2 aTimoti 1
1
Ashou
1Mi aBulus, amanzo aYeso Kiristi, nushim aya Adakunom. Adakunom ti tom nong ta tak itak kutser kuya wu tá tsang a no̱o̱k kuto̱ kaye̱e̱r aYeso Kiristi.
2Wan, aTimoti, igon riye̱ mi.
Ritek be kuro̱ riye̱ ne kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be wan.
Riye̱ rikan ne kutsesek
3Mi be riye̱ rikan be Adakunom aya mi tu ku nye itomong be riye̱ rizining kyo̱ndi átukop'i tu ku nye'me. Katuk be kunom mi nye aduwa ne i yiring be wan ye̱r ye̱r. 4Izen iya ne mi yiring be nanyisi wan ne a ni te ke mi ka di nong ase̱ riye̱ mi ta men. 5Mi yiring be kuri kuno̱o̱k katsak kufe katsak kuya wan ta be, kuri kufe akaka wan aLoyis ne kufe ango̱ wan, aYunis, mi no̱o̱k katsak ye wan be kuri'me gip. 6Kamok anong ne mi bun i ka yiring'e ye i rin nye itomong dide̱ng be kunang kuya Adakunom tá ka no̱o̱k kum nizen mi tin sak kubo̱k ritek natoon wan. 7Kamok kabik kaya Adakunom ti no̱o̱k yir nye kabik kufok inyim baꞌ, amma kafe kukyem ne kushim be kuyiir rice.
8Kamok anong sang tú fok isum kufe̱ itak natoon Agwo̱m Ágwo̱m yir baꞌ, ka isum'i kamok a tin te nitso̱m kamok wu baꞌ. Amma gung rice be mi kaye̱e̱r risam'me kamok Rife̱ Ritek'e ne i ni fereng nukyem Adakunom. 9Wu ne a ti shesh yir ne a ni kasa yir nong ta sor yir kusor kuzhe̱l'e. A ti kasa yir sang kamok yir tá nye yir ike̱ng ikak itek baꞌ, amma kamok ike̱ng ife wu tá shim'ong ne ritek wu. A tin no̱o̱k yir ritek'e kamok aYeso Kiristi nizham a ta ra nye kazatse, 10Amma kyo̱o̱rna a ti tonong yir'e be kube̱ Aner Kashesh yir, aYeso Kiristi. Wu ne a canang riku ne a ni tonong yir kutser kufe izen izen kanang be Rife̱ Ritek.
11Kamok Rife̱ Ritek'e ne Adakunom ti kasa mi nong tá te aner kunye awazi ne i te amanzo ne i te aner kubo̱so̱p ánerawe'me. 12Ike̱ng i ta sak mi ta sen so̱ risam kuri riyuna'ong. Gip be anong mi fok isum baꞌ, kamok mi ren kuri aner aya mi tin no̱o̱k katsak ni wu ne i bun i ren tse̱ng tse̱ng ye a be kukyem kufe a tanin sak riye̱ nike̱ng iya a tin won amana'me ma Katuk'ong.
13Yiir kuri kubo̱so̱p na kufe katsak kuya wan tá fok nunaan, i tu sor ike̱ng wan tanin nye kumaas. Yiring ta sor kaye̱e̱r kuno̱o̱k katsak ne kushim kuya wan ta be kaye̱e̱r aYeso Kiristi. 14Ni sak riye̱ be kubo̱so̱p kufe katsak a tá ka won amana'me. Kabik Kazhe̱l'e a ta se kaye̱e̱r aye̱ yir ta ka se̱ mo nong tin nye itomong.
15Wan ren ye koangan niben Asiya ti kirik kama, ma be aFizhilus ne aHamozhanis gip.
16Won Agwo̱m Ágwo̱m tu ro̱ riye̱ áfekasa aOnesiforus, kamok koakye izen a yiir ni tsesek a fok isum ye mi se nitso̱m baꞌ. 17Amma nizen a tá se na aRom, a ban a tsang a tse̱r karo̱ mi tú ku se̱ ma a ti se̱. 18Mi mok ye Agwo̱m Ágwo̱m ta sak Katuk kayong aOnesiforus ta se̱ ritek nufu. Ei, wan ren tseng tseng kuri itomong iya wu tin nye'me na Afisa.
Currently Selected:
2 aTimoti 1: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc