Maraku 8

Zang labang dɛ̃ɛti ɓɔɔ Yeesɔ a ri vuu shaanang ɓɛɛ

(Mat 15:32-39)

1Ka diki kaɓa, zang ɓɔɔgn, ri naa kpalɛ zɔɔ ka bii ɓiɓɛ gaagaa, vuu ɓɔɔ ri shaa ɓɛɛ takpang. A Yeesɔ ɓaa nyaa ka zang ɓɔɔ ri mantɛ vuu ka bii ɓiɓɛ, a kɔɔ ri tɔɔ, 2“Zang keɓe gn ɓarɛ kɔng m dɔɔli, ka ruu ɓɔɔ, ri nwang tɔ nɛɛ n daa diki taati, vuu shaanang ɓarɛ takpang ɓɛɛ. 3Naa n jee ri nyaa nɛɛ ri dita gãa, ri shaa vuu ka nyaa kpang, doo daa kaa ri katɔ ka gbalang. Ka ruu ɓɔɔ, zang ɓɔɔ ri álɛ̀ nɛɛ nɔng beebang ɓɛɛ.”

4A ri kasɛ wu nyaa tɔɔ, “A ruu walɛ borodi ka niya ka jĩngti keɓe, ruu a zang keɓe naa ɓɔɔ daa ri katɔ wiya?”

5A hɛ̃ɛ ri tɔɔ, “Borodi manɛ yaa nɛya?” Ri kasɛ wu nyaa tɔɔ, “Yaa manziti.”

6A kɔɔ zang ɓɔɔ ri kpalɛ zɔɔ gaagaa, nɛɛ ri nwálɛ́ ta tipi. A see borodi manziti kaɓa, a zãa Kpanti Laa, a shalɛ, a zang ɓɔɔ ri mantɛ vuu ka bii ɓiɓɛ, nɛɛ ri alɛ zang ɓɔɔ ri kpalɛ zɔɔ ɓɛɛ ta. A zang ɓɔɔ ri mantɛ vuu ka bii ɓiɓɛ, ri alɛ zang kati. 7A jaazĩi seseere ti yaa doogn ka naa zang ɓɔɔ ri mantɛ vuu ka bii Yeesɔ tɔkɔlɔng. A Yeesɔ ti zãa Kpanti Laa ka ruu jaazĩi kaɓa, a kɔɔ zang ɓɔɔ ri mantɛ vuu ka bii ɓiɓɛ, nɛɛ ri alɛ zang ta kɔ doori. 8Zang keɓe piti, ri shaa vuu shaanang, buru ɓarɛ yirɛ, a zang ɓɔɔ ri mantɛ vuu ka bii Yeesɔ, ri kpalɛ ɓɔɔ zang yaarɛ knti, saang manziti. 9Zang ɓɔɔ ri shaa vuu shaanang kaɓa, ri labang dɛ̃ɛti. 10A jee ri nyaa kati, a vang tonsi kaa nɛɛ zang ɓɔɔ ri mantɛ vuu ka bii ɓiɓɛ tantɛnang daa ka tipi Damanuta.

Zang Farisi gãsɛ Yeesɔ

(Mat 16:1-4)

11A zang Farisi ri arɛ, ri gaa tɔɔsung nyaa laanang nɛɛ Yeesɔ. Ri kasɛ nɛɛ ri gãsɛ wu katɔ, ka ruu nɔngkɔ, ri kɔɔ wu nɛɛ, wu palɛ vuu ɓɔɔ zang zirɛ, zang mã naa ka danggn, nɛɛ tɔ̀ɔ, ri zi kati nɛɛ Yeesɔ a ɓi nɛɛ bii Laa. 12A Yeesɔ shu gn, a kɔɔ ri tɔɔ, “Zang koo jaa knti keɓe, nɔɔ kasɛ n tusu nɔɔ vuu ɓɔɔ zang zirɛ, zang mã naa ka danggn, ka ruu viya? N kɔɔ nɔɔ ruu ɓɔɔ niizang kɔ nwani, n tusu nɔɔ kpang.”

13A yáa ri ka nɔngkɔ, vang tonsi tɔkn, ta mii waapo daa ka nyaa gãnggãng dang.

Yisi zang Farisi nɛɛ ɓɔɔ Hiridu

(Mat 16:5-12)

14Danggn ning zang ɓɔɔ ri mantɛ vuu ka bii Yeesɔ katɔ, ri tuu borodi ka naa kpang, ɓi ɓɔɔ yaa ka yeti tonsi gbete ɓɛɛ kɔ shɛ̃ɛning. 15Ri daa kana, a Yeesɔ gaa tɔɔsung ɓɔɔ wu shaarɛ ri nyaa ɓɛɛ kati, kɔɔ ri tɔɔ, “Nɔɔ shing danggn kagn, nɔɔ gãng jĩng ka yisi ɓɔɔ zang Farisi nɛɛ ɓɔɔ Hiridu ning.”

16Zang ɓɔɔ ri mantɛ vuu ka bii Yeesɔ ri gaa tɔɔsung yee rangkɛnang kaa naa ɓarɛ. Ri tɔɔ, “Yeesɔ rang ruu yee keɓe, ka ruu ɓɔɔ, borodi ka naa ɓuru kpang ɓɛɛ.”

17Yeesɔ ti zi ruu ɓɔɔ ri kɔɔrɔ ka naa ɓarɛ ɓii tɔ, a hɛ̃ɛ ri tɔɔ, “Nɔɔ kɔɔrɔ ɓu ka ruu vi, nɛɛ borodi ka naa manɛ kpang viya?” Nɔɔ zi ɓu gn kpang ya? Nɔɔ zi dĩiri vuu ɓɔɔ n tusu nɔɔ kpang ya? 18Jĩng manɛ kagn, nɔɔ zi nɔng kpang ya? Shoo manɛ kagn, nɔɔ tãa nɔng kpang ya? Nɔɔ kpaa danggn, 19ka diki ɓɔɔ n á zang labang maani borodi maani kpang ya? Nɔɔ kpalɛ ɓɔɔ zang yaarɛ knti, saang nɛya? A ri kasɛ nyaa tɔɔ, “saang kopi tu ziti.”

20A borodi manziti ɓɔɔ n á zang labang dɛ̃ɛti, nɔɔ kpalɛ ɓɔɔ zang yaarɛ saang nɛya? Ri ti kasɛ wu nyaa tɔɔ, “Saang manziti.”

21A ti naa hɛ̃ɛ ri tɔkn tɔɔ, “Nɔɔ zi ɓu gn kpang ya?”

Yeesɔ masɛ zang jĩng ringtang ka Bɛsɛda

22Ri naa a ka Bɛsɛda. Zang atɛ wu zang ɓɔɔ jĩng ringtang, a zang gaa wu, nɛɛ wu lee wu naa ka bii, tɔɔ wu masɛ wu kati. 23A Yeesɔ yi zang jĩng ringtang ka naa, daa nɛɛ wu ka knti gari. A Yeesɔ tu sisãa ka jĩng ɓiɓɛ, a lee naa ka jĩng ɓiɓɛ, a hɛ̃ɛ wu tɔɔ, “Mɔɔ zi vuu ɓɔɔ kana ya?”

24A zang jĩng ringtang kaɓa tuu jĩng, a kasɛ Yeesɔ nyaa tɔɔ, “N zi zang ri rakɛ kana, ri nwang kaa naa laa.”

25A Yeesɔ lee naa kaa tɔkn jĩng yɔɔ, jĩng ɓiɓɛ ɓele kati, a zi vuu piti kaa tɔ̃ɔ tɔ̃ɔ. 26A Yeesɔ kɔɔ wu kati, nɛɛ wu dita gãa. A shaarɛ wu nyaa tɔɔ, mɔɔ daa yeti gari takpang.

Nyaa ɓɔɔ Bituru kasɛ Yeesɔ ɓɛɛ

(Mat 16:13-20; Luk 9:18-21)

27A Yeesɔ ti yi gbalang daanang ɓi kaa nɛɛ zang ɓɔɔ ri mantɛ vuu ka bii ɓiɓɛ. Ri daarɛ ka rɛɛ gari ɓɔɔ ka tipi Kayisariya Filipi ɓɛɛ. Ri daa kana, a Yeesɔ hɛ̃ɛ zang ɓɔɔ ri mantɛ vuu ka bii ɓiɓɛ, tɔɔ, “Zang kɔɔ nɛɛ N ɓu wiya?”

28A ri kasɛ Yeesɔ nyaa tɔɔ, “Zang ɓɔɔ ri kɔɔ ɓarɛ nɛɛ mɔɔ ɓaa Yɔhana ɓɔɔ palɛ zang batizima ɓɛɛ. Zang ɓɔɔ ri ti kɔɔ ɓarɛ nɛɛ mɔɔ ɓaa Iliya. A zang ɓɔɔ ri kɔɔ ɓarɛ nɛɛ, mɔɔ ɓaa zang nyaa shonang Laa ɓɔɔ gbete ɓɛɛ.”

29A Yeesɔ hɛ̃ɛ ri tɔɔ, “A nɔɔ kɔɔ manɛ nkɔ wiya?” Bituru kasɛ wu nyaa tɔɔ, “Mɔkɔ Kirisi.”

30A Yeesɔ shaarɛ ri nyaa tɔɔ ri kɔɔ zang ɓɔɔ nɛɛ wukɔ Kirisi kpang.

Yeesɔ kɔɔ ri naa ɓɔɔ wu naa vɔ ɓɛɛ

(Mat 16:21-28; Luk 9:22-27)

31Yeesɔ gaa ri tɔɔsung vuu tusunang tɔɔ, “Ɓɔɔ n Jaa shɔnzang n naa dang jĩng ditɔ dɔɔli. Zang bang zang Yahudi, nɛɛ zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri naa bɛ̃ɛ m ditɔ. Zang naa nyɔ m vɔrɔ, Laa naa wisi m paa ka lee ɓɔɔ diki daa taati ɓɛɛ.” 32Kɔɔ ri ruu keɓe nɛɛ nyaa vuu jeenang kpang, kɔɔ ri waati, naa ɓɔɔ ri zi katɔ ɓɛɛ. Ka ruu nɔngkɔ, Bituru gɔ̃ɔ wu dang gbete, a mangkɛ wu. 33Ɓɔɔ Yeesɔ raa jĩng zi rɛɛ zang ɓɔɔ ri mantɛ vuu doo ka bii ɓiɓɛ kɔ ɓɛɛ, a mangkɛ Bituru tɔɔ, “Dita kaɓa sheetang. Mɔɔ rɛ̃rɛ ɓaa vuu ɓɔɔ Laa kasɛ kpang, mɔɔ rɛ̃rɛ ɓaa vuu ɓɔɔ, shɔnzang kasɛ ɓɛɛ.”

34A Yeesɔ ɓaa nyaa ka zang ɓɔɔ ri kpalɛ zɔɔ, nɛɛ zang ɓɔɔ ri mantɛ vuu ka bii ɓiɓɛ, a kɔɔ ri tɔɔ, “Zang piti ɓɔɔ nɛɛ tɔɔ wu dũng m, wu yaa yuu ɓiɓɛ kasɛnang ta, wu ta jĩng dannang ɓɔɔ a ka ruu nung mɛɛ ɓɛɛ. Wu tuu laa ɓiɓɛ ɓɔɔ zang naa ɓaa wu naa kagn ɓɛɛ, wu dũng m. 35Ka ruu ɓɔɔ, zang ɓɔɔ kasɛ nɛɛ wu ta yuu ɓiɓɛ, naa loo ɓi katɔ kɔ jong ɓɛɛ. A Zang ɓɔɔ loo yuu ɓiɓɛ ka ruu mɛɛ, nɛɛ ka ruu, Ruu Tɔ̃ɔ Laa, wukɔ naa ta yuu ɓiɓɛ ɓi jong. 36Naa shɔnzang wàlɛ̀ vuu ɓɔɔ ka koo keɓe nandon, a loo suru bii ɓiɓɛ, vuu ɓɔ̀ɔ́ koo keɓe nwáng wu ɓu viya? 37Vuu ɓɔɔ shɔnzang kɔ̃sɔ suru bii ɓiɓɛ nɔng kagn ya? 38Shɔnzang piti ɓɔɔ yusɛ̃ɛ mɛɛ nɛɛ ɓɔɔ Ruu mɛɛ, nɛɛ tuuru wu ka tĩng zang shi kpang kɔ ri palɛ vuu shi kpang ɓee. Jaa Shɔnzang naa tuuru yusɛ̃ɛ ɓiɓɛ doo nɔngkɔ, ka diki ɓɔɔ wu naa a nɛɛ bannang ɓɔɔ Daa ɓiɓɛ a wu ɓɛɛ. Ti naa a nɛɛ rɛɛ zang nyaa shonang Laa ɓɔɔ ka lapa ning ɓɛɛ.”

Currently Selected:

Maraku 8: mzmNT

Highlight

Copy