Rooma 14

Nɔ́ɔ dɔ̀ng zang ɓɔɔ ri dũng doo Laa kɔ ruu kpang

1Zang ɓɔɔ nɛɛ shing danggn doo rɛ̃rɛkɛ, nɔɔ ta wu katɔ ka teteng manɛ. Nɔ́ɔ laa nyaa kaa tɔ̀ɔ́ nɛɛ wu ka ruu vuu ɓɔɔ nɔɔ kasɛ nɛɛ wu palɛ, nɛɛ vuu ɓɔɔ wu kasɛ nɛɛ wu palɛ ɓɛɛ kpang. 2Zang ɓɔɔ danggn shinnang ɓiɓɛ yàá wu gbalang katɔ wu shaa vuu piti, a zang ɓɔɔ shing danggn doo rɛ̃rɛkɛ shaa ɓi sɔ̃ngkɔ kɔ shɛ̃ɛning. 3Zang ɓɔɔ shaa vuu piti keɓe, wu tɔɔ kpang nɛɛ wu ɓa zang ɓɔɔ shaa ɓi sɔ̃ngkɔ keɓe katɔ kpang. Zang ɓɔɔ shaa ɓi sɔ̃ngkɔ, wu ti dɔng zang ɓɔɔ shaa vuu piti ruu kpang, nɛɛ wu palɛ vuu shi kpang tɔ, ka ruu ɓɔɔ, wu bɛ̃ɛ vuu ɓi gbete kpang ɓɛɛ kpang. Ka ruu ɓɔɔ, Laa tá wu ɓi tɔ ɓɛɛ. 4Mɔɔ dɔng zang shonang zang ɓɔɔ ruu kpang. Ɓi dabang gãa ɓiɓɛ kɔ kɔɔ shɛ̃ɛning nɛɛ zang shonang ɓiɓɛ palɛ vuu tɔ̃ɔ. Nɛɛ ti palɛ shi kpang wukɔ kɔɔyi. Shii ditɔ, ka ruu ɓɔɔ, Laa yi wu naa katɔ ka bii wu shiiyi ɓɛɛ.

5Zang ɓɔɔ kɔɔ ɓi nɛɛ, diki keɓe ɓa diki ɓɔɔ nimbang katɔ. Zang ɓɔɔ ti kɔɔ ɓi nɛɛ diki piti ɓi gbete. Zang ɓɔɔ wu rɛ̃rɛ ka yeti ɓiɓɛ waasɛ̃, ka yuu vuu ɓɔɔ wu shing gn nɛɛ tɔ̃ɔ ɓɛɛ. 6Zang ɓɔɔ nɛɛ tɔɔ, diki ɓɔɔ ɓa ɓɔɔ nimbang katɔ, kɔɔ nɔngkɔ, ka ruu ɓɔɔ, kasɛ nɛɛ wu a Laa bannang ɓɛɛ. Zang ɓɔɔ nɛɛ shaa vuu piti, shaa ka Ruu Laa, ka ruu ɓɔɔ zãa Laa katɔ ɓɛɛ. Zang ɓɔɔ nɛɛ bɛ̃ɛ vuu piti shaanang, bɛ̃ɛ ka Ruu Laa, a ti zã̀a wu katɔ. 7Zang ɓɔɔ kagn teteng ɓuru, nwàng nwannang yuu ɓiɓɛ kpang, a ti vɔ vɔrɔ yuu ɓiɓɛ kpang. 8Ruu nɛɛ nwangnɛ, ruu nwàng ɓuru nwannang Laa. A ruu nɛɛ ti vɔrɛ, ruu vɔ ɓuru ka ruu ɓɔɔ tɔ̀ɔ, zang a Laa bannang ɓɛɛ. Naa ruu nwàng doo ningkãari, a naa ruu vɔ doo katɔ, ruu ɓuru zang Laa. 9Ka ruu vuu keɓe kɔ, Kirisi vɔrɛ, a Laa wisi wu paa ningkãari tɔkn, tɔ̀ɔ, wu nwàng kaa Kpanti zang ɓɔɔ ri vɔlɔ tɔ, nɛɛ zang ɓɔɔ ri doo ningkãari ɓɛɛ. 10A mɔɔ dɔng ɓaazung, ɓɔɔ dũng doo Laa kɔ ruu ka ruu viya? A mɔɔ zí ɓaazung, ɓɔɔ dũng Laa kɔ naa vuu ɓɔɔ kpang ka ruu viya? Rùu nandon, ruu naa shii ditɔ ka tĩng Laa, wu dɔng rùu, rúu. 11Naa ɓɔɔ Laa kɔɔ ka yeti labeenang ɓiɓɛ ɓɛɛ tɔɔ,

“ ‘Niizang n kɔɔ nɔɔ, naa wee n nwàng ningkãari dòndòng ɓee.’

‘Zang piti ri naa tang m ditɔ

nɛɛ gutu. Zang piti ri kɔɔ ditɔ nɛɛ nkɔ Laa.’ ”

12Zang naa shing zang ɓu ditɔ, wu kɔɔ Laa vuu ɓɔɔ wu palɛ ɓɛɛ.

Mɔɔ shing ɓaazung, wu palɛ vuu shi kpang, kpang

13Ka ruu nɔngkɔ, ruu yaa ruu ɓɔɔ ruu dɔng zɔɔ ɓɛɛ ta. Nɔ́ɔ shing ka yeti manɛ nɛɛ nɔɔ shing ɓaazung ɓɔɔ dũng doo Laa kɔ, wu kpaa doo kpang, wu ti palɛ vuu shi kpang, kpang. 14N ɓɔɔ n shing danggn tɔ nɛɛ bii Kpanti Yeesɔ ɓɛɛ, n zi m tɔ nɛɛ, vuu shaanang ɓɔɔ ɓi shi kpang, ɓi kagn kpang. Naa zang ɓɔɔ nɛɛ tɔɔ vuu keɓe shi kpang, ɓi ti shi kpang ka jĩng ɓiɓɛ. 15Naa mɔɔ lasɛ ɓaazung ɓɔɔ dũng doo Laa kɔ yeti, ka ruu vuu ɓɔɔ mɔɔ shaa ɓɛɛ. Mɔɔ palɛ vuu keɓe ɓi tɔ̀ɔ́ ka ruu ɓɔɔ mɔɔ kasɛ ruu ɓiɓɛ katɔ kpang. Mɔɔ yaa vuu shaanang ɓɔɔ mɔɔ shaayi, wu ningsi zang ɓɔɔ Kirisi vɔ ka ruu ɓiɓɛ kpang. 16Mɔɔ shingnɛ vuu shaanang ɓɔɔ mɔɔ ɓàa nɛɛ tɔ̃ɔ, zang a wu nung shi kpang, kpang. 17Ka ruu ɓɔɔ, vuu ɓɔɔ Laa kasɛ, wukɔ vuu shaanang nɛɛ vuu ɓoonang kpang. Laa kasɛ nɛɛ zang nwang zang tɔ̃ɔ ka tĩng ɓiɓɛ, ti kasɛ nɛɛ zang nwang ka nyaa zɔɔ nɛɛ wu, a zang ti tãa tĩnang ɓɔɔ Suru Laa shingnɛ ɓɛɛ. 18Zang ɓɔɔ nɛɛ palɛ Kirisi shonang naa weɓe, shingnɛ, Laa tãa tĩnang, wu ti shingnɛ, shɔnzang wu kasɛ vuu ɓɔɔ wu palɛ ɓɛɛ.

19Ka ruu nɔngkɔ, diki diki, rúu shing jĩng ka vuu ɓɔɔ shingnɛ zang ri nwang ka nyaa zɔɔ ɓɛɛ. Ruu ti yì zɔɔ naa kagn, ruu shing danggn gbãng gbãng. 20Mɔɔ lasɛ vuu ɓɔɔ Laa palɛ, ka ruu vuu shaanang kpang. Vuu shaanang piti ɓi tɔ̃ɔ. A naa nɔɔ shaa vuu piti ɓɔɔ shing zang ɓɔɔ, wu pálɛ́ vuu shi kpang, nɔɔ palɛ vuu shi kpang tɔ. 21Naa mɔɔ yaa yɔpɔ shaanang, nɛɛ sàa ɓoonang, nɛɛ vuu piti ɓɔɔ mɔɔ palɛ, ɓɔɔ shing ɓaazung ɓɔɔ dũng doo Laa kɔ, wu palɛ vuu shi kpang ɓɛɛ, mɔ̀ɔ palɛ vuu tɔ̃ɔ tɔ. 22Vuu ɓɔɔ mɔɔ shing ka yeti ɓaaɓɛ, ka yuu vuu keɓe ɓi ka teteng ɓaaɓɛ nɛɛ Laa. Tĩnang tãanang ɓi ɓɔ̀ɔ́ zang ɓɔɔ zi tɔ, ka yeti ɓiɓɛ nɛɛ vuu ɓɔɔ wu pálɛ̀ ɓi tɔ̃ɔ ɓɛɛ. 23Naa nɛɛ zì kpang, nɛɛ vuu kɔ wu shaa ɓee, naa wu pálɛ̀ vuu shi kpang ya, naa wu palɛ vuu tɔ̃ɔ ya ɓɛɛ. Naa shaayi, Laa dɔng wu ruu katɔ, nɛɛ wu palɛ vuu shi kpang tɔ. Ka ruu ɓɔɔ palɛ vuu keɓe, ka ruu ɓɔɔ ka doo danggn ɓɔɔ wu shing kpang ɓɛɛ. Vuu piti ɓɔɔ zang palɛ ka doo danggn ɓɔɔ zang shingnɛ, nɛɛ vuu bìí tɔ̃ɔ ɓɛɛ kpang, zang keɓe palɛ vuu shi kpang ɓi tɔ.

Currently Selected:

Rooma 14: mzmNT

Highlight

Copy