan áfe atekasa wu tú ku kuus kuta. Ne a rip afe ime̱se̱ng'e ye, ‘Atekasa mi ta kuus kuta amang e̱?’

6“Ne aner'e fe̱ ye, ‘A ti kuus ágalon name nafar kuso̱k inyak ikara.’ Aner a tin sak riye̱ nike̱re̱ ame fe̱ ye, ‘Inga kufumung na ni zibir gbashak ye i se inyak iso̱k inaas.’

7“Ne a rip afe afa ye, ‘Wan ne e̱? Amang ne a ta kuus e̱?’

“Ayong a fe̱ ye, ‘Ágbuhu alikama izungu izining.’

“Ayong a fe̱ be wu ye, ‘Inga kufumung na ni zibir ye i se iso̱k inyak ikara.’

8“Atekasa'me kerek aner a tin sak riye̱ nike̱re̱ ame afe sang a ta be katsak ame baꞌ, kamok a tá nye ritse̱ng. Kamok ánerawe kazatse na se tse̱ng tse̱ng ninye ike̱ng ba be áfe a ta se kyo̱ndi ba ne a nar áfe a ta se na akanang. 9Mi tà ka tak yin ye i rin nye yin itomong be kurum kazatse nong tin se̱ yin áferime̱, nong ase̱ ke kurum'e gang, a tà ka shan yin naro̱ kafe izen izen.

10“Koangan ne a nye katsak nike̱ng ihiir'e, a tà kyem a nye katsak nigbang'e gip. Koangan ne a nye katsak nike̱ng ihiir'e baꞌ, a tà nye katsak nigbang'e gip baꞌ. 11Kamok anong, ke yin nye yin katsak nike̱ng kazatse na baꞌ, angan ne a tà ka no̱o̱k yin kurum kufe katsak nong tin sak yin riye̱ e̱? 12Ke yin nye yin katsak nike̱re̱ akak baꞌ, angan tá ka no̱o̱k yin ike̱re̱ ife yin e̱?

13“Akak ta kyem a nye atek kasa afa itomong baꞌ. A ta shim akak ne a rawu akak, ka ne a tiyiik akak ne a zhe̱e̱sh akak. Wan ta kyem i nye Adakunom ne Itso̱m itomong nizen izining baꞌ.”

Rife̱ rikak aYeso tá fe̱

(aMat 11.12-13; 5.31-32; aMar 10.11-12)

14Áner aFarisi á ta shim itso̱m dide̱ng tá fa fok anong, ne á ni ko̱k acoop na aYeso. 15aYeso fe̱ be ba ye, “Yin ne i shim yin ánerawe ta ka di yin ye yin nye yin áner katsak, amma Adakunom ren aye̱ yin. Ike̱re̱ ánerawe ta di yiik i se fe̱re̱ nufe Adakunom.”

Kubo̱so̱p a tin barang

16“A taas ánerawe Itsi aMusa ne rife̱ áner kuzarap Adakunom agbugbang'e ma nizen aYohana aner abatisma. Amma kum a ta taas Rife̱ Ritek natoon rigwo̱m Adakunom, koangan gaas karo̱ nong a ta no̱ kaye̱e̱r'e. 17I ta se we̱e̱r we̱e̱r kaza be kaben tana gang, amma ko kaban ike̱ng ikak ihiir'e kaye̱e̱r afumung Itsi na tà wei baꞌ.

aYeso fe̱ itak ikam kuwe̱ne̱ng

(aMat 19.1-12; aMar 10.11-12)

18“Koangan ne a kam be abining wu nong a ta sok akak, i nye ye a nye rikuna be abining'e. Aner aya ne a sok abining aya a tá kam be amitek wu, i nye ye a nye rikuna.”

Arum akak ne aLazarus

19“Arum akak tuse afe a tá tes ares atek afe itso̱m, ne a fok kusas kusor ye̱r ye̱r kamok kurum wu tá be. 20Aner akak tuse a tú ku yis ye aLazarus a tá sor nanu kasa arum'e ne a nye izong. A be ifor nuro̱m wu cei. 21A shim ke a ya naya arum'e naya na ta kpas kaben. A se ma ágabu be̱s nong á ta re̱s ifor wu.

22“Katuk kakak aLazarus'e ku, yong ámaleka tú sok nong á tá tseng be wu nufe Ibrahim naro̱ kayiik'e. Arum ame ma ku gip, yong a tú ne̱r. 23Arum'e tseng naro̱ kaya áya a tá kus tú ku tsees, a se no̱ kaye̱e̱r amaan risam azong. A tá fa sok rice naza, ne a di Ibrahim mak be aLazarus gugo̱k be wu. 24Ayong a tá kuto̱ a tá yis ye, ‘Ada Ibrahim, ro̱ riye̱ mi. Tom aLazarus nong a tin te kabanbo̱k wu kaye̱e̱r ashi nong a tà be̱ a tin shu mo kuto̱, kamok mi se na amaan risam kaye̱e̱r kuro̱ng.’

25“Amma Ibrahim fe̱ be wu ye, ‘Igon'i, yiring nizen wan tá se nazatse, wan se̱ ike̱re̱ itek, aLazarus so̱ risam. Kyo̱o̱rna a sen fok kusas kusor aze, ne wan ma sen so̱ amaan risam. 26Nama anong, agbang ribong kuse natite yir be wan, fan áfe a ta shim á ta tar aze nong á ta be̱ nufe yin bu kyem á tar, fan akak bu ne azong nufe yin nong a ta tar nufe yir aze.’

27“Ayong arum ame fe̱ ye, ‘To̱, kusuk mi ta nye izong ada, tom aLazarus nong a tà tseng nasa ada mi, 28kamok mi be ároneng atoon. A ra ka ko̱ro̱k ba kuto fan ba gip á bu be̱ naro̱ amaan risam na.’

29“Iyong Ibrahim fe̱ be wu ye, ‘Ba be áfumung Itsi aMusa be áfe áner kuzarap Adakunom. Á ra foos ike̱ng iya ba tá fe̱.’

30“Ayong arum ame bun a fe̱ ye, ‘Wayo, ada Ibrahim, ke akak kaye̱e̱r áfe a ta n kus tseng nufuba, á tá shishing kuse ba.’

31“Ne Ibrahim fe̱ be wu ye, ‘Ke á kuus Itsi aMusa ne á fok rife̱ áner kuzarap Adakunom baꞌ, ko a fa fe̱ ye akak fa dorok kaye̱e̱r áfe a ta n kus gip, á tin no̱o̱k katsak baꞌ.’ ”

Currently Selected:

aLuka 16: izrNT

Highlight

Copy