Maraku 7

Zang ɓɔɔ ri dɔ̀ɔ́ Laa nɛɛ nyaa waati ɓɛɛ

(Mat 15:1-9)

1Zang Farisi nɛɛ zang ɓɔɔ ri tusu zang vuu, ri a nɛɛ Urushalima, ri naa kiiri Yeesɔ nyaa ka teteng. 2A ri zi zang ɓɔɔ ka teteng zang ɓɔɔ ri mantɛ vuu ka bii Yeesɔ, ri shaa vuu shaanang, ri sɔɔ naa ɓarɛ naa ɓɔɔ zang tĩng ri tusu ɓɛɛ kpang.

3(Zang Farisi nɛɛ zang Yahudi nandon, ri sɔɔ naa katɔ gbongkarɛ naa ɓɔɔ daa ɓarɛ túsú, tɔɔ ri shaa vuu shaanang kati. 4Ri nɛɛ gbãayu tɔ nɛɛ lumang, ri shaa vuu shaanang kpang, ri wili bii ɓarɛ ka gbongkarɛ naa ɓɔɔ daa ɓarɛ tùsù ri ɓɛɛ. Ri ti palɛ vuu ɓɔɔgn ɓɔɔ daa ɓarɛ tusu ri dɔɔli. Vuu ɓɔɔ naa rɛɛ waka nɛɛ ɓari nɛɛ gbanti sɔɔnang ɓɛɛ.)

5A zang Farisi nɛɛ zang ɓɔɔ ri tusu zang vuu kaɓa, ri hɛ̃ɛ Yeesɔ tɔɔ, “Zang ɓɔɔ ri mantɛ vuu ka bii ɓaaɓɛ, ri pálɛ̀ vuu ɓarɛ naa ɓɔɔ daa ɓuru tusu kpang ka ruu viya? Ri shaa vuu shaanang, ri sɔɔ naa ɓarɛ naa ɓɔɔ daa ɓuru tusu ruu kpang ka ruu viya?”

6A kasɛ ri nyaa tɔɔ, “Ruu ɓɔɔ Ishaya zang nyaa shonang kɔɔ ka yuu manɛ, nɔɔ zang ɓɔɔ nwãarɛ zang nɛɛ vuu ɓɔɔ nɔɔ palɛ, niizang kɔ nwani. Laa kɔɔ nɛɛ nyaa Ishaya tɔɔ,

“ ‘Zang keɓe ri dɔɔ m ka nyaa lapa waati,

yeti ɓarɛ ɓi ka bii mɛɛ kpang.

7Ri dɔɔ m ɓarɛ waati.

Ri tusu zang nyaa ɓɔɔ shɔnzang dangnɛ

kaa naa wukɔ Ruu Laa jong.’

8“Nɔɔ yaa nyaa ɓɔɔ Laa dangnɛ, nɔɔ dṹng nyaa ɓɔɔ shɔnzang dang ɓɛɛ.”

9A ti kɔɔ ri tɔkn tɔɔ, “Nɔɔ zunung ɓɔɔ nɔɔ ɓa nyaa ɓɔɔ Laa dangnɛ, nɔɔ dũng ɓɔɔ daa manɛ dang ɓɛɛ dɔɔli. 10Musa kɔɔyi tɔɔ, ‘Zang wu shing jĩng ka diiɓɛ nɛɛ niiɓɛ’ nɛɛ ‘Zang ɓɔɔ nɛɛ rang yee shi kpang ka yuu diiɓɛ nɛɛ niiɓɛ, zang wu nyɔ wu vɔrɔ ka tipi tang.’ 11Nɔɔ kɔɔ manɛ tɔɔ, ‘Zang nɛ̀ɛ́ kɔɔ diiɓɛ nɛɛ niiɓɛ nɛɛ, ń a Kpanti Laa vuu ɓɔɔ n nɛ̀ɛ́ á nɔɔ tɔ nandon. Vuu ɓɔ̀ɔ́gn kpang,’ 12nɔɔ yàa zang gbalang tɔ nɛɛ zang wu shing jĩng tɔ̀ɔ́ ka daa zang nɛɛ naa zang kpang.” 13Ka ruu nɔngkɔ, nɔɔ shing Ruu Laa nwang tɔ vuu ɓɔɔ kpang, ka ruu ɓɔɔ, nɔɔ tusu zang vuu ɓɔɔ dáa manɛ tusu ɓɛɛ. Vuu ɓɔɔ nɔɔ palɛ naa weɓe ti kagn dɔɔli. Nɔɔ tusu zang wu Ruu Laa kpang.

Vuu ɓɔɔ lasɛ shɔnzang ɓɛɛ

(Mat 15:10-20)

14A Yeesɔ ɓaa nyaa ka zang ɓasi ri kpalɛ zɔɔ ka bii ɓiɓɛ tɔkn, a kɔɔ ri tɔɔ “Nɔɔ ɓaa shoo ta nandon nɔɔ tãayi, nɔɔ ti zi vuu ɓɔɔ kagn ɓɛɛ. 15Vuu ɓɔɔ daa ka yeti shɔnzang, ɓɔɔ raa shɔnzang wu nwang zang shi kpang ka tĩng Laa ɓi kagn kpang. Ɓi vuu ɓɔɔ nwang nɛɛ nyaa shɔnzang kɔ shing zang, zang nwang zang shi kpang ka tĩng Laa. 16[Zang ɓɔɔ shoo ɓiɓɛ nɛɛ kagn, wu tãayi.]”

17A Yeesɔ naa yaa zang ka biling daa ka yeti gãa. A zang ɓɔɔ ri mantɛ vuu ka bii ɓiɓɛ, ri naa hɛ̃ɛ wu nɛɛ wu kɔɔ ri dĩiri yee ɓɔɔ wu rang ɓɛɛ ta. 18Yeesɔ hɛ̃ɛ ri tɔɔ, “Nɔɔ zi kpang kɔ doori ya? Nɔɔ zi kpang nɛɛ vuu piti ɓɔɔ daa ka buru shɔnzang, ràa zang, zang nwang zang shi kpang ka tĩng Laa kpang, kpang ya? 19Ka ruu ɓɔɔ, daa ɓi ka ɓoro ɓiɓɛ kpang, daa ɓi ka buru ɓiɓɛ kɔ jong, wu naa nwang kaa nɛɛ dii.” (Yeesɔ kɔɔ naa weɓe, nɛɛ tɔ̀ɔ, zang wu zi kati nɛɛ vuu shaanang ɓi tɔ̃ɔ kɔ nandon.)

20A ti kɔɔ tɔkn tɔɔ, “Vuu ɓɔɔ nwang nɛɛ nyaa shɔnzang, wukɔ shing zang, zang nwang zang shi kpang ka tĩng Laa. 21Ka ruu ɓɔɔ vuu naa, rɛɛ rɛ̃rɛnang vuu shi kpang, rooronang nɛɛ jaa soro ɓɔɔ zang gee ka takpang, shɔngɓɔ ɓɔɔnang, shɔnzang nyɔnang vɔrɔ, rooronang nɛɛ soro zang ɓɔɔgn, 22kasɛnang vuu ɓɔɔ wu ɓɔ̀ɔ́ zang kpang nɛɛ gɔ̃ɔ kãanang, nɛɛ zang nwãarɛnang, nɛɛ vuu yusɛ̃ɛ palɛnang, nɛɛ sũnyaa kaanang, nɛɛ yee shi kpang rannang ka yuu zang, nɛɛ yuu tuunang, nɛɛ vuu ɓɔɔ zang palɛ naa shoko, nwáng ɓi nɛɛ yeti shɔnzang. 23Vuu shi kpang keɓe, a ɓi nɛɛ yeti shɔnzang kɔ nandon. Rikɔ shing zang, zang nwang zang shi kpang ka tĩng Laa.”

Jaa soro ɓɔɔ shing danggn ka bii Yeesɔ ɓɛɛ

(Mat 15:21-28)

24A Yeesɔ naa seepaa nɛɛ nɔng kaɓa, daa ka tipi Taya nɛɛ tipi Sidong. A daa hãa nyaa ka yeti gãa, kasɛ nɛɛ zang ɓɔɔ wu zi nɛɛ wu ka nɔngkɔ kpang. Zang ti naa zi ɓiri, nɛɛ wu kagn nɔngkɔ. 25A jaa soro ɓɔɔ suru shi kpang ka bii jaa ɓiɓɛ ɓɔɔ soro, naa tãa nyaa nɔng ɓɔɔ Yeesɔ kagn ɓɛɛ, a tantɛ anang naa tang nɛɛ gutu ka tĩng ɓiɓɛ. 26Jaa soro keɓe ɓi zang Heleni. Zang yi wu ɓi ka tipi Fonishiya ɓɔɔ ka tipi Siriya ɓɛɛ. A gaa Yeesɔ nɛɛ wu nwángsɛ̀ wu suru shi kpang ɓɔɔ ka bii jaa ɓiɓɛ jong. 27A Yeesɔ kasɛ wu nyaa tɔɔ, “Rúu a wujɛ kɔ vuu shaanang shɔɔnang, ka ruu ɓɔɔ, daa naa ɓɔɔ zang tuu vuu shaanang wujɛ zang tasɛ zaa kpang.”

28A jaa soro kasɛ wu nyaa tɔɔ, “N zi tɔ nɔngkɔ niizang, zaa ɓɔɔ ka dii teeburu, ri yakɛ kɔkɔlɔ borodi ɓɔɔ shili nɛɛ naa wujɛ ɓɛɛ katɔ.”

29A Yeesɔ kɔɔ wu tɔɔ “Mɔɔ kasɛ nyaa tɔ̃ɔ, ka ruu nyaa ɓɔɔ mɔɔ kasɛ m naa weɓe ɓɛɛ, gbãayu ta mɔɔ daa gãa, suru shi kpang yàa jaa ɓaaɓɛ bii tɔ.”

30A jaa soro gbãayu daa ĩi jaa ɓiɓɛ roo tɔ ka latãng, suru shi kpang nwang tɔ yaa wu bii tɔ.

Yeesɔ masɛ zang ɓɔɔ shoo nɔɔ katɔ ɓɛɛ

31A Yeesɔ yaa tipi Taya, nɛɛ wu daa kaa nyaa waapo Galili a sɔɔ kaa nɛɛ tipi Sidong nɛɛ tipi Dekapoli (rɛɛ gari kopi). 32A zang atɛ wu zang shoo nɔɔ katɔ, a ti ráng nyaa rũntung. A ri gaa Yeesɔ nɛɛ wu shing wu naa ka bii, tɔ̀ɔ, wu masɛ wu kati. 33A Yeesɔ naa gɔ̃ɔ wu ka bm dang gbete, a hãlɛ saa naa ka shoo yɔɔ, a tu sisãa, a lee rĩiti yɔɔ nɛɛ mani. 34A Yeesɔ tuu jĩng ka lapa a shu gn, a kɔɔ yɔɔ tɔɔ “Efata,” (Dĩiri ruu keɓe ɓi, “Lu ta.”)

35Yeesɔ kɔɔ tɔ naa weɓe, a shoo yɔɔ luku kati. Rĩiti ɓiɓɛ ti ɓele, a gaa tɔɔsung yee rannang tɔ̃ɔ kati. 36A Yeesɔ shaarɛ zang ɓɔɔ ri kpalɛ zɔɔ nyaa nɛɛ, ri daa kɔɔ zang ɓɔɔ kpang. Yeesɔ nɛɛ, shaarɛ ri nyaa tɔɔ nɛɛ ri daa kɔɔ zang ɓɔɔ kpang, ri ti daa kɔɔrɔ zang ɓarɛ kaa gbãng gbãng kɔ jong. 37Zang piti ɓɔɔ ri tãa ruu kaɓa, ri mã naa ka danggn. Ri tɔɔ, “Vuu ɓɔɔ yɔɔ keɓe palɛ ɓi tɔ̃ɔ kɔ nandon. Pálɛ̀ zang ɓɔɔ shoo nɔɔ katɔ wu tãa nɔng. A zang ɓɔɔ nyaa nɔɔ katɔ ti rang yee.”

Currently Selected:

Maraku 7: mzmNT

Highlight

Copy