2 aTimoti 2
2
aSozha aYeso afe katsak
1Kamok anong, wan igon'i, nyeseng kpa kaye̱e̱r ritek riya ri ta se kaye̱e̱r aYeso Kiristi. 2Cice̱r ike̱re̱ iya wan tá fok nunaan nasho̱o̱n ánerawe whe̱re̱, bo̱so̱p ánerawe áfe a ta be katsak nong ba ta ma kyem a bo̱so̱p ákak'e gip.
3Naka tsesek kaye̱e̱r risam na mak be yir, kyo̱ndi asozha atek afe aYeso Kiristi. 4aSozha akak kuse a ta se kaye̱e̱r itomong a tana bun a te rice wu ni ike̱re̱ kazatse baꞌ, kamok ike̱ng ife asozha ta shim nye a tu kare̱p atekasa wu riye̱. 5Anong ne i se be aner aya a ta se be kuyo̱ro̱k itsi, a ta se̱ ishorong baꞌ, ma ke a kuus ike̱ng iya a tá fe̱ ye a ra nye. 6Anong ne aner ikap aya a ta nye itomong riko̱ wu dide̱ng, ta se̱ naya wu ni ime̱se̱ng'e, nizen'e gip. 7Ni i nye kuto̱ro̱ng natoon ike̱re̱ iya mi ta sen fe̱ be wan kamok Agwo̱m Ágwo̱m tà ka barang mo akanang nong tà ren koakye ike̱ng.
8Yiring be aYeso Kiristi aya a tú ku dorok nure̱k, aya a tá nye aner kasa aDauda kyo̱ndi Rife̱ Ritek riya mi tá taas, tá fe̱. 9Kamok anong ne mi ti so̱ risam na ma a min te nitso̱m gip kyo̱ndi aner aya a tá nye amaan ike̱ng, amma a ta kyem a ta rosom rife̱ Adakunom baꞌ. 10Kamok anong mi tsesek kaye̱e̱r koakye kamok áya Adakunom tá kasa nong ba gip ta ma se̱ kashesh na a ta se̱ kaye̱e̱r aYeso Kiristi ne kuyiik kufe izen izen.
11Rife̱ na nye katsak, rita fe̱ ye,
“Ke yir kus yir mak be wu,
yir tà bun i sor yir mak be wu;
12ke i naka tsesek yir,
yir tà bun i nye yir rigwo̱m mak be wu.
Ke yir ton yir ye sang yir tu ren yir baꞌ,
wu tà ton'e gip ye sang wu ti ren yir gip baꞌ.
13Ke yir be yir katsak baꞌ,
wu tà sor afe katsak
kamok wu tà kyem a ton rice wu baꞌ.”
Aner itomong aya Adakunom ta kasa
14Ya kasho̱o̱n be kuka yiring ba ike̱re̱ na. Ku zhe̱e̱r ba nasho̱o̱n Adakunom ye, á ra won kuya nanan natoon naban azhizhe̱k rife̱. Rife̱ kuri riyong ti barang ike̱ng ikak baꞌ, ma ke ri bu beseng áya a ta foos tsek. 15Nye koakye kuri ike̱ng iya wan tana kyem i nye nong ta tonong ye wan nye aner aya Adakunom tá kasa. Sang tu sor aner itomong aya a ta fok isum baꞌ, ne i bo̱so̱p rife̱ katsak gye̱r. 16Kam be akpe̱de̱ng rife̱, rife̱ kuzhe̱e̱sh Adakunom, kamok kuse kuri kuyong tà tseng be ánerawe kaye̱e̱r kuse kuri kuya Adakunom ta shim baꞌ. 17Kubo̱so̱p ba tà ya kasho̱o̱n kyo̱ndi kufor ku tan te inyo̱o̱r. Kaye̱e̱r áner kuri ayong'e akak nye aHimenayus ne aFiletus, 18áya a tá won iren katsak'e. Ba fe̱ ye izen kudorok ikom nare̱k n gor ma á sak ákak won kuno̱o̱k katsak ba. 19Gip be anong, katsak rife̱ Adakunom'me ri ta nye itsik'e rusek kpa be izibir natoon'e ye, “Adakunom ren áya a ta nye áfu,” be, “Koangan aya a ta fe̱ ye wu nye afe Agwo̱m Ágwo̱m a ra won amaan kunye wu dim.”
20Kaye̱e̱r agbang kasa a sak awan izinariya ne azurfa tsek baꞌ, amma ike̱re̱ a ta nye be ikon ne riro̱p gip. Kamok ike̱re̱'me ikak i nye ife itomong i ta nye ife kuyiik ne ikak nye ife kuyiik baꞌ. 21Ke aner aya a kam be amaan ike̱re̱'ong mi tin fe̱ natoon'e, a ta sor kyo̱ndi ike̱re̱ iya a tin nye itomong iyiik'e, ne a se zhe̱l nong Atekasa wu tin nye itomong be wu. A ta sor be kanye̱k kamok koakye kuri itomong itek.
22Kam be kushim amaan ike̱re̱ kuri ife ricam ne i ni te rice ni itse̱r kusor kuzhe̱l'e, ne kuno̱o̱k katsak be kushim ne kusor caang, mak be áfikuus áfudang wan á ta yis kaye̱e̱r riyerek Adakunom be riye̱ zhe̱l. 23Sang ike̱ng ikak ta ka gung be kuya aduk nanan baꞌ, kamok wan ren anong be̱ be aduk riwo̱ng. 24I se gye̱r aner itomong Agwo̱m Ágwo̱m ta sor aner riwo̱ng baꞌ, a ra se gye̱r be koangan ne a nye aner a tana kyem a bo̱so̱p ánerawe'me sang afe riye̱ rife̱ baꞌ. 25A ra bo̱so̱p áya a ta gaar kubo̱so̱p wu'me whiwhe̱ kamok kashim Adakunom ta ka no̱o̱k ba iren kushishing kuse ba nong á ta ren katsak, 26nong ke á tu ku bun kaye̱e̱r kuto̱ro̱ng ba, ne á se̱ ku wher kaye̱e̱r agunung Amaan Aner, aya a tá tsang a ka yiir mo ba nong á ta kuus kuto̱ro̱ng wu.
Currently Selected:
2 aTimoti 2: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc